Mazmur 119:15 - Eipomek

¹⁵ Ance, “Aning ara, wininamlulume. Aning ara, pia kum wininamlulume. Teleb winina ara, ani,” nyalisilyam yupu nirya ara, ‘Deiyok noutam ning dan do?’ tenen, narye pia moubuka tenepnirye, talibuka wininamne. Aning atonun, ance, “Aning ara, wininamlulume,” nyapdeiamsulum ning ati, pia teninamne. Malye winin ning tenena kumce, an yupu uk moubuka tenenauk unamne.

Mazmur 119:15 Referans Kwoze

Mazmur 1:2

Bukni, sik Allah ati dib tenenyak ninye ara, sik patalul ning ara, Allah Yahweh arye, ‘Wininamlulume, aning ara kum wininamlulume,’ nyabuk yupu nirya atibuk, kanye deibikirye, moubuka kekenyake. Ara, keting noutam talak babye, lukunyan talak babye, Allah Yahweh elce nyalilamsuk yupu nirya kekebikirye, ‘Deiyok ara, aning ati nyabuk do?’ tenen, moubuka tenebikirye, unamake. Aninye ara, Allah arye melilamliba, telebuk unamake.

Yakobus 1:25

Bukni, yata nang do nirya, Allah arye, ‘Wininamak’ tenen, diksukum areamsuk yupu ara, moubuka pia kel kibikirye, luba kina kum arye, pia dobolbalamice nang ara, sik kanye deibuka unyak ning nirya ara, telebuk unamake. Allah arye diksukum yupu areamsuk ning ara, malye ning arye kouamsuk noutam arye lobuka delisulule.

Mazmur 119:148

Aning atonun, inipmaliba, lukunyan noutamak ninye arye, mapmace talak nirya babye, ance nunti, “Winibuka melibuka, teleb updeipnamsine,” nyabuka, nyalina yupu deice nyapdeiamsulum yupu ati, moubuka nuknirye, ‘Deiyok dan do?’ tenen, pia teninuk unune.

Mazmur 119:97

Dipkoprop nara, Allah ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu atibuk, kanye deibuka unune. Asum-asum nirya noutamak, ayupu moubuka tenepnirye wininune.

Mazmur 119:78

Deiyok kum upmanile bukni, nati, ‘Anye bira nun like,’ tenepnikirye, sik talima erebuka, kwalibuka unyak nang arye, nati malye kililamnilce, ikin ning, na nong deice delilamnik. Ati ara, ‘Ance sikti, wenepminyebuk, alye daknamak’ tenen, moropkine. Ance sik anang ati, wenepminba, alye dakdanamak bukni, nara ance, “Aning wininamlulume. Teleb winina ara ani,” nyalisilyam yupu nirya ara, ‘Deiyok noutam ning dan do?’ tenen, narye pia moubuka tenepnirye, talinauk unamne.

Mazmur 119:48

Narye ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu ati, kanye deipnirye, ayupu ap, an ap ati, pia telebe nyabuka, si erekunune. Tonda, ance nunti, nyapdeiamsulum yupu ati, ‘Deiyok noutam ning ara, dan do?’ tenen, ayupu nirya ara, nuknirye moubuka tenenamne.

Mazmur 119:131

Ance nyasiminye yupu weik arye, patanulul anya arye, na kanye talima noutamak ayupu ati tenipdenirye, ‘Se ayupu ara, weik tonun ton kel biktinye’ tenen, talimauk dinulule. Winipmanto ara, kam ara, mek pataliba, si akuka kang-kang alamle tonun, unune. Ara, talye ati kume. Na ni Allah ance, “Aning ara, wininalulume. Aning ara, pia kum wininamlulume,” nyapdeiamsulum yupu nirya ati ara, ‘Ayupu kel biktinye’ tenen, pia patanilya deice arye unune.

Mazmur 119:117

Nara, na ni Allah, ‘Ikin ning na dam yanuka, malye kipnilyakʼ tenen, ancuk erepnimince, teleb sukumuk deipnamnilyame. Winibuka akunum deipniminyopura, nara telebuk unamne. Tonda, ance nyasiminye yupu nirya ara, moubuka kekepmince, aninguk pia talinamlyame.

Mazmur 119:23

Tonda, amutuku noutamak talibuka wininyakce, ninye deiyok nang nirya arye, bulubuka wekikirye, nati on yupu talinamniak. Sikce winibuka yupu talinamniyak talak nirya babye, nara an pil donanye ununa anya arye, ance, “Teleb winina ara, ani,” nyapdeiamsulum yupu uk, talibuka dobolbanirye, pia tuba tenebuka wininamne.

Mazmur 119:6

Se, na ni Allah, ance nyapdeiamsulum yupu nirya, moubuka talepnirye, teleb winin ninguk, winipnin banamne. Winibuka unyopura, nara ilil una ap, alye dakna ap ara, pia kum unamne.

Kejadian 24:63

El li dam yanuka unmoka ani, tonok sum sintam ara, ‘Na yuk Allah ati tenenamne’ tenebukce, tonok wa win dam binuka bukmok. Bukmokce, kisok erebuka otam dildeyukce, unta basam bisik noutamak yanganmokba, eibuk.

Mazmur 119:99

Dipkoprop nara, Allah ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu atibuk, kanye deibuka unirye, asum-asum nirya noutamak, ayupu moubuka tenepnirye, talinune. Ati ara, na moubuka teninun ning ara, weik arye teninun bukni, na peterena deiyok nang ara, ‘Deiyok ani’ tenen, sik mitika aryuk, bikinyake. Sik tenelamik atonun, kum tenenune. Nara, pia weik arye tenebuka bikinune.