Lukas 14:11 - Eipomek

¹¹ Ara talye ati kum nyapsine. Yata ninye do nirya, sikce sik bidamnye ati erelilalamak nang ara, aminyan talak Allah arye anang dobuka amu kipdeipnamle. Bukni sik talima darapdongobuka amu tam ulamice nang ara, aminyan talak Allah arye anang erebuka teleb ak deipnamle.” Yesus arye nyabuk. Nyabukopura, Yesus arye el bukmok aik deiyoknye biti nyabuk.

Lukas 14:11 Referans Kwoze

Lukas 18:14

Nyabukopura, ayupu tonap dukdongobuka nyabuk. “Ara na dipkoprop nyapsine. Allah arye pajak ayo bok bulubuka delina deiyoknye ati, el malye winin ning kum danibukce lyebuke. Allah arye tenebuk ning ara, anye bira akunum lyepnyeura, teleb upnamle, tenebuk. Bukni, Farisinye ati ning ara, Allah arye kum lyebuk. Allah arye tenebuk ning ara, ‘Anye bira, nara telebnye, tenebuka ati, kum lyepnamne,’ tenebuk. Aning ara, talye ati kume. Yata ninye do nirya, sikce sik bidamang ati, kanye erebuka unyak nang ara, Allah arye anang ara, amuak du deipnamle. Bukni, sik kanye talima lamapdongobuka amuak unyak nang ara, Allah arye ereipnamle.” Yesus arye, el yupu kekenmek nang ati nyabuk.

Matius 23:12

Ara talye ati kume. Yata ninye do nirya, sik bidamnye sik damanguk erelilalamikce nang ara, Allah arye anang dobuka amutamuk kipdeipnamle. Bukni, sik talima mitang arye amu tam unyak nang ara, Allah arye aninye erepdeipnamle. Yesus arye anang ati nyabuk.

Amsal 29:23

Teleb kanye bobuka, talima darapdogobuka ululnye bira, namin asa arye ulamlya ani, yuk ninye arye anye biti, eibuka kel kibicopura, ‘Elda teleb ubuka ulule’ tenen, ereibikirye, elti, kanye deibuka kinyake. Bukni, sikce sik bidamnye ati, talima erepdakirye, maknya kiknipdanuka unyak nang ara, yuk nang arye sik wininyak ning, kel kibicopura, anang sik amu tamuk deipnamake. Anang ati, kanye deibuka kum kinyake. Mangkau kilongona uk unamake.

Yakobus 4:6

Aning ati ara, Allah yupu deice ayupu nyapsine. ‘Allah arye sik kanye talima erena nang ati, yaniltalule. Bukni, sik kanye talima darabuka amuak unyak nang ati, el mikip arilula deice arye, talibuka melilule.’ (Amsal 3:34)

1 Peterus 5:5

Asurat deice arye, “Yuk nang ati, nimalye arye sik amutamak unamlulume,” nyapmasin touk, anggun wisi danana kum arye, kam nang atonun nang ati, ayupu nyapsine. Ara, sik wisi nang amutamak umunce, sik yupu kekebuka nimalye arye unamlulume. Buku Amsal yupu noutamak sekeipsik yupu aupmala ati nyapsine. Ayupu ara ani. ‘Sik kanye erebuka, dildanyak ninye ara, Allah arye aninye ati bataklirye, sik yupu sekelule. Bukni, sik kanye darabuka, talima nimalye arye amutamak unyak ninye ati ara, bico tenepsilirye, talye luba kibuka melisulule.’ (Amsal 3:34) Ayupu tuba awamsuka ati, anggunce yuk ninye nirya ati, anggun bidamnye kanye darabuka, talima nimalye arye teleb ubuka unamlulume.

Amsal 18:12

Ninye ton sik kanye talima erebikirye, kwalibuka ukirye sikce tenebuka, ‘Se, nunda weik teleb nang unyabe,’ tenebuka unyaka deice arye, dipkoprob aminyan talak ara, saknamake. Yuk ninye amu tamuk unamake. Bukni, ninye ton mitang asa arye, kanye talima dakdongobuka ululnye bira, telebuk upnin baliba, yuk ninye nirya eibikirye, elti, kanye delinamake.

Yakobus 4:10

Anggun kanye talima nimalye arye ubuka, Allah el amuak kipdopmunyopura, Allah arye anggunti erepdeipnamsile.

Mazmur 138:6

Ton deiyok ara ani. Allah Yahweh, anda dipkoprob aning-aning nirya talibuka umince, pia deice tam, mikip weik deiyoknye ulyam bukni, ance nun tukwak mutuku noutam, ikin weik unyap nang ati, bico tenepsimince, tuba bikisilyame. Bukni, sik talima erepdakirye, maknya kintininyak nang nirya ara, yukak aryuk elilyame. Anang dam yanuka, sikti, kum melilyame.

Yesaya 2:17

Allah arye, aning nirya winipnamla deice arye, sik kwalibuka kiminyak nang ap, tonda kanye erena deice arye, kwalinyak nang ap ara, amu tam kipdeipnamle. Kanye eren nang nirya, wibuka amu tam kipdeiplyopura, atalak ara, ninye mutuku sirya, im sirya nirya arye, yuk nang ati, si kum erenamak bukni, sik nirya arye, Allah el tibuk, “Se, mambul kibuka, pia teleb ululnye bira, el uka,’’ nyabuka, Allah el siuk erenamake.

Mazmur 18:27

Atonun, malye winin ning talina kumce, pia teleb winin ninguk wininyak nang ati, Allah ance tamubuka, sik anang ati, pia teleb winin ninguk kililyame. Bukni, yata nang do nirya, sikce talye-talye yupu nyabuka, kanye tenina deice arye, malye winin ning talibuka, duknubikirye, malye unyak nang ara, ance kel weik bikina deice arye, sikti, yu tenebuka, ikin ning arepmince, wenelyame.

Yesaya 2:11

Na dipkoprob nyapsine. Yata nang do nirya, sik kanye erebikirye, sik asing erebuka dilenyak nang ap, tonda, ‘Nunda pia mambulʼ tenen, kwalinyak nang ap ara, Allah arye, sikda amu tam kipdeipnamsile. Winipsiliba, anggun alye dakdamunce, ikin kanye bobuka unamlume. Atalak akunum yalyopura, Allah arye weneplirye, kanye erena deice arye, kwalinyak nang nirya ati, wibuka amu tam kipdeiplye nang, mutuku sirya, im sirya nirya arye, Allah el tibuk, “Se, mambule, pia teleb ululnye bira, el uka,” nyabuka, Allah el siuk erenamake.

Amsal 15:33

Yata ninye do nirya, Allah Yahweh ati, ilil tenebuka ukirye, el siuk erenyak ninye nirya ara, sik peterena deiyok nang arye, peterenyakba moubuka kekebikca deice arye, weik kel bikna ning tonap, tabakuka kel kipnin banamake. Tonda, yata nang do nirya, sik talima nimalye aryuk amu tamukiba, aminyan talak yuk ninye nirya eibikirye, ‘E, anang ara, telebuk unyaka anya arye, nun ninye deiyok nang unamsiyak’ tenen, anang dobuka erebikirye, kanye delinamake.

Ayub 22:29

Ninye nirya ara, talima erebuka unyakce, maknya kintinibuka erenyak nang nirya ara, Allah arye anang dobuka amu tam kipdeipnamle. Ance aning eipminyopura, ‘E, Sikda talima erebuka, maknya kintinibuka kwalinyaka ati, Allah arye anang akunum wenebuke,’ tenepmince, nyanalyame. Bukni, dipkoprob ning ara, kanye lamapdongobuka unyak nang ara, wininyak deice arye, Allah elce anang melibuka lyelule.

1 Samuel 15:17

Anyabuk touk, Samuel birye, Saul biti nyabuk. “Ura, minop talak ara, ance an bidamang ati, ‘Se, nara talye urdemnye,’ tenelalalum bukni, Allah arye, erebuka tikeipkukba, Israel ninye ayala-ayala nirya, sik ninye deiyoknye, Raja min wipdeipkuk do, kum do? Allah arye, ninye deiyoknye tikeipkukba umince, Israel ninye unyak mutuku nirya, talibuka ulyame.

Lukas 1:51

Allah el taruk mikip deice arye, weik mambul pil dolamuk. Tonda, sik kanye tenena deice arye, ‘Nun weik nang unyabe,’ tenebuka, kwalilamik ninye nirya ara, akunum kum danililamukce ara, bisibuka yanilule.

Yesaya 57:15

Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.

2 Samuel 22:28

Tonda, talima namin kibuka, amu tam unyak nang ara, melibuka lyelyam bukni, talima erenyak nang ara, moubuka dimince, wenebuka amu tam kibuka delilyame.

Amsal 25:27

Winipmanto ning ton nyapnusine. Mong mek ara, pia dina teleb ning anya arye, teleb lelule. Bukni, ‘Among mek tonok dinamne’ tenen, weik arye dimunyopura, dipkoprob mun uk dinamsile. Aning atonun, yuk ninye arye anggunti, ‘Se, anang ara teleb unyak nang,’ tenepsikirye, tuba-tuba kibuka kanye deipsikiba kekemunce, ‘E, anyapmasiyak yupu ara kekena telebe. Tuba nyapsitinge,’ tenenamlume. Bukni, anggunce, ‘Se, ninye nirya arye, nunti kibuka kanye deipsitinge’ tenen, patapliba, aning tuba-tuba tenena uk umunyopura, pia malye unamlume. Winibuka tenena uk umunyopura, anggunce anggun bidamnye atibuk, malye ulildalamlume.

Lukas 1:52

Sik weik ninye deiyok nang erepdeipnarye, ulamik dobuka el amuak deililamukura, el amuak ulamik nang ara dobuka ereldelilamukce, teleb akuk deililamuk.

Lukas 14:12

“Anggun yuna kwalibuka deipmamunye talak ara, anggun kayapu nang ap, anggun weitcapu silip ap, anggun yala nang ap, bona talin nang ap, ‘Yuna dilyanuyak’ tenen, ananguk kum yukupnamlulume. Ato nanguk yukupmunyopura, sikce tuba tamubuka anggunti kwalibuka delinamsiak anya arye, ‘Elce tamubuka yuna kwalibuka deipnamnile,’ tenepmunye nanguk kum yukupnamlulume.

Yakobus 1:9

Bona talina kum nang, talye kan-kan nang ara, sik kan-kan danerye diba tenelamak nang ara, Allah arye akunum lyebuka ereibuka ati, Allah e kanye ara, ‘Aninye ara, sik mambul ninye,’ tenelule. Ati ara, sik kanye deibuka unamake.

1 Peterus 5:6

Aning ati ara, Allah el mikip pia weik ululnye, el amu tam bukuka, anggun kanye darabuka, talima nimalye aryuk unamlulume. Winibuka umunyopura, Allah arye tenepsuk talak akunum uplyopura, anggun dobuka ereipnamsile.

Ester 6:10

Nyabukura, ninye deiyoknye Raja Ahasyweros birye, Haman biti nyabuk. “Anda winipnalyame. Minopce na minop talak arye ongolamse Raja baju ap, na min arye balamse kuda basam ap ara, dopropmince, aning nirya ara dobuka, Yehuda yalanye, el si Mordekai dobuka arepnulyame. ‘Amutuku ninye nirya arye, Raja el kanye deipmalnye eibikirye, elti, si erenamak’ tenen, laka nyapmanilam ning nirya ara, Mordekai biti winipnamlyame. Arup talak ance, ‘Anye si erena ati, winiptibye, winiptibye,’ nyabuka, laka nyapmalam ning ara, tonok ning babye ton, luba kina pia meme. Amutuku noutamak na aik pia weik bisik bublan dam anyuk bululnye Mordekai biti, aning nirya winipnamlyame,” nyabuka, Raja Ahasyweros birye, Hamana ati nyapdeibuk.