Mazmur 10:14 - Eipomek

¹⁴ Bukni, na ni Allaho, nun akunum biknuyape. Dipkoprop ning ara, ance tukwak nang wininyak ning nirya ara, ance akunum elisilyame. Ara talye ati kum bukni, ance, ‘Sik wininyak ning nirya ati, bita eipnirye, sik wenena ati, dengna arepnamne,’ tenelyame. Tonda atonun, ‘Sik ti, yupu bokeipnamne,’ tenelyame. Ati ara, sik namin asa uk unyak nang arye, ‘Kume, nun wininamap ning ap, nun nong nirya ara, Allah el taruk deice delinyabe,’ tenen, anti pia diba tenekinyake. Tonda, nun ni Allah, ance sik kwaknamne mapu ati, pia moubuka dimince, kalekuka melisilyame!

Mazmur 10:14 Referans Kwoze

Mazmur 68:5

Anggun Israel yala nang nirya ara, Allah ati, “Anda pia teleb ulyame,” nyabuka, mot deice arye, el siuk erenamlume. Ara, im deice arye, dua deice bukuka banmalanye, nun ni Allah ati, kanye lon mot nyamunyak arye, el siuk erenamlume! Nun ni koproba Allah, el si ara, Yahweh ulule. Ati, Allah Yahweh el dam yamunyopura, kanye deibuka unamlume.

Mazmur 146:9

Tonda, Allah Yahweh arye, sik mutuku kum unyak bukni, yuk mutuku noutam, ninye asik nang unyak ninye ati, moubuka dilirye, kalikilule. Aning dem kum bukni, Allah arye kwaknamne mapu ap, youwak kilapu ap nirya ati, tuba-tuba melibuka kalikilulce, sik patan ning ati, talye arelule. Bukni, sik pia malye-malye weik wininyak nang arye, ‘Winipnamabe,’ tenenyak ning ara, Allah arye, yupu sekelulba, nong kum ulule.

Hosea 14:3

Wini talak ara, nun akunum kel kipmabe. Asyur mutuku yin talin nang arye, nunti kum lyepdopnamsiyake. Tonda, nun kuda basam deice bukuka batipya babye, aning arye kum lyepdatibye. Tonda, minop talak ara, nun taruk arye puturubuka deiamupu ning ati, ‘Nun ni yapu ani,’ nyabuka, talye ning ati, si erelamupu bukni, aminyan dounamle talak ara, aning tuba tonap pia kum wininamabe. Aning ara, akunum batakabe. Ara, talye ati kum nyapmabe. Nun ni Allah ancuk, mutuku-mutuku daunyak ninye nirya ap, kwaknan mapu nirya ap, bico tenesimince, melipsilyame. Ati, nun melipmantonye ton kum ulule, an tonoka.” “Nyabuka moronamlume.” Hosea birye, Israel ninye ati nyabuk.

Yeremia 49:11

Se, anggun Edom mutuku ululum nango! Anggunce deiplum bukni, aminyan yanuka unamak mapu nirya ara, na damuk batakdopnululume. Winipmunyeba, narye sik kwaknamne mapu ati, moubuka kalikinamne. Aning atonun, youwak kilapu babye, na damuk deipmunyeba, narye kalekuka melinamne.

Mazmur 55:22

Anye birye, kekena pia teleb yupu nyanulul bukni, el kanye talima pum tam ara, ‘Narye anye biti, olbinyeura, anye opnamne,’ tenenulule. Diba, anye birye, pia namin yupu deice arye, teleb yupu nyanulul bukni, elce nyanulul yupu ara, dipkoprob ninye ona ati, parang ya atonun ulule. Nemalye aryuk, talye yupu uk nyanulule.

Ulangan 10:18

Allah elda, kwaknamne mapu ap, youwak kilapu ap ati, teleb ubuka diksukumuk melilule. Aning atonun, Israel mutuku noutam unyakce, yuk yala ninye asik nang ati, sik patapliba, din ning ap, ongon baju ap, bico tenebuka arelule.

1 Peterus 5:7

Allah arye anggun nirya ati, bico tenepsilirye, pia melisulula anya arye, anggunce, ‘Se, yata wiripnuyap do?’ tenen, imun kanye bobuka, teniltonauk usilye ning nirya ara, Allah el deiceuk delinamlulume.

1 Peterus 4:19

Aning ati ara, na kayapu, Allah arye tenyamsuk touk, malye nang arye ikin ning anggun nong deice deipsikcopura, teniltona kum arye, anggun kwepdeisuknye Allah ati, anggun nong ap, anggun kanye talima ap, anirya dobuka, Allah el deice delinamlulume. Anggunce, anggun bidamang nong ap, kanye ap, Allah ati arepmunyopura, batakna kum, teleb un ninguk ubuka, pia diksukumuk unamlulume. Nun kwepdeisuknye Allah ara, pia batakna kum, melibuka dinauk usulule.

2 Timotius 1:12

‘Apil donamle’ tenen, wipdeipnuka ati, apiluk donuna ati ara, yuk ninye arye, ‘Nun lik’ tenen, ikin ning weika arye, na nong deice delininyak ati ara, na kanye mambul kanye bobuka, ikin unulule. Bukni, ikin ning na nong deice upnilya babye, narye, ‘Se’ tenen, alye kum dakanune. Ura, talye ati kume. Deiyok ara, ani. Na kanye teniltona pia kum aniryuk, na diba tenyamsinye bira, na kele. Narye Allah ati, ‘Pia moubuka kalikinamnel’ tenen, el deiceuk deiamse ning nirya ara, min kum kum datue. Wini talak arye dipdongobuka, Yesus tamubuka el yanamle talak bukni, anoutam talak nirya ara, Allah arye moubuka kaliknilirye, dinamnile. Na Paulus arye nyapne.

Habakuk 1:13

Wininalam bukni, na nio, anda malye winin ning ayala-yala nirya ap, malye unyak nang ap ara, kanye deibuka kum elilyame. Anda, pia Teleb koprop, uk ubuka, pung ulyamnye binya arye, an pia teleb asing arye, malye ning ati, kanye deibuka kum elilyame. Aning atonun, malye wininyak nang ara, ance aninye eibuka, ‘Dauplye’ tenen, kum batakalongolyame. Na nio, anyapman touk ulyamnye bukni, yata deiyok ati, wini talak ara, anda malye wininyak nang, sik Kasdim nang ati, kum wenepmalam do? Tuba dinmasemince, bico tenesilyam bukni, yata deiyok ati, sik malye wininyak nang, Kasdim yala nang arye, nun Israel ninye teleb ubuka unyap nang ati, olyanganamsiak do? Habakuk birye Allah ati, malye nyabuka morobuk.

Yeremia 51:56

Alelim kekenamluma ara, talye ati kuma! Deiyok ara, na Allah arye, sik Babel tam nang malye weik winilamik ning wenena ati, yu weik upnilyeba, sikti, wenepnirye opnamne. Winipnamna ati, narye yukupnyeura, yuk karin mutuku yu nang arye, sik Babel mutuku nang nirya ara, sikti, dengna atonun arepnamne. Babel nang olan ati, yuk mutuku nang yakirye, Babel mutuku noutam nirya ara, ululopnamake. Winibikirye, Babel mutuku yin talin nang, ninye olan ati, weik kel nang nirya tomopnamake. Sik bopmakce yin nirya ara, bataklopnamake. Deiyok ara, na Allah Yahweh arye, sik malye-malye weik winilamikce, menenga arena ap, kwang dakna ap ati, sik nirya ati, wenepnirye, obuka sirya daknamne!

Yeremia 16:17

Winipnamna deiyok ara ani. Ara, narye sik amutuku nang wininyak ning nirya ara, akunum elinune. Sik wininyak ning nirya ara, na dam arye duknupmanto kum ati, yata ning do nirya, lakauk elinune. Ati ara, anggun amutuku nang arye, pia malye ning talibuka, wininyak ning nirya ara, elinauk unune. Aning nirya ara, kum duknupmanto. Ati, narye anang nirya wenebuka opnamnarya.

Amsal 15:3

Allah Yahweh elda, mutuku-mutuku nirya tuba-tuba dilula anya arye, yata winin ning do nirya, malye winin ning babye, teleb winin ning babye nirya ara, aning nirya dilirye kel kisulule. Tonda ninye kanye noutamak tenenyap ning nirya babye, eibuka kel kisulule. Teleb ubuka unyak ninye babye, malye ubuka unyak ninye nirya babye, elcuk sik damak ulirye, tuba-tuba pia disulule. Allah ati, tonok ning babye kum dungnuptibye.

Mazmur 35:22

Ati ara, aning-aning nirya ara, Allah Yahweh ance akunum eililyama ati, yupu nyana kumce, talye tunim abuka, kum wininamlyame na nio. Nara pia ikin weik unulula ara, an akunum bikilyama ati, ‘Anda pera sukum kum unalyame, bukni, na dam yamince, melibuka lyepnamnilam’ tenen, moropkine na nio.

Mazmur 22:11

Ati ara, na ni Allah, ance kum bataknamnilyame. Nara, pia malye winin ning kan-kan ununa ati ara, amalye winin ning, na dam yaliba, ikin kanye bobuka, unamne talak nirya ara, yuk nang arye ton yanuka, pia kum melinamniake. Ati na ni, ‘Na dam anyuk unamle’ tenen, morokunune.

2 Tawarikh 6:23

Sik anang atonun yuk nang ton, an aik dam yakirye, yupu nyabikirye morobikcopura, an im deice arye kekenamsilame. ‘Kekepsimince, yupu bokeipnamsilamʼ tenen, nyabuka moropkine. Allah im deice arye bikuka kekepsimince, ‘Anye bira, dipkoprob malye upmale. Anye bira, malye kum upmale,’ tenepsiminyopura, amalye upmalinye bira, amalye winipmalye touk, el wenena ati arenamlame. Tonda, malye kum upmalinye bira, el teleb ninguk winipmalye touk, ‘Teleb kipdeipnamlamʼ tenen, moropkine. Talya kum batakanamlyame.” Raja Salomo birye nyabuka, Allah ati morobuk.

Hakim-Hakim 1:7

Winibik talak ara, anye Adonia-Bezek birye nyabuk. “Kume, min talak ara, narye ninye deiyok kibuka ulamik nang ara, tujuhpuluh (70) nang babye, tomobuka sik taruk duk, pamu ning ap, yan duk pamu ning ap, sekuka batakamsiba, ulamikce, na meja deice bukuka, din dinmanbuk, adin sung-sunga sakanman ning ara, sik anang arye bulubuka dilamik. Sik anang ati, winilamse ning ara, Allah arye tuba tenyamnuka anya arye, aning ati, kwang daknile,” nyabuk. Nyabukopura, Adonia-Bezek adiparyuk bobukabikce, Yerusalem mutuku delilbiyik. Binuka deiamikba, daulamika ani, aminyan talak amutuku arye dibuk.

Ibrani 4:13

Yata ning do nirya, Allah arye kintinipdeiyamuk ning nirya ara, pia kum duknupmanto. Allah arye aning-aning nirya ati, pia dilule. Baju arye singipdongopmakce ning auplyeba, abaju dopdobikcopura, laka ulamle touk, Allah arye aning-aning nirya lak akuk dilule. Aning-aning nirya dilinye Allah ati, nun wininyap ning nirya laka nyabibyeba, elce kekebuka dipdesilirye, “Aning teleb, aning malye,” nyabuka, yupu lipsisikuka bokeipnamsile. Nun wininyap ning nirya ati, Allah el dam laka nyabibyeba, dipdesilirye, yupu lipsisikuka bokeipnamsile. Tonok ning babye kum duknuptibye.

Yoel 3:4

Allah arye ayupu ton nyabuk. Se, anggun Tirus mutuku ululum nang ap, Sidon mutuku ululum nang ap arye nati, ‘Elda mambulnye kume,’ tenenumunce, malye winilinululum do? Se anggun Sidon mutuku ululum nang ap, Tirus mutuku ululum nang ap, Pilistin tam ululum ninye nirya ap ara, narye yata malye ning arepsisiba, anggunce nati, malye ulinmanulum do? Anggun kanye ara, ‘Allah arye winipsuk ning ara, nunce ton kwang daknamabe,’ tenenumunce, ‘Naʼ tenen, ninye ati, malye winililulum do? Utenenumunya ati, narye anggun dam ikin ning, min yuma deipnamsin ning ara, adiparyuk dopropnamlume. Narye anggunti, kwang daknamsine.

Yesaya 10:3

Allah arye anggun nirya ati, wenepnamsil talak ara, anggunda yata wiripnamlum do? Tonda, anggun wenena ati, lo arepsilirye, ikin ning dopdeipsiliba, pia pera mutuku, yu nang arye mal piyanamsiyak talak ara, anggunda yata wiripnamlum do? Allah arye lo arepsiliba, pera mutuku arye, mal piyanamsiyak nang arye yakceura, anggunda dan mutuku nang arye mikip kiptingba, sikce amutuku nang dam binuka, ‘Se nun ton melipsululume,’ nyabuka, moroptum do? Tonda yata tonye biti, ‘Melipsilyame,’ nyabuka moropnamlum do? Tonda, anggunce talibuka umunce, bona talin nang umunye ning nirya ati ara, ‘Duknubuka deiptibiba, ubula kum dopropnamsiyakʼ tenen, dan mutuku duknupnamlum do? Kume, aning kum winipnamlume.

Yeremia 23:24

Ati ara, yatanye birye, ‘Kume, na dungnupnyopura, Allah arye na wininye ning kum eipnamnile,’ tenelul do? Kume, na Allah Yahweh ara, im deice babye, tukwak mutuku nirya babye, aununa anya arye, aning-aning nirya dinune. Ati ara, tonoknye babye, ton kum duknuptue. Anirya dinauk ununa anya arye, dungnuptuma babye, eilisunune.

Kejadian 21:17

Elce engenmok touk, el mi babye engenmokba, Allah kekebukce, nyapdeibukba, Allah el im deice pil melinanye, malaikat tonok arye, Hagar biti im deice arye yukubukce ayupu nyabuk. “Ka kilo, yata deiyok ati engenmalam do? An ilil una meme. An mi ormapmalce engenmala ara, Allah arye akunum kekepmale.

Kejadian 31:12

‘Dipdelyame. Ayim kambing arye, kil kambing lamakmakce ning nirya ara, sik urasin ara, kikipna ning ap, tonda botbotokna ning ap, ayala ninguk unmake. Ara, talye ati kume. Deiyok ara, Laban arye, malye-malye ukulul ning nirya ara, dib elinune.

Keluaran 2:25

Allah arye, “Narye anggun melina ati, winipnamsine,” nyapdeiamuk ning ati, tuba tenelamuka anya arye, sik Israel ninye ati, pia bico tenelamukce, ‘Sik melina ati, yata wiriptinye do?’ tenebuk. Utenebuka ati, Allah arye, ‘Israel ninye, sikda narye dina ap, kalikna ap tuba unamne,’ tenebuk.

Keluaran 22:22

Atonun tonda, anggun dam unyak youwak kilapu ap, kwaknamne mapu ap ati, ‘Sikda talye nang unyaka ati, dauaplye’ tenebuka, sik dam ara, ikin ning deipmunce, sikti, malye kum kilinamlume. Sik dam ara, kanye ikin ning kum delinamlume.

Keluaran 22:26

Winipmanto ara, an kwit birye yo bok pataplyeba, ance ayo bok tia ati arepmince, elti, ‘Aning dipkoprob tamubuka arepnamnilamʼ tenen, “An teleb ning, cang baju, buppu kin ning ara, tia ati dopropnirye deipmanya ani, ance na yo bok ton tamubuka arepnamnilam talak ara, acang baju ton tamubuka arepnamkine,” nyana meme. Aning ara, kum nyanamlum bukni, el baju tia ati dopropmaminyopura, asum keting kum kumupmalye talakuk, adiparyuk tamubuka arenamlulume.

2 Samuel 16:12

Dipkoprop ara, Allah arye nyabukba ulul kum danya? Anye birye malye yupu na deice deipmanilba, Allah el si Yahweh arye kanye imun ning arepnil ning ara, eiplirye bico tenepnilyopura, amalye ning nong pununa ati, teleb kipdeipnamnil do, kum do? Dina uk unamne. Pirildenilye ning punubuka Allah arye tamubuka teleb upnamnil ca, tenepne,” Raja Daud birye nyabuk.

Mazmur 31:8

Allah anda narye pia, “Bico tenekinirye, narye anti, winibuka pia teleb kipdeipnamkine,” nyalin yupu deice arye, nyapdeiamkise ning nirya ara, ‘Batakna kumce, pia melinamkine,’ nyanilyama ati, kanye deipnirye, telebuk wininamne. Ara, na ona ati yu nang arye, warebuka dininyak nang ati, ance akunum eibuka, nati akunum melinimince, lyelonilyama ati, pia kanye deipkine na nio.

Mazmur 68:6

Sik nin yapu ap, sik ni yapu ap nirya, akunum diamik mapu, kwaknamne mapu nirya ara, Allah arye, ‘Amapu ara, na mapu koproba unyake. Nara, sik ni koproba unune,’ tenelule. Tonda, sik youak kilapu ati, Allah arye, ‘Sik ti, pia melibuka kalikinamne,’ tenelule. Allah elda pia teleb lekak, im deice tuba aulule.

Amsal 15:25

Ninye ton kanye talima erebuka ululnye bira, el kam unamle talak pil donamle ning ap, el upnamle ning ap, el kilapu ap, el mapu silip nirya ap ati, Allah Yahweh arye, sik wenen ning nirya, kum kilinamle. Bukni, diksukum teleb ubuka unyak youwak kilapu ara, sik talibuka unamak talak noutamak nirya ara, Allah Yahweh elce melibuka, arenamle deice arye, sik bona ning ap, sik mapu ap ati, pia melibuka kalikinamle. Sik ning ara, kum kum upnin banamle.

Ratapan 3:59

Na ni Allah Yahweh, na mal olan nang arye malye ning, na dam wininyak ning ara, an akunum elilyame. Ara, sikce nati yu tenenikirye, ‘Anye bira oplonuyapʼ tenen, yupu talinyake. Ati ara, na ni Allah, ance na tam kipropnimince, na deken ning nirya ara, ‘Teleb ulamuk do, kum do?’ tenen, yupu lipsisiknilyame.

Hosea 14:4

Allah arye Israel ninye ati nyabuk. Narye anggun Israel ninye nirya ati, tuba tenesenuna anya arye, tuba tamubuka dopdopsenirye, teleb ulinamsine. Anggun tuba-tuba malye winimun bukni, na kanye aryuk bico tenepsinirye, anggunti pia melinamsine. Anggun malye winin ning ara, kum kipdeipnirye, aninye ati bico tenenuna anya arye, tuba tonap, teleb kipdeipnamsine. Min talak ara, narye anggunti, yu weik uamnuk bukni, aminyan talak ara, anggunti tuba ton tamubuka, wanabuka kum opnamsine.