Mazmur 7:9 - Eipomek

⁹ Allah Yahweh, elcuk, nun tukwak unyap nang yala-yala nirya ap, mutuku noutam unyak nang nirya ati, yupu lipsisikuka bokolina deiyoknye ulule. Ati, na ni Allah Yahweh, ancuk kintinipmince, na dipkoprobuk ulamse ning nirya ati, moubuka tenipdemince, ance nati, yupu lipsisikuka bokeipnamnilame. Tonda, na kanye talima noutam tenina deice arye, tilila yupu tonok ning babye kum nyalamse. Na kanye talima ara, dipkoprob uk unulula deice arye, aning dipdemince, na winilamse touk ubuka, yupu lipsisikuka bokeipnamnilame.

Mazmur 7:9 Referans Kwoze

Yeremia 11:20

Nyalamikba, akunum bikseura, narye Allah ati moropse. “Na ni Allah Yahweh anda, im deice yin talin malaikat nirya ara, sik deiyoknye ulyama ati, anda mikip weiknye ulyame. Na bikse, anda yupu bokolina deiyoknye umince, ninye tukwak nang ati, diksukumuk yupu bokuka nyalilyame. Ancuk, nun tukwak nang, kanye talima noutam tenenyap ning babye, tukwak arye eibuka bikiselyame. Ati na nio, sikce nati, ‘Anye opnamap,’ nyanyak ning nirya ara, dobuka an deiceuk deipkine. Ati ara, ance tenepnimince, ‘Sik anang deice menenga dobuka, deipnalam ning ara, na ton eipnirye, biktinyeʼ tenen, moropkine.

Yeremia 17:10

Bukni, na Allah Yahweh aryuk, ninye sik talima pum ulul ning ap, ninye arye teninyak ning ap ara, tukwak arye eibuka bikne ning ara, narye sikti, ‘Teleb wininamak do, malyeuk wininamak do?’ tenen, sik nirya ati winilenune. Narye tukwak nang nirya ati, tonok-tonok nang arye, sik wininyak ning, dawinilamiceba, nong akunum uplyopura, narye eipnyopura, sik winilamikiba, duk mouplyopura, narye sikti, kwang dakanune. Ara, narye sik winilamice touk, deken ning arenune.

Yeremia 20:12

Allah Yahweh, anda mikip weiknye ulyame. Anda aning-aning ap, im deice yin talin malaikat nirya ap, sik weik deiyoknye ulyama anya arye, ance diksukumuk ubuka, wininyak ninye ati ara, ‘Dipkoprop teleb wininyak do, kum do?’ tenen, asildelyame. Ara, Allah ance, ninye nirya, sik kanye talima noutamak ulul ning ap, sik kanye noutamak tenenyak ning nirya ara, ance moubuka bikisilyame. Ati, na yu teneninyak ninye ara, ance wenen ning arepminba, ‘Na ton eiptinye’ tenen, moropkine. Aning ati ara, na wininun ning ap, na kam una ap nirya ara, ‘Na ni Allah, elcuk kalikuka melinamnil’ tenen, an deiceuk lobuka deipkine.

1 Tawarikh 28:9

Tonda, na mi Salomo, narye el si erelamse Allah, na ni koproba Allah ati, an babye kel bikinamlame. Allah el siuk pia erenamlame. Ara, an kanye talima nirya moubuka tenepmince, ‘Winipnun do, kum do?’ tenen, teniltona pia kum unamlame. Pia pi dobuka, el tibuk, talipmince el siuk erenamlame. Ara talye ati kume. Deiyok ara, Allah Yahweh elda, ninye talima noutamuk ulul ning nirya weklirye dilule. Tonda, ninye kanye pum tam teninamak ning ap, ‘Winipnamabe tenen,’ teninamak ning ap nirya ara, kel bikilule. Ura, ance elti, ‘El kanye delilul ning eipnirye, kel biknamne. Aninguk talibuka unamne,’ tenepminyopura, dipkoprob adiparyuk el ulul ning ati eipmince, elti, bikinamlame. Bukni, aning winina kumce, el batakmince, kum dobolbiminyopura, elce, ‘Kume, anye na like,’ tenepkilirye, pia ati bataknamkile, kum melinamkile.

1 Samuel 16:7

Utenebuk bukni, Allah el si Yahweh arye tamubuka, Samuel biti nyabuk. “Ancuk eipmince, ‘Anye bira, el urasin teleb, el nong ara, cang weik ati, pia telebnye ulule,’ tenebuka, wibuka erelina kume. Narye, anye akunum batakmana ati, kum wipdeipnune. Deiyok ara, nyapnukine. Ara, na Allah arye, ninye nong ap, sik urasin ap, eipnirye kum erelinune. Ninye arye, nong bol deice ning eibikirye, ‘Aning mambule, anye bira telebe,’ tenelamaka atonun, kum tenenune. Tonda, ninye arye urasin ara, elilalulum bukni, nara Allah, na Yahweh arye, anggun talima pum tam moubuka elisunune,” nyabuk.

Wahyu 2:23

Akil arye deiyamuk mapu nirya ara oplopnamne. Winipniba, amutuku-amutuku diba tenenyak ninye nirya arye, moubuka kel kipnamake. Ara, ‘Se, ninye kanye tenen ning ap, ninye talima pum tam usilye ning nirya ap ara, elce kel kisulule. Nun nirya arye ulamap touk, yupu bokeipsilirye, wenesulule,’ tenebikirye, kel kipnamake.

Mazmur 139:1

Sisinanye Raja Daud, mot sena deiyoknye birye nyabuk. Diba, na ni Allah Yahweh, ancuk na talibuka wininun ning nirya ati, pia moubuka dinimince, kel kinilyame.

Mazmur 44:21

Bukni, nun kanye tenenmaba ara, ani. Nun si erenyap Allah, elti, akunum batakuburye, el si luba kiptibyeura, Allah arye aning biktu do? Kum do? Tonda, nunce Allah batakuka, yuk talye ning ati, isa si erelamtibye toura, Allah arye, aning biktu do? Kum do?

Mazmur 37:23

Yata ninye do nirya, diksukum bisikuk banyak ninye ara, Allah arye aninye ati, melibuka kalikilule. Allah arye aninye ati melipliba, sik wininamak ning nirya ara, telebuk upliba, nong upnamle. Deiyok ara, Allah arye aninye pia moubuka talilirye, telebuk unamake.

Mazmur 26:2

Se, na ni Allah Yahweh, ‘Anye bira, malye ulul do, telebuk ulul do?’ tenen, na wininye ning nirya ati, moubuka dipdenimince, biknamnilame. Ara, na kanye talima noutam tenenun ning babye, patanulul ning babye, dipdenilyame na nio.

Mazmur 11:5

Allah Yahweh arye, malye winin ninguk, talibuka wininyak nang babye, teleb ning talibuka, diksukumuk wininyak nang babye, ‘Teleb wininamak do, kum do?’ tenen, asilelule. Bukni, Allah el talima noutam ara, ‘Sik malye winin ninguk, talibuka wininyak nang nirya, sik anang ara, pia na like,’ tenelule.

Mazmur 10:15

Na nio, anti moropkiabe. ‘Sik mikip dobuka, pia yu weik unyak nang ati, sik mikip unyaka ara, ance kum kipdeipnamlame!’ tenen, moropkiabe. Tonda, ance sikti, ‘Sik pia malye wininyak ning ara, yata wirinmak do?’ tenen, moubuka dipdemince, aning nirya eipmince, wenepnalam’ tenen, moropkiabe na nio.

Roma 16:25

Allah el siuk weik arye erenamabe. Na Paulus arye, Yesus Kristus ninye lyena ati el laka teleb yupu dobuka peteresunune. Apeteresinye yupu deice arye, diba tenepmunyopura, Allah arye anggun kanye talima mikip kilisululba, pia batakna kumce pia talibuka unamlume. Allah elcuk mikip ulisulule. Mikip kilisululba, minop talak arye dipdongobuka, danoutam talak nirya ara, Allah arye ninye lyena ati, Yesus el laka teleb yupu ara duknyamukba ninye arye kum kekepmanto ulamik. Bukni, wini talak ara ayupu lakak kibukba, peteresinyabe.

Mazmur 17:3

Ance, na kanye talima noutam ara, moubuka dipdenimince, tonda, lukunyan noutam babye, ‘El talima noutam ara, malye winin ning aupmal do, kum do?’ tenen, na kanye talima noutam moubuka dipdeniminyopura, ‘Aning ton aubukʼ tenen, eipnamnilame. Na kanye talima noutam ara, malye un ning ap, tonda, ‘Malye winin ning talibuka wininamne’ tenen, ning ton, pia kum eipnamnilame.

Rasul 12:23

Anang arye nyanmekbuk, Herodes arye, ‘Kume, na teleb unmana ara, na mikip deice aryuk unune,’ tenebukce, Allah si kum erebuka ati, adiparyuk im deice Allah melinanye birye malaikat arye Herodes ati, uk ning aribukura, kuluma weika arye el deiplyu potokukura, minopce dibuk.

Mazmur 58:6

Diba, sikda pia malyeuk wininyaka ati, kel weik nang arye, ‘Winipnamlume, winipnamlume,’ nyaptinga babye, anang arye, pia kum kekeptinge. Diba, kel weik nang arye, yupu nyabikiba, kwatima ara, teleb kilinyak bukni, amalye winina deiyok ning, kel weik nang arye, ‘Winipnamlume,’ nyabuka, nyaptinga babye, pia kum kekeptinge.

Mazmur 10:18

Tonda, nun bikmubu. Nunce morokipye ati, ance nun bona uto-toa kum talinyap nang ap, kwaknamne nang ap, ikin deipsikiba, imun kanye bonyap nang nirya ap ati, teleb kipsimince, melibuka lyenamsilame! Ara ance, “Aning ara, wininamlume, aning ara, pia kum wininamlume,” nyapdeipsulum yupu aulye touk deice arye, teleb kipdeipnamsilame. Teleb kipdeipnamsilama deiyok ara, ani. Teleb kipdeipsiminyopura, sik yu nang arye, malye kipsikiba, ilil weik unyap ning nirya ara, kum kipdeipsiminba, telebuk unamaba atia.

Daniel 11:45

Winipnamle talak ara, iknapnye tam taleamuknye, Siria mutuku taleamlye Raja ara, elce, ninye weik tonun akunum oplirye, sirya daklyopura, el tia talak una ati, tenda aik kintinip deipnamle. Ara, keting kumulbalye tam, weik laut mekwen el si Laut Mediterania otam, keting panalyangan tam ara, Allah el ‘Naʼ tenen, mutuku, el si erena ati aik domik mutuku, Yerusalem mutuku ara, awamukak bukni, anuotam mutuku ara, asukumuk el doltakan tenda aik kintinip deipnamle. Bukni atalak ara, Siria mutuku taleamlye ninye deiyoknye Raja bira, el asukum aryuk dipnamle. Winipnamle deiyok ning ara, yuk mutuku nang nirya arye, sikce elti, kum yanuka melipnamake. Yuk nang arye, el obikcopura, dipnamle. Ura, Malaikat arye, na Daniel biti nyapnukba, kekepsirye sekse.

Mazmur 40:2

‘Na ni Allah, el si Yahweh, ‘Na ikin unilye ning ati, melipnamnil ca’ tenen, moropsirye, dinauk ulamsebuk, na moropse yupu kekepnuke. Allah atibuk, ‘Melipnilyame,’ nyabuka moropsiba, kekepnukce, akunum melipnuke.

1 Samuel 2:9

Ninye ton, Allah ati, ‘Nun ni koproba ani,’ tenekirye, batakna kumce, el yupu moubuka talibikirye, dobolbanyak ninye ara, sik pia namin kanye bobuka ulamak ninye ara, Allah Yahweh arye, sikti, kalikilirye, pia teleb ubuka melinamle. Bukni, malye un ninguk, pia talibuka unyak ninye ara, amu tam deipliba, sikda kuna sukumuk pia unamakeʼ. Aning kum kipdeiplyopura, ninye arye kum elinamake. Aning ara, talye ati kume. Ninye nirya ara, sik mikip deice aryuk, teleb ubuka kum unamakeʼ. Allah arye melisilya deice arye, teleb unamabe.

Yudas 1:1

Na si ara, Yudas arye, Yakobus el weit koprop arye ayupu sekeipsene. Nara, nun deiyoknye Yesus Kristus arye, talipnukura, el piluk donune. Ayupu sekeipsin nang ara, nun ni Allah wipsukce, bico tenesilirye, nun du Yesus Kristus arye, ‘Malye ning arye, malye updeiplyak’ tenen, melibuka kalikisulule. Anggunti ayupu sekeipsene.

1 Peterus 5:10

Winibuka umunye talak noutamak arye, ikin ning ton upsilyopura, Allah elce anggunti, teleb kipdeipsilirye, ‘Darapdongobuka unamak’ tenen, mikip arepsilyopura, pil pia palibuka dona ati deiyok ning arenamsile. Allah arye, ‘Sik ap, Yesus Kristus ap, kanye dukdongobuka unyaka deice arye, pia kam unamake. Teleb arye dirina kan-kan ak, na ap dukdongobuka neika unamap’ tenen, yukupsuke.

1 Tesalonika 3:13

Tonda, nun Deiyoknye Yesus ap, el im deice melina nang, malaikat ap, tukwak tamubuka yanamak talak noutamak bukni, anggun Tesalonika ninye ara, nun ni Allah dam tikilbinamlum talak ara, ‘Anggun malye winin ning tonok ning babye, kum uplye deice arye, pia diksukumuk wininamlulum’ tenen, Allah morosunune. Tonda, ‘Winibuka wininamak’ tenen, ‘Yesus arye anggun talima mikip kilililamsilya deice arye unamak’ tenen, Allah morosunune. Na Paulus arye nyapsine.

1 Raja-Raja 8:32

Aning atonun nang, an aik dam yakirye morobicopura, an im deice arye kekepnamsilyame. ‘Kekepsimince, yupu bokeipnamsilam’ tenen, ati nyapkine. Allah im deice arye kekepsimince, kel bikuka ‘Anye bira dipkoprob malye winipmale. Anye bira malye kum winipmale,’ tenepsimince, amalye winipmalinye bira, el malye winipmalye touk wenen ning arenamlyame. Tonda malye kum winipmalinye bira, talye batakanamlyame. Winipminyopura, nunce, ‘Teleb ning ani, malye ning ani’ tenen, kel biktibye,” Raja Salomo nyabukce morobuk.

Mazmur 9:9

Allah arye, na tahkta deice buknirye, aning-aning nirya talepnirye, ‘Aning ara, wininamlume, aning ara, pia kum wininamlume,’ akunum nyapdeipsise touk ubuka, tukwak mutuku unyak nang, mutuku sirya, im sirya nirya ara, pia diksukumuk yupu lipsisikuka bokolinamsine. Atonun, tukwak nang, mutuku sirya, im sirya nirya ara, nunce winilamap touk ubuka, yupu lipsisikuka bokeipsilirye, wenepnamsile. Ati, ton tam nang ati, ‘E, sikda na kayapu’ tenen, kum bataknamle. Tukwak nang nirya ara, bita lakak arye lipsisikuka yupu bokolisulule.

Mazmur 18:21

Tonda, nara malye winina kumce, pia diksukumuk winilamsa ati, Allah arye na melina ati, dengna arena atonun ubuka, lyepnuke. Ara, na taruk arye, malye winin ning pia kum winilamsirye, diksukumuk ulamsa ati, Allah arye, na melina ati, dengna arena atonun ubuka, lyepnuke.

Mazmur 35:23

Ati, minop bukmince, na lyena ati, mining dam anyuk yamince, kalikinamnilyame na nio. Ara, talye ati kum bukni, anda na si erekunun Allah, anda aning-aning nirya talimince, Pia Mikip Weik Deiyoknye ulyama ati, na melibuka lyelona ati, minop yanulyame na nio.

Mazmur 43:1

Na ni Allah, anti diba kum tenekinyak ninye arye, nati tilila minina yupu nyaninyaka ati ara, ance yanuka melipnilyame. Allah anda, na tam kipmince, nati, ‘Optibye,’ teneninyak ninye ap, tonda minin yupu nyaninyak ninye ap, malye winin ning weik wininyak ninye ap, nirya ara, ‘Allah ance kum daneipnamlyame’ tenen, moropkine.

Mazmur 96:10

Nun dib tenenyap ninye nirya arye, sik yuk yala ninye mutuku-mutuku nirya unyak ninye nirya, kekenamakak arye, “Nun ni koprop Allah, el si Yahweh ara, aning-aning deice tam talibuka, ninye deiyoknye ulule,” nyabuka, laka nyalbanamabe. Tonda, Allah arye, tukwak mutuku nirya kwepdeibukba, pia darapdongbuka unamle. Allah tenyamuk talak, akunum uplyopura, tukwak mutuku noutamak unyap ninye nirya arye, wininyap ning nirya ati, “Teleb ning ani, malye ning ara, ani,” nyaplirye, elce ninye yupu bokuka, wilibuka deipnamsile. Ara, ninye nirya winilamak touk, diksukumuk ubuka, yupu bokeipnamsile.

Mazmur 96:13

Nun nirya arye, Allah Yahweh ati, el si erebuka kinamapa ara, talye ati, kum wininamabe. Deiyok ara, Allah yanamle talak ara, nun yupu bokeipsilirye, wilipdeipnamsila ati, el si erenamabe. Tonda nun nirya ara, yupu weik arye, kanye pin-pin dobuka, el si erebikirye, kanye lon mot nyanamabe. Allah arye, tukwak mutuku tamubuka yalirye, tukwak mutuku-mutuku nirya noutamak unyap ninye nirya ati ara, ninye pil donyap ning ati, apil-apil donyap touk, Allah arye, ‘Teleb ning ani, malye ning ani,’ teneplirye, nun wenena ati, yupu bokdeipnamsile. Winibuka yupu bokeipnamsil talak ara, malye winina kum aryuk, tonda, tilila yupu nyana kum diparyuk, pia diksukum winibuka, yupu bokeipnamsile. Allah arye nyasilye yupu, el dipkoprob yupu deice arye, ninye pil donyap ning ati, apil-apil donyap touk, yupu lipsisikuka bokeipsilirye, wenepnamsile. Ati, Allah el tibuk, el si pia erenamabe.

Mazmur 98:9

Deiyok ara, Allah Yahweh arye yanuka, ninye tukwak nang nirya ati, dipdelirye, sik malye winilamikce ning ap, teleb winilamikce ning ati, yupu lipsisikuka bokeipsilirye, dengna arepnamsile. Allah arye, tukwak mutuku noutam unyak nang nirya ati, yupu lipsisikuka bokeipnamsil talak ara, elce, “Aning ara, wininamlume. Aning ara, pia kum wininamlume,” nyapdeiamsuk yupu deice arye, diksukum kibuka, yupu lipsisikuka bokeipnamsile. Diba, Allah arye, tukwak nang yuk-yuk nirya ati, sikce winilamikce ning moubuka dipdelirye, sik winilamice touk, yupu lipsisikuka bokeiplirye, dengna arepnamle. Nun winilamepye touk ubuka, “Anang ara, teleb wininyake, anang ara, malyeuk wininyake,” nyabuka, nun winilamepye ning ereplirye, aning atouk ubuka, yupu lipsisikuka bokeipnamsile!