Mazmur 58:10 - Eipomek

¹⁰ Tonda, winipmanto ara, mitik yun mek makau ara, weik uku dinmalya deice deibikiba, pia minopce buppu ulamle touk, ‘Ance amalye una deiyok nang ati, minopce obuka sice buklopnalam’ tenen, moropkine na nio. Tonda, weik uku arye, maning nirya minopce diplyeba, kum danalamle touk, ‘Ance amalye winina deiyok nang ati, minopce wenebuka opminyopura, kum danamak’ tenen, moropkine na nio.

Mazmur 58:10 Referans Kwoze

Mazmur 68:23

Se, Allah ara, aning-aning nirya talilirye, mikip weik ulya deiyoknye ulula ati, elce nyabuk. Nati, ‘Nun like,’ tenelamnik nang, akunum opse nang ara, sik nong dobuka, Basan mutuku arye tamubuka, Yerusalem mutuku boyanamne. Tonda, yuk nang ton opseba dibikce, weik laut mekwen pum tam, akunum weklamik nang ara, sik nong ton dobuka, Yerusalem mutuku tamubuka boyanamne.

Mazmur 91:8

Anggun winibuka unamlum talak ara, anggun asing arye, amutuku nirya dinmalumba, ‘Sik amalye winilamak ninye, sik wenena ati, dolonyak dekna ati ara, ikin ning doprobikirye, dibinyake’ tenen, eipnamlume. Utenepmunce, sik malye wininyak ninye dipnamaka ara, anggun asing arye elinamlume.

Mazmur 64:10

Ati, Allah arye sik malye wininyak nang ati, akunum wenebuka oplyopura, yuk-yuk nang nirya, aning eibuka bikikcopura, ilil weik upnamle. Ilil weik uplyopura, sik nirya arye, ‘Se, Allah arye, amalye winin nang wenebuka opmala ara, winibuka-winibuka winipmala deice arye, sik yu nang akunum wenebuka opmal atia, nyabuka yuk mutuku nang ati, laka nyalbinamake. Tonda, Allah arye amalye wininyak nang opmalinye biti, pia moubuka tenebikirye, biknamake.

Amsal 11:10

Dipkoprop ninguk, talibuka unyak ninye arye, pil dopra bakirye, sik winin ning nirya, teleb upra balyopura, amutuku noutamak unyak ninye nirya arye, kanye deibuka unyake. Aning atonun, sik malye ninguk, talibuka unyak ninye dibicopura, sik mutuku neika unyak ninye arye, kanye deibuka unyake. Ara, ‘Naie, nunti malye kililamsuknye bira, merekuka dipmale. Elda akunum kum danmala ati ara, wini talak ara, nunda telebuk upra banamabe,’ tenebikirye, kanye deibuka unamake.

Mazmur 107:42

Pia diksukumuk ubuka wininyak nang ara, aning eibikirye, kanye deibuka pin-pina asa arye unamake. Bukni, sik malye winin ninguk talibuka unyak ninye ara, yupu tana kumce si bam bol tirikdongobuka unamake.

Ulangan 32:43

Ati ara, anggun mutuku-mutuku nirya ululum ninye ara, anggun nirya arye, Allah el mapu ap, kanye deibuka, kil-kil asa arye unamlulume. Deiyok ara, malye nang arye, Allah el pil don nang weik olamikba, sik ining balamuk. Ati ara, Allah arye, amalye nang, sik wenena ati, oplopnamle. Allah arye elti, ‘Nun like,’ tenenyak ninye ati ara, yu tenebuka onamle. Elce sikti, wenebuka opnamle. Ara, malye nang arye, Allah el mutuku ap, el mapu ap ati, malye weik winilamik ning ara, Allah arye lipsisikuka doplirye, lyepnamle. Aning nirya, teleb kipdeipnamle. Musa birye, amot yupu sebukba, Israel nang arye kekebik.

Wahyu 18:20

Ati ara, amalaikat arye ayupu ton nyabuk. “Allah arye, Babel mutuku ulamik ninye sik wenena ati, akunum oplopmala ati ara, anggun im deice tam ululum ninye nirya arye, kanye deibuka pin-pin asa arye unamlume. Tonda, Allah arye wiamsukba, elti, diba tenebuka ululum nang ap, el yupu dobuka peterelbana ati, deiyok kouna nang, dopkwetepsuk Rasul nang ap, el yupu laka nyalamlum nabi-nabi nang ap, anggun nirya babye kanye deibuka pin-pin asa arye unamlume. Deiyok ara, sik Babel mutuku ulamik ninye arye, anggun nong deice ikin ning weika arye delilamsika ati ara, Allah arye sik Babel mutuku unyak ninye ati, akunum wenebuka oplopmala atia. Ati anggun nirya arye kanye deibuka unamlulume.”

Mazmur 52:6

Ninye arye, malye-malye yupu nyanyaka deice arye, yuk nang ati, ikin kilinyak bukni, ance, ‘Aning ara, teleb uka’ tenen, kanye delilyame. Se, dipkoprob ance nyalyam yupu nirya ara, talye-talye yupu uk nyalyame.

Ayub 29:6

Na talibuka weilamse sapi basam ap, kambing basam ap arye, moum yung ara, weik purubuka delilamse. Tonda, narye zaitun yo duk weik dakamsirye, keil pala deice arye, aning weik tonun purubuka delilamse. Winipsopura, zaitun mek ara, akeil pala deice arye, balamukba, kwebuka dilamse. Winipmanto ara, talye mek balamle touk, akeil pala noutam arye, banauk ulamnuk.

Ayub 22:19

Allah arye, sik malye unyak nang ati wenelul talak ara, sik diksukum telebuk unyak nang arye eibikirye, kanye deibuka, si weik arye libuka unyakce, kanye pin-pin arye unyake. Tonda, Allah arye, sik malye unyak nang ati weneplyeopura, sik malye winin ning talibuka kum unyak nang eibikirye, kanye deibuka, nalikirye, sik malye wininyak nang ati akutunyake.

Hakim-Hakim 5:31

Nun ni Allah, yuk talak ara, Allah an si Yahweh ati yu tenekinyak nang ara, Sisera ap, el mapu silip ap dibik atonun winipnamak. Bukni, anti diba tenyamkikirye, anti kanye delilamak ninye ara, keting yalirye, mutuku nirya deibuka bereklamla atonun, mikip weik unamake. Sik Debora ap, Abinoam el mi Barak ap, mot dobuka seprik. Ura, Sisera akunum obikopura, keting tamun yupa dumbarye deice ara, Israel ninye olana kum diparyuk, kanye deibuka telebuk ulamik.

Wahyu 14:20

Aweik ning, anggur duk darapdongobuka yanipmek ning, el nong ara, Allah el yu weik upliba, tukwak ninye nirya, weik arye wenebuka, yupu lipsisikuka bokeiplirye, opnamle ning ati ulule. Malaikat arye, anggur duk nirya, yanibuka kwangnalamak ning pum tam yamopdongobukura, anggur duk nirya daralyaninmekba, mek kwen banmok ning ara, urdem mek kume. Anggur duk yaninmekba, ining mekwen weika arye, banmoke. Pia weika arye banmoka ani, weik ining mekwen dana-dana deibuk ning, mitikto kume. Asukum arye, otam karen ara, yupa weik 300 kilometer mekwen deipra banmok. Aining karu ara, tonok meter ap, tonda noutam ning ap, satu setengah (1.5) meter mekwen weik deibukba, eipse. Na Yohanes arye nyapsine.

Amsal 10:25

Winilula ati ara, malye, el dam ara, pia weik kumanya mikip yalirye, amalye ululnye dam, yanuka puplirye, el nong bobiliba, kum danamle. Bukni diksukum teleb ubuka unyak ninye ara, pirilen ning ton, sik dam yatua babye, kum lulukdenamake. Pia tunim abuka telebuk unamake.