Mazmur 78:16 - Eipomek

¹⁶ Diba, Allah el mikip deice arye, pil dobuka ati, weik mutuku bulamle keil noutam arye, weik mek panabuka balamukba, sikda amek dam yanuka kwepnarye dilamik. Diba, amek ara, mitik mek kume. Akeil noutam arye, weik mek balamuk touk, ubuka arebukba, akeil noutam arye, weik mek kutukukura, amekuk kwebuka dilamik.

Mazmur 78:16 Referans Kwoze

Ulangan 8:15

Tonda, Allah arye meliamsuka deice arye, mek ap, ninye ap, pia kum uamuk mutuku noutamak arye, bobuka yangalamsuke. Amutuku noutamak yangalamlum talak ara, ninye on kwatima ap, ninye si tolamle sul kwising ap, awamuk bukni, Allah meliamsukba, si kum tolamsukba, telebuk balamlume. Tonda, winibuka balamlum talak ara, amutuku noutamak ara, mek pia kum uamuk bukni, Allah el mikip deice arye, kat keil noutamak arye, mek kutukuka sakukba, dinmalumba, bouamsuke.

Bilangan 20:8

“Musa ance minop talak anyaik deiamlum kama ara, an ap, an du Harun ap, anggunce bobuka birumunce, sik Israel ninye nirya bulubuka, keil lak tonokak deipdurume. Otam ara, weik keil aubuka eiptinge. Ati, Musa ance akeil dam tikmince, ‘Mek panaplyame,’ nyapminba, adiparyuk mek kutukuka panalyanamale. Winiplirye amek ara, pia ati kutukuka balamliba, sik Israel ninye ap, sik sapi basam ap, kambing ap, domba ap, sik weinyak ning, aning-aning nirya ap, amek kwebuka dinamake.” Allah arye, Musa biti nyabuk.

Mazmur 105:41

Tonda, “Mek patapsile ati, mek arepsilyame,” nyabuka, Allah ati morobikura, mutuku bukamuk noutamak arye, keil deice debukba, mek panabuka sakuk. Atalak ara, mek kumak, pia pata mutuku noutamak ulamik bukni, amek ara, mutuku patak arye panabuka yayukce, mikip arye biyukba, kwebuka dilamik.

Ulangan 9:21

Winipsopura, anggunce, sapi mi atonun ning memebuka deiamlumce, si erelamlum ning ara, dobukapsirye, uku dongopseba, nong nirya uku dibukabukce, uku sice buklobukopura, narye auku sice dobukapsirye, amutuku balamuk mek pum tam dongopseba, bobiyukce, kum kibuk.

Mazmur 107:35

Bukni, yata mutuku ninye do nirya, Allah arye nyalul yupu moubuka kekebikirye, teleb ubuka diksukumuk winibicopura, Allah arye, aninye ati melilule. Ara, pata mutuku ara, tuba tamubuka mekwen delinak kililule. Aning atonun, keting buppu arye, mek nirya cepropliba, mikne tukwak arye, tuba tamubuka mek pu kipnamle.

Mazmur 114:7

Se, tukwak mutuku, im sirya, mutuku sirya nirya ara, nun ni Allah Yahweh, el dam yamunyopura, ilil upliba, mutuku nirya ara, lulukukna ap, sirim talina ap, unamlume! Ara, nun apu koproba Yakub birye, si erelamuk Allah, el dam yamunyopura, sirim talinauk unamsile!

Mazmur 114:8

Tonda, nun ni Allah arye, pata mutuku noutam, mek pia kum uamuk mutuku bukni, Allah arye ninye dopmankum pil dobuka deice, weik keil noutam arye, mek arebukba, panabuka biyukce, weik mekwen deibuk. Ara, pia mutuku yangan keil uamuka noutam, Allah arye ninye kum winipmanto pil dobuk deice, mek pu panabuka biyuke.

Habakuk 3:9

Ance tenelalum touk, yin talin nang arye, yin dobuka olyangalamik talak ara, ance, ‘Winibuka opnamake,’ tenelalum touk, sik yin dopdomikce, ninye weik olamike. Tukwak mutuku noutamak ara, ‘Yuk-yuk upnamle’ tenen, talye balamle mek ap, weik laut mekwen ap, arelalumce, mutuku-mutuku nirya noutamak arye bokuka, dana-dana tam kipdeiplumba, anoutam ara, mek balamuk. Tonda, laut mekwen ara anoutamak deibuk. Mutuku-mutuku nirya yanuka wiliproplumba, mek pu dobuka balamuk.