Matius 6:5 - Eipomek

⁵ Yesus arye ayupu nyabukopura, ayupu ton nyabuk. Anggun talimak malye ning tuba aupsukbuk, ‘Ninye eipsikirye, teleb nang tenepnamsiyak’ tenen, nong bola deiceuk teleb unyak nang wininyak touk, anggunda na mapu arye, aning kum wininamlulume. Amalye unyak nang ara, ‘Yuk nang arye eipsiting’ tenen, ninye bulubuka balamak bisik ap, Allah yupu peterena aik kopropa ap, ninye dinak tikikirye, Allah moronyake. Awininyak ning nirya ara, ‘Teleb nang tenepnamsiyak’ tenen, unyaka anya arye, na dipkoprop nyapsine. Sik dekna atonun ning ara, adeice arye akunum dolonyake. Aminyan talak, Allah arye anang ati, yuk ning ton tabakuka kum arenamle. Bukni, na mapu, anggunce Allah moronamlum talak nirya ara, sik anang wininyak touk kum wininamlulume.

Matius 6:5 Referans Kwoze

Matius 6:2

“Aning ati ara, sik tenepce arye, talya nyaltakanyak nang winilamak ning ara, anggun atonun kum wininamlulume. Anang ara, Allah el si erena ati kum bukni, ‘Yuk nang eipsikirye, si erepsikirye, pia teleb nang tenepnamsiyak’ tenen, bona utotoa talina kum ninye patalul ning arebikce talak ara, weik bingong nyana terompet nyabikirye, ninye weik arye, ban bisik nirya ap, Allah yupu peterena aik kopropa ap, asukumuk yuk ninye dinyakak, laka ubuka arenyake. Na dipkoprop nyapsine, Allah arye anang ati, aminyan talak teleb ning ton kum arepnamle. Anang arye, teleb wininyak ning ara, yuk ninye arye, laka akunum elinyaka ati, sik menenga atonun ning ara, akunum dopropmake. Allah arye anang ati, yuk ning tabakuka kum arepnamle.

Lukas 18:13

Farisinye birye nyabuka morobukura, ‘Amutuku talina deiyok nang arepnamne’ tenen, pajak yo bok bulubuka delinanye birye, mitikto yukak tikukce, ‘Nara, pia malinye’ tenen, mambul kanye bobuka, ‘Allah ulyak kum elinune’ tenen, gisok talipdanuka amnyok dunupdongobuka, Allah morobukce nyabuk. “Se, nai Allah, nara pia malinye ununa ati ara, bita opnutum bukni, ‘Bico tenepnulumce bataknulumce, lyepnutum’ tenen, moropkine,” nyabuka Allah morobuke. Yesus arye nyabuk.

Markus 11:25

Tonda, Allah ati moronamlum talak nirya ara, anggunti malye winipdeipsice nang ara, anggun malye winipdeipsice ning atibuk, malye kanye tuba tenepmunyopura, adiparyuk teniltona kumce, anggun malye winisice nang ati namin kilongonamlulume. Namin kipmunyopura, anggun ni Allah im deice ululnye birye, anggun babye, malye winilamlum ning nirya babye, namin kipnamsile.

Yeremia 29:12

Anggun kanye talima nirya, na deiceuk deipnumunce, nati diba tenepnumunyopura, anggunce nati, ‘Nun ni Allah, melipsilyame!’ nyabuka, moronamnulume. Nati, moropnumunyopura, narye dipkoprob, anggunce moronamnulum ning kekepsinirye, melinamsine.

Yesaya 1:15

Tonda, anggunce taruk erebuka, Allah moromunye ning babye, narye moubuka kum dilisunune. Anggunce, ‘Winibuka melipnamsil’ tenen, moronumunye ning ara, na kum kekesunune. Aning deiyok ara, anggun taruk deice ara, ninye ining weik upsuka ati, nyapsine.

Lukas 20:47

“Ton wininyak ning ara ani. Sikce talye bona utoto kum kilapu, youwak kilapu ati, nyanyake. ‘Anggunda, anggun talilulum ning nirya, noutam arye bokuka, Allah si erena ati arenamsulume,’ nyaltakanyak bukni, youwak kilapu arye sik ning aribicopura, anang arye sikce sik bidamang ati bokuka, weik arye dolonyake. Tonda, yuk nang arye, ‘Anang ara, Allah morona weik kel nang, nyapnamsiyak’ tenen, Allah moroce ning ara, yupu cang arye moronyake. Awinice ning nirya ati ara, Allah arye awininyak nang atonun nang nirya ati, pia weik arye wabuka opnamle.” Yesus arye el mapu obarye 12 nang ati ayupu nyabuk.

Yakobus 4:6

Aning ati ara, Allah yupu deice ayupu nyapsine. ‘Allah arye sik kanye talima erena nang ati, yaniltalule. Bukni, sik kanye talima darabuka amuak unyak nang ati, el mikip arilula deice arye, talibuka melilule.’ (Amsal 3:34)

Lukas 18:1

Yesus arye, ‘Na mapu ara, batakna kum arye Allah moronauk unamak,’ tenebukce, ‘Winipmanto yupu nyapnyeura, kel biknamak,’ tenebuk ati, ayupu nyabuk.

Daniel 6:10

Ayupu nyapdeibukba, Daniel kekebuk. Kekebukopura, adiparyuk tamubuka, el ulamuk aik biyukce, asum-asum nirya ulamuk touk, el im aik jendela kukuk. Ara, Yerusalem tam botcamik jendela ara, kukeibukce, el Allah si erelamuk touk, gutam tuku dipdongobuka, Allah morobukce, Allah el si erena ati, mot sebuk. Ara, Allah yupu mot sebuka winililamuk touk, asum babye atonun, Allah ati, teleb abuka kinmok.

Efesus 6:18

Aning nirya bobuka, unamlum talak noutamak nirya ara, Allah El Dib Kanye arye, anggun kanye talima talisilirye, el mikip deice nyasilye touk, Allah morona ap, aning-aning nirya ap, anggun patan ning ati, Allah morona ap, pia wininamlulume. Ati, ‘Allah El Dib Kanye mikip arisilya deice arye, Allah moronamabe’ tenenauk umunce, talye kanye bobuka, lik una kum aryuk unamlulume. Tonda, batakana kum, pia pi dobuka, Allah ati pia moronamlume. Allah moronamluma ara, ani. Ara, ‘Allah arye wibuka, el mapu kipdeipsuk nang nirya ati, Allah arye melinamsile’ tenen, anggunce Allah moronamlume.

Lukas 11:43

Anggun Farisi nang ara, ‘Se’ tenebuka, imun kanye bobuka unamlume. Ton malye winilaluma ara, Yahudi yala nang Allah yupu peteren aik, Allah yupu peteren talak ara anggunda, ‘Yuk nang eipsikirye, teleb nang tenepnamsiyak’ tenen, weik nang bukmantoak, ninye urasin dinakuk bulbalulume. Tonda, ninye nirya din ning deibuka dekenmakcak, ‘Pasar noutam arye banmabikuk, ninye nirya arye kinamsiyak’ tenen, kil-kil kanye arye bobuka balalulume.

Matius 21:22

Aning ati ara, na nyapsine. Allah moropmamunye talak ara, aning-aning moropmamunye ning nirya ara, ‘Allah arye dipkoprop arepnamsile’ tenen, kanye bokoltona kum diparyuk, diba tenebuka moropmunyopura, Allah arye dipkoprop arenamsile,” Yesus arye nyabuk.

Mazmur 55:17

Anang ati wenebuka opnamlum bukni, na ikin weik unilye talak nirya ara, narye anti, ‘Se, na ni Allah, ance melibuka lyepnilyame,’ nyabuka moronamkine! Na kel bikne, moropnyeura, Allah Yahweh arye, nati, dipkoprob lyepropnamnile.

Mazmur 5:2

Na ni Allah Yahweh, narye anti moropnukin yupu ara, moubuka kekepnamnilame. Na kanye talima daksaknil ati, narye, ‘Se, yata winiptinye do?’ tenen, ikin kanye bonuna ara, ance moubuka tenepnamnilame.

1 Tesalonika 5:17

Tonda, batakna kum aniryuk, atalak nirya ara, Allah pia moronamlulume.

Yohanes 16:24

Nati, diba tenepnulum talak arye diprongobuka, wini talak noutamak nirya ara, aning-aning na si deice arye kum moronululume. Bukni, wini talak ara moronamnulume. Moropmunyopura, dolonamlume. Dopropmunyopura, kanye deibuka pin-pin asa arye unamlume. Yesus arye el mapu ati nyabuk.

Markus 12:38

Yesus ayupu peterenmok talak ara, ayupu tonap, nyabuk. Allah arye, ‘Aning wininamlulume, aning ara, kum wininamlulume,’ nyapdeibukura, Musa arye sekamuk yupu peterena deiyok nang, sik wininyak ning ati, moubuka unamlulume. Sik malye wininyak touk, ‘Nun babye, malye winibibyak’ tenen, kanye moubuka unamlulume. Sik malye wininyak ning nyapnusine. Sikda, ‘Yuk ninye arye, nunti sisinanye tenepnamsiak’ tenen, deice tam ongoce ongon cang weik baju, juba ara, cang weik ning ongobikirye, banyake talak ara, langtupnin banyake. Tonda, ninye bona ning dekna ati, yupa weik arye bulubuka weklamak noutamak arye, ‘Ninye weik dinyak ak banmabibuk, kipdopsikirye, “Telebe,” nyapsiceopura, yuk nang nirya eibuka kekebikirye, “Se, anang ara, weik mambul nang,” nyanamsiak’ tenen, pia patalule.

Matius 9:38

Aning ati ara, wa deiyoknye birye nyapdeipliba, ‘El pil don nang arye, el wa dam lilbanamak’ tenen, wa deiyoknye biti moronamlulume.” Yesus arye nyabuk.

Matius 23:13

Yesus arye ayupu nyabukopura, dukdongobuka ayupu tonap, nyabuk. “Farisi nang ap, Musa sekamuk yupu peterena deiyok nang ap ati, Allah arye wenebuka opnamsila ati, anggun bico,” nyabuk. Nyabukce, ayupu ton dukdongobuka nyabuk. Se, anggun Farisi nang ap, Musa sekamuk yupu peterena deiyok nang ap, Allah arye wenebuka opnamsila ati, anggun bico. Anggun talimak malye ning aupmasilibuk, ‘Teleb nang tenepnamsiyak’ tenen, teleb ning bola deiceuk winilulume. Anggun malye winimunye ning ara, nyapnusine. ‘Allah dib tenebibyeura, Allah arye nun dobuka nun talima talinamsilak binuyabe,’ tenenyak nang ara, anggunce yupu sekeldongolulume. Winiluluma ara, ‘Anggun aik weknuyap’ tenen, buplan dam ninye tikilyangaki bukni, yu upliba, mikip arye buplan tirikildongolamak touk, winilulume. Ara, ‘Allah ati, dib tenebibirye,’ ‘Allah talinamsilak weknuyabe,’ tenenyak ninye ati, yupu sekeldongoluluma ati nyapsine. Anggun babye dib tenebuka kum wekelulume. Tonda, ‘Nun dib tenebuka Allah talinamsiak wekenamabe,’ tenenyak nang ati ara, anggun Farisi nang arye winimunye ning deice arye, aninye ati yupu sekeldongolulume.

Amsal 16:5

Ninye nirya, sik kanya deilin erebuka ukirye, kwalinya nang ara, Allah Yahweh arye, ‘Anang ara na like,’ tenelule. Ara, dipkoprob elce, sik anang ati tenelye ning ara, ton pia luba kum kinamle. Nunda aning pia dipkoprob bikinyabe. Allah arye sik aninye ati, ‘Na like,’ tenelamlya ani, kum daneipnamle. Dipkoprop yuk talak ara, aninye ati weik arye wenebuka oplopnamle.

Matius 23:6

Ton malye ulamak nang ara, weik kwalina talak nirya ara, kwalina deiyok nang arye akwalina yanuka lukuka dipnopura, sik Farisi nang arye weik nang bukman akuk, ‘Weik nang tenepnamsiyak’ tenen, pia teleb ak bulbanyake. Ton nang ara, Allah yupu peteren talak ara, Farisi nang arye, ‘Yuk nang eipsikirye, teleb nang tenepnamsiyak’ tenen, Yahudi yala nang Allah yupu peteren aik pum, ‘Anyaik ninye sik urasin nirya din tamuk bukibibuk, eipsikirye, se, sik anang ara weik mambul nang, tenepnamsiyak’ tenen, weik nang bulam akuk, bulbanyake.

Amsal 15:8

Allah Yahweh elda, malye winin ninye arye elti, morona ap, ‘Nun malye un ning kilipsilirye, namin kipnamsil’ tenen, teleb ning weik arye arena ap, wininyak ning nirya ara, el kanye deibuka kum dolonamle. Allah arye anang ati yu tenelule. Bukni, ninye ton Allah arye, “Wininamlulume, aning ara pia kum wininamlulume,” nyabuka, nyasilye touk kekebikirye, moubuka wininyak ninye nirya ara, el kanye delilule. Sikce Allah ati, arena ning pia teleb ning kum upmalya babye, sik aninye arye morobice ning ara, Allah kekebuka dopdoplirye, sikti, kanye delilule.

Matius 6:16

Yesus arye nyabuk. Sik talimak malye ning tuba aubuk buk, ‘Ninye eipnamsiyak’ tenen, nong bola deiceuk, teleb unyak nang atonun kum unamlulume. Sik anang ara, Allah si erena ati, din dina kum, si tebuka unyak talak ara, ‘Yuk nang eipsikirye, mambul nang tenepnamsiyak’ tenen, sik asok melmel karikuka engepmanto unyake. Tonda, ‘Yuk nang eipsikirye, se Allah ati din dina kumce, urdemuk unmake, tenenamsiyak’ tenen, potong lelekna ap, mek kekena ap, kum diparyuk, malye-malye ubuka lakak banyake. Anang ara, yuk ninye eibikirye, sikti, ‘Se, sikda mambule,’ tenelamak nang akunum dopromaka anya arye, aminyan talak Allah arye, yuk dekna ning ton, sikti, tabakuka kum arepnamle.

Matius 6:1

Yesus arye ayupu nyabuk. “Anggun kanye moubuka una ati, ayupu nyapnusine. Anggunda, ‘Allah el si erebuka, el pil donamape,’ tenemunye talak nirya ara, yuk nang eipsikirye, ‘Sikda teleb nang, tenenamsiyak’ tenen, ninye si seknak lakak anyuk kum pil donamlulume. Ninye si seknakuk, laka pil domunyopura, anggun ni Allah im deice ululnye birye, ‘Dekne ning arenamne’ tenepsuk ning kum arenamsile.”

Matius 23:5

Sik winilamak ning ap, pil dolamak ning ap nirya ara, ‘Yuk ninye eipsikirye, se anang ara pia teleb nang, tenepnamsiyak’ tenen, wininyake. Sikda kanye talima ereldanyake. Ton ning ara, Allah yupu kekebuka diba tenenyak ninye ara, ‘Allah yupu ati pia tenenamap’ tenen, mitik pala ning deice arye, Allah yupu ayat sekdeipnopura, taruk nakup deice ap, asok deice ap, deibuka kitilongonyak. Bukni, sik Farisi nang ap, Musa sekamuk yupu peterena deiyok nang ap ara, ‘Ninye eipnamsiyak’ tenen, pala weik ning deice kitildongokirye dinyake. Winilamaka nirya ara, ‘Yuk ninye eipsikirye, ara pia teleb nang, weik kel nang tenepnamsiyak’ tenen, wininyake. Ton ning ara, Allah diba tenenyak ninye ara, sik Allah morona talak ara, kisok pakunyak baju mouse ak ara, bumang baju sekuka tipmenikuka mitik-mitikuk kirikildongonyake. Bukni, sik Farisi nang ara, ‘Yuk nang eipsikirye, ara Allah morona weik kel nang tenepnamsiyak’ tenen, weik cang baju sekuka, tipmenikuka mitik-mitikuk kisok pakunyak baju mouse ak kirikildongonyake.

Lukas 6:24

Bukni, anggun wini talak arye, bona weik nang deiyok ninye ara, anggun kanye delin ning akunum dobuka talilamlum ati, se tenebuka kanye imun unamlume. Akunum dololuluma ati, aminyan yuk ning tonap kum dopropnamlume.