Mazmur 35:12 - Eipomek

¹² Na ning ara, teleb winin ninguk, wininun bukni, sikce nati ara, tamubuka malye winin ninguk wininyakce, ikin ning na nong deice deilininyake. Winipnikcopura, na talima nirya ara, ikin unilirye, talima dakalsakanauk uniliba, winipmanto kum unune.

Mazmur 35:12 Referans Kwoze

Yohanes 10:32

“Na ni koprop melyamnuka deice arye, ninye kum winipmanto ning weik arye pil dopsibuk, elinululume. Ninye kum winipmanto pil, weik mambul pil dolamse ning noutamak arye, yata malye pil dopsa ati, anggunce, ‘Opnuyap’ tenen, keil dobuka kintinibuka dinmanulum do?” nyabuk.

Yeremia 18:20

Na ni Allah, an kele. ‘Ance Israel ninye nirya, obuka sirya daknamlam’ tenen, “Sik melina ati, ateneplum ning ara, bataknulyame,” nyabuka, sikti, moropkine na nio. Narye teleb ning winipseba, sik Israel nang arye, tamubuka nati, malye kilinmaniaka ara, teleb do? Ance nyapnulum yupu laka nyalamsiba, sik anang arye, ‘Anye Yeremia bira, talinye binya arye opnuyabe’ tenen, yupu talenmaniake. Winipnikce, nati, ‘Teling bisik sakturye, diptue’ tenen, bisik akunum palibuka kintinibik. Winipnik bukni, narye sikti, Allah moropkise. Ara, sik malye winilamik ning ati, ‘Allah arye aninye ati, bico tenepturye, kum wenebuka opnamle’ tenen, Allah an dam yanuka moropkise.

Mazmur 38:20

Narye sik anang ati, telebuk kilinun bukni, sikce tamubuka, malye winin ninguk kilininyake. Diba, narye, ‘Teleb winin ninguk talibuka wininamne,’ tenepnirye, aninguk talibuka wininun bukni, nati, ‘Anye bira nun lik’ tenen, na mal olan nang arye, ‘Anye biti, malye kipdeibibiba, ikin weik unamle,’ tenenauk uninyake.

Amsal 17:13

Yata ninye do nirya, yuk ninye arye sikti, pia teleb ubuka melilamiki bukni, aminyan talak ara, sik melilamice ninye ati, tamubuka malye kipdeibicopura, pia malyeuk unyake. Amalye un ning winibicopura, dipkoprob aminyan talak noutamak nirya ara, sik aik noutamak aniryuk ikin ning weik, tuba-tuba panapliba, malye kanye bobuka, ikin pia weik unamake. Kanye imun ning, sik damak tuba-tuba yanganamle.

1 Samuel 19:15

Ayupu nirya bobinuka, Saul dam binuka, lak nyabikba, kekebukopura, Saul birye, anang ati, tamubuka nyabuk. “Kume, wini talak ara, tamubuka bimunce, anggun asing arye, el nong dipkoprob ebuka bikmunyopura, Daud eluk dinmalba mapmalye amsuna amapmalibuk, akipman tomobuka boyanamlume. Winipmunyopura, narye anye opnamne,” nyabuk.

1 Samuel 25:21

Daud ayanganmok talak nyanmok yupu ara, ani. “Nabal taleamuk ning ati, narye melilamkise, nyapmek ning ara, Nabal kum kekebukce, na yupu talye batakmanua ati, na like. Narye, Nabal el domba wein nang ap, el domba ap, Paran mutuku mek kumak weilamikbuk, sikti, tuba kalikuka melilamse. Winilamsiba, sik anirya ara, ton tunim ana kume. Pia telebuk ulamike. Narye, winilamsibuk, Nabal birye, malye yupu nyapmanue. El ti teleb kibuka, melilamse ning ara, talye ati melilamse. ‘Elce nati, malye kipdeipmanile,’ tenepne. Ati ara, wini talak ara, binuka opnuna ati, yu weik upnile” nyapra banmok.

1 Tawarikh 19:4

Nyabikura, ninye deiyoknye Raja Hanun birye, Daud wipdeipmokba yanmek nang nirya ara, tomobuk. Winibuka sik anang bam potong, ton tam nirya ara kobuka batakuk. Tonda, sik ongopmek baju der dam adiparyuk sekuka batakuk. Winibukopura, sik anang nirya ati, “Wini talak ara binulume,” nyabukba, tamubuka biyik.

Mazmur 38:21

Se, na ni koproba Allah Yahweh, ‘Ance kum bataknamnilam’ tenen, morokunune. Diba, na ni Allah, ‘Ance na bataknimince, kisikdakuka, yuk pera mutuku ara, binuka kum unalame. Na damuk pia neika unanam’ tenen, morokunune.

Mazmur 142:5

‘Yatanye birye yanuka melipnamnil do?’ tenen, na diksukumuk wininirye, anti pia dinauk unune. Aning nirya ara, patapniliba, pia dinauk unun bukni, na melipmantonye ton, na dam pia kum ulule. ‘Yu nang arye opnikca’ tenen, na duknupmanto babye, pia kum ulule. Tonda, na tam nang babye, yuk mutuku daunyak nang babye, nati, bico tenepnikirye, kum melinamsile.