Mazmur 112:7 - Eipomek

⁷ Tonda, pia diksukum kibuka, telebuk wininyak nang ara, yuk nang arye, weik tilila yupu ap, kanye imun yupu ap bobuka, sik dam yanuka laka nyabikce babye, aning ara, ‘Se, yata wiriptibye do?’ tenen, ilil pia kum unamake. Deiyok ara ani. Sik diksukum telebuk wininyak nang ara, sik kanye talima noutam nirya ara, Allah Yahweh, el deiceuk deibikirye, ‘Allah aryuk melibuka lyepropnamsil’ tenen, Allah ati diba tenenauk unyaka atia. Sik kanye talima noutam nirya ara, ilil uplyeba, pia morolkiriknauk kum unyake.

Mazmur 112:7 Referans Kwoze

Mazmur 57:7

Na on nang arye, ‘Anye tomobibirye, el nong deice, ikin ning deibibirye, opnamap’ tenen, warikininyake. Ayu nang arye, ikin ning pia weik, na deice delininyaka ati, na talimauk dinilirye, pia mitang dem unulule. Ninye on nang arye, ‘Bai tam kam ulye ning opnuyap’ tenen, tuku pum tam palibikirye, yo tace lubuka, atuku pum tam ikuka delilamak touk, sikce na ban bisik ara, ninye arye, tuku lukuka deibikce, yo tace lubuka atuku pum tam ikuka kintinip deibik. Winilamik bukni, sikce, ‘Yuknye opnuyap’ tenen, kintinip deiamik ning pum tam ara, sik damang akintinip deiamik ning pum tamuk, sakuka poulbiyikce, opdayik.

Amsal 1:33

Bukni, narye pia weik kel bikna deiyok ning ati, laka nyasinye yupu moubuka kekece ninye nirya ara, pia kam unyakce, telebuk unamake. Ara, sikce, ‘Se, yatato ikin ning arye nun dam yaliba, imun kanye bobuka unamap do?’ tenena kumce, talye kanye bobuka, pia telebuk unamake. Aninye ara, ilil kanye bobuka, kum unamak bukni, kanye deibikirye darabuka unamake.

Mazmur 118:6

Aning ati ara, na ilil upniliba, yok sirim kum talipnamnile. Ara, Allah Yahweh aryuk, pia tuba melinilyame. Ati ninye yuk nang, sik mikip deice arye, na damak yanuka, asilen ning ton kum winipnitinge. Ara, Allah arye tuba melinulula ati nyapne.

Yohanes 14:1

Yesus arye el wipdeiamuk nang ati nyabuk. “Anggunce mambul kanye bobuka talima bouku sukuna kum unamlume. ‘Allah elce, melinamsil’ tenen, diba tenebuka anggun kanye talima el deice delinamlulume. Tonda aning atonun, nati, ‘Elce melinamsil’ tenen, dib tenebuka, anggun kanye talima na deice delinamnulume.

Mazmur 64:10

Ati, Allah arye sik malye wininyak nang ati, akunum wenebuka oplyopura, yuk-yuk nang nirya, aning eibuka bikikcopura, ilil weik upnamle. Ilil weik uplyopura, sik nirya arye, ‘Se, Allah arye, amalye winin nang wenebuka opmala ara, winibuka-winibuka winipmala deice arye, sik yu nang akunum wenebuka opmal atia, nyabuka yuk mutuku nang ati, laka nyalbinamake. Tonda, Allah arye amalye wininyak nang opmalinye biti, pia moubuka tenebikirye, biknamake.

Mazmur 34:4

Ati ara, anggun nirya, na dam yanganamlume. Yamunba nun nirya arye, “Allah el mikip weik arye winilul ning nirya ara, pia telebuk winilule,” nyabuka, Allah el siuk erenamabe. Aubirye, Allah el si erebibirye, neika si erenamabe. Winibuka ulamepya ani, ninye weika arye, tonap tabakuka kekebikirye, ‘E, diba Allah elda pia mambulnye ulule,’ tenebuka unamake.

Daniel 3:16

Ura, ayupu nyabuk talak ara, Sadrak, Mesak, Abednego ap, sikce ninye deiyoknye Nebukadnesar ati, tamubuka nyabik. “Nai Rajao, nun dem aryuk, kum lyepdatibye. Anyapmasilam yupu ara, nun bidamnye arye, yupu kum sekdatibye,” nyabik.

Mazmur 62:8

Ninye tukwak nang arye kum bukni, ikin upmanilibuk na ni Allah arye, lyepnilyopura, teleb kibuka erepdeipniliba, yuk nang arye, nati, si erebuka kininyake. Allah ara, elcuk melibuka kalikinulule. Yata ikin ning do nirya, el dam kum yanuka opnutua ati, el dam ara, na telebuk unune. Elda pia mikip weik keil aik atonun, tonda weik mutuku kon keil atonunye ulule.

Rasul 27:25

Ayupu nyabukopura, ayupu ton nyabuk. “Allah arye nyapnuka ati, narye Allah ati pia dipkoprop tenenune. El nyapmanuka atonun winipnamsile. Ati, anggun anang nirya ilil kum arye, mikip aryuk unamlume.

Lukas 21:9

Tonda aminyan talak ninye arye, “Ton tam nang ap, ton tam nang ap oldanmake,” nyabuka nyanamaka ap, “Nun mutuku talisinyak nang ‘Obuka daknamap’ tenen, oldanmake,” nyanamaka ap, yanuka nyabikiba, kekepmunyopura, ilil kum unamsulule. Allah arye, ‘Atonun ning wininamle,’ akunum tenyamuk ati, wininamle bukni, ‘Sirya talak sirya dakna ning ara, kabula,’ tenenamlulume.

Lukas 21:19

Anggun ilil una kum aryuk, talye tunim abuka upmunyopura, Allah arye lyepnamsile. Ara, anggun nonguk ara opsitinge bukni, Allah arye kam una deiyok ning akunum arepsilyopura, anggun sambalauk pia kum dipnamle. Pia kamuk unamle.

Rasul 21:13

Malye nyabuka morobupubuk, Paulus arye tamubuka nyapsuk. “Na akunum tenepsirye binamna anya arye, anggun malye nyabuka, engenmaluma deice arye, anggunce nati mitang kipdeipmanuluma ara, yata ati do? Tonda, Yesus el si ati ara, Yerusalem mutuku binibuk, tapu kouna babye, na nong ona babye, dawinipnamniake. Na akunum tenepsa ati, aning nirya ara, telebuka,” Paulus arye nyabuk.

Rasul 20:24

Nun deiyoknye Yesus arye, pil arepnuk ara, Allah el kanye aryuk nun bico ati, Yesus deice lyepsilirye, talye melisulul yupu, el laka teleb yupu peterena pil arepnuke. ‘Apil nirya doptinirye, sirya daktinyopura, anyuk ara, pia teleb,’ tenenune. Yesus arepnuk pil ara, ‘Pia dopra balamnya ani, sirya daknamne’ tenen, na ona babye, dipna babye, telebe uka. Na kam una ara, ‘Na’ tenen, tenena kum arye, ‘Urtalya, daopnitinge,’ tenenune.” Paulus arye nyabuk.

Ayub 11:15

Ance aning nirya akunum teleb kipdeipminyopura, an urasin erepmince, alye kum dakalanalame. Ara, an talima noutam ap, an dam ap ara, malye un ning ton pia kum upnamkila ati, atalak ara, an taruk erebuka, Allah ati moronalame. Atalak ara, ance, ‘Se, yata ikin ning na dam yanamnil do?’ tenen, ilil pia kum unamkile. Atalak ara, anda mikip arye tikuka, talye mangkau banauk unamlame.

Mazmur 49:6

Yu nang arye, nati, ‘Anye bira nun lik,’ teneninyak nang arye, malye upnikirye, na nong deice ikin deipnikce talak ara, yata deiyok ati, sikti, ilil upnamnil do? Kume, ilil kum upnamnile.