Mazmur 34:11 - Eipomek

¹¹ Aning atonun, bai tam ulamle weik kuse atonun ning, weik yu ning, el si ara, singa kuse, el din ning ton kum uplirye, din kum diplyopura, mikip kum ulule. Bukni, nun ni koproba Allah Yahweh ati, si erebuka ukirye, ‘El dem aniryuk lyenamsil’ tenen, el amu tamuk unyak ninye nirya ara, teleb ning ati, kum patalule. Sik kam una ati, teleb ning nirya arepliba, kanye imun ton kum ulule. Aning nirya ara, sik dam pia aunamle.

Mazmur 34:11 Referans Kwoze

Amsal 1:7

Weik ikin yupu nyapnusin ning ara ani. ‘Weik kel bikna deiyok ning, moubuka tenepnirye, telebuk unamne’ tenen, patalul ninye ara, minopce nun ni koproba Allah, el si Yahweh ati, ‘Elda pia weik mambulnye’ tenen, ilil upliba, el siuk erebikirye, el amu tamuk unyake. Bukni, kanye bona kumce, pia walwal asa unyak ninye ara, diksukum un ning nirya ati, ‘Nun like,’ tenenyake. Sikce pia weik kel bikna deiyok ning ap, tonda talye mangkau asa una kum bukni, ‘Malye ubipyak’ tenen, moubuka tenebikirye, diksukumuk un ning ati, ‘Nun like,’ tenenyake. Ara, pia walwal uk unyak ninye ati nyapne.

Mazmur 111:10

Yata nang do nirya, sikce, ‘Kume, Allah arye nyasulul yupu atonun kibuka, pia teleb wininamne. Pia teleb, weik kelnye wininamne,’ tenenyak nang nirya ara, minop weik mambul unamak ning ara, ani. Ara, Allah ati, ilil tenebikirye, elce nyasulul yupu moubuka talinyakce, dobolbanamake. Wininamaka deice arye, weik kel nang unamake. Allah arye, “Aning ara, wininamlume. Aning ara, pia kum wininamlume,” nyapdeiamsuk yupu moubuka talikirye, dobolbanyak nang ara, yata ning do nirya, nong noutam ning moubuka tenebikirye, telebuk wininyake. Dipkoprop teleb ning ara, ninye tukwak nang nirya arye, Allah ati, “Anda pia telebuk ulyame,” nyabuka, el si erenauk wininamake. El si erena ara, pia kum batakanamake.

Mazmur 32:8

Na ni Allah Yahweh arye nyasulule. Narye, “Abisikuk binamlulume,” nyabuka, peteresinye bisikuk banamlume. Ara, ‘Sikce talibuka wininamak ning nirya ap, sik kam unamak talak nirya ap, pia telebuk wininamle’ tenen, “Abisikuk banamlume. Awinin ning ara, telebe, aning ara, malye ning,” nyabuka, peterenamsine. Winipsinirye, anggunti kalikuka melipsiniba, diksukum bisikuk banamlume.

Yesaya 28:9

Nyabukce, ayupu ton dukdongobuka nyabuk. “Tonda sikce malye kanye bobuka, na Allah ati nyaninyake. Allah arye nunti, ‘Danto nang peterepnun’ tenen, nyasulul do? ‘Yata nang ati nyapnun’ tenen, ayupu weik tonun lak nyasulul do? Elce, nunti, ‘Sikda kanye bona kumce, milo mapu atonun unyake,’ tenesilirye nyasulul do? Elce, nunti, ‘Sikda kanye bona kumce, moum tuba dinyak mapu atonun unyake,’ tenesilirye nyasulul do?

Amsal 8:17

Sikce nati patapliba, ‘Se, pia weik kel bikna deiyok ning ton doproptibye’ tenen, tuba teneninyak ninye ara, narye sikti, bico tenenirye, melinune. Tonda, yata mutuku ninye do nirya, sikce, ‘Se pia weik kel bikna deiyok ning doproptibye’ tenen, nati patapliba, pia pi dobuka, eninyak ninye ara, dipkoprob sikce pia weik kel bikna deiyok ning, akunum talibuka unamake.

Amsal 7:24

Ati ara, na mapu nirya ati, narye, “Winibuka upnamlume,” nyabuka nyasinye yupu moubuka kekepmunce, kel biknamlulume.

Amsal 4:1

Se, amapo, anggun ni yapu arye nyasinyak yupu nirya ara, pia moubuka kekenamlulume. Winibuka umunce, anggun ni yapu arye nyanyak yupu nirya ara, moubuka kekepmunyopura, anggun kel bikna ning ara, pia weika arye kel bikinamlume.

Mazmur 66:16

Yata mutuku nang do nirya, Allah ati ilil tenelulumce, ulamlum nang nirya ara, anggun babye, na amot nyanmanye dam yamunce, kekenamlume. “Allah arye, na melina ati, mambul pil melibuka dolamnuk ning ara, ani,” nyabuka nuknirye, laka nyanamne. Ati, anggun nirya ara, na dam yamunce, kekepnululume!

Amsal 22:6

Anggun mapu nirya ati ara, ‘Teleb un ninguk talibikirye, teleb bisikuk banamak’ tenen, moubuka peterenamlume. Winipmunce, sik mapu nirya ati wenebuka, teleb kibuka peteremunce, anggun mapu teleb un bisikuk banamake. Sik mitik mapu unyak talak noutamak, teleb kibuka peterepmunyopura, aminyan talak anggun mapu akunum nebicopura, diksukum un bisik kum batakanamake. Sik mangkau arye tia talak ati, yuk malye bisik badikiba, malye winipmakca babye, aminyan talak ila tuba tonap, moubuka tenebikirye, malye winin ning batakikcopura, tamubuka teleb un bisikuk yanamake.

2 Timotius 3:15

Tonda, an mitik mi ulamlum talak arye dipdongobuka, anoutam talak nirya, Allah el pia diksukum yupu peterelamkikbuk, akunum kel bikamlume. Allah yupu peterelamsiaka deice arye Allah, ninye ati lyesulul yupu ap, lyen ning ap, nirya ara, kel bikinyabe. Nunce Yesus Kristus ati, dib tenenyap deice arye, Allah lyesulule. Aning nirya ara, Allah el yupu deice arye kel bikinyabe.

Amsal 8:32

Ati ara, anggun na mapu nirya ap, anggun kam nang nirya ap ara, na nyasinye yupu moubuka kekenamnululume. Yata ninye do nirya, narye, “Wininamlulume, aning ara kum wininamlulume. Teleb kibuka un ning ara ani,” nyalisinye yupu moubuka kekebikirye, talibuka dobolbana uk, unamak nang nirya ara, Allah arye melipliba, pia telebuk unamake. Allah arye aninye nirya ati, kanye deiplirye, teleb ulinamle.

Penghotbah 11:9

Ati ara, anggun wel nanguk tuba ululum nang ara, anggun tuba weluk unamlum talak ara, kanye deibuka umunce, pin-pin kanye bobuka unamlume. Anggun talima noutam arye, ‘E, aning ara wininamne, aning ara, ton piripnamaneʼ tenen, teninamlum ning nirya ara, dobolbanamlume. Tonda, anggun asing arye eipmunce, ‘Se, aning ton taliptibye,’ tenelulum ning nirya babye, ‘Talipnunʼ tenen, dobolbanamlume. Wininamlum bukni, kanye moubukapmunce, teninamlume. Anggun wel tuba unamlum talak wininamlum ning nirya ara, Allah arye, anggun malye wininamlum ning nirya ati, dipdelirye, yupu bokeipsilyopura, wenepnamsile. ‘Dauplyeʼ tenen, talye luba kina kum unamle. Ati, pia moubuka teninamlume.

Yohanes 13:33

Nyabukce, ayupu ton nyabuk. “Na mapu, na ap, anggun ap, like mitik anunuk, neika unmabya ani, na yuk bindopnamne. Binyopura, anggunce epdenamnulum bukni, kum eipnamnulume. Narye Yahudi yala deiyok nang ati nyapse touk, anggun babye nyapsine. Ara, na benamne mutuku ara, anggun ap kum bitibye.

Ayub 4:11

Tonda, bai tam kus atonun ning, el si singa kus ati, Allah arye el din ning kum arepmalyeura, din patapliba, diplyopura, el mapu nirya ara, talye yuk-yuk dabanyake. Elifas birye nyabuk.

Mazmur 23:1

Allah el si Yahweh, elce nati, domba basam weilamak atonun, nati melibuka kalikinulule. Ati ara, yata patan ning do nirya, elce kalikuka melinilya deice arye, na patanilye touk, Allah arye nati pia arenamnile.

Mazmur 107:9

Ara, urdem ati kume. Deiyok ara, mek patanmalye ninye ap, dina patanmalye ninye ap, elce yamubuka areliba, dibiceura, boulule. Ati ara, Allah el tibuk, “Telebe, anda weik telebnye winilyame,” nyabuka, el si erebuka kinamake.

Mazmur 112:3

Allah arye teleb kipdeiplyeura, sikda bona ap, yuk dekna weik ning ap aupnamla ati, bona talin nanguk unamake. Tonda, anang arye, diksukum kibuka, telebuk wininamak nang ara, pia kum bataknamake. Tuba-tuba, diksukum telebuk wininamake. Aning ara, min kum uptue.