Mazmur 78:69 - Eipomek

⁶⁹ Allah arye Sion mutuku wibukopura, elce, ‘Winipnulyame,’ nyabukba, sikce el si eren aik ara, amutuku noutamuk domik. Ara, im deice nirya teleb kipdeiamukba, pia deice tam aunamle touk, el si eren aik babye, Sion mutuku kon deiceuk tuba aunamle. Tonda, tukwak mutuku im sirya, mutuku sirya, nirya kwepdeiamuka ara, min kum kum danamle. Apia aunamle touk, el si eren aik ara, Sion mutuku kon deice, pia aunamle. Aminyan talak ara, aning babye min kum kum datue.

Mazmur 78:69 Referans Kwoze

Wahyu 20:11

Aning nirya eipsopura, aning ton eipse. Ara, weik ninye deiyoknye kurun ning deice bunlulak eipse. Ara, pia weik kurun bun ning ap, aning deice bukmoknye ap eipse. Anye laka ubukba, im ap, im noutamak ulul ning nirya ap, tukwak ap, tukwak mutuku noutamak ulul ning nirya ap, aweik deiyoknye dam kum yanmanto ati ara, aning nirya kum dayukba eipse.

Yesaya 51:6

Ati, anggun Israel yala nang nirya babye, tikuka im deice tam ap, tukwak mutuku ap, dipdenamlulume. Dipkoprop nyapsine. Im deice tam ulul ning nirya ara, kum danamle. Ara winipmanto ara, ninye arye weik uku deibikiba, im noutam welepmalya ani, adiparyuk kum danalamle touk, im deice tam wamlye ning nirya babye, kum dandopnamle. Tonda, tukwak mutuku ara, ninye arye wilamak baju wisi danamlirye, kwilikilsakalamle touk upnamle. Winiplyopura, tukwak mutuku noutam, mutuku sirya, im sirya nirya unyak nang nirya ara, talye suma adiparyuk dibilamak touk ubuka, dipnamake. Bukni, na Allah arye anggunti, lobuka lyepdopnamsin nang ara, min kum, kum danamle. Narye anggunti, lobuka lyepdopnamsin nang ara, pia ati aunamle. Aning ara, min kum, kum danmanto anya arye, pia sirya dakuka min kum, kum danamle.

Yesaya 48:13

Na mikip weik taruk arye, tukwak mutuku amu tam ara, mutuku yuk ning keil deiamse, aning nirya baribuka talipse. Na mikip weik sirik taruk arye, im noutam ap, im deice tam ap, ulye ning nirya ara, naryuk lilibuka deiamse. Tonda, im deice tam awamuk ning nirya babye, narye yukupnirye, sik si, si sibuka, ‘Yalulume!’ nyaptinyopura, sik adiparyuk bikbik abuka yakirye, ‘Yata nyapnusil do?’ tenen, kintinibikirye, tunim abuka tikinyake.

Mazmur 104:5

Tukwak mutuku-mutuku nirya dobuka, weik mutuku yangan keil deice deiplume. Ninye arye aik dopnuce talak, ayukumna yo ikildaralamak atonun, ance, ‘Tukwak mutuku nirya, long-long aplirye, kum kum danamle’ tenen, tukwak mutuku amu tam mutuku yangan keil deiplumba, pia darapdongobuka, dopluma ati ara, anye pia aunamle.

Mazmur 102:25

Ati ara, na ni Allah, narye anti, nyabuka moropkine. Na kam tuba unamanye talak aryuk, ‘Kam una deiyok ning min kum dopropneminyeura, adiparyuk kum dipnamne’ tenen, moropkine na nio. ‘Tuba kam uptinye’ tenen, moropkine. Na ni Allah, anda pia kum dipnalame. Tuba-tuba dounamle talak nirya ara, kamuk unalame. Pia kum dipnalama atia.

Ayub 26:7

Aning-aning min kum uamuk talak ara, deice tam lo weik ubukce, lo ubukba, Allah elcuk, itam ara, im kwepdeibukce, itamuk bibikdeibukba, tuba aulule. Aning atonun, minop talak weik lo ubukak ara, tonok ning babye, kum uamuk bukni, anoutam ara, Allah arye tukwak mutuku, im sirya, mutuku sirya nirya kwepdeibukce, asukum ara, tuba aulule.

2 Tawarikh 3:4

Anyaik urasin tam ara, ninye wekelbana ati, atolonga atonun buk weik ning ton dobik. Anyatolonga el weik lo ubuk ning, el cang ara, tukwak arye dipdongobuka, eitam cang ara 54 meter uamuk. Anyatolonga el pala ara, 9 meter uk uamuk. Anyaik urasin tam dobuk atolong ara, pum noutam ara, dekena weik ning emas lek pia weik ning dobuka urasin teleb ning arye taplak deibikce dobik.

2 Tawarikh 2:9

Urasin teleb yo kintinipnamak ning ara, mitik tonun kum bukni, pia weik tonun kintinibikirye, na dam boyanamake. Aning deiyok ara, ani. Ara, ‘Allah Yahweh el si eren aik ati dopnamne,’ tenepse ning ara, urasin pia teleb ap, nong weik aikak dopnamne.

1 Tawarikh 29:19

Tonda, nara Daud birye, ‘Na deiamse mi, Salomo melipnamlamʼ tenen, moropkine. Winipminyeura, elce, ‘Aning winipnamne do, kum do?’ tenena kumce, pia dipkoprob tonok kanye aryuk, ance, Winipnamlume, aning ara kum winipnamlume,’ nyabuka, nyapdeiamlum mem yupu ap, ance, ‘Teleb un ning ara ani,’ nyapsulum yupu ap, ‘Na tam nang arye, aninguk talibuka unamake,’ nyapdeipsulum yupu ap, aning nirya ara, Salomo moubuka tenelirye, dobolbilirye, an siuk erenamkileʼ tenen ati moropkine. Winibuka winiptopura, narye, ‘An si eren aik dopnamakinʼ tenen, aik don ning yuk-yuk ning nirya akunum kintinip deipse ninguk, ‘Na mi Salomo doproplirye, an aik dopnamkilʼ tenen moropkine, na ni Allah.” Ayupu ara, Daud birye Allah ati nyabuka morobuk.

1 Tawarikh 29:1

Israel mutuku noutam ulamik nang, sik ninye deiyok kibuka ulamuknye, Raja Daud birye, el dam bulubuka yanmek nang nirya ati, nyabuk. “Ura, na kayapo. Na mi Salomo bira, Allah arye, ‘Anye bira Raja unamleʼ tenen, akunum wipdeipmasile. Anye wipdeipmal bukni, elda welnye tuba unmal talak wipdeipmala anya arye, el pil dona ara, kabula. Elda winiryuk biknin banmale. Tonda, nun ni koproba Allah Yahweh, el si eren aik dona ati ara, pia ikin pil ulule. Deiyok ara, aweik aik ara, talye tukwak nang, dipnamak nang arye wekenamak aik kume. Ninye talye nang sik weken aik kum bukni, anyaik ara, Allah el si Yahweh, aning-aning deice tam ululnye, el aik ulul ati nyapne.

1 Raja-Raja 9:8

Wini talak ara, ance dopnulum aik ara, urasin pia teleb aik ulule. Anyaik atonun ton kum ulule. Bukni, sik Israel ninye arye malye-malye ubikirye, na bataknicopura, narye anyaik batakniba, pia malye upnin banamle. Winiplyeura, uluplopnamake. Winiplyopura, anyaik dam banmace nang eibikirye, ‘Se, ara yata ati ubuk do?’ tenen, talima lukdakirye, nyapnamake. “Yata deiyok ati, Allah el si Yahweh arye, anyaik ap, amutuku ap, aninye ap ara, pia malye kipdeibuk do?” nyanamake.

1 Samuel 2:8

Aning atonun, ninye ton imun kanye weik bobuka, atu butbuta deice uk ulamlirye, aning-aning nirya kumnye ulamliba ani, Allah Yahweh aryuk, anye erepdeiplyopura, telebuk ulule. Atonun ton, ‘Seʼ tenen, kanye imun deice uk ulamlirye, ninye arye pia malye ning uku dongolbanakuk, ‘Nun like,’ tenena uk ulamliba, Allah Yahweh arye, anye erepdeipliba, ninye deiyoknye Raja, el mi ap burudake. Tonda, Allah Yahweh arye, aninye nirya ati, ‘Pia teleb unamakʼ tenen, weik deiyok nang atonun kipdeiplyopura, yuk ninye arye, anang ati, si erenamake. Apil nirya dolula ara, talye ati kume. Allah Yahweh arye, mutuku-mutuku nirya ara, Allah el ning uka. Ninye arye, aik dopnamikce talak ara, kat ayukumna yo ikikirye, anyaik teleb ubuka dolamak touk, Allah Yahweh arye, tukwak mutuku kwepdeibukce, ‘Apia unamleʼ tenen, mikip arye, teleb ubuka kwepdeibukce, aning-aning nirya ara, lilipdeibuk.

Mazmur 87:1

Korah el deibukba, deipdanin balamik ninye arye nyalamik mot ara, ani. Allah elce, ‘Amutuku deice, na si deipnamne’ tenen, wipdeibuk mutuku, malye ning tonok babye pia kum ulul mutuku ubuk. Amutuku deice ara, Allah Yahweh arye dobuka deibuk mutuku, weik kota kintinip deibuk.