Markus 1:14 - Eipomek

¹⁴ Yohanes Pembaptis tongobikce, akunum tapu koubuka wenen aik dongobikba, Yesus ara, Galilea tam tamubuka welebiyuk. Welebiyukce, Allah el laka teleb yupu, ninye lyen yupu lak nyalamuk. Nyalamuk ning ara, ani.

Markus 1:14 Referans Kwoze

Matius 4:23

Sik ap, Yesus ap, Galilea mutuku noutamak balamika ani, Yesus arye, sik Yahudi yala nang Allah yupu keken aik wekuka, el yupu peterelamuk. El teleb yupu peterelamuka ara, Allah arye ninye lyeplirye, sik talima talinamle yupu, lak teleb yupu peterelamuk. El peterelamuk talak nirya ara, sik amutuku ninye mitikuk dilamuk nang ap, minop danirye weik uk dilamuk nang ap, teleb ubuka kwetelamukba, aninye nirya teleb ulamik.

Matius 4:12

Ura, yuk nang arye, “Raja Herodes arye, Yohanes tapu koubuka, ninye wenen aik dongopmale,” nyabikba, Yesus kekebukce, tamubuka Galilea mutuku yayuk.

Efesus 2:17

Kristus yayukce, Allah el laka teleb yupu, ninye lyen yupu peterelamsuke. Ninye yala nirya ap, Allah ap, kanye dukdongobuka neiktoto teleb una ati, el yupu peterelamsukba, anggun pia bai tam ulalumce, Allah damak ara, pia pera atonun ninye ulalumbuk, anggun babye, kekelamlume. Aning atonun, nun Yahudi yala ninye Allah dam ara, miningdam ton unyap ninye babye, ayupu ton kekelamubu.

Lukas 8:1

Atalak noutam ara, Yesus arye, weik asik dolamikak ap, ninye mitik anun ulamikak ap, balamukce, Allah arye ninye lyeplirye, sik kanye talima talinamle yupu, laka teleb yupu peterelamuk. Peterepra balamuk talak nirya ara, elce wipdeiamuk nang obarye 12 nang ap, melibuka balamik.

Rasul 28:23

Nyabikura, sik ap Paulus ap arye, “Ara asum arye bulubibyopura, yupu talipnamabe,” nyabik. Nyabik touk, asum akunum ubukopura, dana-dana tam nirya arye, Paulus unmok aik damak ninye weik bulubuka yanmek. Yayikopura, beren tam arye ubuka keting dukduk noutam ap, anoutam nirya peterenmoka ani, inibuk. Paulus arye peterenmok yupu ara, ani. Tonok ning ara, Allah arye ninye lyeplirye, sik kanye talima talipnamle yupu peterenmok. Tonda Musa arye sekamuk yupu noutamak ap, tonda Allah el yupu lak nyalamik nang nabi-nabi nang arye sekamik yupu ap, doprobukce, ‘Anggun kel kiplulume. Yesus ara, dipkoprop Ninye Lyena Deiyoknye ulule,’ nyabuka peterebuk. Ara, ‘Awekmek nang dib tenepnamak’ tenen, peterebuk.

Matius 9:35

Wini talak noutamak ara, Yesus arye, weik asik dolamik ap, ninye mitika arye ulamikak ap, Yahudi yala nang, sik Allah yupu peterena aik binuka wekelbalamukce, ‘Allah ninye lyeplirye, sik kanye talima talinamle’ tenen, lak teleb yupu lakak ubuka peterelamuk. Tonda, Yesus arye mutuku-mutuku nirya peterepra balamukce, uk yala yuk-yuk, uk dilamuk ninye weike kwetelilamuk.

Rasul 20:25

Nyabukce, ayupu ton dukdongobuka nyabuk. “Winira na kele. Anggun nirya, anggun kan-kan balamsirye, ‘Allah lyepsilirye, ninye kanye talima talinamsil,’ nyabuka, el yupu peterelamsise ninye nirya, tuba tamubuka tonap, pia na kum eipnamnulume.

Matius 14:2

Yesus el pil dolamuk ning, Raja Herodes kekebukce, walwal arye nyabuk. “Se, anye bira Yohanes arye winilule. Yohanes Pembaptis ara, ya arye ngang seklopsinye bira, akunum kam bukuke. Akunum kam bukuka ati, amikip deice arye ninye kum winipmanto ning pil dolule,” walwal arye nyabuk.

Lukas 3:20

Herodes ara malye winin ning weike akunum winilamukura, Yohanes wenena aik dongobuk ning ara, aning deice arye malye ning tonap tabakuka winibuk.

Matius 11:2

Yesus arye peterelamuk ning ap, winilamuk ning ap ara, yuk nang laka nyabikba, Yohanes arye kekebuk. Ara, diba tenena ninye mek dongolamuknye, Roma mutuku deiyoknye birye wenena aik pum dongobuknye, Yohanes Pembaptis arye, Yesus winilamuk ning kekebukce, el melin nang ati ayupu nyabuk. “Anggunda, Yesus dam bimunce, ayupu ara asipdelulume. ‘Nabi nang arye, ‘Ninye mutuku-mutuku nirya noutamak arye, ninye weik lyeplirye, sik kanye talima talinamlanye yanamle,’ nyalamsiknye bira, an akunum do? Yuknye ton aminyan talak yanamsil do?’ nyabuka, Yesus ati asildelbilulume,” Yohanes arye nyabuk.

Matius 4:17

Yesus arye, Nasaret mutuku batakuka, Galilea mutuku biyuk talak ara, aning ara, Allah yupu deiyok koubuka peterelamuk. El peterelamuk yupu ara, ani. “Anggun malye winimunye ning ap, kanye talima malye tenelulum ning ap, batakanamlulume. Ara, Allah arye ninye weike lyeplirye, sik talima talinamle talak akunum dam upmala atia,” nyalamuk.

Roma 1:1

Telebe, na kayapo. Na Paulus birye, anggun Roma mutuku diba tenelulum ninye ati, teleb nyabuka, asurat sekeipsene. Na Paulus ara, Yesus Kristus el amu tam bukuka, el pil melibuka donanye, Rasulnye unune. Allah arye nati, ‘Paulus ara, na laka teleb yupu, ninye lyena yupu dobuka peterelbinamle,’ tenen wibuka deipnukce, el laka teleb yupu dobuka peterelbana ati, deiyok kouna deiyoknye, Rasulnye kipnuke. Ati, elcuk wipdeipnukba, apiluk donune.