Ura, anang arye Yesus ati ayupu nyabuka asipdeyika deiyok ara, ‘Malye yupu nyaptopura, elti, “Anda malye winilyame,” nyabuka, el nong deice malye yupu nyabuka ikin deiptibyeba, ninye nirya kel biknamak’ tenen, asipdeyik. Utenebuka asipdeyik bukni, Yesus arye el nong ganupdongobuka, mikamuk tuku awamuk noutamak arye, el taruk duk arye yupu sekdeibuk.
Markus 10:2 - Eipomek2 Tonok talak, Farisi nang arye Yesus dam yayikce, ‘Yesus ara, malye yupu nyaptue’ tenen, ayupu tenebuka, arye asipdeyikce Yesus ati winipdeyik. Farisi nang arye nyabik. “Musa sekeiyamsuk yupu deice, tonoknye birye el kil bataktue nyabuk do, kum do?” nyabuka asipdeyik. Gade chapit la |
Markus 10:2
25 Referans Kwoze
Yesus arye ayupu nyabukopura, dukdongobuka ayupu tonap, nyabuk. “Farisi nang ap, Musa sekamuk yupu peterena deiyok nang ap ati, Allah arye wenebuka opnamsila ati, anggun bico,” nyabuk. Nyabukce, ayupu ton dukdongobuka nyabuk. Se, anggun Farisi nang ap, Musa sekamuk yupu peterena deiyok nang ap, Allah arye wenebuka opnamsila ati, anggun bico. Anggun talimak malye ning aupmasilibuk, ‘Teleb nang tenepnamsiyak’ tenen, teleb ning bola deiceuk winilulume. Anggun malye winimunye ning ara, nyapnusine. ‘Allah dib tenebibyeura, Allah arye nun dobuka nun talima talinamsilak binuyabe,’ tenenyak nang ara, anggunce yupu sekeldongolulume. Winiluluma ara, ‘Anggun aik weknuyap’ tenen, buplan dam ninye tikilyangaki bukni, yu upliba, mikip arye buplan tirikildongolamak touk, winilulume. Ara, ‘Allah ati, dib tenebibirye,’ ‘Allah talinamsilak weknuyabe,’ tenenyak ninye ati, yupu sekeldongoluluma ati nyapsine. Anggun babye dib tenebuka kum wekelulume. Tonda, ‘Nun dib tenebuka Allah talinamsiak wekenamabe,’ tenenyak nang ati ara, anggun Farisi nang arye winimunye ning deice arye, aninye ati yupu sekeldongolulume.
Tonda, nun apu yapu arye, “Allah dipkoprop teleb ubuka kum winilamsutue. El yata ati amalye mutuku noutamak boyanmasilce batakasulul do?” nyabuka, Allah ati malye yupu nyabuka pirilelamikce, Allah ati winildelamik. Ara, nyalamika deice arye, ‘Allah arye, nunti bico tenebuka nimalye arye, tenesilye ara, dib do, telela do?’ tenen, Allah ati pia winilelamik. Nun apu yapu arye Allah ati, winilelamik touk kum wininamabe. Pirilelamik ati, Allah arye, sik wenena ati, sik dam yu kwatima deibukba, weik arye, yanuka si tolamukura, ninye weik diplamik.
Yahudi yala nang, Allah arena ati weik deiyok nang ap, sik Farisi nang ap arye, ninye nirya ati nyabik. “Yata ninye do nirya, Yesus yalyeba, eipmunyopura, ‘El unmalak ani,’ nyabuka, adiparyuk laka nyalyanamsulume,” nyabik. Ayupu nyabika deiyok ara, ‘Yesus tapu koubibirye, wenebuka optibye’ tenen, nyabik.
Laka nyabikura, sik Farisi nang kekebikce, yu ubukba, sik Yahudi ninye yupu bokolina deiyok nang, Sandeheren nyalamik nang, ‘Anang ap yupu talipnamap’ tenen, anang nirya yukubik. Yukubikba, sik nirya Farisi nang ap, Allah arena ati weik deiyok nang, Yahudi yala deiyok nang nirya bulubuka yupu talinmek talak ara, nyabik. “Se, nun yata wiripnamap do? Nun talyeuk unmaba ara, yata ati do? Anye birye, ninye kum winipmanto ning, ‘Allah el mikip deice pil dolule tenepnamake’ tenen, ninye kum winipmanto pil weik arye donmale.
Anggun tenipdelulume. Nun Farisi nang ap, nun Yahudi yala deiyok nang ap arye, elti, diba tenenyap do? Kume, diba pia kum tenenyap bukni, amutuku talye wekmak ninye ara, sikda kanye bona kum ninye unyake. Sikda Musa sekamuk yupu nirya ara, pia kum kel biklamike. Sikda yuk nang arye anang ati, ‘Motona talipnamle’ tenen, benepdeibika deice arye, aninye arye Yesus ati diba tenenyake,” nyabik.
Awekmek ninye kan-kan arye, sik Farisi nang ton wekmeka ati, aninye nyanmek yupu kekebikce yu ubuk. Yu ubukba, sik Farisi nang ap, Allah arena ati weik deiyok nang, sik imam nang ap arye, ‘Yesus tomobuka tapu koupnamak’ tenen, biyikce yupu nyapdeibikba, Allah arilbalamik aik yin talibuka kaleklamik nang arye, Yesus ati elelbiyik.
AFarisinye ngalukun moka ati, Yesus arye anye biti nyabuk. Se, anggun Farisi nang ara, anggun kanye talima noutam malye ning aupmasilyebuk, ‘Teleb nang tenepnamsiyak’ tenen, nong bol deice ninguk teleb winilalume. Anggun mek makau ap, piring ap, ‘Malye upmasilye mangkau arye dipnyak’ tenen, bol deice tam ara teleb-teleb ubuka mek likilulum bukni, anggun kanye talima noutam ara, pia malye wini ning ap, yuk ninye ning ubula dona ap, awabsilibuk, aning tenena kum aryuk talye kanye bobuka ulalume.
Anang arye, ‘Allah el bisik ara telebe,’ nyanmek bukni, sik Farisi nang ap, Musa sekamuk yupu peterena deiyok nang ap ara, Allah arye, ‘Aninye babye, lyeptinye,’ tenyamuk bukni, sikce, ‘Aning ara, nun like,’ tenebuka batakik. Utenebuka batakik ati ara, sik malye winin ning kum batakikura, Yohanes arye anang mek kum dongamuk.
Atalak ara, Farisi nang ap, Musa sekamuk yupu peterena deiyok nang ap arye, ‘Yesus malye uptuopura, malye upmale nyaptibye’ tenen, Yesus ati pia dil taknauk unmek. Kalikmeka ati, ‘Yesus arye nun Allah si erena ati dikdik sen sum, Sabat sum deice arye, taruk kwalyamuknye kwetepnul do?’ tenen, pia kalikmek.
Dinmekbuk, Musa sekamuk yupu peterelamik nang ap, Farisi nang ap, tabakuka ulamik nang, tonda Farisi nang kopropa ap, Roma mutuku deiyok nang arena ati, pajak yo bok bulubuka delina deiyok nang ap, tonda yuk malye-malye winilamik nang ap, Yesus ap anyaik wekuka neika din dinmek. Dinmek talak ara, sik Farisi nang arye eibikce, Yesus el melina nang ati asipdeyik. “Yesus ara, pajak yo bok bulubuka delina deiyok nang ara, sikda ubula dolon nang unyaka anya arye, anang ap, malye-malye wininyak nang ap, Yesus anang kan-kan din dinmal ara, yata ati do? Ara malye wininmale,” nyabuka wenebik.
Mek liya yo deice bukuka banmek talak ara, Yesus arye el mapu 12 nang ati nyabuk. “Farisi nang ap, Raja Herodes ap, sik malye wininyak ning ara, roti nena deiyok ning atonun ulula ati, pia kalekuka dinamlulume. Anggun moubuka kalekuka dinamlulume,” nyabuk. Sik Farisi nang ap, Raja Herodes ap, arye, kanye talima malye tenebuka winilamak nang ara, ‘Na mapu kekebikirye, sik babye, malye winibikcak’ tenen, Yesus arye el mapu ati ayupu nyabuk. “Ninye arye roti dana ati, roti nena deiyok ning mitik anun aryuk dobuka, roti bun noutam dongopmacebuk, weika arye banmalya ani, roti weik arye nelamle touk, sik Farisi nang ap, Raja Herodes ap, kanye talima malye tenelamak yupu kekepmunce, anggun kanye tenen ning babye, ‘Malye updeipsilyak’ tenen, moubuka umunce, sik yupu kum kekenamlulume,” nyabuk. Ara, sik Farisi nang ap, Raja Herodes ap arye, Yesus el ulamuk ning ap, yupu peterelamuk ning ap, ‘Allah el Mi Koprop ulirye, apil dolule’ tenen, ‘Diba kum tenepnamap,’ tenelamikce, Yesus ati, “Ninye kum winipmanto pil dakna pil dopsutumopura, diba tenepkitibye,” nyalamik. Utenebuka nyalamika anya arye, Yesus arye el mapu ati, Farisi nang ap, Raja Herodes ap, sik tenebuka winilamice ning, roti nena deiyok ning weika arye balamle touk ulul ning ati, “Moubuka unamlulume,” nyabuk.
Dalmanuta mutuku binuka daunmeka ani, Farisi nang ton Yesus dam yayik. Yesus dam yayikce, ‘Yesus ara, Allah el mikip deice arye dipkoprop apil dolul do, kum do?’ tenen, Yesus asibikce winipdeyik. Sikce nyabik. “Allah arye dopkwetepkuk ak, ‘Allah el mikip deice arye pil dolule,’ tenepnukiyaba ati, ninye kum winipmanto ning, winipman kum pil dopsilyame,” nyabuka asipdeyikce piripdeyik.
Tonok talak ara, Farisi nang Yesus dam yayikce, ‘Yesus ara, malye yupu nyapnul do, kum do? Malye yupu nyaptuopura, nunce, “Elda pia malye winilulnye,” nyaptibya’ tenen, tenepce asipdeyik. “Musa sekamuk yupu deice, tonoknye birye el domtu kil ati, ‘Akil bataknune,’ teneplirye, adiparyuk talya lukparabuka bataktu do? Yata deiyok arye do nirya, anye teneplye touk, ‘Adeiyok ara, ani. Adeiyok atia, na kil bataknune,’ teneplye touk, adeice aryuk el domtu kil bataktopura, aning teleb do, malye do? Musa arye, ayupu sekeipsuk do? Kum do?” nyabuka asipdeyikce, Yesus ati winipdeyik.
Magadan mutuku binuka daunmek bukni, Farisi nang ap, Saduki nang ap, Yesus dam yayik. Yesus dam yayikce, ‘Yesus ara, Allah el mikip deice arye dipkoprop apil dolul do, kum do?’ tenen, Yesus asipdeyikce winibik. Sikce nyabik. “ ‘Allah arye dopdeibukba, el mikip deice arye pil dolule,’ tenepnukiyaba ati, ninye kum winipmanto ning ap, sirya dakna pil ap, dopsilyame. Aning dopminyeba eibipyeura, dib tenepkitibye,” nyabuka asibuka, Yesus ati piripdeyik.
Aning ara, talye ati kum nyapsine. Ara, Allah arye, ayupu nyapdeipsuke. Anggun min yuma domunye kilapu batakamunye nang ara, na Allah arye yu weik unulula ati, weik arye wenepnamsine. Ara, Allah Yahweh, Israel ninye pia kalikuka melilulnye, anggun deiyoknye, Allah arye nyapsuka ati, aning ara weik mambule nyapsine. Allah Yahweh, im deice yin talin malaikat nirya, sik weik deiyoknye birye nyapdeipsuke. Winipmanto ara, ninye arye, ton nang oplobikirye, adipmace nang sik ining palepmalye baju dobuka, ongobikcopura, pia malye ulule. Ara, bico tenena kum ninye arye, aning atonun ning wininyake. Ati, anggun domunye kilapu batakmunyopura, ara ayu un nang atonun ululume. Winina meme. Ati ara, anggun nirya arye, anggun bidamnye ati, ‘Nun dobupu kilapu deiyok kum upmalibuk, talye batakibirye, yuk kilapu dobipyopura, Allah arye yu kanye bopsilyak’ tenen, pia moubuka kalikelanamlulume. Min yuma domunye kilapu batakna meme. Ayupu nirya ara, Allah Yahweh, aning-aning nirya ap, im deice yin talin malaikat nirya ap, sik weik deiyoknye birye nyapsile. Na Maleaki birye lak nyapsine.
Piblisite