Matius 28:5 - Eipomek

⁵ ‘Akilapu ara, lukdanuka ilil uplyak’ tenen, aim deicanye malaikat arye akilapu ati nyabuk. “Anggun lukdanuka ilil una kume. Na kele, sik yu nang arye wanwanun yo deice opmeknye Yesus ati enmalume.

Matius 28:5 Referans Kwoze

Ibrani 1:14

Anggun ton teneipdelulume. Allah el im deice pil don nang malaikat nirya ara, im deice ning, dib kanye atonun nang unyakba, Allah arye sik malaikat ati, ‘Kume, ninye tukwak ninye lyepneba, ninye lyen ning nirya dolonamak ninye ati, sik melipnamlyame. Tukwak ninye, lyepnamne ninye ara, sik melina ati, ‘Pil melibuka donamlum’ tenen, anggun malaikat dolkwetesunune.’ Allah arye untenyamukce, sik malaikat ati nyabuk. Malaikat ara, Allah arye lyelul ninye sik melina ati, dolkwetelula anya arye, sik malaikat ara, mitik mambul unyak bukni, Allah el Mi Kopropa ara, eluk weik mambul ulule, nyapsine.

Yesaya 41:10

Ati ara, narye nyapsise. Anggunda ilil una meme. Nara anggun dam unirye, pia melinamsine. Nara, anggun ni koproba Allah ununa ati, anggun kanye teniltona kum unamlume, Imun kanye bobuka kum unamlume. Nara anggun ni Allah unirye melinamsine. Na aryuk mikip arenamsine. Tonda nara, malye ning tonok ning babye ton kum ununye birye, na sirik taruk deice arye, pia talinamsine. Winibuka melipsinya deice arye, aning-aning nirya malye kum kipnamsine.

Lukas 24:5

Winiprikura, akilapu eibikce, lukdayikce ilil weik ubuka ati, koupdongobuka tikmek. Ilil weik ubukura, anang arye akilapu ati nyaprik. “Diplamak ninye wein dam, ‘Yesus aunmal do?’ tenen, dilyanmaluma ara, yata ati do?

Lukas 1:30

Ilil ubuk bukni, Gabriel arye Maria ati nyabuk. “Kume an ilil kanye bona meme. Allah arye anti bico tenebuka, kanye akunum deiamkuke.

Markus 16:6

Lukdana ilil ubukura, anye birye akilapu ati nyabuk. “Anggun lukdanuka ilil una meme. El asukum kum unmale. El akunum kam bukmale. El nong deipmanguak ara, dipdelulume. Anggunce enmalumnye bira, pia asukum kum ulule.

Matius 28:10

Winiprikba, Yesus arye ayupu nyabuk. “Anggun ilil una meme. Na mapu dam birumunce, na weit yapu ati nyaprurume. ‘Galilea tam bimunce, Yesus ap epdanuka eipnamlume,’ nyabuka laka nyalbinururume,” Yesus arye nyabuk.

Matius 14:27

Ngalukikba, adiparyuk Yesus arye, “Na aunmana ati, anggun ilil una meme,” nyabukce, “Ilil una kumce, kanye lamapdongobuka banamalulume,” nyabuk.

Daniel 10:19

Elce nyapnuk, “Allah arye anti, weik tonun bico tenekilirye, ‘Anye bira, mambul weiknye ulule,’ tenekulule. Ati Daniel, an ilil una meme. Ilil upmakilce, mitang upmakil ning ara, bataknulyame. An adiparyuk mikip kipnulyame. Tonda, ‘Allah arye dipkoprob kalikuka melipnamkilʼ tenen, ilil una kum bukni, malye kibuka, telebuk unamlame,” nyapnuke. Elce ayupu nyapnuk talak ara, na mikip tamubuka yanuke. Yanukba, narye elti, nyapse, “Na nio, winira ance mikip kipdeipmanilama ati, yupu nyapdeipnilyame,” nyapse.

Daniel 10:12

Tikmasopura, na dam yanmoknye birye, nati nyapnuk. “Danielo, an ilil una kume. Alengdar mapmomce, eipmalam ning deiyok koun talak ara, Daniel ance, ‘Kel bikilin ning ton arepnutue,’ tenepmalamce, kanye lamapdongobuka, Allah ati moroplum ning ara, Allah akunum kekepkuke. Ati, na an dam yanmana ara, ance Allah ati moroplum ning ati, nong laka nyalyakine.

Yesaya 41:14

Anggun apu koproba Yakub birye deibukba, dadeipdanin yangalamik ninye, anggunda el yala nang ara, anggun ilil una meme. Yuk yala ninye arye anggunti, ‘Sik Israel ninye ara, mitik ap, mikip kum ap unyaka anya arye, sikda, talye kwising ap, kuluma ap atonun ninye unyake. Sikda mambule pia kume,’ nyabuka nalinamsiyake. Nyapsica babye, aning tenena meme. Deiyok ara, nara Allah Yahweh arye nyapsine. Narye anggun Lyena Deiyoknye unune. Nara Allah Pia Telebnye unirye Israel ninye ati, lyelona ap, kalikuka melina ap deiyoknye usunune.

Yesaya 35:4

Atonun, sik kanye bokoltoliba, teniltoce ninye ati, “Ilil una kumce, kanye talima moubuka unamlume,” nyabuka laka nyanamlulume. “Anggun ilil una meme. Anggun ni Allah, yu weik uplirye, ‘Na tenena ninye malye winililamlum ning ati, kwang daknamsine,’ tenen, yalirye, el mikip deice arye, nun mal olan nang nirya obuka sirya daklirye, nunti lyepnamsile,” nyabuka laka nyanamlulume.

Matius 28:4

Winibukopura, akalikmek yin talin nang eibikura, lukdayikce, ilil weik ubukba, sik nong nirya sirim talibukce, dipna atonun ubik.

Rasul 2:24

Yesus dibuk bukni, Yesus dipnarye, el nong tup ara, lyupmanto kumnye binye arye, Yesus dibuk bukni, Allah arye tamubuka kam bukibuk.