Lukas 1:65 - Eipomek

⁶⁵ Winibukopura, Yudea mutuku noutam sik anoutamak ulamik ninye nirya, awinipmok ning ati, ‘Se, aning ara mambul weik ning’ tenen, malye nyanmekce yupu talilamik.

Lukas 1:65 Referans Kwoze

Lukas 1:39

Atalak aryuk, Maria kintinibukura, minopce Yudea noutam weik asik dolamik, mutuku dup awamukce welina ap, koulukuna ap, kipdanin binamuk mutuku biyuk.

Rasul 5:11

Anirya akunum winibukopura, Yesus el diba tenebik nang nirya ap, awinyabuk ning kekenmek nang nirya ap, ilil weik ulamukce, mambul kanye weik bolamikce, sik nong nirya sirim talilamuk.

Rasul 5:5

Nyabuk ati, Ananias ayupu kekebukura, adiparyuk tukwak daksakuka pubuk akarye dibuk. Pubuk akarye dibuk ati, awinibuk ning lak nyabikura, kekenmek nang nirya weik ilil ubuk akarye, sirim talibuk.

Rasul 2:43

Allah arye el mikip melilamuka arye, Yesus arye wibuka deiamuk Rasul nang ara, mambul pil ninye winipmanto kum pil ap, Allah arye mikip weik kildelilamukba, ninye kum winipmanto ning, pil dolamik ning ap, apil dolamikce awinilamik ati, aning nirya sik elilamikce, ‘Na ni,’ tenen, ‘Se dipkoprop, Allah arye mambul pil donmasile’ tenen, teleb tenebuka, kanye deipnarye ulamik. Ton ninye ara kanye deibuka ulamik. Ton ninye ara, mambul kanye bolamik.

Lukas 7:16

Yesus arye ami kwetebukopura, abulubuka wekmek nang nirya mambul nyanmekce, Allah si erenmek. Allah si erenmekce, ayupu tonap nyabik. “Se, Allah yupu laka nyananye nabi atonye, nun kan-kan noutamak kunum kutukuka unmale. ‘Allah arye wibuka deibuk ninye ati, melipnun’ tenen, Allah arye dopkwetebukura, akunum yanmasile,” nyanmek.

Wahyu 11:11

Bukni, lengdar atonun ning eipsa deice arye, asum winilye ap, tonok sum ton noutamak ap akunum ubukba, Allah arye kam una deiyok ning, sik bitinye ati aribukce, kam bukeibukba, tuba tonap kam bukuka tikrikce, aning dinmek ninye nirya ara, ilil weik ubukce, asok mek butubukce asok dama biyuk ak, anirya eipse.

Rasul 19:17

Sik Yahudi yala nang ap, Yunani yala nang ap, Efesus mutuku ulamik ninye ara, isa arye Sekewa el mapu opbisibuk ning laka nyabikura, kekebikce, ilil pia weik ubuk. Ilil ubukura, anang nirya arye nun deiyoknye Yesus, el si erelamikce, Yesus ati kisal pia weik dolamik.

Yosua 10:40

Ura, winilamuka deice arye, Yosua birye, amutuku noutam ulamik nang nirya ara, akunum obuka sirya dakuk. Ara, ninye deiyok nang Raja-Raja babye, oltaknauk ubuke. Ara, Negeb mutuku, mek pu sukum ati, weik mutuku ap, mutuku bumang deice ap, amutuku taram kanimna uamuk mutuku ap, tonda amutuku noutam ulamik nang nirya ap, otam ulamik nang ap, tonda amutuku-amutuku noutam keting kumulban tam, eitam ulamik nang ap nirya ara, obik. Tonoknye babye, ton pia kum batakik, anirya obik. Ara, Israel nang talibuka ulul Allah, sik ni Yahweh arye, “Winipnamlyame,” nyapdeibuk touk winibik.

Yosua 10:6

Winibikopura, Gibeon ninye arye, Yosua ap, el mapu silip ap, Gilgal mutuku unmekak nyalbiyik. Sikce nyabik, “Nunda, anggun amu tam unyap ninye ati, kum bataknamsilyame. Anggunce nunti, minop melilyasumunce, lyepnamsulume. Sik Amori tam deiyok nang nirya ap, sik yin talin nang nirya ap arye, tabakukabikirye, sik mutuku arye koulukuka yakirye, nun olyanamsiyaka ati, kintinipmake,” nyabik.

Matius 2:1

Yesus deiyamuk mutuku ara, Yudea tam noutamak bukni, mutuku si ara, Betlehem mutuku deibuk. Yesus deibuk talak ara, amutuku nirya weik ninye deiyok talibuka ulamuknye, el si ara Raja Herodes ulamuk. Yesus akunum deibukopura, kurya ning min arye kel kibuka balamik nang, keting yangan tam arye, weik mutuku si Yerusalem mutuku dilyayik.

Lukas 5:26

Yesus winibuka deice arye awekmek nang nirya, se tenebuka mambul lenmekce, Allah el si erenmek. Tonda, “Awininmeka ara, ninye kum winipmanto ning eipmabe. Aning atonun ning ton kum elilamupe,” nyabuka malye nyabik.

Lukas 2:18

‘Ayupu kekenmek ninye nirya ara, adomba wein nang nyapmek yupu ati, se’ tenen, ngalukunmek.