Aning atonun, keting dirin ap, wala dirin ap, ‘Adirina lapsutuba eiptibye’ tenen, patalyeba, pia kum tenenyake. Allah el bidamang dirina ara, pia weik ulula ati ara, im deice unamak ninye ara, yuk dirin ning ton kum patalule. Tonda, Domba Mi Atonye birye, el bidamang dirin weik ululba, anyasik noutamak weik dirin atonun unamla ati ara, keting ap, wala ap ara, winiryuk im deice mutuku kum ulule.
Mazmur 80:1 - Eipomek1 Mot wibuka sena deiyoknye, Asaf birye kita oulamle ning, el si ara, Bunga Bakung deice libuka nyanmok. Gade chapit la |
Mazmur 80:1
37 Referans Kwoze
Atalak ara, ance lyepropsulumce, weik laut mekwen noutam arye, teleb bisik kintinip deipsulume. Diba, weik laut mekwen mikip noutam ara, ance nun teleb bisik, tukwak yapdeipsulumce, bobisulume. Bukni, an yupu deice arye, tuku mikdeiplum deice yanibuka binamupu sukumak ara, laka kum ati, ninye arye kum elilamik.
Allah Yahweh arye aning-aning nirya talibuka, weik deiyoknye ulule. Ati ara, ninye tukwak mutuku noutam unyak yala nang nirya ara, ilil upliba, sik nong nirya sirim talinauk unamle. Malaikat sik si ara, Kerub unyaka deice tam ara, Allah bukukce, aning-aning nirya talibuka, weik deiyoknye ulule. Allah el mikip weiknye ulula ati, tukwak mutuku im sirya, mutuku sirya nirya lulukuna uk unamle.
Minop talak ara, anggun nirya domba teleb bisik batakuka, malye bisik kwekdanin balamak touk ulalum bukni, wini talak ara, sik domba weilamak Deiyoknye damuk tamubuka yangalamak touk, akunum yanuka ululume. Ara, anggun kanye talima ap, kanye ap, melipsilirye, ‘Malye ubicak’ tenen, dilesilya Deiyoknye dam, akunum yanuka ululuma ati nyapsine.
Aning nirya winipnamne talak ara, narye ninye deiyoknye Raja tonokuk, ‘Sik aninye nirya taliplirye, yupu nyanamleʼ tenen, na amu tam pil teleb kibuka dolulnye, el si Daud, domba deiyoknye atouk kipnirye, elti wibuka, sik dam deipnyopura, elcuk, ‘Naʼ tenen, nang, Israel yala nang talibuka, Raja kiplirye, yupu nyapnamle. Domba basam weina deiyoknye telebuk ulamle touk, Daud babye, ‘Naʼ tenen, nang, Israel yala nang nirya taliplirye, sik din ning teleb ninguk arepnamle. Areplirye, ‘Adomba telebuk unamakʼ tenen, anang ati, teleb kibuka kalikinamlule. Elti wipdeipyeba, Raja Daud, elcuk, na domba basam atonun nang nirya ara, ninye deiyok kiplirye, teleb kibuka weinamle.
Daud ap, Daud birye wipdeipmok yin talin nang ap, Allah arye nyapdeiamuk yupu sekuka, marikna pum bisik deiamik ning bolbana ati, Yehuda tam noutam bukni, mutuku si Bala mutuku batakuka biyik. Ara, nun ni Allah, el si Yahweh. Elda aning-aning deice tam ulirye, pia mikip weiknye ulule. Amarikna ara, Allah el si Yahweh, el ‘Naʼ tenen marikna nyanyabe. Amarikna deice bukni, im deice pil don nang, malaikat urasin atonun ning puturubuka, dana-dana memebuka deibik ning noutam ara, Allah el mikip ap, el dirina ap, arepliba yangalule.
Nyabikce, sik aninye nirya arye, “Allah Yahweh el nyalilamuk yupu donokupu marikna, el si ara Peti Perjanjian, Silo mutuku dolbilulume,” nyabuka, ninye ton wipdeibik. “Allah Yahweh elda, aning-aning nirya talibuka, mikip weik deice erebuka ululnye birye, amambul marikna deice tam bulul sukum dana-dana tam ara, Kerub bitinye tenerurake. Ara, ninye deiyok nang arye, weik buna ning deice bukikirye, ‘Winiplulume,’ nyabuka nyalamak touk winilule. Tonda, Allah el nyalilamuk yupu deibik marikna dam ara, Eli el mapu bitinye Hofni ap, Pineas ap ara, ayok marikna dam anyuk kalikidurake,” nyabik.
Allah arye, ‘Ninye nirya, olana kum arye, teleb kanye bobuka, yuk ninye ap, neika teleb unamak’ tenen, teleb una ati deiyok ning arisululnye ulula anya arye, elcuk melisilyeba, yuk ninye ap teleb ubuka neika unamabe. Allah arye, “Na ap, ninye ap, teleb ubuka neika unamabe,” nyabuka nyalilamsuk yupu, ninye lyena yupu ara, Yesus el ining biyuka deice arye, sirya dakuka ansinipdeipsuke. Yesus obikba dibuk bukni, Allah arye Yesus tamubuka kam bukdeibukba, Yesus ara, kam tuba ulule. Allah arye nun lyena ati, nyalilamsuk yupu ara, kume kum danamle. Aning ara, pia aunamle. Winipmanto ara, sik domba weina deiyok nang arye, sik domba ati, teleb-teleb kibuka weilamak touk, Yesus arye nun diba tenenyap ninye ati, pia teleb kibuka melibuka kalikisulule.
Winipmok talak ara, Allah el weik dirina til weik dang-dang alamle ning ara, kisikdakuka, yukak binmok. Ara, minop talak, Pia Teleb Lek Aik pum tam, Peti Perjanjian deiamik deice tam, Kerub urasin atonun ning, bitinye puturubuka deibik ning deice arye, Allah el dirina uamukak ara, kisikdakuka, Allah el si eren aik bai tam wekelbana ati, bisik bublan botopdeiamikak, asukum binuka tikuk. Winibukopura, adua ara, Allah el si eren aik pum tam nirya langdibuk. Tonda, anyaik bai tam bukni, anyaik dam ara, Allah el teleb una ap, mikip ap, lak kilin ning, el weik dirina ara, weik ubukba, anyaik dam nirya ara libukba, til weik upmok ning ara, langdibukba, eipse.
Allah arye Israel ninye ati wenelamukba, adeice arye sik moubuka tenelamik. Minop talak Musa ap, sik apu yapu ap, neika balamik ning ati teneipre ulamik. Winilamikce nyabik. “Musa birye nun apu yapu nang, Mesir mutuku ulamikba, boyangalamuk Allah ara, wini talak dan unmal do? Nun apu yapu yangalamik talak, Ining bi Laut mekwen noutam bokuka, dana-dana kiprobukba, anoutam bisik menekuka balamukba, sik aminyan yangalamik. Bukni, nun ni Allah ara, wini talak dan mutuku ulul do? Winipmanto ara, domba basam weina deiyoknye birye, el domba basam ati melibuka weilamle touk, nun apu koproba Musa biti melibuka nyalilamuk Allah ara, wini talak dan mutuku ulul do? Tonda, minop talak ulamik Israel ninye, sik noutamak, el Dib Kanye dolkwetelamuk Allah ara, wini talak dan mutuku ulul do? Akunum bataksuk do?” nyabuka asilelamik. Aning nirya ara, sik Israel ninye malye winilamikba, Allah arye sikti, wenelamuk talak ara, sik mining ninye uk asilalelamik.
Allah arye Israel ninye ati nyabuk. Yerusalem mutuku ululum ninyeo, anggunda mikip kipdopmunce, kanye deibuka telebuk unamlume. Anyapmasin ning ara urdem ati kum nyapsine. Allah el weik dirina dobuka anggun deice deipsiliba dirina kipmasile. Allah arye kanye deipsilirye, teleb kilinamsila ati, bukmunce, lak koprop kibuka winipmunyopura, yuk nang nirya arye sik dirina atonun ning, sik lyena ati akunum yanamal ning ara, eipnamake.
Daniel birye ayupu ton morobuk. “Ati nun ni Allah, nara an amu tam pil donanye Daniel birye, an Allah ati, ‘Melipsilyame,’ nyabuka, moropkin ning ara, kekepnimince, melipsilyame. Ara, an ‘Naʼ tenen, mutuku Yerusalem noutamak, asik dobuka ulamupua ani, yuk ninye biyikce, nun aik nirya akunum dakuka uluplopsik ning ara, tamubuka teleb kipdeipsilyame. Aning winipdeipsiminba, yuk mutuku ninye nirya arye, awinipminye ning eibikirye, ‘Se, dipkoprob Allah ara, eluk ulule,’ tenebikirye, an siuk kel biknamake. Yerusalem tamubuka teleb kum kipdeipsiminyopura, ‘Yuk mutuku nang arye, tonap malye yupu tuba nyapkicak’ tenen, moropkine na nio.
Winipnuk talak arye, dinmasibuk, keting panalyangan tam arye, anyaik dam weik dirina yayuka ara, meldang-dang abuka yayukak, narye dipdenmanto kum upse. Weik dirina yayuk ning ara, Israel yala nang sikti, kalekuka pia melilulnye, Allah Yahweh, asukum yanmoka ati, lak kilina ati, adirina arye winibuk. Tonda, weik laut mekwen longteng aplirye, mek kait welepmalya ani, koulukliba, lelim weik nyalamle touk, Allah anyaik wekmok talak ara, alelim nyalamle touk, nyanmokba kekepse. Tonda, Allah yanmok deice arye, el dirina weik ubuka ati, mutuku sirya im sirya nirya babye, dirina weik ubukba eipse.
Akam unyak ning, sik nong noutamak arye ubuk ning ara, uku sekmakiba, uku dinmalirye, uku duk lonmalirye, bi paralamle tonun ubukba eipse. Tonda, sik dumbarye bukni, sik kan-kan ara, weisa ubikiba, dirina weik ulamle touk ubukba, narye eipse. Auku buk noutamak nirya ara, dirina weik ubuk. Tonda, auku buk noutamak arye, bebeya lakna weik arye ubukba, mil parabuka bindakuk.
Tonda ninye tonok basam weina deiyoknye birye, el domba basam nirya bulubuka tonokak delilamle touk, Allah el mapu sirika nirya ara bulubuka telebak deipnamsile. Tonda, domba weina deiyoknye birye, domba basam mapu bico tenen, iribuka bobalamle touk, Allah arye el mapu koproba dobuka iribuka bobinamsile. Tonda domba basam mapu nirya sik nin birye, ‘Na mapu na dam nimalyap asa yanamal’ tenen, ‘Yalulume,’ nyapnin balibuk, sik nin yupu kekebuka balamak touk, Allah arye el mapu koproba ati atonun wininamle.
Se, nun ni Allah Yahweh, ninye malye wininyak ning ati, anda kwang dakna deiyoknye ulyama ati, ance, “Aning wininamlume. Aning ara, pia kum wininamlume,” nyapdeiamsulum yupu nyasulul touk ubuka, ninye nirya kum winibikirye, malye wininyak ning ati, wenenamsilame. Diba nun ni Allah, anda sik malye wininyak nang ati, kwang dakna deiyoknye ulyama ati, minop yanuka, ninye nirya ati, yupu lipsisikuka bokeipmince, wenenamlame!
Bukni, Israel nang malye ulamik ning ati, Allah el yu weik ulamuk talak ara, Yusuf birye deiamukba, sikce dadeipdanin yangalamik nang babye, Allah arye anang luba kibuka bataklamuk. ‘Na si eren aik ara, sik mutuku dopnamne,’ kum tenebuka ati, sik mutuku ara, batakuke. Atonun, Allah el yu weik ulamuk talak ara, Efraim birye deiamukba, sikce dadeipdanin yangalamik nang babye, Allah arye anang namin kibuka ati, ‘Na si eren aik ara, sik mutuku dopnamne,’ kum tenebuka ati, sik mutuku ton, wibuka kum tenebuka ati, batakuk.
Allah arye aning nirya akunum winibukce, elce ‘Anang ara, ‘Naʼ tenen nang unamak’ tenen, weiamuk nang ara, dobuka, Mesir mutuku batakuka, yuk pera mutuku bobinamuk. Winipmanto ara, domba basam weina deiyok nang arye, sik domba basam dobuka balamak touk ubuka, Allah arye, sik Israel nang lobuka lyebukce, boyangalamuk. Tonda, Mesir mutuku akunum batakuka, bindobik talak ara, ninye pia kum sukum, pata weik mutuku noutam, Allah arye, sik Israel nang bobinamuk. Domba basam deiyok nang arye, meibuka bakiba, sik domba aminyan yangalamak touk, Allah arye minop menekuka balamukba, Israel nang, el balye tam melibuka dobolbalamik.
Raja Daud birye, Mazmur yupu mot sekuk. Daud birye nyabuk. “Ara, Allah yupu mot nyana deiyoknye arena ati, sekuk. Tonda amot ara, yuk Allah yupu mot, el si ara, Urasin Teleb Keit Lelamle Ning el si ara, Bunga Bakung, amot lelilim nyalamle touk, asekeipmasin mot babye atonun nyanamlume,” nyabuk. Amazmur yupu ara, Israel nang peterena ati, Daud birye sekuk.
Tonda, asipdeikene. An taruk arye, na kwepdeipnuluma ati, ance na deice, ikin ning deibuka darapdongopnilyame. Tonda, an taruk deice aryuk, talibuka dominye bira, ‘El nong deice ara, pia ikin ning tuba delinamne,’ tenelyamce, kanye delilyam do? Aning kumopura, sik malye unyak nang arye, ‘Malye un ning ara, wininamabe,’ tenenyak ning ati, ance melipmimba, sikce amalye un ning ara, talye luparabuka winipnin banamak do? Na dam tuba malye kilininyake.
Asurat tukwak binuka deibukce, Hizkia birye Allah el si Yahweh ati morobukce nyabuk. Na ni Allah an si Yahweh, anda Israel nang pia melibuka kalikisilyame. An dirina ara, an si eren aik pum tam ulule. Minop arye, memepdeibik ning, malaikat urasin atonun deibik ning dana-dana tam tikrikce, sik pol anoutam ara, an aulyame. Anda aning-aning deice tam umince aning nirya talilyame. Ninye tukwak nang arye, amutuku-amutuku weik talinyakce, weik deiyok unyak bukni, dipkoprob ara, ancuk amutuku nirya ap, adeiyok nang nirya ap, deice tam umince talilyame. Weik mikip weiknye bira an tonoka. Na ni Allah ancuk im ap, im deice ap, tukwak ap, kwepdeiplumce, weik deiyoknye ulyame.
Allah arye, Sinai mutuku dup yayukce, Seir mutuku deice keting sinarya kutukuka, pata tikilamle atonun yayukba, sik eibikba, sikti yanuka melibuk. Tonda, elda Paran mutuku dup, dirin weik arebukba eibik. Allah el yayuk talak ara, Allah el im deici pil don nang malaikat ara, yupa sepuluh ribu (10.000) malaikat nang ap, weik nukmanto kum arye, neika yayikce, el sirik taruk tam ara, uku buk paklamle atonun, ubukba eibik.
Ninye si Asaf birye, aMazmur mot yupu sekuk. Asaf birye sekuk yupu ara, ani. Aning-aning nirya deice tam erebuka, Pia Weik Mikipnye, Allah, el si Yahweh, elce tukwak mutuku sirya, im sirya nirya unyak nang ati, “Na damuk yalulume,” nyabuka, yukulule. Ara, keting panalyangan tam arye dipdongobuka, otam keting kumulban tam unyak nang nirya babye, ninye tukwak nang nirya ati, “Na dam yalulume,” nyabuka, yukulule.
Piblisite