Mazmur 89:16 - Eipomek

¹⁶ Yata ninye do, nirya ara, kanye teniltona kum diparyuk, pin-pin kanye bobuka, Allah an siuk erenamkiak ninye ara, ance pia telebuk kilinamlyame. Allah Yahweh ance, an weik dirin ning ara, sik aninye nong deice deliminyeba, adirin deice arye, an dam anyuk yanganamake.

Mazmur 89:16 Referans Kwoze

Pilipi 4:4

Yesus ap, talima dukdongobuka, kanye deibukauk unamlulume. Anyapmasin touk ila tamubuka tonap, nyapnusine. Yesus ap, talima dukdongobuka, kanye deipdanuka unamlulume. Neika unamlum talak nirya ara, kanye deibuka unamlulume.

Pilipi 3:9

Musa seklamuk yupu talibuka dobolbanirye, diksukum unya deice ara, Allah arye, ‘Anye bira telebnye ulule,’ kum tenenamnile. Aning kum bukni, pia patapnil ning ara, narye, Kristus ati diba tenenun deice aryuk, Allah arye, “Elda telebnye,” nyabuka deipnamnile. Aning ara, akunuma. Yuk winin ning deice arye, teleb kum kipdeipnamnile. Kristus ati, dib tenebibya deice aryuk, Allah arye, talye arena atonun, ‘Aning ara, diksukum teleb nang unyake,’ tenepsilirye, teleb kipdeipnamsile.

2 Korintus 5:21

Ara, Allah arye nun lyena ap, yok pununa ap ati, malye winin ning tonok ning babye kum ulamukce, pia diksukum ululnye Yesus ara, Allah arye dobuka, tukwak ninye nun malye winin ning nirya el nong deice deibukba, nun malye ning nirya dobuka kum kipdeipsuke. Ara, nun malye winin ning pununa ati, winipsuke. Winibuka deiyok ara ani. Allah arye utenyamuk, ‘Tukwak ninye nirya, malye winin nang unyak bukni, nara Allah pia diksukum unye touk, Kristus ap aninye ap talima dukdongopniba, Kristus deice arye, aninye diksukum kipdeipnamne,’ tenebukce, Allah arye apil dopsuke. Na Paulus arye nyapsine.

Lukas 1:47

Tonda, na kanye talima arye, na Lyena Deiyoknye Allah arye lyepmanila ati, na kanye pia deipne.

Mazmur 89:12

Im deice ap, im deice ulul ning nirya ap, tukwak ap, tukwak mutuku noutamak ulul ning nirya ap ara, ancuk kwepdeipluma ati ara, an bidamnye aryuk, aning ayala-ayala nirya, talibuka ulyame. Ara, an ninguk ulule. Tonda, tukwak mutuku ap, tukwak mutuku noutamak ulul ning nirya ap, tonda tukwak noutamak unyak ninye nirya ap ara, ancuk kwepdeipluma ati, tuba talilyame.

Mazmur 29:7

Allah Yahweh, el yupu ara, pia minopce nyalule. Winipmanto ara, bebeya talye karin arye, laklamle touk ulule. Tonda, weik uku buk dilamlirye, dirina weik ulamle touk, Allah el yupu babye, minopce nyapliba, mutuku sirya, im sirya nirya, daunyak nang arye kekenyake.

Mazmur 40:10

Na ni Allah Yahweh, an kele. Ance, ‘Diksukum winin ning ara ani,’ nyabuka laka nyapdeipnulum yupu nirya ara, tonok ning babye duknubuka, kum batakanune. Ninye nirya arye, an si eren ati, bulubuka wekenyak aik pum tam arye, ance nyasiminye yupu nirya, lakoprop kibuka laka nyanune. Ninye nirya wekenyak sukum laka nyanune. Tonok ning babye, kum batakanune.

Roma 1:17

Anyapmasin yupu ara talye ati kume. Deiyok ara, minop talak Allah yupu deice arye, ayupu ton sekamik. ‘Allah arye el diksukumuk ulul touk, elce diksukum kililul ninye ara, sik dib tenenyak deice aryuk, kam pia unamake.’ (Habakuk 2:4) Habakuk arye ayupu sekuka deiamuk touk, Allah arye diksukum una deiyok ning, kintinipsuk ara, el laka teleb yupu, ninye lyena yupu noutamak arye, lakak nyasulule. Adiksukum una deiyok ning arisulul ning ara, deiyok kouna talak arye dipdongobuka, doryanamle talak nirya ara, dib tenenyap deice arye arisulule.

Yesaya 46:13

Narye, anggun ikin kanye bobuka umunye noutam arye lopdeipsinirye, anggun lyen talak ara, dam kipdeipnamsine. Anggun lyepnamsin talak ara, ‘Aminyan dotalak uk yanamle do?’ kum tenenamlulume. Ara, dipkoprob dam uple ati nyapsine. Anggun lyena ati yanyopura, yatanye birye ton, ‘Aning ara kum winiptue,’ tenen, yupu seknutu do? Ara, pia kum winipmantoe. Na Allah arye Yerusalem mutuku umunye ninye nirya ati, dipkoprob lyepnamsine. Tonda, nara pia teleb unye touk, Israel ninye ati, teleb kipdeipnamsine. Winipnirye, yupu laka kipdeipniba, yuk mutuku ninye arye, Israel ninye ati, ‘Se sikda mambul weik ninye,’ nyabuka si erenamsiake.” Allah Yahweh arye nyabuk.

Mazmur 105:3

Allah el nong ara, pia telebnye ulule. Ati, nunda, el ‘Naʼ tenen, nang unyap anya arye, nunda kil-kil kanye bobuka, unamabe. Anye atonun, yata ninye do nirya, Allah ati si erenyak nang nirya ara, kanye deibuka, pin-pin asa arye unamake.

Mazmur 44:8

Aning nirya kum bukni, na kele, “Allah ancuk, nun mal olan nang ara, akunum obuka, malye kilyama ati, akunum lyepropsulume. Diba, nunti, ‘Anang ara, nun pia lik,’ tenesinyak nang ati ara, an Allah aryuk, kanye walwalamak ning arepminyeura, anang sik kanye sirika bona kumce, ilil uplyeba, nun dam ara batakuka, dana-dana tamuk, bikbik abuka banyake.

Mazmur 33:21

Diba Allah ap, nun ap, kanye talima dukdongobuka unyaba deice arye, pin-pin asa deiceuk unamabe. Ara, talye ati kume. Nun ni Allah, elda malye ning tonok ning babye, kum winilirye, el si ara, pia mambul weik winilule. ‘Elcuk melibuka lyelonamsil’ tenen, el tibuk, diba tenebibirye, el talibuka unyabe. “Allah elda dipkopropnye winilule,” nyabuka, el siuk erenamabe.

Mazmur 29:5

Allah Yahweh arye, weik yupu nyaplyopura, cang weik yo pabuka tiklamle touk, tikilule. Ara, Libanon mutuku noutam tiklamuk kat yo, el si ara cemara yo tobuka, tukwak saklirye, bongolule.

Yeremia 23:6

Narye wibuka deipnamne Diksukum Una Deiyoknye birye, amutuku talinamle talak ara, Yehuda yala ninye nirya lyepnamle. Tonda, Israel ninye ayala-yala nirya ara, ‘Nun oldan nang arye olyanamsiyak do?’ tenena pia kum diparyuk, talye kanye bobuka, kanye deibikirye, teleb ubuka neika unamake. Ilil una ap, oldana ap, kum unamake. Ninye deiyok kipnamlanye biti ara, nyanamaka ara, ani. Ara, ‘Allah Yahweh ara, nun Diksukum Ulisulul Deiyoknye ulule,’ nyanamake.” Allah arye nyabuk.

Imamat 25:8

Nuknin balamunya ani, like tekbarye tujuh kali keting tamun ton nukmunyopura, minggu tekbarye atonun bukni, ‘Keting tamun tekbarye akunum kipleʼ tenen, nuklenamlulume. Anuklamunya aketing tamun nirya upnin balamlya ani, yupa weik empat puluh sembilan (49) tahun upnamle. Keting tamun 49 akunum uplyopura, ‘Akunumaʼ, keting tamun lima puluh (50) ning ara, el si ara, Yobel keting tamun, ‘Allah el mambul weik keting tamun akunum yanmasile,’ tenenamlume.

Imamat 25:9

Tonda, keting tamun 49 ning akunum uplyeba, wala tekbarye nukmamunya ani, tekbarye wala akunum uplye talak ara, awala noutam bukni, tanggal sepuluh (10) uplyopura, asum ara, weik lelim nyan ning, el si terompet arye, lelim weik arye nyanamle. Deiyok ara, aketing tamun ara, lima puluh (50) keting tamun, el si ara, Yobel keting tamun, akunum upmalya ati, ninye malye ulamice ning, Allah arye kilipsilirye, teleb kipdeipnamsile. ‘Tamubuka tonap, teleb kilinamsil sum ara, ani,’ tenenamlulume. Ati ara, keting tamun lima puluh (50) yalyopura, mutuku-mutuku nirya daunyak nang ap, mutuku-mutuku yuk-yuk talibuka, daunyak nang ap, sik kekena ati lelim nyan ning, el si ara terompet arye lelim nyapnin banamlulume.

Yesaya 2:5

Ati, se, Yakub birye deibukba, dadeipdanin yangalamlum ninye nirya ara, yamunba, nun nirya Allah el dirin deiceuk, talibuka unamabe.