Mazmur 34:22 - Eipomek

²² Tonda yu kanye bobuka, pia malye winin ninguk talibuka, wininyak ninye ara, sikce amalye ninguk wininyaka deice arye, sik bidamnyeuk olanamake. Sik bidamnye, malye wininyaka deice arye dipnamake. Tonda, Allah ati dib tenebikirye, diksukumuk wininyak ninye ara, yuk nang arye sikti, wilibuka deibikirye, ‘Aninye nun like ati ara, olbinuyabe,’ tenebuka, unyak ninye nirya ara, Allah arye, sik aninye ati, wenebuka oplopnamlarya.

Mazmur 34:22 Referans Kwoze

Mazmur 103:4

Aninguk kum bukni, Allah arye kum melipnutopura, dipkoprob malye wininyak ninye dibikiba, balamak sukumuk, el si ara Sheol, betinye bukni, Allah ati, diba tenenyak ninye ara, amutuku kum wekinyake. Allah elcuk nun diba teneyap ninye lyesulule. Anya arye, dipnyopura, diplamik ninye unyakak ara, kum binuka unamne. Nara, kamuk unamne. Tonda, Allah arye, bico tenenilirye, ‘Narye anggun, ‘Naʼ tenen nang ati, ‘Winipnamsine. Pia teleb kilinamsine,’ nyabuka, nyalin yupu deice nyapsise yupu nirya ara, pia dipkoprob wininamsine. Tonoknye babye, pia kum bataknamne. Winibuka nyapsuka ati, lyesulule. Adeice melilnamsilya deice arye, tuba-tuba teleb kilisulirye, pia kamuk unamyabe.

Mazmur 71:23

Nara pin-pin kanye bopnirye, na sitang deice arye, “Anda pia teleb ulyame,” nyabuka, mot nyapnirye, an si erenamkine. Ance lyepropnulumba, na kum dipsa ati, na kanye talima noutam nirya arye, antibuk, mot nyanirye, “Anda pia telebuk winilyame,” nyabuka, an siuk erenamkine.

2 Samuel 4:9

Nyapdik bukni, Daud birye, sik Rekhab ap, Baana ap ati, tamubuka nyabuk. Na ni Allah Yahweh, kam una deiyoknye, pia kam ulula ati, na dipkoprob nyapsine. Allah elce, na kanye ikin ulamnuk talak nirya, melibuka lyelamnuke. El si deice arye nyapsine.

Wahyu 5:9

Sik 24 wisi deiyok nang arye, Domba Mi Atonye el si erena ati, winiryuk mot senmekba, kekepse. Sikce mot nyanmek yupu ara, ani. “Anda pia diksukumuk uminya deice arye, an tonok arye asekna mambul ning dobuka, taplaklamak yo pea atonun ning daklobuka, abuku yokeipsutume. Deiyok ara, sik opkikba, an ining biyuka deice arye, ninye ayala-ayala kan-kan nirya arye, ‘Allah el na tenen ninye unamak’ tenen, ninye weika arye deklume. Akunum dekuka lyeplum ninye ara, im sirya, mutuku sirya nirya ap, ninye ayala-ayala nirya ap, ayupu-ayupu nirya ap, weik mutuku nang (negara-negara) nirya ap, noutamak arye ninye weik dekuka lyepluma ati, ancuk abuku yokeipsutume.

Mazmur 31:5

Tonda, yu nang arye nati, ‘Anye bira, opnuyap’ tenen, ninye onak akunum kintibikce, ninye on ning, el si jaring, dungnubuka deibika noutam arye, ‘Ance lobuka lyepnamnilam’ tenen, moropkine na nio! Aning ara, talye ati, kum morokunune. Kume, ‘Na on nang arye, opnikcak’ tenen, an damuk yanuka unune. Tonda, anda, na Lyena Deiyoknye unilyama ati, antibuk morokunune na nio.

Mazmur 130:8

Allah elcuk nun Israel ninye arye, malye wininyap ning nirya, namin kipsilirye, kum kipdeipsilyopura, lyepnamsile. Lyebuka dopropsilirye, pia teleb winilinamsile. Nun malye wininyap ning ati, wenebuka oplopsutu bukni, bico tenepsilirye, amalye wininyap ning nirya ati, namin kipsilirye, lyesulule.

1 Raja-Raja 1:29

Akil yanuka tikuk talak ara, aninye deiyoknye Raja Daud birye nyabuk. “Dipkoprop na mi Salomo birye Israel ninye sik deiyoknye Raja unamle. Anyapmana ara, ‘Pia dipkoprob kipnamle, tenenamlam’ tenen, Allah el si Yahweh, pia Kam Una Deiyoknye, el si deice arye nyapne. Na ikin ulamnuk talak nirya ara, Yahweh arye, na kanye imun ulamnuk noutam nirya, meilyamnuk deice arye lyepropnuke.”

Kejadian 48:16

Na ikin ulamnuk ning nirya noutam arye lolamnuk Allah arye, ‘An mapu bitinye ati melibuka pia teleb updeipnamle’ tenen, nyapne. Tonda amapu bitinye ara, yuk ninye arye sikti, ‘E, amapu ara Israel birye deiamuk mapu ururake. Sik apu yapu ara Abraham ap, Isak ap ulamrik. Sikda ayala nang arye deibik,’ nyabuka ‘Pia nyanamake’ tenen, Allah moropne.” Israel birye nyabuk.

1 Peterus 1:5

Anggunda, Allah ati diba teneluluma ati, Allah arye, ‘Na mapu malye ubicak’ tenen, el mikip deice arye kalekuka lelilongosulule. Wini talak arye dipdongobuka, dotalak yanamle talak nirya ara, el mikip arye kalekuka lelisilyebuk, sirya daknamle talak akunum uplyopura, Allah arye lyen ning akunum kintiniyeiamsuk ati, Yesus aminyan talak tamubuka yalyopura, lyepnamsile. Atalak ara alyen ning nirya laka daneipnamsile.

Ratapan 3:58

Na ni Allah Yahweh, ance aning-aning nirya talemince, mikip weik deiyoknye ulyama ati, ance na ikin weik ulamse ning ara, lipsisikuka akunum teleb kipdeipnulume. Winipnuluma deice arye, ance na nong ara, akunum lyepropnulume.

Mazmur 37:12

Malye winin ninguk, talibuka wininyak ninye nirya arye, diksukumuk wininyak ninye ati, ‘Sik anang ara, yata wiriptibya deice arye optibye do?’ tenenyake. Tonda, ‘Anang ara, yata wiribuka opnamap do?’ tenen, sik malye wininyak ninye arye, anggun teleb winimunye nang ati, yu kanye bobikirye, malye yupu nyasinyake.

Mazmur 37:15

‘Diksukum wininyak ninye ap, bona utotoa talina kum ninye ap, opnuyap’ tenen, kintinilonyak bukni, sik mining abolamak tace ning arye, sik bidamnye aryukuk olilanamake. Tonda, sik abonyak yin nirya ara, lakuka saknamle.