Mazmur 142:7 - Eipomek

⁷ Se, na ni Allah, na pia ikin unilyeba, pia amu tam atonun akunum ununa ati, narye anti moropkinye yupu ara, ‘Moubuka kekepnutum’ tenen, moropkine na nio! Nati, yanipnikirye, ikin weik areninyak nang arye, ‘Kanye ikin ning ton tabakuka arepnikcak’ tenen, na ni Allah, ancuk na lobuka melipnilyame! Ayu nang ara, mikip weik nang unyak bukni, nara mitangnye unune.

Mazmur 142:7 Referans Kwoze

Mazmur 143:11

Na ni Allah, ance melibuka kalikniminyopura, kam tuba unamne. Winipnamne talak ara, yuk nang nirya arye, ‘An si Yahweh ati, bikikirye, an siuk pia erenamkiak’ tenen, moropkine na nio! Anda pia diksukumuk winiminye biti, ance, “Pia kalekuka melinamsine,” nyabuka, nyalin yupu deice arye nyapdeiamsulum touk, na ikin unulul noutam arye, lyepdopnamnilame na nio!

Mazmur 146:7

Malye nang arye, yuk nang ati, yanibikirye, ikin ning, sik nong deice delinyak ninye ati ara, Allah Yahweh arye, imun kanye bobuka, unyak nang ati, melibuka teleb kilinamle! Tonda, Allah elcuk sik din patalye ninye ati, din ning dobuka arelule. Tonda, ikin kanye bobuka unyak nang do, aning atouk ton deiyok kum wamlyebuk, wenen aik pum dongobiceba, unyak ninye do nirya ara, Yahweh birye loplobuka, lyelolule.

Mazmur 13:6

Bukni, na ni Allaho, narye anti pia diba tenekunune. Ati ance, “Bico tenepsinirye, narye, ‘Winipnamsine,’ nyabuka, nyalin yupu deice arye nyapdeipsise yupu nirya ara, pia dipkoprob winipnamnarya!” Anyapdeipmasulum ning ara, pia diba tenekunune. Na talima noutam nirya ara, an deiceuk deipkine. Ati ara, ance lyepnamnilama ati, na kanye deipnamkine. Narye an Allah Yahweh ati, si ereipkinirye, mot nyanamkine. Deiyok ara, ance pia teleb kibuka meliamnuluma ati, mot nyanirye, an siuk tuba-tuba pia erenamkine.

Yakobus 5:11

Anggun kele, ikin ning weik ulamu bukni, sik batakna kum arye, diba tenelamikce, pia pi dobuka, pil dolamik nang ulamik. Winilamika ati, Allah arye sikti, teleb ubuka kipdeiamukbuk, kanye deibuka ulamik. Tonda, nunce, ‘Anang ara, weik mambule, sik pia telebuk ulamik,’ tenenyabe. Anggunda ayupu akunum kekelamlume. Ayub ara, el nong deice ikin ning pia weik ulamu bukni, teniltona kum arye, pia palibuka tunim abuka ulamuk. Daulamukba, Allah arye ila tamubuka aribuk ning ara, akunum kekelamlumce kel biklume. Nun ni Allah ara, pia bico tenepsilirye, nun malye wininyap ning ati optapsitu bukni, lubakipsilirye, nun patapsilye ning nirya ati, talye arisulule.

Rasul 2:24

Yesus dibuk bukni, Yesus dipnarye, el nong tup ara, lyupmanto kumnye binye arye, Yesus dibuk bukni, Allah arye tamubuka kam bukibuk.

Yesaya 61:1

Nabi Yesaya birye nyabuk. Allah aning-aning deice tam talibuka Weik Mikip Deiyok ululnye, Allah Yahweh arye, ‘Wininamne,’ tenelye touk winilule. El Sambala mikip weik ning na deice deipnuke. Allah Yahweh winipnukce, nati ‘Elce laka teleb yupu nyalbanamle’ tenen, wipdeipnuke. Ara, bona utotoa kum talinyak ninye ap, imun kanye bobuka, unyak ninye ap ati, nyanamlyame. Kanye talima uk dipliba ikin kanye bobuka unyak ninye ati, ‘Allah arye anggun kwa dibuka melinamsile,’ nyabuka laka nyanamlyame. Tonda malye kum winilamik buk, wenen aik noutam bunyak nang ati, ‘Allah arye lolinamsile,’ nyabuka laka nyanamlume. Tonda sik asing kubukba kwelakirye, kunukna noutamak unyak ninye ati, “Allah arye anggun asing laipnamsile,” nyabuka laka nyanamlyame. Anggun nirya ati, “Allah arye lyepnamsile,” nyabuka, ‘Nyalbanamle’ tenen, Allah Yahweh arye na wipdeipnuke. Nabi Yesaya birye nyabuk.

Mazmur 9:14

Se, diba na ni Allah Yahweh, ‘Na malye winilamse ning ati, pia malye winiluleʼ tenen, adiparyuk wenepnutum bukni, ‘Bico tenepnutumce, teleb kipdeipnutum’ tenen moropkine. Yu nang arye, nati, ‘Anye bira pia nun lik,’ tenepnikirye, ikin ning na nong deice delininyak ning ara, ance moubuka dinunilyame na nio! Sikce ikin weik kipdeipnikiba, nara akunum dipmatinyeba, kuna bisik bublan dam binmatini bukni, ancuk, na nong dobuka erepdeipnulumba, kam tuba unune.

Mazmur 142:1

Raja Daud birye, ‘Yu nang arye opnicak’ tenen, weik keil deiya pum tam duknubuk talak arye, nyabuk yupu. Ayupu ara, sik ‘Israel nang peterepnamne’ tenen, sekuk Mazmur yupu mot. Tonda, Allah morona yupu deice arye sekuk. Daud birye nyabuk yupu ara, ani.

Mazmur 119:17

Nara, ‘Allah el pil donanye birye, telebuk unamne,’ tenenun ati, ance weik arye melipniminba, na kanye talima namin kilinamnilame. Winipniminyopura, na upnin banamne talak nirya ara, ance nyalilalum yupu uk, kekebuka winipnin banamne.

Mazmur 116:7

Allah el si Yahweh arye, akunum melipnuka ati, na kanye talima lamapdongobuka arye, el amu tamuk unamne. Ati winipnirye, pia kum teniltonamne.

Mazmur 119:74

Allah ance, “Aning wininamlulume, teleb winina ara, ani,” nyapdeiamsulum yupu nirya ara, kum bataknamne. ‘Ayupu ara, na tuba-tuba tenena arye, ayupu deice arye, teleb ubuka winilinamnile’ tenen, moubuka dobolbanamne. An nyasiminye yupu ati, kanye delinuna anya arye, anti ilil upliba, ‘Nun ni Allah, mambul weik ulul’ tenen, unyak ninye arye nati, eipnicopura, kanye delinamniake.

Mazmur 34:2

Raja Daud birye, nyabuk. “Se, na ni Allah Yahweh, asum-asum nirya, na ni Allah ati, ‘Anda pia telebe,’ nyabuka, mot senirye, an si atibuk, pia erenamkine. Tonda, tuba-tuba Allah el si ati, si donirye, mot senamne ning ara, pia kum bataknamne.

Mazmur 31:8

Allah anda narye pia, “Bico tenekinirye, narye anti, winibuka pia teleb kipdeipnamkine,” nyalin yupu deice arye, nyapdeiamkise ning nirya ara, ‘Batakna kumce, pia melinamkine,’ nyanilyama ati, kanye deipnirye, telebuk wininamne. Ara, na ona ati yu nang arye, warebuka dininyak nang ati, ance akunum eibuka, nati akunum melinimince, lyelonilyama ati, pia kanye deipkine na nio.

Mazmur 9:3

Narye an tonok ati, kanye deipnirye, pia kil-kil kanye bobuka unamne. Se, na ni Allah, anda aning-aning nirya talibuka, deice tam erebuka, Pia Mikip Weiknye ulyama ati, an siuk erepnirye, an si ati, “Pia telebe,” nyanamkine.

Mazmur 38:20

Narye sik anang ati, telebuk kilinun bukni, sikce tamubuka, malye winin ninguk kilininyake. Diba, narye, ‘Teleb winin ninguk talibuka wininamne,’ tenepnirye, aninguk talibuka wininun bukni, nati, ‘Anye bira nun lik’ tenen, na mal olan nang arye, ‘Anye biti, malye kipdeibibiba, ikin weik unamle,’ tenenauk uninyake.

Mazmur 143:9

Na ni Yahweh, ‘Na ona ati, yu nang arye, opnicak’ tenen, ‘Ancuk sik dam arye lyepnamnilam’ tenen, morokunune na nio! Ancuk nati, ‘Kalikuka melipnimince, teleb kibuka melipnamnilam’ tenen, an dam akunum bikbik abuka yanamse.