Utenebuk bukni, Allah el si Yahweh arye tamubuka, Samuel biti nyabuk. “Ancuk eipmince, ‘Anye bira, el urasin teleb, el nong ara, cang weik ati, pia telebnye ulule,’ tenebuka, wibuka erelina kume. Narye, anye akunum batakmana ati, kum wipdeipnune. Deiyok ara, nyapnukine. Ara, na Allah arye, ninye nong ap, sik urasin ap, eipnirye kum erelinune. Ninye arye, nong bol deice ning eibikirye, ‘Aning mambule, anye bira telebe,’ tenelamaka atonun, kum tenenune. Tonda, ninye arye urasin ara, elilalulum bukni, nara Allah, na Yahweh arye, anggun talima pum tam moubuka elisunune,” nyabuk.
Lukas 16:15 - Eipomek15 Wininmekura, Yesus arye aFarisi nang ati ayupu nyabuk. “Anggun Farisi nang ara, ‘Yuk nang arye malye nang tenepsicak’ tenen, anggun malye winimunye ning duknumunce, nong bol deiceuk teleb pil dolulum bukni, anggun kanye talima noutamak tenebuka duknulum ning ara, malye ning weik tuba aupmalye ning ara, Allah arye kel biksulule. Tuku ak ninye arye, ‘Aning ara mambul’ tenen, pataplibuk kanye delinyak ning ara, Allah aning ati, el kanye ara, ‘Aning ara pia malye, tenebuka like,’ tenelule. Gade chapit la |
Lukas 16:15
40 Referans Kwoze
Ninye nirya arye, sik yuk-yuk unyak ning nirya ati ara, ‘Kume, nunda teleb ubuka unyap,’ tenenyake. Bukni, ninye arye sik talima pum tam arye, ‘Adeiyok ati apil donamne, adeiyok ati ayupu nyanamne,’ tenebikirye, ulamak ning nirya ara, lakak kum ulul bukni, ninye tukwak ninye, sik talima pum tam ara, Allah Yahweh arye kel kisulule. Ati, ‘Sik talima teleb do, malye do?’ tenen, asibuka winilasulule.
Aning ati ara, nun nirya ati nyapsine. Allah arye, ‘Yesus tamubuka tukwak yanamla ati, atalak ani’ tenen, wepdeibuk sum min kum upmalye talak nirya noutamak arye, yata winin ning do nirya ati, “Aning telebe, aning malye,” nyabuka, yupu lipsisikuka kum bokeipnamlume. Aning nirya daupmaliba, ‘Nun Deiyoknye Yesus dan talak yanamle do?’ tenen, dinauk unamlulume. El yalyopura, elcuk yupu lipsisikuka bokeipnamsile. Yesus tamubuka yalyopura, aning-aning nirya ati, yupu lipsisikuka bokeipnamsile. Yata ning do nirya, kunuknak duknulamak ning nirya ara, dirinak deibuka, lak kipdeipnamle. Ninye sik talima noutamak arye, ‘Winipnamne, winipnamne’ tenen, deiyok ning duknulamak ning nirya ara, laka kipdeipnamsile. Tonok ning babye, kum duknupmantoe. Anirya laka danamle. Winibuka akunum laka kipdeipsilyopura, atalak aniryuk, Allah arye, ninye nirya ati, sik winilamice ning auplye touk, yupu lipsisikuka bokeipnamsile. Teleb winin ning ati ara, “Telebe,” nyapnamsile. Malye ning ati ara, “Malye,” nyabuka wenepnamsile.
Bukni, na Allah Yahweh aryuk, ninye sik talima pum ulul ning ap, ninye arye teninyak ning ap ara, tukwak arye eibuka bikne ning ara, narye sikti, ‘Teleb wininamak do, malyeuk wininamak do?’ tenen, sik nirya ati winilenune. Narye tukwak nang nirya ati, tonok-tonok nang arye, sik wininyak ning, dawinilamiceba, nong akunum uplyopura, narye eipnyopura, sik winilamikiba, duk mouplyopura, narye sikti, kwang dakanune. Ara, narye sik winilamice touk, deken ning arenune.
Ninye nirya, sik kanya deilin erebuka ukirye, kwalinya nang ara, Allah Yahweh arye, ‘Anang ara na like,’ tenelule. Ara, dipkoprob elce, sik anang ati tenelye ning ara, ton pia luba kum kinamle. Nunda aning pia dipkoprob bikinyabe. Allah arye sik aninye ati, ‘Na like,’ tenelamlya ani, kum daneipnamle. Dipkoprop yuk talak ara, aninye ati weik arye wenebuka oplopnamle.
Allah arye nun kanye talima tenenyap ning kel kilisulule. Allah El Dib Kanye arepsuk touk, anang babye, dib tenebik deice arye Allah El Dib Kanye sikti, akunum aribuk. Aning winibuka deice arye, ‘Sik Yahudi yala kum ninye babye, diba tenebiceura, na mapu kiptinge’ tenen, Allah arye akunum laka nyapmasile.
Aning ara, kum bukni, anggun kanye talima noutam, teleb-teleb ubuka ulamunye deice arye, dipkoprop teleb kilapu unamlulume. Anggun nimalye arye tunim abuka una ap, yupu weik arye nyana kum, kanye dukdongobuka nimalye arye una ap ara, talima noutam usulul ning anya arye, nong bol deice usilye ning, wisi dakirye suruklamsil ato kume. Aning ara, talima noutam pia usilibuk, Allah el kanye ara, ‘Aning ara, pia mambule,’ tenelirye, kanye deilisulule.
AFarisinye ngalukun moka ati, Yesus arye anye biti nyabuk. Se, anggun Farisi nang ara, anggun kanye talima noutam malye ning aupmasilyebuk, ‘Teleb nang tenepnamsiyak’ tenen, nong bol deice ninguk teleb winilalume. Anggun mek makau ap, piring ap, ‘Malye upmasilye mangkau arye dipnyak’ tenen, bol deice tam ara teleb-teleb ubuka mek likilulum bukni, anggun kanye talima noutam ara, pia malye wini ning ap, yuk ninye ning ubula dona ap, awabsilibuk, aning tenena kum aryuk talye kanye bobuka ulalume.
Na Daud birye akunum kele bikamse. Na ni koproba Allah, ninye nirya sik kanye noutamuk deipmince, asilelyame. Tonda, el talima noutam pia teleb ulamlanye bira, diksukum ulamlanye biti, kanye pia delilyame. Ati, narye aning nirya ara, na kanye pia teleb deice aryuk talye arepkine. Tonda wini talak ara, narye an mapu koproba, abulupmak Israel nang babye, akunum eipmane. Ara, asukum yanmakce, aning nirya, sik kanye talima noutam arye, ‘Se, nun ni Allah ara pia telebeʼ tenen, teleb kanye bobuka, pin-pin deice arye, aning boyanuka arepmak nang ara, akunum eipmane.
Yesus arye nyabuk bukni, anye bira, ‘Yesus arye nati, el malye ulule,’ tenepmanila ati, ‘Na malye wininye ning kum biknilirye, telebnye uk, tenepnunile’ tenen, ayupu tamubuka nyabuk. “Yo, deiyok ara, Allah yupu deice arye, ‘Anggun bidamang unyak nang,’ nyalulul ara, dipkoprop ara yatato nang ati nyalul do? Yata nang ati bico tenebuka kanye deipnamne do? Yata nang ati, melinamne do?” nyabuka asipdeyuk.
Akil arye deiyamuk mapu nirya ara oplopnamne. Winipniba, amutuku-amutuku diba tenenyak ninye nirya arye, moubuka kel kipnamake. Ara, ‘Se, ninye kanye tenen ning ap, ninye talima pum tam usilye ning nirya ap ara, elce kel kisulule. Nun nirya arye ulamap touk, yupu bokeipsilirye, wenesulule,’ tenebikirye, kel kipnamake.
Asurat deice arye, “Yuk nang ati, nimalye arye sik amutamak unamlulume,” nyapmasin touk, anggun wisi danana kum arye, kam nang atonun nang ati, ayupu nyapsine. Ara, sik wisi nang amutamak umunce, sik yupu kekebuka nimalye arye unamlulume. Buku Amsal yupu noutamak sekeipsik yupu aupmala ati nyapsine. Ayupu ara ani. ‘Sik kanye erebuka, dildanyak ninye ara, Allah arye aninye ati bataklirye, sik yupu sekelule. Bukni, sik kanye darabuka, talima nimalye arye amutamak unyak ninye ati ara, bico tenepsilirye, talye luba kibuka melisulule.’ (Amsal 3:34) Ayupu tuba awamsuka ati, anggunce yuk ninye nirya ati, anggun bidamnye kanye darabuka, talima nimalye arye teleb ubuka unamlulume.
Aning ati ara, yata ninye do nirya ati, Allah arye, “Aning wininamlulume, aning ara kum wininamlulume,” nyabuka, mem yupu areamsukba, ayupu talibuka dobolbabirye, diksukumuk winibibyopura, adeice Allah arye nunti, ‘Sikda teleb nang,’ kum tenenamsile. Nun babye mikip deice arye, diksukumuk kum winiptibya ati nyapne. Aning kum bukni, Allah el yupu kekebuka kel kinyaba deice arye, ‘Se, nunda dipkoprop kanye talima malye nanguk unyabe’ tenen, moubuka kel kinyabe.
Sik winilamak ning ap, pil dolamak ning ap nirya ara, ‘Yuk ninye eipsikirye, se anang ara pia teleb nang, tenepnamsiyak’ tenen, wininyake. Sikda kanye talima ereldanyake. Ton ning ara, Allah yupu kekebuka diba tenenyak ninye ara, ‘Allah yupu ati pia tenenamap’ tenen, mitik pala ning deice arye, Allah yupu ayat sekdeipnopura, taruk nakup deice ap, asok deice ap, deibuka kitilongonyak. Bukni, sik Farisi nang ap, Musa sekamuk yupu peterena deiyok nang ap ara, ‘Ninye eipnamsiyak’ tenen, pala weik ning deice kitildongokirye dinyake. Winilamaka nirya ara, ‘Yuk ninye eipsikirye, ara pia teleb nang, weik kel nang tenepnamsiyak’ tenen, wininyake. Ton ning ara, Allah diba tenenyak ninye ara, sik Allah morona talak ara, kisok pakunyak baju mouse ak ara, bumang baju sekuka tipmenikuka mitik-mitikuk kirikildongonyake. Bukni, sik Farisi nang ara, ‘Yuk nang eipsikirye, ara Allah morona weik kel nang tenepnamsiyak’ tenen, weik cang baju sekuka, tipmenikuka mitik-mitikuk kisok pakunyak baju mouse ak kirikildongonyake.
Ninye weika arye nyabuka laka nyanyake. “Kume, nunda pia dipkoproba bico tenesinyaba anya arye, anggunti pia kum batakanamsiabe,” nyanyake. Bukni, sik anang noutamak arye, ninye pia weik tam ara, talye yupu nyaltakanyake. Bukni, talye yupu nyaltakana kumce, “Dipkoprop anye bira, na kwit koproba, na talimanye ulule,” nyabuka, pia bico tenesilirye, kum batakasululnye bira, pia elti, eiptibye bukni, anye bikilul touk, yuk nang ton weik kum unyake. Dipkoprop bico tenesinyak ninye ara, tonok-tonok uk unyake.
Birikce, Farisinye tikukce, Allah moronmok noutam arye, elce winilamuk ning atibuk ayupu nyabuk. “Na ni Allah, yuk ninye nirya malye ulamak touk kum wininune ati, teleb nyapkine. Anang ara, wininyake. Ton ning ara, ‘Weika arye dopropnamap’ tenen, yuk nang tia aryamice, ato kum bukni, weik tonap tabakuka tamudolonyak nang unyake. Ton ning ara, pia malye-malye wininyak nang ap, sik domik kilapu kum bukni, talye kilapu yona nang ap unyake. Sik wininyak atonun kum wininune. Tonda, otikmalnye yo bok boyangace buk, ubula dololamle atonun, nara kum wininune.
Allah Yahweh, elcuk, nun tukwak unyap nang yala-yala nirya ap, mutuku noutam unyak nang nirya ati, yupu lipsisikuka bokolina deiyoknye ulule. Ati, na ni Allah Yahweh, ancuk kintinipmince, na dipkoprobuk ulamse ning nirya ati, moubuka tenipdemince, ance nati, yupu lipsisikuka bokeipnamnilame. Tonda, na kanye talima noutam tenina deice arye, tilila yupu tonok ning babye kum nyalamse. Na kanye talima ara, dipkoprob uk unulula deice arye, aning dipdemince, na winilamse touk ubuka, yupu lipsisikuka bokeipnamnilame.
Moropkipyopura, nun ni anda im deice mutuku unmamince kekenamsilyame. Kekepsimince, nun malye un ning ati namin kipsimince, lyelonamsilyame. Na ni ance tukwak mutuku noutam unyak nang nirya ati, nun talima noutam ulye ning ara, an kel ati, teleb do, malye do, ninye arye sik yuk-yuk malye winilamice touk, tonda teleb ulamikce touk, ance yupu bokeipnamsilame. Na ni ancuk ninye ap, sikce deibikce nang ap, tukwak nang nirya, sik talima noutam ulye ning nirya diminyakarye, bikisilyame. Aning ara, ninye yuk nang arye ton kum winiptinge. Aning ara, ancuk winiptume, ati moropkine.
“Ton wininyak ning ara ani. Sikce talye bona utoto kum kilapu, youwak kilapu ati, nyanyake. ‘Anggunda, anggun talilulum ning nirya, noutam arye bokuka, Allah si erena ati arenamsulume,’ nyaltakanyak bukni, youwak kilapu arye sik ning aribicopura, anang arye sikce sik bidamang ati bokuka, weik arye dolonyake. Tonda, yuk nang arye, ‘Anang ara, Allah morona weik kel nang, nyapnamsiyak’ tenen, Allah moroce ning ara, yupu cang arye moronyake. Awinice ning nirya ati ara, Allah arye awininyak nang atonun nang nirya ati, pia weik arye wabuka opnamle.” Yesus arye el mapu obarye 12 nang ati ayupu nyabuk.
Ara yuk talak ara, Yahudi yala deiyok nang arye, ‘Yesus el yupu nyaptu deice arye malye uptue’ tenen, sikce yuk nang wibuka deibikce, ‘Yesus yupu kekebikirye, nun yanuka nyapnamsiyak’ tenen, ayupu maka meilbana ati dopkwetebik. Ara, ‘Yesus malye yupu nyaptu deice arye, tapu koubuka Gubernur dam bobibyeura, elce wenebuka opnamle,’ tenebika ati, anang maka meilbana ati, Yesus dam dobuka deibik.
Yesus arye nyabuk. Sik talimak malye ning tuba aubuk buk, ‘Ninye eipnamsiyak’ tenen, nong bola deiceuk, teleb unyak nang atonun kum unamlulume. Sik anang ara, Allah si erena ati, din dina kum, si tebuka unyak talak ara, ‘Yuk nang eipsikirye, mambul nang tenepnamsiyak’ tenen, sik asok melmel karikuka engepmanto unyake. Tonda, ‘Yuk nang eipsikirye, se Allah ati din dina kumce, urdemuk unmake, tenenamsiyak’ tenen, potong lelekna ap, mek kekena ap, kum diparyuk, malye-malye ubuka lakak banyake. Anang ara, yuk ninye eibikirye, sikti, ‘Se, sikda mambule,’ tenelamak nang akunum dopromaka anya arye, aminyan talak Allah arye, yuk dekna ning ton, sikti, tabakuka kum arepnamle.
Yesus arye ayupu nyabukopura, ayupu ton nyabuk. Anggun talimak malye ning tuba aupsukbuk, ‘Ninye eipsikirye, teleb nang tenepnamsiyak’ tenen, nong bola deiceuk teleb unyak nang wininyak touk, anggunda na mapu arye, aning kum wininamlulume. Amalye unyak nang ara, ‘Yuk nang arye eipsiting’ tenen, ninye bulubuka balamak bisik ap, Allah yupu peterena aik kopropa ap, ninye dinak tikikirye, Allah moronyake. Awininyak ning nirya ara, ‘Teleb nang tenepnamsiyak’ tenen, unyaka anya arye, na dipkoprop nyapsine. Sik dekna atonun ning ara, adeice arye akunum dolonyake. Aminyan talak, Allah arye anang ati, yuk ning ton tabakuka kum arenamle. Bukni, na mapu, anggunce Allah moronamlum talak nirya ara, sik anang wininyak touk kum wininamlulume.
“Aning ati ara, sik tenepce arye, talya nyaltakanyak nang winilamak ning ara, anggun atonun kum wininamlulume. Anang ara, Allah el si erena ati kum bukni, ‘Yuk nang eipsikirye, si erepsikirye, pia teleb nang tenepnamsiyak’ tenen, bona utotoa talina kum ninye patalul ning arebikce talak ara, weik bingong nyana terompet nyabikirye, ninye weik arye, ban bisik nirya ap, Allah yupu peterena aik kopropa ap, asukumuk yuk ninye dinyakak, laka ubuka arenyake. Na dipkoprop nyapsine, Allah arye anang ati, aminyan talak teleb ning ton kum arepnamle. Anang arye, teleb wininyak ning ara, yuk ninye arye, laka akunum elinyaka ati, sik menenga atonun ning ara, akunum dopropmake. Allah arye anang ati, yuk ning tabakuka kum arepnamle.
Tonda nyanululume. “Nun bidamnye asing arye akunum elinyabe. Ara, sik kanye talima pum tam erelana deice arye karye dobuka, kwalinyak ninye babye ara, ikin ning ton sik nong deice kum yangalule. Teleb aryuk ukirye, teleb kanye bobuka, kil-kil asa aryuk unyake. Tonda, sik malye wininyak nang nirya babye, dekna weik ning dopdobikirye, bona weik talin nang unyake.” Tonda, malye unyakce, “Malye winin ninguk winibirye, Allah ati winipdenuyabe,” nyalulume. ‘Allah arye, nunti wenebuka kum opnamsile,’ tenekirye, “Pia mandipna kanye bobuka, kum kekamna atonun malye-malyeuk wininyak nang ara, tuba telebuk unyake. Allah arye sikti, kum oplirye, ikin ning sik dam kum yangalule. Ati, anang malye wininyak touk, nun babye atonun wininamabe,” nyanululume. Allah arye Israel ninye ati, nyabuka wenebuke.
Deiyok ara ani. Sik bona weik bonyak nang babye, akunum dibikcopura, sik talilamikce bona ap, yo bok ap ara, kum dobuka bobinamake. Kume, sik akunum dipnamak talak ara, tuku dongobikiba, dabinuka unamakak ara, sikce talilamikce, dengna weik ning yuk-yuk ning nirya ara, dobuka kum bobinamake. Aning nirya ara, kum danamle!
Ura, tukwak mutuku noutam unyak nang nirya ara, bona weik talibikirye, maknya kintinibuka, pia teleb kibuka winilamak nang babye, kam pia kum unamake. Sik babye dipnamake. Winipmanto ara, bai tam talye kam ulye ning, yuk-yuk ning nirya dibilamak touk, sik bona talin nang babye, aminyan talak atonun, dipnamake.
Aminyan ara, Yesus like winilye ning arye Peterus ati asipdeyuk. “Wisinye Yohanes arye deipkuk mi, anda Simon Peteruso, dipkoprop kanye delinilyam do?” nyabuka asipdeyuk. Asipdeyukura, Peterus arye, ‘Se, like winilye ning arye, tuba tamubuka tonap aninguk asipdenmanile’ tenen, bouku sukubuk. Mambul kanye bobukce, Yesus ati tamubuka nyabuk. “Naio, anda aning-aning nirya kel bikinanye ulyama anya arye, adinmanilama arye, moubuka kel bikmanilame. Narye anti kanye delikunune,” nyabuk. Peterus arye nyabukba, Yesus arye tamubuka nyabuk. “Ati, na bico tenenun domba ati, sik din arenamlyame,” nyabuka domon yupu deice nyabuk.
Malye winin ninguk talibuka wininyak nang ara, ‘Nun patapmasilye ning ara, ani-ani,’ nyabuka maknya kintinibikirye, kwalinyake. Ati, ‘Sik malye wininyak ning ara, tamubuka sik nong deice yanuka, malye kipdeipdating’ tenen, morokinyabe. Tonda, sikce, ‘Nun bona weik tonun doprobibirye, bona talin nang unamab’ tenenyak nang ara, Allah Yahweh ati, ‘Allah ara, nun lik,’ tenebikirye, batakanyake. Tonda, yuk nang nirya ati, ‘Malye kipdeipnamap’ tenen, pia sunyake.
Tonda, Yesus arye el yupu kekenmek nang ati, ayupu nyabuk. “Ton nang ara, sik kanye talima ak malye ning aupmalibuk, sikce sik bidamnang ati, nunda pia telebuk unyabe. ‘Nunda pia teleb nang bukni, yuk ninye nirya ara, malye nanguk unyake’ tenen, unyake. ‘Unyak nang ara, sik wininyak ning kel kipnulum’ tenen, winipmanto yupu nyapnusine,” Yesus arye, el mapu ati nyabuk. Nyabukce ayupu ton nyabuk.
Nyabukopura, ayupu tonap dukdongobuka nyabuk. “Ara na dipkoprop nyapsine. Allah arye pajak ayo bok bulubuka delina deiyoknye ati, el malye winin ning kum danibukce lyebuke. Allah arye tenebuk ning ara, anye bira akunum lyepnyeura, teleb upnamle, tenebuk. Bukni, Farisinye ati ning ara, Allah arye kum lyebuk. Allah arye tenebuk ning ara, ‘Anye bira, nara telebnye, tenebuka ati, kum lyepnamne,’ tenebuk. Aning ara, talye ati kume. Yata ninye do nirya, sikce sik bidamang ati, kanye erebuka unyak nang ara, Allah arye anang ara, amuak du deipnamle. Bukni, sik kanye talima lamapdongobuka amuak unyak nang ara, Allah arye ereipnamle.” Yesus arye, el yupu kekenmek nang ati nyabuk.
Nun diba tenenyap ninye nirya ati, Allah El Dib Kanye arye nun melina ati, melibuka Allah morosulule. Allah El Dib Kanye arye nun melina ati Allah morosulula ara, Allah arye, ‘Winibuka unamak,’ tenesilye touk, tonokuk tenebuka morosulula anya arye, Allah El Dib Kanye tenelul ning nirya ara, Allah el babye kele bikilule. Aning atonun, nun kanye talima pum tam tenepye ning nirya babye, Allah arye kel kisulule.
Piblisite