Matius 2:18 - Eipomek

¹⁸ ‘Rama mutuku noutamak ara, weik arye malye nyana ap, engena ap, wininmakba, kekepmabe. Rahel, el mapu dipmakba, weik arye engenmale. El kanye talima weik arye buku sukunmala ati, kum namin uptue. Kanye namin una ara, el like. Ara el mapu weike dipmaka atia.’ (Yeremia 31:15)

Matius 2:18 Referans Kwoze

Yeremia 31:15

Allah el si Yahweh arye nyabuk. “Minop talak ara, ikin weik ning, sik Israel ninye deice yanamle. Winiplyopura, mutuku si, Rama mutuku ulamuk kil, el si Rael, el mapu nirya obikiba, dibikcopura, pia bico tenen, talima sukupliba, engenauk unamle. Pia engebuka, yuk nang arye, el talima kum kwa dipmanto upnamake. Ara, el mapu nirya obikiba, ‘Se, na mapu nirya ara, akunum obuka sirya dakmake. Tonok mapu babye, kam kum unamake,’ teneplirye, engenauk unamle.”

Yeremia 4:31

Na Yeremia lengdar mapsa deice arye kekelamsak, anang ara, kilapu mi deipnukca ati, mi deiyok dinmaliba, donmakce talak, ngalukulamak atonun unmikce, engenmikak kekepse. Sik ngalukna ara wel kil winiryuk mi deipnamlirye, uk dinmalyeba, ngaluklamak atonun unmikce, engenmikak kekepse. Akekepse ning nong ara, ani. Ara, sik Yerusalem mutuku unyak nang nirya ara, isin welebuka, ngosoklamak touk, nyabikirye engenamake. Sik amutuku unyak nang ara, taruk erebikirye, nyapnamake, “Se, nun amutuku unyap nang ara, ikin upsile. Ara, nun mal olan nang arye, opnusiake,” nyabuka, weik yupu arye ngalunamake. Nabi Yeremia birye nyabuk.

Yehezkiel 2:10

Ara, abuku atonun ning, kitipmok ning ara, na dam akunum deibukopura, narye dipdesibuk dana tam, dana tam nirya, alip tam ap, amu tam ap, nirya sekamik ning diamuk uamuk. Asekna ning deice sekamuk yupu ara, bouku sukubuka weik engenyak yupu ap, ikin upnamle yupu ap, mambul kanye bobuka nyalamak yupu ap, imun kanye bobuka engelamak yupu ap, sekdeiamuk ning upmokak eipse.

Kejadian 37:30

Winibukce, el kwit capu dam tamubuka biyukce, nyabuk. “Se, Yusup bobuka, tuku pum bisik dongopmapu sukum ara, kum unmale. Winira, na mambul upnile. Yata wiripnaman do?” nyabuka, malye nyabuk.

Wahyu 8:13

Aning nirya wininmokba, dinmasi talak ara, tonok Bib Seng-Seng ana maka arye, im noutamak lakuka banmokce, ayupu nyanmok. Elce nyanmok yupu ara, ani. “Sik yuk malaikat winilye nang arye, sik terompet deice lelim nyabikiba, anggun tukwak mutuku ululum ninye nirya ara, weik kanye imun ning winilye tonap yanganamsila ati, anggunda bicoe. Se, anggun bicoe, bicoe, bicoe,” nyabuka, lakuka banmokce nyabukak, kekepse.

Ayub 14:10

Bukni, ninye tonok ara, dibibiyeba weibicopura, tonap tamubuka kum kam bunyake. Tonda, ninye akunum dibicopura, sik isin tuba kum welelule. Atalak sik dib kanye ara, dan mutuku banyak do? Nun kum elinyabe, talye tunim abuka unyake.

Kejadian 42:36

Winibikba, sik ni koproba Yakub birye sikti, nyabuk. “Anggunda, pia ikin kipdeipnulume. Na mapu Yusup ap, Simeon ap, wini talak kum unmaraka ara, deiyok anggun uka! Aninguk kum bukni, wini talak ara, na sirya deipse mi Benyamin, ‘El ton bobuka, Mesir mutuku bobinamabe,’ teninmalume. Se, aning-aning nirya ara, kanye malye upnile. Na pia ikin unulule!” nyabuka malye nyabuk.

Matius 2:17

Amapu nirya obika ara, Allah yupu laka nyalamuknye nabi Yeremia nyalamuk touk, winibuk. Yeremia nyalamuk yupu ara ani.

Lukas 8:52

Yarius el aik akunum wekik talak ara, anyaik dam unmek nang, sik weik arye engena ap, weik arye ngalukuka malye nyana ap, wininmekbuk, Yesus arye eibuk. Eibukce, anyaik malye nyanmekce, kweldanmek nang ati nyabuk. “Anggun weik arye malye, nyabuka, ngalukuka kweldanmaluma ara, bataklulume. Anggun tunimaplulume. Akilmu ara kum dipmale. Urdem mapmale,” nyabuk.