Lukas 23:2 - Eipomek

² Anang nirya ara, ‘Pilatus arye Yesus opnusil’ tenen, minina yupu arye ayupu nyabik. “Yesus ara, el malye ulya deice arye, nun mutuku noutamak unyak ninye nirya eibikirye sik nirya malye wininamake. Elce malye winilisulule. Tonda, nunce Kaisar yo bok arilamap ning ara, ‘Aning kum wininamabe,’ nyabuka yupu sekeldongosulule. Tonda, Allah arye dopreipliba ninye weik lyeplirye, talinamle deiyoknye, ‘Mesias ara, na unune,’ Yesus arye nyalule. Mesias ara, Raja atonye unamle ati, ayupu nyasilya deice arye, ‘Nara, weik ninye deiyoknye, Raja atonunye unune,’ nyasulula anye arye, aning ara, pia malye.” Sik anang arye minina yupu deice arye nyabik.

Lukas 23:2 Referans Kwoze

Yohanes 19:12

Yesus arye ayupu nyabuk talak arye diprongobuka, atalak noutamak nirya ara, Pilatus ara ilil ubukba, ‘Yesus lopdeiptinye’ tenen, lo talak dipdeyuk bukni, sik Yahudi yala ninye deiyok nang arye weik arye nyabik. “Kume, ance anye bira Yesus lopdeipminyopura, Roma mutuku nirya talilul weik deiyoknye Kaisar arye, anti, ‘Anye bira na ka koprop,’ kum tenenamkile. Aning ara talye kum nyapkiyabe. Yatanye do nirya, ‘Nara, ninye deiyoknye,’ nyabuka, si ereldanyak ninye nirya ara, Roma mutuku weik ninye deiyok talibuka, ulul Kaisar ati, yanina atonun ninye unyake. Ati, ayupu atonun nyabuknye Yesus kum lopdeiptume,” nyabik.

Lukas 23:14

“Anggunce Yesus dobuka na ak boyanmalumce, ‘Anye bira el malye winilya deice arye, amutuku talinyak nang Roma nang obisiptibye nyalule,’ nyapmanulum bukni, anggun tuba kekenmalum talak ara, asipdenmanubuk, anggun nyapmalum touk, el dipkoprop malye winilul ning ara, tonok babye ton kum kekepmanue.

Rasul 24:5

Nyabukce ayupu ton nyabuk. Anye bira Paulus ara, el malye ulya ara, akunum kel kibupe. Elda malye winilulnye ati ara, mutuku-mutuku nirya, el malye winiprabalamuka deice arye, Yahudi yala nang ninye weik bulyamikura, yu weik ulamukbuk, yupu nyaldalamikce, malye ulamik. Tonda, Yahudi yala nanguk bukni, urasin yuk kipdobikce malye nang ara, Nasarani nyanyak nang ara, el deiyoknye ulule.

Yohanes 18:30

Nyabukba, sikce, “Kume, elda pia malye wininanye kum uptopura, tapu koubuka, an dam kum arel yakitibye. Talye ati kum yanmabe,” nyabik.

Markus 12:17

Nyabikbuk, Yesus arye anang ati nyabuk. “Yo bok ara, yala tonokuk ulula ati, Kaisar arye, ‘Aning arepnululume,’ nyasulul ning ara, adiparyuk Kaisar ati arenamlume. Tonda aning atouk, anggunce, ‘Allah ati arenamabe,’ teneplum ning ara, adiparyuk Allah ati arenamlume. Aning atouk, ‘Tonye bira, kekenamabe, tonye biti, nun lik tenen, bataknamabe,’ tenena kume. Kaisar arye nyasulul yupu babye, Allah elce nyasulul yupu babye, kekebuka wininamlulume.” Yesus arye nyabuk. Yesus ayupu nyabuka deice arye, Farisi nang ap, Raja Herodes el yupu kekelamik nang ap, arye, ‘El yupu nyaptua deice arye malye uptue, tenepmap bukni, aning kum winipmanto uple,’ tenebikce, “Se,” nyabuka mambul kirik.

Matius 22:21

Asipdeyuk ati, sikce tamubuka, “Ara Kaisar el ning,” nyabik. Nyabikopura, Yesus arye anang ati nyabuk. “Ati, Kaisar el ning ara, adiparyuk Kaisar ati arenamlulume. Ton, Allah el ning ara, adiparyuk Allah ati arenamlulume.” Yesus arye nyabuk.

Zakaria 11:8

Ati sik domba weina ati deiyok nang winilye nang arye nati, ‘Nun like,’ tenelamnik. Winibuka tenelamnikba, narye sikti, ‘Se, sik anang ara dan talak arye teleb pil donamak do? Pia sikcuk ukirye, teleb ubuka pil kum donyake,’ tenepse ati, ‘Aning ara na pia like,’ tenepsirye, ‘Akunuma sikda dauplye,’ tenepse. Winibuka tenepse ati, tonok wala deice aryuk, sik adeiyok nang winilye ati, wenepsirye, yakuka dopkwetepsirye, obuka sice buklopse.

Yeremia 38:4

Ayupu laka nyabukba, sik amutuku noutamak deiyok yuk-yuk talibuka, mambul pil dolamik nang kekebikce, sik ninye deiyoknye, Raja dam nyalbiyik. “Kume na nio. Ance nyapdeiptumba, ayupu nyanmalanye bira, oploptibye. Ara, urdem ati, kum nyababe. El yupu deice arye, amutuku kalikina ati unyak yin talin nang ap, amutuku unyak ninye ap, ayupu kekebikirye, ilil upliba, sik mikip kum upnin balule. Sik mikip, pia mitang uplyak ati, yanuka nyapkiyabe. Ara, dipkoprob anye bira, Yeremia birye, talye tilila yupu nyaplopliba, amutuku unyak ninye nirya kekebikirye, pia malye kanye bonyake. El pataplye ninguk tenelule. ‘Amutuku ninye teleb winipnamak’ tenen, patapliba, kum nyasulule. ‘Amutuku ninye ikin uptu babye,’ teleb uka, tenelirye, nyasulule,” nyabik.

Yeremia 20:10

Tonda, amutuku ninye nirya arye, natibuk, yupu mur-mur ana deice arye, yupu talenmakiba kekenune. Sikce natibuk, nyanyake. “Anye bira, ‘Ikin ninguk yanamsile,’ tuba tenelirye ulule. Elda nun lik anya arye, tomobibirye, nun mutuku weik deiyok nang dam bobibirye, ‘Anye bira, malye yupu nyalule,’ nyabibibuk, sikce wenepnamake,” nyaninyake. Tonda, na kayapu nang babye, ‘Malye winipnul do?’ tenen, pia kalikuka dininyake. Tonda, ‘Malye winipliba, eiptibirye, tapu koubibirye, wenebuka optibye,’ teneninyake. Ara, yuk nang aryuk, aning kum teneninyak bukni, pia na tam nang koprop babye, ayupu nyaninyake. “Winibibya deice arye, ‘El ti obuka bisipnamabe,’ tenenyap ning ara, akunum winipnamabe,” nyaninyake.

Mazmur 62:4

Bukni, sik yu nang ara, yata talak arye, yuk nang ati, opnamlum do? Winipmanto ara, basam poka daksakmanto uplyopura, ninye arye ayo nirya ulultaklamak touk, anggunce sik lik tenelulum nang ati, tuba-tuba onauk wininamlum do?

Rasul 24:13

Aning atouk, tonda sikda si bam bol deice aryuk, “El malye winibuk,” nyabuka talye nyapmaniyak yupu ara, “Dipkoprop winibuke, aning ton winibuke,” nyabuka kum wipdeipmaniake. Deiyok ton kum upmanilabuk, talya nyapmaniake.

Lukas 23:5

Nyabukura, Allah arena ati deiyok nang nirye arye, ‘Pilatus kekeplirye, diba tenepnamal’ tenen, tabakdongobuka mikip arye tonap ayupu nyabik. “Kume, Yesus el malye winilul ning ara, malye-malye peterelya deice arye, Yudea tam unyak Yahudi yala ninye nirya ati, malye ulisulule. Galilea mutuku arye malye-malye winipnin yangalamuka ani, amutuku babye, yanuka tuba malye winilisulule,” nyabuka weik arye nyanmek.

Matius 17:27

Bukni, ayo bok dona deiyok nang arye, nunti malye tenepsikcak tenen ati, anda Galilea mekwen lilkwa bimince, mekin bal youn ning dobuka, mekwen pum dongopminba, mekin bal tonok youpminyopura, amekin bal si bama baktalibuka dileminba, derakma keil uang tonok awaplyopura, dopropnulyame. Akeil uang ara, nun bitinye nang anyaik wekelbinunama dekna ati, akil uang deklyame. Akeil uang ara, dopropmince Allah el si erena aik deiyok nang ati, arel binulyame,” Yesus arye nyabuk.

Amos 7:10

Ara, Allah arye ayupu nirya nyapdeibukba, nabi Amos birye, ayupu akunum laka nyalbiyukopura, Betel mutuku Allah yupu aik pum tam, pil dolamuknye, el si ara, Amazia birye kekebuk. Kekebukce, ninye tonoknye ton, wipdeibukura, Israel ninye taleamuka deiyoknye, Raja Yerobeam dam laka nyalbiyuk. Elce nyapdeibuk yupu ara, ani. “Atalak ara, Amos birye nyasulule, ‘Nun deiyoknye Raja Yerobeam ap, el talibuka ulul mutuku nirya ara, kum danamle.’ Amos birye nyabuka, malye yupu nyalula deice arye, amutuku noutam unyak Israel ninye arye, anti malye kilina ati, yupu talinamake. Aning ara, mambul weik anya arye, kanye moupnulyame.”

Mazmur 35:11

Tonda, nati ara, pia yu nang arye, ‘Anye biti malye kipdeibibirye, opnamabe,’ tenepnikirye, nati minin yupu nyaninyake. Ara, deiyok kum upmalibuk, sikce nati, “Elce malye winibuk ning ara ani, ani,” nyabuka, talye yupu aryuk nyaninyak bukni, dipkoprob ara, aning nirya ara, narye pia kum winilamsa ati, aning ara, na pia walwale.

1 Raja-Raja 18:17

Ahab birye Elia binuka tikmokak eibukopura, “Dipkoprop anda Israel ninye ati malye kililyamnye bira, an atikmalama akunum do? Yuknye do?” nyabuk.

Matius 27:11

Yesus bobuka, amutuku nirya talyamuk deiyoknye, Gubernur Pilatus el dam bobinuka arebikura, Pilatus arye Yesus ati asipdeyuk. “Yahudi yala nang, sik weik deiyoknye Raja atonun nyanyaknye bira, an akunum do?” nyabuka asipdeyuk. Asipdeyukbuk, Yesus arye tamubuka nyabuk. “Diba, anyapmalam touk unune,” nyabuk.

Markus 15:2

Bobinuka arebikbuk, Pilatus arye Yesus ati asipdeyuk. “Yahudi yala nang sik weik deiyoknye ati, Raja nyanyaknye bira, an aulyam do?” nyabuka asipdeyuk. Asipdeyukura, Yesus arye tamubuka nyabuk. “Diba anyapmanilam touk unune,” nyabuk.

Yohanes 18:29

Wininmeka ati, Pilatus el aik pum arye bai tam yayukce, el aik dam bulubuka yanmek ninye ati ayupu nyabuk. Bura tam yayuk talak ara, Pilatus arye anang ati asipdeyuk. “Anye Yesus ara, yata ning malye winibuka deiyok ati, na dam boyanmalum do?” nyabuka asipdeyuk.

Roma 13:7

Yata deiyok ninye do nirya ati, anggunce, “Amutuku una ati pajak umum areplulume,” nyabikcopura, adiparyuk arenamlulume. Sikce, “Abona dolona ati, pajak tabakna yo bok ton areplulume,” nyabikcopura, arenauk unamlulume. Aning atonun, ninye deiyok nang nirya awininyak touk, ‘Anggunda mambule’ tenen, sik amu tam umunce, sikti, pia moubuka si erenamlulume.