Mazmur 16:1 - Eipomek

¹ Na ni Allah, ance kalikuka melipnilyame. ‘Ikin upnilyak’ tenen, an dam anyuk yanganune. Anda ninye melina deiyoknye ulyame.

Mazmur 16:1 Referans Kwoze

Mazmur 56:1

Raja Daud birye, aMazmur mot yupu sekuk. Sekukce, Allah yupu mot nyana deiyoknye biti arebukce, “Amot ara, yuk mot, el si ‘Yalma maka ara, weik yo, el si Tarbatin, deice bukmal’ nyalamak mot lelim atonun ubuka nyanamlume,” nyabuk. Sik Pilistin yin talin nang arye, Kat mutuku noutam ara, Daud tomobik talak ara, Daud birye, amot sekuk.

Mazmur 17:8

Na nio, ance nati, pia bicoe tenenilyama ati, ‘An asing koproba arye dimince, kalikinamlam touk, nati melibuka kaliknamnilam’ tenen, moropkine. Atonun, an dam ton deipnimince, kalekuka lyenamnilame na nio. Winipmanto ara, ayam arye, el mapu dobuka, el pol amu tam deiplirye, kalikuka irilamle touk, ‘Ance nati, an dam deipnimince, kalikinamnilam’ tenen, moropkine.

Mazmur 116:6

Ninye kanye talima erelana kumce, kanye lamapdongobuka ululnye bira, Allah Yahweh arye melilule. Ati ara, na mikip pia kum wamnuk talak ara, Allah arye nati, melibuka lyepropnuke.

Mazmur 84:12

Aning ara, talye ati kum nyapne. Allah anda aning-aning deice tam talibuka weiknye umince, kiting dirina ulamle touk, an dirina ara, nun deice deilisilyame. Tonda, ance im deice unyak yin talin malaikat, sik deiyoknye ulyame. Tonda, Allah anda erebuka umince, nunti kaliksiminyeba, nun mal olan nang, nun dam kum yanganyake. An amu tam ubyeba melisilyame. Allah Yahweh arye, tuba-tuba aning-aning yamubuka aresiminyeba, yuk mutuku nang arye, nunti si eresinyake. Yata nang do nirya, malye winina kumce, diksukumuk wininyak nang ati, nun ni Allah Yahweh ance, wininyak nang ati, aning-aning nirya yamubuka aresilyame. Allah ancuk nunti bico tenepsimince, pia weik teleb ning tonok babye, ton kum batakasilyame. Aning nirya, yamubuka aresilyame.

Mazmur 31:23

Atalak ara, na kanye ara, ilil weik upnuk talak ara, narye ayupu nyapse. Ara, “Se, nara Allah dam kum unune. Na on nang arye, pia yuk mutuku noutam bobinamnikba, asukumuk ununa ati, Allah arye eibuka, pia kum melipnutue,” nyabuka, malye nyabuka engepse. Bukni, narye Allah anti, moropkise ning nirya ara, ance akunum kekepnulume. Ara, narye anti, ‘Naio, ancuk na melipnilyame!’ nyabuka, moropkise yupu ara, ance akunum kekepnulumce, melipnulume.

2 Timotius 1:12

‘Apil donamle’ tenen, wipdeipnuka ati, apiluk donuna ati ara, yuk ninye arye, ‘Nun lik’ tenen, ikin ning weika arye, na nong deice delininyak ati ara, na kanye mambul kanye bobuka, ikin unulule. Bukni, ikin ning na nong deice upnilya babye, narye, ‘Se’ tenen, alye kum dakanune. Ura, talye ati kume. Deiyok ara, ani. Na kanye teniltona pia kum aniryuk, na diba tenyamsinye bira, na kele. Narye Allah ati, ‘Pia moubuka kalikinamnel’ tenen, el deiceuk deiamse ning nirya ara, min kum kum datue. Wini talak arye dipdongobuka, Yesus tamubuka el yanamle talak bukni, anoutam talak nirya ara, Allah arye moubuka kaliknilirye, dinamnile. Na Paulus arye nyapne.

Amsal 2:8

Tonda, sik diksukum telebuk unyak ninye ati, Allah Yahweh arye melilule. Winibuka melilya ati, sik anang arye el tibuk, asum-asum nirya tenekirye, kanye deibuka unyake. Winibuka unyak ninye ati ara, elcuk melibuka kalikilule.

Mazmur 146:5

Bukni, yata nang do nirya, sikce nun apu Yakub ton, kalikuka melilamuk Allah ati, ‘Nara elcuk, nati melibuka lyepnamnileʼ tenenyak nang ara, Allah arye aninye ati, kilinamle. Aning atouk, yata nang do nirya, sikce Allah Yahweh ati, ‘Eluk na si erenun Allah ulula ati, elcuk kalikuka lyepropnamnile,’ tenenyak ninye ara, Yahweh arye aninye ati, teleb kilinamle.

Mazmur 9:10

Yata, bona uto-toa talina kum unyak nang do nirya, yuk nang arye yanibikcopura, amu tam unyak bukni, Allah Yahweh arye anang ati, pia melibuka kalikinamle. Ati ara, kanye imun weik ning, sik dam yanamle talak ara, Allah arye sik ikin upliba, amu tam unyak nang ati, weik tonun melibuka kalikinamle!

Mazmur 7:1

Daud birye kitar ona atonun ning, el si ara kecapi dobuka, Allah Yahweh ati, amot nyabuka engebukce, el mal olananye bira, Benyamin yalanye el si Kush biti, nyabuk.

Mazmur 125:1

Weik asik Yerusalem mutuku noutam welebuka bibirye, ‘Mambul weik sum ati, kwalya kwalibuka wininamap’ tenen, kanye lon mot nyanyabe. Allah Yahweh ati, ‘Dip tenebuka,’ anggun kanye talima nirya, el deice delinyak nang nirya ara, anggunda, weik tonun bukuk mutuku, el si ara, Sion mutuku, pia kum lulukulula nyalula atonun ubuka, sik babye, kanye imun weik ning yatua babye, imun kanye bobuka, kum unamake. Aning kum bukni, sikda pia, kanye deibuka, telebuk unamake.

Mazmur 97:10

Ati ara, yata nang do nirya, sikce, Allah Yahweh ati, ‘Nun ni koproba ani’ tenen, diba tenebuka, elti, kanye deipmunce, bico tenelulum nang nirya ara, anggun nirya arye, malye un ning nirya ati, anggunce, ‘Nun like’ tenenamlume. Allah el tibuk, anggun kanye talima, el deiceuk delinamlume. Allah arye, ‘Naʼ tenen nang, ‘Winibuka wininamak’ tenen, akunum wipdeiamsuk nang ati, “Aning ara, wininamlume. Aning ara, pia kum wininamlume. Winipmunyopura, narye anggunti, pia teleb kilinamsine,” nyapdeiamsuk yupu, moubuka talinyak nang ara, Allah arye, pia melibuka kalikisulule. Winilula ati, anggun mal olan nang ap, sik pia malye ning talibuka, wininyak nang ap ati, obuka sirya daklyopura, el ‘Naʼ tenen nang anggunti dobuka, teleb kipdeipnamsile.

Mazmur 60:1

Raja Daud birye, Mazmur yupu mot sekuk. Daud birye nyabuk. “Ara, Allah yupu mot nyana deiyoknye arena ati, sekuk. Tonda amot ara, yuk Allah yupu mot, el si ara, Urasin Teleb Keit Lelamle Ning el si ara, Bunga Bakung, amot lelilim nyalamle touk, asekeipmasin mot babye atonun nyanamlume,” nyabuk. Amazmur yupu ara, Israel nang peterena ati, Daud birye sekuk.

Mazmur 37:28

Aning ara, talye ati kum nyapsine. Deiyok ara, ani. Sik diksukumuk wininyak ninye ara, Allah el si Yahweh arye, sik aninye ati, weik arye bico tenelirye, pia melilule. Tonda, yata ninye do nirya, nun ni koproba Allah ati, ‘Elda weik mambulnye ulula anya arye, el amu tamuk ubirye, elce nyalul yupu moubuka talibibirye, diksukumuk wininamabe’ tenen, telebuk wininyak ninye nirya ara, Allah arye, pia kum bataknamle. Aninye ap, sikce deibikceba, dadeipdanin banamak ninye babye, Allah arye aninye nirya ati, pia kalikuka melinamle. Bukni, sik malye winin ninguk, talibuka malyeuk wininyak ninye ap, sikce deibikceba, dadeipdanin banamak ninye nirya babye, Allah arye aninye ati, wenebuka oplyopura, sik nirya kum upra banamake.

Mazmur 25:20

Ati ara, ‘Na kam un ning ati, moubuka kaliknimince, lyepropniminyopura, kam tuba unamne,’ tenen, moropkine. Tonda, ‘Yu nang arye, malye kipdeipnikiba, alye daknyak’ tenen, ‘Melibuka lyepropnutum’ tenen, moropkine na nio. ‘Yu nang arye, na opnikcak’ tenen, narye an damuk duknuna ati, ‘Ancuk kaliknamnilam’ tenen, morokunune.

Mazmur 17:5

Diba na ni, ance, ‘Aning ara, wininamlume. Aning ara, pia kum wininamlume,’ nyapdeipsulum yupu, pia moubuka talinirye, dipkoprob uk wininune. Winipmanto ara, ninye arye kat tuku deice arye, bisik talye mangkau asa banmakirye, yan dum dukliba, kum saklamaka atonun, kum wininune. Ance nyapdeiamsulum yupu ara, pia moubuka kekenuna ati, malye kum wininune.

2 Korintus 1:9

Aning ara, dipkoprop nyapne. Nun kanye talima noutamak ara, ‘Nun dipkoprop dipnamname,’ tenelamnumu. Pia malye kanye bobuka, ‘Dipnamname,’ tenelamnumu bukni, aning pia ikin ulamsuka ara, talye ati kum upsuke. Deiyok ara, Allah arye nunti, utenebuke. Sikce, ‘Nun tukwak ninye, nun mikip deice aryuk apil doptinimnye, teneprikcak’ tenen, ikin ning arepsukbuk, ikin weik ulamsuke. Tonda, Allah arye nunti utenepsuke. Sikce, ‘Nun mikip deice aryuk kume. Allah ara, akunum dipmakce ninye kam bulilulnye, el mikip deice aryuk apil doptinimnye’ tenen, ‘Kel biknamake,’ tenepsukce ikin ning arepsuke.

Mazmur 22:8

Yuk ninye arye nyaninyake. “Nunce elti, mangkau kibuka batakipyeba, yata wiribuka unamle do? Anye birye, ‘Allah Yahweh elcuk lyepnamnile’ tenen, diba tenelula anya arye, Allah el siuk erelule. Winilula ati ara, Allah Yahweh arye, elti, kanye deibuka lyepnamle do, kum do? Elda Allah ati diba tenelulnye ati ara, nunda dinauk unamabe,” nyabuka nalininyake.

Mazmur 7:2

“Se na ni Allah Yahweh, ikin unilye talak ara, an damuk yanuka dungnubuka unune. Ati, yu nang arye, ‘Anye opnuyap’ tenen, nati dobolyanganinyak nang ara, ance kalekuka talipnimince, lyepdopnamnilame na nio.