Mazmur 138:2 - Eipomek

² Tonda, Allah an si eren aik, malye ning pia kumak, pia teleb lek aik ubuka dam arye, an si erena ati, tuku deice kutam dipdongobuka, anyaik eipnirye, an kekena ati, amot nyana deice arye nyanune. Wininuna deiyok ara ani. Ara, Allah an ap, an si pia telebnye ap, ance, “Winipnamne,” nyalyam yupu atonunuk kibuka, winilyam ning nirya ap, aning nirya ati, “Telebe,” nyapkine. Tonda, anda pia weik tonun bico tenesimince, “Batakna pia kumce, winibuka teleb kilinamsine,” nyabuka, nyalin yupu deice arye nyalisilyam touk, aning tuba-tuba winisilyam ning ati, narye, “Pia telebe,” nyapkine na nio. Ati ara, Allah an siuk pia erekunune. Ara, aning-aning nirya aupmal bukni, ance yuk awamlye ning deice tam ara, an si akunum erebuka deiamluma ati, an si ara, weik mambul si ulule.

Mazmur 138:2 Referans Kwoze

Matius 5:18

Na dipkoprop nyapsine. Wini talak arye dipdongobuka, im ap, tuku ap, kum danamle talak noutamak nirya ara, Allah arye, ‘Aning wininamlulume, aning ara pia kum wininamlulume,’ nyapdeibukba, Musa arye sekeiyamsuk yupu, mem yupu noutamak ara, tonok huruf babye, pia mitik sekna ning babye, min kum, kum danamle. Ayupu nirya, sik lyalamik touk, dipkoprop nong upnamle.

Yesaya 42:21

Na Allah Yahweh unune. Nara malye winin ning tonok babye, kum unirye, pia diksukumuk unune. Diksukumuk ununa anya arye, narye Israel ninye ati, ‘Aning wininamlulume, aning ara kum wininamlulume,’ nyapdeiamsise ning ara, pia teleb kibuka nyalamsise. Ayupu ara, pia teleb dirina weik kililamle yupu ulule. Winipsa ati, na kanye deiamse.

Mazmur 56:10

Tonok ning ara, pia dipkoprob akunum bikamse. Ara, na ni Allah arye, nati, ‘Anye pia melinuna deice arye, teleb kilinamne,’ tuba tenelula ara, na akunum bikamse. Ati, dan talak do nirya, narye, ‘Allah melipnilyame,’ nyabuka, moronun talak nirya ara, Allah el adiparyuk, yanuka melinulule.

Matius 24:35

Im deice tam ulye ning nirya ap, tukwak tam ulye ning nirya ap ara, kum danamle bukni, na nyasinye yupu nirya ara, tonok babye ton kum, kum danamle. Pia aupnamle. Na yupu nyasinye touk dipkoprop nong upnamle. Yesus arye nyabuk.

Mazmur 5:7

Sik tilila yupu nyakce nang ara, ance wenebuka opminyakarye, sirya daknulyame. Allah Yahweh, anda sik yuk nang olamak nang ap, talye yupu nyakce nang ap ara, ance, ‘Anang ara, na pia like,’ tenelyame.

Mazmur 28:2

‘Winipnyak’ tenen, na nio, narye anti, ‘Melibuka lyepnilyame,’ nyabuka, ‘Moropkin yupu kekepnunilam’ tenen, na nio narye engebuka moropkine. Na ikin unilye ning ati, ‘Ance melibuka lyepnilyame,’ nyabuka moropkine na nio. ‘Allah anti moropnukin’ tenen ati, na taruk erepnirye, an si eren aik pum tam, aik wilibuka Pia Teleb Lek Aik kibuk dam eipnirye, an Allah ati morokunune.

Yohanes 1:17

Ayupu nyapmasina deiyok ara, ani. Ara, Allah arye, ‘Wininamlume, aning ara kum wininamlume,’ nyapdeiamukba, Musa kekebukce sekeiyamsuk mem yupu nirya ara, Musa deice arye areamsuk. Bukni, dipkoprop winina deiyok ning ap, Allah arye el kanye aryuk nunti bico tenesilirye, melibuka lyesulul ning deiyok ning ap, tukwak ninye ati melilana deiyok ning ap, ninye lyena deiyok ning nirya ap ara, Yesus Kristus deice arye arisulule.

Mazmur 56:4

Ilil weik unilye talak ara, narye anti, ‘Elce lyepnamnil’ tenen, diba tenepkinirye, na talima, an deiceuk deilikunune.

Mazmur 115:1

Nun ni Allah Yahweh, antibuk si erebuka kinamkiyabe. Ara, nun tibuk kibuka, kum erelanamabe. Bukni, nun ni Allah, ance nunti, bico tenepsimince, melisilyama ati, nun adiparyuk anti, si erebuka kinamkiyabe. Tonda, ance nunti, ‘Wininamsine,’ nyabuka, nyalin yupu nyapdeiamsulum ning nirya ara, tonok ning babye, kum bataksulumce, aning nirya winilamsilama ati, an siuk pia erekinyabe.

Daniel 6:10

Ayupu nyapdeibukba, Daniel kekebuk. Kekebukopura, adiparyuk tamubuka, el ulamuk aik biyukce, asum-asum nirya ulamuk touk, el im aik jendela kukuk. Ara, Yerusalem tam botcamik jendela ara, kukeibukce, el Allah si erelamuk touk, gutam tuku dipdongobuka, Allah morobukce, Allah el si erena ati, mot sebuk. Ara, Allah yupu mot sebuka winililamuk touk, asum babye atonun, Allah ati, teleb abuka kinmok.

Yesaya 63:7

Allah Yahweh, el kanye aryuk, Israel ninye ati teleb kibuka melilamuk ning ara, ‘Ninye nirya kekenamak’ tenen, laka nyanamne. Amambul pil dolamuk ning nirya ati, ninye nirya arye, Allah ati, el si erebuka kinamake. Nun ni koprop Yahweh arye meliamsuk ning ara, kum nukmanto ulul touk pia weik tonun laka nyanamne. Yuk yala ninye ara, pia kum meilyamuk bukni, nun Israel yala ninye ati, weik tonun melilamsuke. Nun malye ulamupu ning ati, talye lukparabuka opsutu bukni, bico tenelamsukce, lyelolamsuke. Allah arye nun Israel ninye ati, batakna pia kumce, weik tonun bico tenesilirye, melisulula deice arye, lyesulule.

Mazmur 99:9

Ati ara, nun Israel yala nang nirya arye, nun si erenyap Allah, el si Yahweh ati, “Anda pia teleb ulyame,” nyabuka, el si weik tonun erenamabe. Wininamap talak arye, Allah el si eren aik domik mutuku kon deice, amutuku dam yanganamabe. Amutuku deice yapyopura, el si erebibirye, kutam tuku deice dipdongobuka, kisok kanubuka, el pia diksukumuk teleb winilul ning tenebuka, el siuk erenamabe. Aning wininamap talak ara, talye ati kume. Deiyok ara, nun ni Allah Yahweh, elda pia teleb leknye ulula ati, el siuk erebibirye, el ulye mutuku kon dam yapyopura, kutam tuku dipdongobuka, kisok kanupdongobibirye, el siuk erenamabe.

Mazmur 99:5

Nun Israel yala nang nirya arye, Allah Yahweh, el siuk erenyaba ati, elti, ara, “Naio anda pia telebuk ulyame,” nyabuka, el si tuba erenamabe. Tonda, winipmanto ara, dikdik sena ati, el yan erebuka delilula dam, anggun nirya arye, kutam tuku deice dipdongobuka, kisok kanubuka, el siuk erenamlume. Nun ni koproba Allah, elda pia yuke. Malye winin ning tonok babye, pia kum winilirye. Teleb, lek dem ulule.

Mazmur 86:15

Bukni na ni Allah, na kele, anda aning-aning nirya talimince, tenesimince, deice tam erebuka, mikip weiknye ulyame. Bukni, nun malye winin ning ati, adiparyuk oplopsutum buk, namin kinauk usilyamce, telebuk kilisilyame. Tonda, nun malye wininyap ning ati, minopce yu kum tenesilyame. Tonda, ance, ‘Weik tonun pia bico tenesimince, pia teleb kilinamsine,’ nyabuka, nyalin yupu deice ara, weik tonun nyasilyam ning nirya ara, batakna kumce, pia teleb kibuka kilisilyame. Tonda, ance, aning nirya ati ara, narye, ‘Winipnamsine, winipnamsine,’ nyabuka, nyasilyam atonun kibuka, pia tuba melisilyame.

Mazmur 85:10

Allah arye, “Aning ara, wininamlume. Aning ara, pia kum wininamlume,” nyapdeipsuk yupu moubuka talibikirye, aninguk wininyak nang ati ara, Allah arye anggun dam yana, melibuka lyelosulule. Ara talye ati kum bukni, ‘Allah el pia teleb ulul ning ap, mikip weik winilul ning ap, nun mutuku noutam arye laka kipdeipsilyeba, ninye nirya eibikirye, el Allah ati biknamak’ tenen, moropkine na nio.

Yohanes 10:35

Nun kele, Allah el yupu ara, kum kum danamle. Allah arye nyalul yupu nirya ara nong dipkoprop upnamle. Allah yupu dipkoprop aupmal noutamak ara, Allah arye el yupu aribukba, doprobik nang, tukwak mutuku ninye deiyok nang ati, “Anggunda, Allah el mapu ululume,” nyabuk.

1 Raja-Raja 8:15

Salomo birye nyabuk yupu ara ani. Nun ni Allah, an si Yahweh ati, ‘Anda pia telebe,’ nyapkiyabe. Ancuk nun Israel ninye ati pia kalikuka meliamsulum touk, tuba melisilyame. Anda nun ni Allah tonok ulyame. Na ni koproba Daud biti, an Allah arye, ‘Wininamkine,’ nyapdeiplume. An si bam bol arye nyaplum yupu ara, wini talak an taruk aryuk akunum winipmalame. Nong akunum upmasile. Nun ni Allah, ance nyapdeiamsulum yupu ara ani.

1 Raja-Raja 8:20

Nyabukce ayupu ton nyabuk. “Ati ara, narye nyapsine. Nun ni Allah el si Yahweh arye, na ni koproba Daud biti, ‘Wininamne,’ nyapdeiamuk yupu dipkoprob nong akunum uple. Allah el si Yahweh arye, ‘Winipnamle,’ nyabuka nyalin yupu nyapdeiamuk touk, na ni koprop Daud el bulamukak akunum punupsirye, Israel ninye nirya talina ati, sik weik deiyoknye, Raja akunum unune. Tonda, Allah arye nyapdeiamuk touk, narye Allah el si Yahweh, el si eren aik akunum dopse. Anyaik pum tam ara, ninye weik arye Allah si erenamake. Nun ni Allah, elcuk el mapu Israel ninye ati, tuba kalikuka melilule.

1 Raja-Raja 8:24

Aning atonun, ancuk na ni koprop Daud biti, ‘Wininamkine,’ nyapdeiamlum yupu ara, akunum winipmasilame. An si bam bol arye nyaplum yupu ara, wini talak an taruk aryuk akunum winipmasilame. Nong akunum upmasilba, arup arye eipmabe.”

Mazmur 5:8

Bukni, ance, “Winipnamsine,” nyalin yupu deice nyapdeiamsulum ning ap, weik tonun bico teneseminya deice arye, ance lyenilyame. Ati, narye, an si erena ati domik aik pum tam wekelyanganamne. An si eren aik pum tam, Pia Teleb Lek Aik ubuk tam ara, eipnirye, an si erebuka kina ati, an dam ara, na urasin tuku deice deipnamne. Winipnamna deiyok ara, narye anti, ‘Se Allah bira, pia teleb ulule’ tenen, ilil upniliba, an siuk erenamkine.