Lukas 14:13 - Eipomek

¹³ Anggun yuna kwalibuka delinamlum talak ara, talye bona utotoa talina kumnye ap, yok kwalin ninye ap, aik bun ninye ap, asing guna ninye ap, ‘Sik nirya dilyanuyak’ tenen, yukupnamlulume.

Lukas 14:13 Referans Kwoze

Lukas 14:21

Sik anang-anang nirya arye nyabikura, anyaik nyalbiyuknye kekebukce, el deiyoknye dam laka nyalyayuk. Laka nyabukopura, akwalina deiyoknye birye, yu weik ubukaura, el melinanye ati ayupu nyabuk. “Minpola weik bisik ap, mitik buru bisik ap nirya, bimunce eipdamunye talye bona utotoa talina kumnye ap, yok kwalin ninye ap, asing guna nang ap, aik bun nang ap, anang nirya ati, ‘Nun deiyoknye yuna kwalibuka deipmala ara, dilbilulume,’ nyapmunce, dobuka boyanululume,” nyabuk.

Yesaya 58:10

Tonda, ‘Bona utotoa talina kum ninye melinamap’ tenen, anggun din ning aupmasilyopura, bokukapmunce, sik dina kum nang ati, bokuka arepnamlume. Anang melina ati, pia pi dobuka, mikip arye pil donamlulume. Tonda yata ninye do nirya, deiyok kum wamikibuk, tapu koubuka, wenen aik dongolamikiba, imun kanye bolamice ninye ati, lolongonamlulume. Winipmunyopura, sik patan ning arebuka melipnamlulume. Anyapmasin touk, akunum winipmunyopura, kunukna noutamak ulamunye ning ara, dirin weik upnamsile. Ara, na nyapsine ning winipmunyopura, wini talak ara, lukunyan noutam kunukulul touk, ikin weik asa ululum bukni, aminyan talak ara, keting noutam talak, dirin weik ulamle touk, teleb unamsile.

Amsal 14:31

Yatanye do, talye bona utotoa talina kum ninye ati, sik nong deice ikin ning weik arye delilulnye bira, bona utoto talina kum ninye kwepdeiamuka deiyoknye, Allah ati, ‘Na like,’ tenena atonun ulirye, Allah ati yanilule. Bukni, yatanye do nirya, mitang ati imun kanye bobuka ukirye, talye bona utotoa talina kum unyak ninye ati, bico tenelirye, teleb ubuka melilulnye bira, bona utoto talina kum ninye kwepdeiamuka deiyoknye Allah atibuk, kibuka si erelule. Allah arye anye biti, kanye delinamle.

Yesaya 58:7

Tonda, ‘Teleb unamlum’ tenepse ning ara, atia. Anggun din ning aupmasilyopura, bokukapmunce sik din kum nang ati bokuka arepnamlulume. Tonda, bona utotoa kum ati talye bisikak balsusulamak ninye ap, ninye asik nang ap ati, ‘Nun aik wekuka yamunyeba, nun ap din neika dibuka unamabe. Nun aik manna teleb uka,’ nyabuka unamlume. Tonda sik baju ongona kumce, nong banang uk ulamak nang ati, anggun baju bokukapmunce, melibuka arepnamlume. Tonda anggun kwit capu ap, anggun yala nang ap, aning-aning nirya pataplyopura, sikti, batakna kumce melibuka arepnamlume. Winipmunyopura, na Allah arye anggunti kanye delinamsine.

Ibrani 13:2

Ura, ton nang ara, ‘E, aninye ara, malaikat unyake,’ kum tenyamik bukni, talye mankau kanye bobuka, ninye asik nang melilamik talak ara, dipkoprop im deice, pil don nang, malaikat ati yukulamikce, melilamik. Aning ati, luba kina kume. Ninye asik nang sik dam yacopura, “Telebe,” nyabuka yukulonamlulume.

Nehemia 8:10

Nyabikura, Nehemia birye sik Israel ninye nirya ati, nyabuk. “Anggunda kum engenamlum bukni, pia teleb din ning ap, to ning ap, teleb mek ap, dilbinamlume. Winipmunce, yuk tam nang ara, ateleb dina kum kintinipmace nang ati, dobuka arepnamlume. Arup ara, Nun ni koprop Allah, el si Yahweh, el weik mambul sum upmasile. Ati, wini talak ara, engena kume. Nun ni Yahweh arye, el melisilya deice arye, kanye pin-pin usulule. Ateleb kanye talima arisilya deice arye, mikip kilisulule. Ati ara, asum engena kume,” nyabuk.

Matius 22:10

Nyabukura, el melin nang arye el nyabuk touk, bisik dandanya nirya banmek akarye, eldanmek ninye nirya bulubukabikce, kil dopnamuknye el li aik wekik. Teleb nang babye, malye nang babye bulubuka anyaik wekika anya arye, anyaik pum ilibik.

Ulangan 16:14

Akwalya kwalibuka dinamlum talak nirya ara, anggun ap, anggun mapu ap, anggun kilmapu ap, anggun pil don nang ap, pil don kilapu ap, tonda anggun asik noutam unamak Lewi yala nang ap, yuk mutuku arye tikilyangan ninye ap, tonda yuwak kilapu ap, sik nin ap, sik ni ap akunum dibikba, kwaknamne mapu ap, kwangnamne nang ap, anggun nirya arye, teleb kanye uk bobuka ulamunce, kil-kil asa arye, neika unamlume. Anggun nirya arye, neika akwalina kwalibuka dinamlume.

1 Timotius 5:10

Tonda, yuk ninye nirya arye, ayouwak kilapu sik winilamik ning akunum eibuka kel bikamik akarye, “Akilapu ara, pia telebuk wininyake,” nyabuka nyalamak kilapu ara, sik siuk sekna telebe. Ayupu ara, ani. “Kume, ayouwak kilapu, sik teleb winin ning weik aulule. Sik damang mapu ara, teleb kibuka kwaknalamikbuk, weik arye nelamik. Ninye asik nang ati, ‘Nun aik una telebe,’ nyabuka, buplan kukulilamik akarye, melilamik.” Ayupu atonun yupu nyapting kilapu ara, sik si sekuka milina telebe. Tonda, yuk ninye melina ati, ‘Apil ara, malye pil ati ara, nun teleb kilapu arye kum pil dopnuyabe’ tenena kumce, yuk dib tenen ninye ati melilamik. Tonda, kanye imun ulamuk ninye melilamik. Ara, yata teleb winin ning do nirya, yuk ning tenena kum, apiluk dobuka teleb ulamik. Yuk ninye arye, ayouwak kilapu ati ayupu atonun nyaptingopura, ‘Ato youwak kilapu ara, melinamabe’ tenen, si sekna telebe.

Ulangan 16:11

Ati, anggun ni koproba Allah Yahweh arye, elce kintinip deiamlyakuk, pia teleb kanye deibuka umunce, aning dinamlume. Ara, anggun ap, anggun mapu ap, anggun kilmapu ap, anggun pil don nang ap, kilapu ap, tonda anggun asik noutam unamak Lewi yala nang ap, yuk mutuku arye tikilyangan ninye asik nang ap, tonda yuwak kilapu ap, sik nin ap, sik ni ap akunum dibikba, batakik mapu ap, kwangnamne nang ap, anggun nirya ara, teleb kanye uk bobuka ulamunce, kil-kil asa arye neika unamlume.

Ulangan 14:29

Akintinip deipnamlum din nirya ara, Lewi yala nang arena ati, deipnamlume. Ara, Allah arye, sik Lewi yala nang ara, sik talibuka wa win tuku ton kum kintinibuka arepnamle. Ati, akintinip deipnamlum din, yala-yala nirya ara, anggun mutuku noutam unamak Lewi yala nang ap, yuk mutuku arye tikilyangan ninye asik nang ap, tonda yuwak kilapu ap, sik nin ap, el li ap akunum dibikba, kwaknan mapu ap, kilapu weiamikce nang ap ati, anggunce, ‘Naʼ tenen, delinamlum din ning, noutam bokuka anyapmasin nang ati arenamlume. Akintinip deipmamunyopura, sik anang yakirye, sik pataplye touk, yanuka doprobikirye, sik weik tonun dinamnyake. Anggun Israel nang arye, aning nirya winipmunyopura, anggun ni koproba Allah Yahweh arye, anggun pil donamlum ning nirya ara, telebuk kilinamsile.

1 Timotius 3:2

Ara, Allah yupu peteren nang. Sik deiyok talibuka pil dopmanto ninye adiparyuk wininyak ning lak nyapnukine. Sikda, malye winina pia kum winilamikibuk, yuk nang arye, “Anang wininyak ning ara, ani-ani,” kum nyapmanto nanguk, wibuka delina telebe. Sikda, kilapu tonokuk dobuka unyakce, ‘Talye kanye bobuka unune,’ tenena kum aryuk, sik bidamnye ati bita dilakirye, teleb winina ap, ninye minop wana ap, yu pola una kumce, nimalye arye una ap, anirya wininamak nang ara, apil dopnamtinge. Ato nang ati ara, yuk ninye arye, “Anang ara, dipkoprop teleb wininyake,” nyabuka, tenelamak nanguk apil dopnamtinge. Tonda, yuk ninye do, ninye asik nang do, sik aik buplan kukulinyak nang wibuka delina telebe. Tonda, yuk nang bikna ati, teleb kibuka peterepting nang wilina telebe. Winilamice ninye uka. Yuk unyak ninye ara, wilina kume.

Ayub 29:13

Sik imun kanye uk bobuka, ikin ulamik nang arye, nati kibuka si erelamnikce, Allah arye, ‘Anye bira, teleb kilinamle!’ nyabuka, teleb yupu nyalamnik. Tonda, narye youwak kilapu, sik patan ning ati, melibuka arelamsiba, Sikda kanye lon mot ton nyalamikce, pin-pin kanye bobuka ulamik.

Nehemia 8:12

Lewi yala nang arye nyabikopura, Israel ninye nirya kekebikce, abulupmeka batakuka, sik yuk-yuk bindobik. Bindobikce, teleb din ning ap, mek ap dilbiyik. Tonda, ateleb din ning kum kintinipmek nang ati, ton tam bokuka arelbanmek. Winipmekce, teleb kanye bobuka, pin-pin asa arye, Allah el si erelamik. Teleb kanye bobuka unmeka deiyok ara, sik Lewi yala nang arye, Allah nyalamuk yupu yinibuka, deiyok ning lak kibuka lak nyanmekba, Israel ninye nirya arye, ‘Deiyok ani’ tenen, akunum kel bikmeka ati, pia teleb kanye deibuka unmek.

2 Tawarikh 30:24

AKaplina Kwalya kwalilamik talak arye, sik kaplin kwalina ati, Raja Hizkia birye, yim sapi basam yupa pia weik seribu (1.000) ekor ap, domba basam ap, kambing basam ap, yupa weik, tujuh ribu (7.000) ekor ap, bulubuka deibukce, kintinibuk. Tonda, Raja Hizkia el amu tam pil don nang arye, yim sapi basam yupa weik, seribu (1.000) ekor ap, domba basam ap, kambing basam ap, yupa weik, sepuluh ribu (10.000) ekor bulubuka kintinibik. Akintinibik ning nirya ara, amutuku nang obuka dipnarye, Allah si erenamik ati bulupdeibik. Atalak ara, imam pil don nang, yupa pia weik arye, ‘Allah dam yakana ati, tonda el piluk donamapʼ tenen, sik nong mek likuka, teleb ubuka kipdeipdayikce, kintinibik.

2 Samuel 6:19

Nyabukopura, din ning pia tup teleb ning ara, awekmek ninye, ati yuk-yuk bukni, sal babye, kilapu babye nirya ara, roti ap, kue kismis ap, arebukba dibikopura, sik aik yuk-yuk tamubuka biyik.

Titus 1:8

Anirya kum bukni, lak nyapnukin ning teleb un ninguk unyak nanguk, ‘Allah yupu peteren nang, sik melina deiyok nang unamak’ tenen, wibuka delinamlyame. Ateleb winin ning ara, ani. Ara, yata ning do nirya, teleb winin ning atibuk patapnamle nanguk wibuka delinamlyame. Tonda, yuk ninye do, ninye asik nang do, sik aik yangana ati, “Telebe,” nyabuka, buplan kukulikirye, melinauk wininyake. Tonda, sik pataplye ning, talye kanye bobuka, winina kum arye, ‘Malye winipnyak’ tenen, dipsukumuk tenepce, telebuk wininyak nanguk, wipnamlyame. Sik bidamang ati, pia bita dilakirye, diksukumuk winikirye, Allah ati pia mambul tenebuka, elce nyasilye touk, wininyak nanguk wipnalyame. Tonda malye kum winibikibuk, yuk nang arye, “Sikda malye wininyake,” nyabuka, kum nyapmanto nanguk, pia diksukum unyak nanguk, wina telebe. Anirya ati ara, ‘Anang ara, diba tenenyak nang, sik melina deiyok nang unamak’ tenen, wibuka delinamlyame. Na Paulus arye nyapmakine.

Pilemon 1:7

Na weit kopropa atonunye Pilemon, ance na talima pia kwa daknulumce, kanye deibuka, pia pin-pin kilinilyame. Ara, talye ati kume. Deiyok ara, ance Allah el mapu ati, sik kanye kwa dilamlum ning ap, sik ikin ulamik ning ati, melilamlum ning ap, adeice arye, anang ati bico tenebuka, kanye deiyamlume. Winiminya deice arye, pin-pin kilinilyama anya arye, na kanye deipkine.

Rasul 9:39

Anang arye Peterus dobuka yarikopura, Dorkas deipmek aik, alip aik deibik. Alip aik noutamak, Peterus binuka tikukbuk, youwak kilapu weik arye el balye tam nirya tikuka antapdongobik akarya nyabik. Tikra antapdongobikce, Peterus ati, “Akain ara, Dorkas arye el kam ulamuk talak nun neika ulamubu talak arye wiyamsuk baju adipdelyame,” nyabuka engenmekce, laka nyanmek.

Lukas 11:41

Anggun mek makau ap, anggun piring ap, noutamak dimunye ning ara, bokuka talye kankan unyak ninye ati, areamtumtoura, anggun un ning nirya ara, diksukumuk unamlume. ‘Nong bol deice atibuk tuba’ tenena, meme. Dipkoprop winin ning ababye, winamlulume. Awinipmunyopura, Allah arye kanye deipnamsile.

Amsal 22:9

Ninye ton, el kanye teleb asa arye ulamlinye birye, sik talye bona talina kum ninye ati, bico teneplirye, el talilul din ning noutam arye bokuka, bona talina kum kili sal ati areplirye, teleb kibuka melilula ati ara, Allah Yahweh arye el dam yalirye pia melinamle. Ateleb kanye bonanye birye, bona talina kum ninye ati melilul touk, Allah arye anye biti weika arye melinamle.

Matius 15:30

Amutuku ninye nirya yupa weik arye, bulubuka yayik talak ara, sik tam ninye, aik bulamik ninye ap, asing kun ninye ap, uk arye bite ikilamuk ninye ap, yupu luba ninye ap ara, uk aning-aning dilamuk ninye ap, ‘Yesus arye kwetepnusil’ tenen, sik kayapu nang arye, auk dilamuk ninye bobuka Yesus dam delilyayik. Delilyayikura, Yesus arye auk dilamuk ninye nirya kwetelinmok.

Lukas 14:12

“Anggun yuna kwalibuka deipmamunye talak ara, anggun kayapu nang ap, anggun weitcapu silip ap, anggun yala nang ap, bona talin nang ap, ‘Yuna dilyanuyak’ tenen, ananguk kum yukupnamlulume. Ato nanguk yukupmunyopura, sikce tuba tamubuka anggunti kwalibuka delinamsiak anya arye, ‘Elce tamubuka yuna kwalibuka deipnamnile,’ tenepmunye nanguk kum yukupnamlulume.

Lukas 14:14

Winilamunyopura, Allah arye anggunti teleb ulinamsile. Ato ninye ara, sikce tamubuka, yuna kwalibuka kum deipsiting bukni, Allah arye sik diksukum wininyak ninye kam bukeipnamle talak ara, Allah arye sik areamuk ning dekna ati, mininga ning weike urdem arenamsile.” Yesus arye el bukmok aik deiyoknye biti nyabuk.