Matius 15:26 - Eipomek

²⁶ Akil Israel yala kum kil arye morobukopura, Yesus arye akil ati adomon yupu deice arye nyabuk. “Mapu kwaning kum dipmakibuk, sik kwaning dalubuka kam dam donokona kume. Teleb ning ara, mapu akunum dinmakca ani, sirya akunum dibikcopura, kam arebikiba, kam arye dina telebe,” nyabuk.

Matius 15:26 Referans Kwoze

Matius 7:6

Ayupu nyabukopura, adomon yupu ton nyabuk. “Anggun Allah arena ati wibuka deiplum ning ap, dekna weik ning ap, dopropmunce, bai kam ap, yua basam ap arepmunyopura, yaniprikirye, tamubuka si tobuluklobuka batakadurake. Bulukuka batakaduraka anya arye, teleb ning dobuka kam ap, basam ap ati, kum arenamlulume. Aning atonun, ninye sik talimak gat upliba, ilil kumce, pi dobuka unyak nang ara, Allah yupu pia ilil ning ara, talima gat nang ati, kum peterenamlyame. Anang ara, Allah yupu kum kekepmanto nang ati, peterepmunyeba, ayupu kum kekebikirye, yaniplobuka demuk unamake.” Yesus arye, el lelul yupu bita moubuka kekenmek nang ati, nyabuk.

Pilipi 3:2

Sik Yahudi yala ninye, malye unyakce, ‘Allah arye kanye deipnamsil’ tenen, “Sal den bam bol mouse ning sekenamlulume,” nyabuka peterenyak nang ara, yu ulamlye kam arye pia yu uplibuk, ubula dona ap, walana ap, malye winilamak atonun, anang babye, malye wininyake. Ara, nun yupu yanipsikirye, ‘Sik yupu kekenyak ninye ara, nun yupu uk kekebuka nun tam kepropsitinge’ tenen, malye yupu nyasinyake. Aninye ara, wininyaka anya arye, ‘Anang nun malye updeipsicak’ tenen, memelonamlulume. Anang ara, winibuka tenenyake. Ara, yuk nang, ‘Aninye ara, malye winin ning batakuka, Allah el na tenen nang unyake, tenepnamsiak’ tenen, bikilin ning ati, sal den bam bol mouse ning sekenyake.

Efesus 2:12

Tonda, minop talak ara, anggun ap, Kristus ap, talima dukdongobuka min kum ulalume. Anggun apu yapu ara, Israel yala ninye kum ulamika ati, Israel yala ninye ap, ansinibuka neika kum ulalume. Allah arye, Israel ninye ati, “Wininamsine, winibuka, winibuka arenamsine,” nyapdeiyamuk bukni, anggun Efesus mutuku nang ara, bai tam ninye asik nang atonun ulaluma ati ara, aning nirya ara, kum dopropmanto ulalume. Anggunda, Allah el si bikna ap, elti, dib tenebuka neiktoto una ap, pia kum ulaluma ati, ‘Allah arye, lyepnamsila ati, kintinibuka dinamabe,’ kum tenyamlume. Talye demuk ulalume.

Galatia 2:15

Ura, na kayapu. Ton nang arye, Yahudi yala kum nang ati, “Anggunda, pia malye winin nang nyanyake.” Ura nunda, Yahudi yala nang arye deipsikbuk, Yahudi yala ninye unyaba anya arye, Yahudi yala ninye arye wininyap ning ara, nun kele.

Wahyu 22:15

Bukni, anyaik noutamak pia kum wekmanto ninye, bai tam atonun unamak ninye ara, pia malye-malye ninguk talibuka wininyak ninye. Ara, kir dona ap, bai mal ona ap, isa mirye tenekirye, aning ayala-ayala nirya pil donyak ninye ap, talye yolanyak ninye ap, ninye oltakanyak ninye ap, talye ning ati, ‘Nun ni kopropa’ tenen, si erenyak ninye ap, tilila winin ning aning-aning nirya ati kanye deibuka tilila pil donyak ninye ap, sik nirya ara, Yerusalem Winiryuk mutuku pia kum weknamake.”

Roma 9:4

Israel ninye ara, talye ninye kume. Deiyok ara ani. Tonok ning ara, Allah arye Israel ninye ati, ‘Na mapu unamak’ tenen, “Kwaknanamsine,” nyabuka nyalilamuk. Tonda, Allah el mikip ap, pia teleb ulul ning ap, sikti, benelelamuk. Tonda, Allah arye, ninye malye winin ning namin kina ati, “Wininamlulume,” nyalilamuk nyalin yupu ara, sik Israel ninye ati nyalilamuk. Tonda, Allah arye Musa ati, ‘Aning ara wininamlulume, aning ara kum wininamlulume,’ nyalilamuk mem yupu nyalilamuk ning ara, Israel ninye ati nyalilamuk. Tonda, Allah arye, “Na si winibuka erenamnulume,” nyabukabukce, el si erena ati, anyaik pum tam unamik ning nirya ap, tonda Allah arye, “Winibuka melinamsine,” nyabuka nyalilamuk yupu ap, ayupu nirya ara, Allah arye sik Israel ninye ati, arilamuk.

Matius 15:25

Nyabukura, akil arye Yesus el dam yayukce, ‘Si erepnun’ tenen, gutam tuku dipdongobuka morobuk. “Naie, anda Daud yala nang arye deipkiknye, ance bico tenebuka melipnilyame,” nyabuka, weik arye morobuk.

Matius 15:27

Yesus arye nyabuk bukni, adiparyuk tamubuka, akil arye Yesus ati nyabuk. “Naie, dib nyapmanilam bukni, mapu dinmakca dam banmalye kam arye, bun pupdopba batakikce ning ara, talye mangkau arye dilule,” nyabuk.