Lukas 9:3 - Eipomek

³ Tonda wininamika ati, laka nyabuk yupu ara ani. “Amutuku-amutuku nirya banamunye talak ara, aning-aning nirya kum libuka banamlulume. Ara, anggunce, ‘Se aning-aning nirya ara, yata wiribuka arye doproptibye do?’ tenen, weik arye tenena meme. Allah arye anggun patapsilye ning ara arenamsile. Kama sirika ap, aling ap, anggun kwaning ap, yo bok ap, baju bitinye ap, libuka kum bopnamlulume,” Yesus arye el mapu 12 nang ati nyabuk.

Lukas 9:3 Referans Kwoze

Lukas 22:35

Yesus arye nyabukopura, ayupu tonap nyabuk. “Narye dopkwetepsibuk, anggun ‘Na’ tenen ning lilalum baju ap, talye din ning lin aling ap, yan ongona ap, kum bopmancuk, na yupu peterepra balalum talak nirya ara, yata ning ton, tonok ning kum upsukura, patalamsuk do?” Yesus arye asipdeyukura, sikce tamubuka, “Nunda aning-aning nirya ara, min kum uamuka ati, kum patalamsuke,” nyabik.

Mazmur 37:3

Anggunda, malye wininyak ninye ati, ‘Anang ara, teleb wininyake,’ kum tenenamlum bukni, tukwak mutuku noutamak unamlum talak nirya ara, ‘Allah elcuk melinamsil’ tenen, anggun ni koproba Allah Yahweh atibuk, diba tenepmunce, diksukum piluk donamlulume.

2 Timotius 2:4

Winira, winipmanto yupu nyapnukine. Talya-talya unyak ninye arye tenebuka, winilamak ning nirya ara, sik yin talin nang koprop arye, aning talibuka kum wininyake. Aning kum bukni, ‘Na weik deiyoknye birye kanye deipnamnil’ tenen, adeiyoknye birye nyalye yupu uk kekebuka pil donyake.

Lukas 12:22

Yesus arye ayupu ton nyabuk. Anggun unamlum ning nirya ati, ‘Se yata wiripnuyap do?’ tenen, kanye imun una kume. Anggun din ning ap, ongon baju ap ara, mitik mambul bukni, anggun nong ap, kam una ap ara, weik mambul anya arye, Allah arye anggun patapsilye ning ati melinamsile. Aning ati ara, ‘Se, nun yata mek ap, yata din ning ap, dinamap do? Nun ongon baju, yataton cang baju, el si juba ongopnamap do?’ tenen, kanye imun kum unamsile.

Lukas 3:11

Asipdeyikura, Yohanes arye tamubuka ayupu nyabuk. “Ongon baju bitinye uplinye bira, ongon baju pia kum uplinye biti, arepnamlule. Din ning uplinye bira, din ning pia kum uplinye biti, arepnamlule,” nyabuk.

Lukas 12:28

Mutmuta noutamak talye ulul kurun ning ara, arup arye kita popmalya ani, ambusum ara keting deiplirye, kuluplyeura, uku dongonyak bukni, Allah arye urasin pia teleb ubuka kwelilule. Aning ara, mambul kum bukni, anggunda weik mambul anya arye, Allah arye anggun baju patapsilyopura, arenamsile. Bukni, anggunda Allah ati, weik arye dib kum tenelulume. Anggunda, ‘Nun patapsilye ning Allah arye arenamsile,’ tenelalum ning ara, mitikuk usulule.

Lukas 5:29

Banmarika ani, Lewi el aik koprop wekelbirik. Ura, Lewi arye, ‘Yesus kipnun’ tenen, weik kwalya kwalibukce, el kayapu nang weik yukubuk. Lewi arye yukubuk nang, ara amutuku talyamik nang, sik Roma mutuku nang ulamik ati, pajak yo bok bulubuka, arelamik nang ulamik. Tonda, yuk nang ap, weika arye yanuka wekik akarye, sik nirya dina neikak dinmek.

Markus 6:7

Ura, Yesus arye Nasaret batakuka, amutuku-amutuku nirya peterebuka balamuk. Apeterepra balamuk talak noutamak arye, elce wipdeiamuk nang, sik 12 nang ati, el dam yangana ati, yukubukce, bitinye-bitinye kibuka, ‘Na pil dolbinamak’ tenen, yuk-yuk dobuka dopdeibuk. Anang dopdeibuk ning, ‘Isa mer nirya bisibuka yakanamak’ tenen, el mikip sik nong deice deibuk.

Lukas 9:4

Nyabukce ayupu ton nyabuk. “Tonok asik domicak bimunyopura, tonok aikuk wekuka anyakauk manmamunya ani, yuk mutuku banamlulume. Anyasik mapmana, orasik mapmana, uasik mapmana kina meme.