Keluaran 34:7 - Eipomek7 Na mapu ati yupa pia weik, kum nukmanto, beribu-ribu ati, batakna kum diparyuk, pia bico tenenune. Sik malye winin ning ati, tuba-tuba namin kinune. Na mapu tukwak ninye arye, malye winipmace ning ap, nati, ‘Nun like’ tenebikirye, na yupu yanibikirye, malye ubica babye, ila tuba tonap namin kisunune. Aning nirya ati, minopce arye yu upniliba, kum wenesunune. Bukni, sik talima pia malye nang, tuba-tuba malye wininyak ninye ati kum bataknamne. Ara, sikce malye winibicopura, anang ap, sikce deipnamak mapu ap, amapu arye deipkirik danin balamica mapu ap, sikce deibuka dadaeipdanen, deipra banamak mapu ap, ninye dika winilye ning ap, ninye dika dumbarye ning ap, sik nirya ati wenepnamne. Ara, sik ni yapu arye, malye ulamica atia,” Allah arye nyabuk. Gade chapit la |
El mi Yesus, el ining biyuk deice aryuk, nun malye wininyap ning nirya namin kipsukce, kum kipdeipsuke. Nun malye winina ati oplopsutu bukni, nun pununa ati dibuksuka deice arye lyepsuke. Nun malye ning tapu kouamsuka noutamak arye, lobuka deksukce, lyepsuke. Winipsuk ning ara, mitik tonun kume. Allah el bico tenesilye ning ap, el kanye aniryuk talye arisilye ning ap, weik arye aulye touk, weik arye areamsuke. Ara, nun malye ning ara, nukmanto kum wamsuk bukni, aning nirya kum kipdeipsukce lyepsuke.
Na ni Allah, ancuk ninye yupa weik, beribu-ribu nukman kumto unyap nang nirya ati, batakna kumce, pia bico tenesimince, ance, ‘Winibuka teleb kipdeipnamsine,’ nyalin yupu deice nyapdeipsulum touk, tuba pia telebuk kilinamsilame. Bukni, wisi nang arye, malye winilamikca dengna ara, sikce deibikce mapu deice, ance ikin ning dobuka, sik mapu deice deibuka wenamsilame. Anda dipkoprob pia mikip weik ulyamce, aning-aning nirya, deice tam erebuka ulyame. Allah Yahweh, anda im deice yin talin malaikat nirya talilyamce, sik deiyoknye ulyama ati, ance mikip weiknye ulyame.
Bukni, nun malye tenenyap ning ap, nun malye unyap ning ap ati, “Kume, aning ara na dipkoprop malye winipse,” lak akarye laka nyabuka, amalye winina ning dipkoprop batakipyopura, Allah arye kum batakasulule. Nun winilamibye touk wibuka, yupu yuk-yuk bokuka delisulule. Allah arye nunti, ‘Sik malye winilamice bukni, aning tonok, adiparyuk kum opnusine’ tenen, bataksilirye, talye kanye dolule. Winilirye, Allah arye nun malye winilamibye ning nirya ati, kum daneipsilirye, amalye ning ati, ila tamubuka tonap kum tenesulule. Nun malye ning namin kipsilirye, telebuk ulisulule.
Winibiba, nun ni Allah, nun malye winina ati ara, ance talye lukparabuka, wenebuka opsutum bukni, ance dipkoprob nunti, bico tuba tenesimince, kanye teleb arepkiliba, nun malye winin ning ati, kum kipdeipsimince, nunti namin kibuka, melisilyame. Dipkoprop nunda, pia weik malye winibirye, an nyapdeiamsulum yupu yaninyap nang bukni, bico tenebuka melisilyame.
Se na nio, nun malye unyap ning ati, wenenauk winilamsutum bukni, anda, ‘Sik malye wininyak ning nirya ara, namin kipnirye, aninye lyepnyopura, sik malye wininyak ning kum kilinamne’ tenen, patakilibuk, bico tenesilyamnye, ulyama anya arye, ninye nirya arye, anti ilil asa unamabe. Ara, ‘Allah elda weik mambulnye ulule. Tonda, Allah elda pia telebnye ulule,’ tenen, an siuk, pia erenauk wininamkiyabe.
Tonda, malye nang arye, sik yupu lipsisikuka bokolin nang dam yakirye, malye kum upmace ninye bukni, anang ati, tilila yupu nyabikce talak ara, anggunce ayupu pia kum kekepnamlume. Ara, malye kum upmalinye do, pia telebuk ululnye do, anang ati, ‘Malye winipmale,’ nyabuka, ‘Obikcakʼ tenen ati, aning ara, pia kum wininamlume. Yupu lilsisikin talak ara, tilila yupu kekena meme. Ara, talye ati kum nyapsine. Deiyok ara, na Allah Yahweh arye, aning-aning nirya dinuna ati, dipkoprob malye winipmace nang ati, ‘Anang ara, teleb unmake,’ kum tenenune. Malye winipmace nang nirya ati, dipkoprob wenepnamne. Dipkoprob malye ubice ninye ati, ‘Dawinipmalye,’ kum tenenune. Sik winipmace touk, yupu lipsisikuka bokeipnirye, wenepnamne.
Allah Yahweh el yu tenepnamle talak ara, yata nang nirya, ilil kumce, el dam yanuka tikting do? Kume, el yu upliba, kanye imun weik wenen ning, uku weik tonun dinmaliba, keil lyeiplirye butuklamle touk ubuka, atu buklopnamle. Winiplye talak ara, yata nang ton, el yu upnamle talak, el dam yanuka tikting do? Kume, ara kum winipmanto. El yu weik uplyopura, kat weik keil babye, el dam arye, atu butbuta atonun kipdeipnamle.
Na ni koproba, Allah el si Yahweh ati, moronmase ning ara, ani. “Na ni Allah, anda aning-aning nirya talebuka, deice tam erebuka, pia mikip weik deiyoknye ulyame. Ati ara, nun Israel ninye, nun malye wininyap ning ara, kunusa kum dopnune. Nun malye ning nirya ara, an dam lak nyabuka, lilipdeipkina arye moropkine. Ara dipkoprop, anda Allah, weik erebuka eitamnye, mikip weiknye ulyame. Tonda, ance, “Winipnamsine,” nyabuka, nyalin yupu nyapdeiamsulum ning ara, kum batakasilyame. Adiparyuk anyalisilyam touk, dipkoprob winisilyame. Ati ara, Allah antibuk, dib tenekinyak ninye ara, ance sikti, pia bico tenebuka melilyame. Amelilyam ninye ara, ance, “Aninguk wininamlulume. Aning ara, pia kum wininamlulume,” nyaplumba, ayupu moubuka talibuka wininyak ninye ati, melilyame.
Amalye winin ning nirya akunum batakmunyopura, anggun nirya arye, yuk ninye nirya ati, bico tenebuka melilanauk unamlume. Wininamlum talak noutamak ara, yuk nang arye, anggunti,malye usinyak ning ati ara, ‘Dauplye,’ tenebuka, namin kinamlulume. Ara, Allah arye, anggun ap, Kristus ap, kanye talima dukdongopsuka deice arye, anggun malye winin ning nirya ara, kum kipdeipsukce, namin kisilya atonun, anggunce yuk nang ati, atonun wininamlulume. Na Paulus arye, nyapsine.
Bukni na ni Allah, na kele, anda aning-aning nirya talimince, tenesimince, deice tam erebuka, mikip weiknye ulyame. Bukni, nun malye winin ning ati, adiparyuk oplopsutum buk, namin kinauk usilyamce, telebuk kilisilyame. Tonda, nun malye wininyap ning ati, minopce yu kum tenesilyame. Tonda, ance, ‘Weik tonun pia bico tenesimince, pia teleb kilinamsine,’ nyabuka, nyalin yupu deice ara, weik tonun nyasilyam ning nirya ara, batakna kumce, pia teleb kibuka kilisilyame. Tonda, ance, aning nirya ati ara, narye, ‘Winipnamsine, winipnamsine,’ nyabuka, nyasilyam atonun kibuka, pia tuba melisilyame.
Nabi Mika birye, Allah ati nyabuk. Se, na ni Allah. An uminye Allah atonun, ton pia kum ulule. An tonok ulyame. Ati, Allah Yahweh ance wipdeiamsulum ninye, mitik anun sirya tuba aunmab ninye ara, nun malye wininyap ning nirya, namin kipsimince, lyepsilyame. Anda ninye tukwak nang ati, pia ton kum deresilyame. Nun malye wininyap ning dekna ati, adiparyuk wenebuka opsutum bukni, aning kum winimince, nunti tamubuka bico tenesimince, melibuka lyesilyame. Ance ninye ati, weik arye bico tenesilyame. Ance nun tukwak ninye ati, kanye delisilyame. Winibuka ulyamnye ati, moropkine.
Ati ara, wini talak ara nun Israel nang arye malye winilamububa, ance pil weik dolamsulumce, lyelolamsulum ning ara, ‘Aning ara mambul kume. Aning ara, daopnyake’ tenen, kum bataknamsilyame. Malye winilamupu buk, ance ikin ning delilamsulum ning ara, tuba tenenamsilyame. Ara, nun wini talak unyap nang ikin usilye ning ap, nun ninye deiyok talibuka ulamik Raja nang ati, ikin ulamuk ning ap, nun yupu bokolina deiyok nang ati, ikin ulamik ning ap, an si eren aik pum tam pil dona deiyok nang ap ati, ikin ulamik ning ap, an yupu lak nyana deiyok nang ati, ikin ulamuk ning ap, nun apu yapu ati ikin ulamuk ning ap, tuba tenenamsilyame. Ura an mapu nirya ati, ikin ulamuk ning nirya ara, ‘Aning nirya ara mambul kume,’ kum tenenamsilyame. Sik Asyur mutuku ninye deiyok nang arye, nunti talibuka, ikin ning nun nong deice delilamsikce, anirye dipdongobuka, wini talak babye ikin usulul ning ati, ‘Aning ara ikin kum tenenamsilyam’ tenen, morokinyabe. Nun ni Allah, anda mikip weiknye ulyame. Tonda, anda aning-aning deice tam ululnye ulyame. Tonda, yuk weik ning aupmalebuk, anda weik mambulnye tonok ulyame. Yuk ning nirya ara, mitik mambul uka. Ance bico tenelamsulum deice arye, “Bico tenesununa anya arye, winibuka wininamsine,” nyapdeiamsulum ning nirya ara, dipkoprob winilyame. Tonok ning babye kum batakasilyame. Ance pia tuba melisilyame. Ati nun ikin usulul ning ara, tenepsimince, melinamsilame na nio.
Se, na ni Allah, im deice ulyamnye bira, anda kwelina mikip weiknye ulyame. Anti ara, ninye tukwak nang nirya arye, ‘Se, elda, weik mambule,’ tenekinyake. Ance, “Aning ara wininamlume, aning ara kum wininamlume,” nyapdeiamsulum yupu kekebuka ayupu atonun unyak nang ara, an deice uk sik kanye talima akunum deiamkike. Ati, ance nunti bico tenebuka, weik arye melisilyame. Ati ara, ance, “Na nyanye yupu moubuka kekepminyeura, narye winibuka melipnamsine,” nyabuka, nyalilamsulum yupu dipkoprob winisilyame. Tonok ning babye kum batakasilyame.
Na kayapu, aning ati ara, ‘Anggun kel kipnuluma’ tenen, laka nyapsine. Allah arye Yesus deice aniryuk, nun malye unyap ning ap, nun kanye talima malye tenenyap ning ap, kum kibuka delisilirye, namin kisulule. Yata ninye do nirya, Yesus ati diba tenebiceura, malye ning arye anggun talima ap, kanye ap, talibuka moupsilirye, yupu molisulul ning nirya, Yesus deice aryuk lyepsilirye, loldongosulule. Musa sekamsuk yupu atonun winimunya deice arye, malye ning talipsuka ara, lyebuka kum lopdeipsutue
Yesus ara, Weik Ninye Deiyoknye una ap, ninye mutuku-mutuku nirya, Lyena Deiyoknye una ap, ‘Unamle’ tenen, Allah arye Yesus dobuka, el sirik taruk tam erebuka deibuk. Ara Allah arye, Yesus pil dobuk deice arye, Israel ninye lyeplirye, sik malye wininyak ning batakikirye, balye tamubikcopura, ‘Na Allah arye, sik malye wininyak ning nirya kum kipdeipnamne’ tenen, Allah arye el sirik taruk tam Yesus erepdeibuk.
Israel ninye arye nyabik bukni, Yosua birye tamubuka aninye ati nyabuk. “Kume, angguncuk, ‘Allah el amu tam ubirye, el siuk erenamabe,’ tenepmalum bukni, aning ara minopce, talye kanye bobuka, kum nyaptume. Deiyok ara, Allah el si Yahweh, elda pia diksukum, kurun kopropuk ululnye. Elce el talilul ninye ati, ‘Na ninye, sikce yuk ning ati, si pia kum ereptinge’ tenen, aning nirya dilulnye binya arye, yuk ning ati talibikirye, si erebikcopura, el yu weik ulule. Tonda, anggunce, Allah el nyalye yupu yaniplopmunce, malye winin ning winimunyopura, amalye winipmunya ati, namin kum kipnamsile.
Wininyak nang, sik menenga ara, na Allah arye, sik malye pil donyak atonun kiklibuka, weik arye wenepneba, sik weik imun kanye bobuka unamake. Ninye kot dam arye, sakuka olamle atonun, sik malye winilamaka ati, aminyan talak, narye anang ati, wenepnamne. Sik anang on talak ara, akunum dam upmale. Anang opnirye, sirya daknamne talak ara, minopce yanamle, akunum dam kipmale. Allah arye nyabuk.
Anggunda bisik banamlum talak niryada, narye dopreipsise malaikat, elce nyapsilye touk, moubuka kekepmunce, talibuka unamlume. Atalak nirya ara, elce nyapsilye yupu kum yaninamlume. Amalaikat ara, na si el deice akunum deipse ati, elce nyapsilye yupu yanipmunyopura, anggun malye upmunye ning ara, namin kum kipnamsine. Anggun ti wenepsilirye, ikin ning anggun nong deice deilinamsile.
“Bukni, weik uku buk dilamukce, tin ap, kumasan bol keil el si ara belerang ap, ara uku tin weika arye dipliba, keil but-buta tong ara, sikin tong atonun, weik lelamle ning nyalamukce deiyamse mekwen, uku din mutuku noutamak dopwketepniba, asukumuk pia daunamak ninye ara nyapnune. Sikda, diba tenena kum ninye ap, ‘Yu nang arye opsicak’ tenen, ilil upliba, nati batakaninyak nang ap, kir dona ninye ap, ninye bai mal ona nang ap, amalye pil donyak ninye nirya ap, talye ning ati, ‘Nun ni kopropa’ tenen, si erenyak nang ap, tilila yupu nyanyak ninye ap, aninye nirya ara, uku din mutuku, noutamak dopwketepniba, apia unamake. Uku din mutuku unamaka ara, Dipna Bitinye ning ati nyapkine.” Allah arye nyapnukba, na Yohanes arye kekepse.
Yo bok areamukura, daulamrika ani, ayo bok tamubuka yuk talak akunum ubukaopura, sik yo bok pia kum ubuka ati, adeiyoknye birye, sik dopromrik yo bok sik ak, ‘Dawaplye. Na tamubuka arena kum’ tenen, bataklobuk. Winibuk ati, yatanye bak yo bok weik el deiyoknye biti, kanye weik deibuk do?” Yesus arye Simon biti asipdeyuk.
Aning ati ara, anggun moubuka kekeplulume. Ayupu pia mambul, dipkoprop nyapnusine. Ninye nirya, sik malye tenelamikce ning ap, malye winilamikce ning ap ara, Allah ati, yanibuka nyalamak yupu ap, anirya ara, sikce sik malye winin ning nirya batakikceba, Allah arye aning nirya kum daneiplirye, namin kipnamsile. Bukni, yata ninye do nirya ara, sikce Allah El Dib Kanye ati, yanibuka nyalamak yupu ara, Allah arye aning kum kum kipdeipnamle. Aning ara pia kum namin kipnamsile. Ayupu nirya awamlya deiceuk wenepnamsile.
Aning atonun, sik bon-bona ap, din ning ap, dekna ati, ‘Ikin ara, yata barye uple do?’ tenen, kiklilen ning deice delilulum bukni, dipkoprob ning deice, kum delilulume. ‘Ikin weik uple,’ nyabuka, tilila yupu deice arye nyabipyopura, ‘Nun dekna ning weik tonun dolonamabe,’ tenelulumce, anggun kayapu ati, tilila yupu uk nyalulume. Winipmunce, pia malye weik winilulum ning ara, narye namin kinamsin do? Kume, aning ara, na pia kum namin kinamsine. Ati aning ara, na like. Sik tilila yupu deice, talye nyaltakanyak nang ati, narye anggun anang ati, adiparyuk wenebuka opnamsine.
Anggun talye ning si erelulum ninye ara, yupu talipmunce, dotalak wininamle ning laka nyapnamnulume. Tonda anggunce anggun bidamang ati asipdanamlume. Ara, ‘Dotalak winipnamle ning ati, min yuma talak yatanye birye nyapdeiamsuk do? Minop talak arye yatanye birye nyapdeiamsuk do?’ nyabuka asipdanamlume. Ayupu ara, na Allah Yahweh arye, nyapdeiamsise. Diksukum koprop telebuk ulirye, ninye lyelula deiyoknye bira, yuknye ton kum ulule, na Allah tonok unune.”
Sik Israel nang ara, teleb kibuka bisik balamik bukni, Mesir mutuku ninye deiyoknye, el si Firaun ap, el tam yin talin nang nirya ara, Allah arye aweik laut Teberau mekwen dobuka, sik nong deice deibukopura, sik nirya obuka, sirya dakuk. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.
Tonda, minop talak sik Mesir mutuku noutam nirya ulamik nang, sik minop deiamik mapu nirya ara, Allah elcuk amapu nirya obuka, sirya dakuk. Winibuka deice arye, sik Mesir mutuku nang ati, imun kanye weik bobuka ulamik. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe,’ nyabuka, nyanamabe.
Ayupu ara, mikip arye nyapmarik bukni, Lot bira, ‘Binun do, kum do?’ tenen, teniltonauk unmok ati, sik Malaikat nang arye Lot ap, el kil ap, el kilmapu bitinye ap, sik taruk talipdakuka, anyasik batakuka, amutuku buru tam bobuka bobirik. Ara, Allah el si Yahweh arye, Lot ap, el mapu silip ap ati, ‘Minopce kum opnaman’ tenen, lo arebuka anya arye dobuka bobirik.
Nyabukura, Allah el si Yahweh arye tamubuka nyabuk. “Na mikip ap, pia teleb wininye ning ap, weik mambul ning ap, an dam winipnin banirye, na si koprop Yahweh laka nyapnamakine. Tonda, ‘Naʼ tenen, ning ap, na kanye delin ning ap, bico tenenamne ning ap ara, na wibuka deipnamne ninye ati, aning arepnamne. Aning atonun, sik malye winibiceba, adiparyuk oploptinye bukni, bico tenepnirye, namin kipnamne ninye babye, na dem aryuk wipnamne. Nara Allah ununa ati nyapkine,” Allah arye nyabuk.
“Se na Ni Allaho, dipkoprob an ‘Naʼ tenen, kanye, na deice deipnutumopura, pia telebe. Kanye deipminyopura, an ap, nun ap, neika bitibirye, melipsutumopura, pia telebe. Israel nang ara, malye pia weik nang bukni, sik malye wininyak ning ap, malye tenenyak ning ap, namin kipsilyame, na nio. Namin kipsutumce, ance, ‘Na tenena ninye,’ tenepsiminyopura, pia telebe. Na nio, ‘Namin kipsutum,’ tenen, moropkine,” Musa birye nyabuk.
“Ati ara, anggun adiparyuk moubuka teneipdemunce, kel kipnamlulume. Pia tenenamlulume. Allah el si ara Yahweh, anggun ni koproba Allah, el tonok ulule. Yuk ton kume. Allah arye nyalilamuk yupu nirya ara, dipkoprob ulule. El nyalisilye yupu ara, tonok ning ara, kum batakalule. Yata ninye do nirya, sikce el deiceuk, sik kanye deibikirye, elce, ‘Aning wininamlulume,’ nyabuka nyasilye yupu, moubuka talibicopura, Allah arye sikti, tuba-tuba melilule. Elce sikti, ‘Wininamsine,’ nyalisulul yupu nirya ara, tonok ning babye kum bataknamle. Nirya awininamle. Ato ninye ati ara, sikce mapu deibikiba, dadeipdanin, banamak nang yupa ara, pia kum nukmanto, pia weik upre balamlya babye, pia melinamle. Sikce, mapu deibikiba, dadeipdanin banamak ninye yupa ara, ninye nel punun nang, generasi yupa weik, seribu kali lipat upre banamak ninye ati ara, Allah arye pia melinamle. Kum bataknamsile.”
“Bukni, yata nang do nirya, sikce elti, ‘Nun like,’ tenebice nang nirya ati ara, pia wenepnamle. Sik malye winibikce touk, Allah arye, ‘Bita merekuka’ tenen, wenebuka oplirye, aninye sirya dakalinamle. Ara, elti, ‘Nun like,’ tenenyak ninye ati, namin kum kiptue. Kume, anang nirya, sik wenena ati ara, namin asa arye kume. Minopce wenebuka oplirye, sirya daknamle.
Tonda, na ap, an mapu Israel nang nirya arye, anyaik yanmanto kum ubibye talak babye an si eren aik tuba tenebibirye, anti tenibuka moropkipyopura, ‘Kekenamsilam’ tenen, moropkine. Ara, ‘An unak im deice arye kekepsimince, nun malye wininyap ning ati, namin kipsimince, lyelonamsilam’ tenen, moropkine.”
Anggun tamubuka, Allah Yahweh el dam yatumce, elce, “Wininamlume,” nyasilye touk, umunyeura, teleb uptume. Winiptum toura, anggun kayapu nang ap, anggun mapu ap nirya ara, anggun mal olan nang arye tapu koubukabikce, tomobuka wenen aik dongobikak, unyak nang nirya ara, abobinuka deibik nang, sik talima Allah arye pil doptuba, sikce tapu koubik nang ati, bico uptuba, tamubuka lopdeipsitingba, sik mutuku tamubuka asukumuk yanganamake. Anggun ni Allah el si Yahweh ara, ninye ati bico teneplirye, nun melina ati, teleb kilina deiyoknye ulule. Anggunce Allah el dam yatumura, elce anggun kum bataksutue. Dipkoprop dopropsilirye, melinamsile.” Raja Hizkia birye nyapdeibukba, ayupu nirya ara, surat deice arye sekik.
Aning kum bukni, yata nang do nirya, sikce ‘E, mambul weik ning ani, mambul weiknye bira ani,’ tenenamak talak ara, sikce anyapnusin ninguk tenenamake. Tonda, tukwak mutuku, talye daulye ning nirya ati, ‘Aning ara, mambule,’ pia kum tenenamlume. Aning nirya kum bukni, anggunce na Allah Yahweh ati, diba tenepnulumce, na ap, na wininye ning ap, moubuka biknamnulum nang ara, angguncuk, ‘E, mambul weik ning ara, Allah Yahweh el uka,’ tenepmunce, aning deice aryuk, kanye pia delinamlume. Ara, anggunce na Allah ati, “E, Allah arye bico tenesilirye, elce, ‘Aning ara wininamlume, winipmunyopura, narye melisinirye, pia teleb kipdeipnamsine,’ nyabuka, nyalin yupu deice arye nyapdeipsuka deice arye, teleb kibuka melisulule. Elce winilye ning nirya ara, diksukum una ap, teleb ning winin deice aryuk, ninye yupu lipsisikuka bokosilirye, tuba-tuba melisulule,” nyaptingce, na si erepnitinge. Nara Allah Yahweh arye, anggunti pia bico tenesinirye, pia kum batakasunune. Narye, anggun tukwak mutuku sirya, im sirya nirya ululum nang ati, melisinye ning nirya ara, bico tenena ap, dip yupu nyana ap, malye winin ning pia kumce, diksukum winin deice arye melisunune. Tonda, na Allah arye, ateleb winin ning nirya ap, ‘Diksukum winin ning nirya ap ara, telebe uka’ tenen, na kanye delinune. Aning ara, na si Allah Yahweh arye ayupu nyapsine, nyabuk.
Aning atonun nang, an aik dam yakirye morobicopura, an im deice arye kekepnamsilyame. ‘Kekepsimince, yupu bokeipnamsilam’ tenen, ati nyapkine. Allah im deice arye kekepsimince, kel bikuka ‘Anye bira dipkoprob malye winipmale. Anye bira malye kum winipmale,’ tenepsimince, amalye winipmalinye bira, el malye winipmalye touk wenen ning arenamlyame. Tonda malye kum winipmalinye bira, talye batakanamlyame. Winipminyopura, nunce, ‘Teleb ning ani, malye ning ani’ tenen, kel biktibye,” Raja Salomo nyabukce morobuk.
Se, nun si erenyap Allah, nun ni Yahweh, sik Israel nang arye, anti, ‘Naio melipsilyame!’ nyabuka morolamikba, ance ayupu kekeplumce, sik morolamik ning ati, melilamlume. Allah, anda sik Israel yala nang nirya ati ara, sik mitik malye winilamik ning ara, luba kiplumce, kum kililamlume. Bukni, sik pia malye weik ulamik ning ara, tuba tamubuka kwang daklamlumce, wenelamlume.
Tonda, sikce nati, ‘Aninguk kum bukni, Daud el li koproba arye, malye winilamuk ning nirya ara, Allah Yahweh arye, aning nirya, kum biknamle. El li koproba arye, malye winilamuk ning ara, Allah arye kum namin kipdeiplirye, Daud el li koproba ati, weneptue,’ tenebikirye, nyaninyake. Tonda, aning atonun, sikce nati, ‘Tonda, Daud el lin koproba arye, malye winilamuk ning nirya ara, Allah Yahweh arye, aning nirya kum namin kiplirye, kum kipdeipliryeura, Daud el lin koproba ati, weneptue,’ tenebikirye, nyaninyake.
Aning ara, talye ati kum nyapsin bukni, deiyok ara, naryuk anggunti yanuka lyepropsinirye, anggun ap neika unamabe. Narye anggun wenena ati, yuk-yuk mutuku noutam yakuka, dopkwetcamsise mutuku nang nirya ara, wenebuka opnyopura, sice buklopnamnarya! Bukni, anggunda, na mapu koproba ara, ‘Naʼ tenen nang ululuma ati, tuba tonap yakuka donoknyeba, yuk-yuk mutuku noutam, kum binuka unamlume. Anggunda, pia ati amutuku uk unamlume. Winipnamsin bukni, anggunce minop talak malye-malye weik winilamlum ning ati ara, dipkoprob wenepsinirye, deken ning arepnamsine. Dipkoprop anggun malye winilamlum ning ara, talye Luba kum kipnamne. Amalye winilamlum ning ati, ‘Daupmalye,’ kum nyaptinye. Aning kum bukni, anggun malye winilamlum touk, anggun deken ning ton, wenebuka arepnamsine. Bukni, winibuka wenepsinirye, tamubuka teleb kipdeipnamsine. Narye anggun Israel nang ati, kume kum daneipnamsine. Ayupu ara, na Allah Yahweh arye akunum nyapdeipsine.