Bukni na ni Allah, na kele, anda aning-aning nirya talimince, tenesimince, deice tam erebuka, mikip weiknye ulyame. Bukni, nun malye winin ning ati, adiparyuk oplopsutum buk, namin kinauk usilyamce, telebuk kilisilyame. Tonda, nun malye wininyap ning ati, minopce yu kum tenesilyame. Tonda, ance, ‘Weik tonun pia bico tenesimince, pia teleb kilinamsine,’ nyabuka, nyalin yupu deice ara, weik tonun nyasilyam ning nirya ara, batakna kumce, pia teleb kibuka kilisilyame. Tonda, ance, aning nirya ati ara, narye, ‘Winipnamsine, winipnamsine,’ nyabuka, nyasilyam atonun kibuka, pia tuba melisilyame.
Keluaran 34:6 - Eipomek6 Allah arye Musa tikmokak urasin tam yayukce nyabuk. “Na si ara Yahweh, Allah unune. Narye ninye ati bico tenebuka, weikto arye melinune. Malye ubica babye, min pola arye yu kum unulule. Tonda min pola aryuk kum wenesunune. Aning kum bukni, narye, ‘Wininamsine,’ nyapsise touk, ninye ati bico tenena ap, batakna kum diparyuk melina ap, weik unune. Gade chapit la |
Keluaran 34:6
47 Referans Kwoze
“Anggunce, ‘Se, nun malye wininyap ning dekna ati, nun ni Allah arye wenepnamsil do?’ tenen, anggun baju bol deice ning, kwiribuka batakalulum ning ara, bataknamlulume. Talye bol deice ning kum bukni, anggun talima pum tam, malye tenemunye ning nirya batakmumce, ikin kanye bobuka, engepmunce, tamubuka anggun ni koproba Allah Yahweh, na dam anyuk yalulume. Ara, ‘Allah elce nun malye winibibye ning ati, adiparyuk kum opnamsil’ tenen, yanululume. Ara, urdem ati kum nyapsine. Nara, ninye malye wininyak ning ati, adiparyuk minopce wenepnirye, kum onune. Dipkoprop anggun malye winina dekna ati, adiparyuk wenebuka oplopsitinye bukni, ‘Sikce tamubuka, na dam yanamak do, kum do?’ tenen, disunune. Nara ninye ati kanye talima areniliba, bico tenen, nimalyap arye, anggunti disinirye, kalikuka tuba-tuba melisunune. Winisununa ati, anggun malye ululum ning batakmunyopura, ‘Narye aninye ati wenebuka opnamsine,’ tenepse ning ara, tuba ton batakname.” Allah arye nyabuk. Ayupu nyabukba, nabi Yoel arye nyabuk.
Allah Yahweh, anda tukwak ninye nirya ati, weik arye kanye talima arekiliba, bico tenenanye ulyame. Ati, nun malye wininyap ning ati ara, adiparyuk wenebuka oplopsutum bukni, an adiparyuk, minopce yu tenebuka, kum osilyame. ‘Malye wininyak ninye arye, sik malye winin ning batakikirye, na damuk tamubuka yatinge,’ tenesilyame. Ance nun tukwak ninye nirya ati, bico tenesimince, pia tuba-tuba melisiminye ning ara, pia kum batakasilyame. Ance tenelamsulum touk, asum-asum nirya, pia melisilyame.
Ance sikti, bico tenebuka, teleb una ati winilalum ning ara, luba kiyamike. Tonda, sik dam ninye winipmanto kum pil dolalum ning nirya ara, tuba kum tenilamikce, luba kiamik. An nyalalum yupu yanibikce, mandipna kanye bobikce kwalilamikce, ‘Mesir mutuku tuba tamubuka bobisiliba, sik amu tam talye pil don nang unamap’ tenen, sik bidamnye arye, ninye deiyoknye wipdeibik. Malye weik winilamik bukni, Allah anda ninye nirya malye wininyak ning namin kina deiyoknye ulyame. Min pola kum wenesilyamce, an kanye aryuk weik bico tenepsimince, weik arye melisilyame. Bico tenesiminye ning ara, weik arye bico tenesilyame. Winilyama arye, nun apu yapu kum bataklamlume.
Derebukce, Allah el si Yahweh ati, morobukce nyabuk. “Ance Niniwe mutuku ninye kum opmalam ara, yata ati do? Na ni Allah, an si Yahweh ati nyapkine. Aning ara, na asik batakuka, amutuku yanuse talak ara, ‘Allah arye dipkoprob Niniwe mutuku ninye kum opnamle,’ tenebuka, kum nyalamse do? Adeiyok ati ara, na adiparyuk, bai sakuka, Tarsis mutuku minopce binamse. Nara, an winilyam ning, akunum kel bikamkise. Ara, Allah anda ninye malye ubica babye, adiparyuk kum oltakalyame. An kanye aniryuk, bico tenebuka lyesilyame. Tonda, minopce yu kum ukulul bukni, ninye malye winilamice ning ara, namin kisilyamce, weik arye bico tenesilyame. Anda ninye nirya ati, weik arye bico tenesilyame. Ati ara, malye wininyak nang arye, sik malye winin ning batakicopura, anda, ‘Ninye opnaman,’ tenepmanan ning ara, aning batakuka, teleb ulinanye usilyame,” Yunus birye Allah ati, nyabuk.
Narye an Allah Yahweh ati, ‘Melibuka lyepdopnilyame!’ nyabuka, morokununa deiyok ara, ani. Ara, anda aning-aning nirya talimince, deice tam erebuka, mikip weik deiyoknye ulyam bukni, ance kanye deipsimince, nun malye wininyap ning ati, namin kipsimince, kum danalilyame. Anda pia telebnye ulyama atia. Tonda, yata ninye do nirya, sikce antibuk, ‘Naio, ancuk melibuka lyepsilyame!’ nyabuka, morokinyak nang ati, lyepmince, pia teleb kililyame. Tonda, anda, ‘Weik tonun bico tenesimince, pia telebuk kilinamsine,’ nyapdeiamsulum yupu ara, weik tonun nyasilyama ati nyapkine.
Anggun tamubuka, Allah Yahweh el dam yatumce, elce, “Wininamlume,” nyasilye touk, umunyeura, teleb uptume. Winiptum toura, anggun kayapu nang ap, anggun mapu ap nirya ara, anggun mal olan nang arye tapu koubukabikce, tomobuka wenen aik dongobikak, unyak nang nirya ara, abobinuka deibik nang, sik talima Allah arye pil doptuba, sikce tapu koubik nang ati, bico uptuba, tamubuka lopdeipsitingba, sik mutuku tamubuka asukumuk yanganamake. Anggun ni Allah el si Yahweh ara, ninye ati bico teneplirye, nun melina ati, teleb kilina deiyoknye ulule. Anggunce Allah el dam yatumura, elce anggun kum bataksutue. Dipkoprop dopropsilirye, melinamsile.” Raja Hizkia birye nyapdeibukba, ayupu nirya ara, surat deice arye sekik.
Nabi Mika birye, Allah ati nyabuk. Se, na ni Allah. An uminye Allah atonun, ton pia kum ulule. An tonok ulyame. Ati, Allah Yahweh ance wipdeiamsulum ninye, mitik anun sirya tuba aunmab ninye ara, nun malye wininyap ning nirya, namin kipsimince, lyepsilyame. Anda ninye tukwak nang ati, pia ton kum deresilyame. Nun malye wininyap ning dekna ati, adiparyuk wenebuka opsutum bukni, aning kum winimince, nunti tamubuka bico tenesimince, melibuka lyesilyame. Ance ninye ati, weik arye bico tenesilyame. Ance nun tukwak ninye ati, kanye delisilyame. Winibuka ulyamnye ati, moropkine.
Bukni, yata nang do nirya, ninye nirya arye natibuk, ‘Allah elda, nun ni koproba ululeʼ tenen, nati kanye deipnikirye, na nyalinye yupu kekebikirye, aninguk talibuka nimalye arye, na amu tamuk upnin banamak nang nirya ara, pia kum bataknamne. Sik anang ara, batakna kumce, pia bico tenepnirye, melinauk usinirye, pia teleb kipdeipnamsine. Tonda, ‘Naʼ tenen, nang arye deibikiba, dadeipdanin banamak nang nirya ara, yupa pia weik nukman kumto, beribu-ribu otalak unamak nang ati, bico tenepnirye, pia telebuk kipdeipnamsine.
Tonda, Allah an si eren aik, malye ning pia kumak, pia teleb lek aik ubuka dam arye, an si erena ati, tuku deice kutam dipdongobuka, anyaik eipnirye, an kekena ati, amot nyana deice arye nyanune. Wininuna deiyok ara ani. Ara, Allah an ap, an si pia telebnye ap, ance, “Winipnamne,” nyalyam yupu atonunuk kibuka, winilyam ning nirya ap, aning nirya ati, “Telebe,” nyapkine. Tonda, anda pia weik tonun bico tenesimince, “Batakna pia kumce, winibuka teleb kilinamsine,” nyabuka, nyalin yupu deice arye nyalisilyam touk, aning tuba-tuba winisilyam ning ati, narye, “Pia telebe,” nyapkine na nio. Ati ara, Allah an siuk pia erekunune. Ara, aning-aning nirya aupmal bukni, ance yuk awamlye ning deice tam ara, an si akunum erebuka deiamluma ati, an si ara, weik mambul si ulule.
Amot nyanamna deice arye, sik yuk mutuku noutam unyak nang kekenamak sukum, amot nyanamna deice arye, an Allah Yahweh ati, “Telebe,” nyanamkine na nio. Tonda, sik yuk mutuku noutam unyak nang, yuk-yuk nang nirya, sik kekenak ara, narye an Allah Yahweh ati, “Anda pia telebuk ulyame,” nyabuka, an si erekinirye, nyanamne.
Ura, Allah arye anggun nirya ati, ‘Se, sik malye winin ning bataknamak do?’ tenen, bico tenesilirye, adiparyuk minopce wenebuka kum osulule. Aning kum bukni, tia talak atibuk namin kisilya deiyok ara nyapnusine. Ara, Allah arye nun tukwak unyap ninye nirya ati, ‘Se, na namin asa arye teleb ubuka melipsiniba, lo tuba awaplyopura, adeice arye sik malye wininyak ning moubuka tenebikirye batakikcopura, tamubuka na tam kipropnamak do?’ tenen, kalikuka disulule. Winisulul bukni, anggun dan do? Aning, moubuka kum tenelulumce, ‘Talya luparabuka malye winin ninguk talibuka wininamap’ tenen, ululum do? Anggunce, aning tenelulum do? ‘Allah bico tenesilirye, adiparyuk wenebuka kum osulul ning ara, elce, ‘Lo arepniba, sik malye winin ning bataknamak’ tenen, patalyeba namin kisilya ara, mambul kum ati, dauplye,’ tenemunce malye tuba winilulum do?
Allah Yahweh arye, ninye kanye talima noutam pil dolyeura, ninye nirya arye, elce kum ninye kum winipmanto pil dosinyaka nirya ara, tuba tenenauk unyake. Aning nirya ara, pia kum luba kinyake. Aning nirya ara, pia ati, aupnamle. Nun ni koproba Allah ara, aning-aning nirya talilulnye ati, el kanye aryuk, nun talye kankan nang nirya ati, weik arye bico tenesilirye, nun patasulul ning nirya tenesilirye, melisulule.
Winipmanto ara, ninye arye, weik weisa ubikceba, dirina weik uplyeura, yuk nang dana-dana tam nirya, teleb kibuka eililamak touk, sik diksukumuk wininyak nang babye, sikti, teleb wininyaka deice arye, yuk nang weik arye melikinyake. Ara, sik diksukum wininyak ning, yuk nang eibikceura, ‘E, teleb winin ning ara ani,’ tenen, kel biklamaka atia. Tonda, sik diksukum telebuk wininyak nang arye, yuk nang ati, bico tenekirye, teleb kibuka melikinyake. Tonda, Allah arye, “Aning ara, wininamlume. Aning ara, pia kum wininamlume,” nyapdeiamsuk yupu moubuka talikirye, telebuk wininyake. Ati, yuk nang nirya ati ara, teleb kibuka wininyake.
Anye el cang buppu baju tia ati dopropmince, ouku weik tonun pia kum delinamluma deiyok ara, ani. Anye el cang baju buppu kin ning ara, el nong bola leilipyeba, buppu una ara, aninguk ulula ati, ance el baju tamubuka kum arepminyeura, el mapnutu talak babye, yata ning arye, el nong pakubuka maptuba, buppu kiptu do? El talye maptuba, buppu kum kiptuura, anye birye na Allah ati, ‘Melipnilyane,’ nyabuka, weik yupu deice arye, malye nyabuka moropnilyeura, narye el yupu dipkoprob kekenamne. Ara, na Allah Yahweh, ninye ati bico tenena deiyoknye ununa ati nyapsine. Aning-aning nirya winina ati, “Aning ara wininamlume, aning ara, pia kum wininamlume,” nyabuk yupu
Allah an mapu koprop ara, Abraham arye deiamukba, dadeipdanin balamik nang, nun Israel yala ninye ati, tenepsimince, bico upkiliba, tamubuka lyepnamsilyame. Tonda, nun apu koproba, Yakub birye deiamukba, dadeipdanin balamika ani, deiamsik Israel nang ati, tenepsimince, bico upkiliba tamubuka lyepdopnamsilyame. Ara, minop talak ancuk, nun apu yapu nang ati, nyalin yupu deice arye, “Wininamsine,” nyapdeiamsulum touk, wininamsilyame. Pia kum bataknamsilyame. Ance nun apu yapu nang ati, “Wininamsine,” nyapdeiamsulum ning nirya ara, kum bataknamsilame. Aning nirya ara, dipkoprob pil donamsilyame. Aminyan talak babye, nun dam teleb winilinamsilyame. Ayupu nyabuka, nabi Mika birye Allah ati, nyabuka morobuk.
Allah arye, ‘Naʼ tenen nang ati ara, tuba telebuk kipdeipnamsine,’ tenesulul ning ara, asum-asum nirya, beren tam talak arye deiyok koubuka, tenena uk usilirye, telebuk kilisulule. Allah elce nunti bico tenesilirye, elce, “Winipnamsine,” nyasulul yupu nirya ara, dipkoprob nong upnamle. Kum bataknamle. Tuba weika arye, teleb kibuka melinamsile.
Ayupu nyapmasina deiyok ara, ani. Ara, Allah arye, ‘Wininamlume, aning ara kum wininamlume,’ nyapdeiamukba, Musa kekebukce sekeiyamsuk mem yupu nirya ara, Musa deice arye areamsuk. Bukni, dipkoprop winina deiyok ning ap, Allah arye el kanye aryuk nunti bico tenesilirye, melibuka lyesulul ning deiyok ning ap, tukwak ninye ati melilana deiyok ning ap, ninye lyena deiyok ning nirya ap ara, Yesus Kristus deice arye arisulule.
Winipmanto ara, ayam mapu, sik nin birye dobuka, el pol amu deibuka irilamle tonun, Allah arye elti, dib tenenyak ninye nirya dobuka, el damak deilinamle. Tonda, sik nirya ara, Allah el mikip weik arye erebuka uliba, el amu tamuk unamlume. Winipmanto ara, el pol mikip arye, anggun nong iripdongopsiliba, kanye lamapdongobuka, nimalya asa arye, el amu tam unamlume. Winiminyeura, Allah arye, pia kum bataknamsile. Winipmanto ara, ninye arye mal oldan talak, ‘Mal biksilyak’ tenen, ting kinikikirye, kelapye dobuka, mal pibalamak touk, Allah el mikip arye, nunti, melibuka kaliksilibuk, opmanto ning, nun damak yalya babye, kum opnamsile. Aning atonun, Allah arye, ‘Ikin ning na amu tam unyak ninye damak yalyak’ tenen, el mikip arye nunti, pia melibuka kalikinamsile. Ati, el amu tamuk unamlume.
Tonda, sik talye-talye yupu uk nyakce nang ara, sik wenena ati, yupu kum kipdeipminba, ‘Talye lup nang ulamak touk, upnamak’ tenen, moropkine na nio. Ara, sik anang arye, ‘Nunda dipkoprob uk kibuka, wininyap nang,’ nyabuka, erelakirye, nunti malye kisinyakce, malye yupu nyasinyak nang nirya ati, nyapkine. Pia maknya kintinikirye, kwalinyaka deice arye, nunti, nalisinyake.
Atalak akunum kiplyopura, anggunce nyapnamlulume. “Nun nirya arye, Allah el tibuk, telebe,” nyabuka, el siuk erepnuyabe! Tonda, ‘Elcuk melibuka lyedopnamsilʼ tenen, el tibuk morobibyakarye, el siuk erenamabe. Tonda, Allah el mikip weik arye, mambul pil dolul ning nirya ara, ‘Yuk mutuku nang nirya kekepnamakʼ tenen, aning laka nyalbinamlulume. Tonda, “Nun ni koproba Allah, mambul weiknye ulula ati, el pia teleb siuk, pia telebe,” nyabuka, erenamabe. Ati ayupu nyabuka, laka nyalbinamlume.
Tonda, Allah arye, “Narye wininamne. Anggunce winamlume. Tonda, anggunce wininamlume,” nyasulul yupu nirya ara, atalak arye dipdongobuka, doupnamle talak nirya ara, pia yuk-yuk kum upnamle. Nyapdeibuk ning nirya ara, tuba anyapdeipsuk touk, pia ati unamle. Ara, Allah arye, “Aning ara wininamlume. Aning ara, pia kum wininamlume,” nyabuka, areamsuk yupu nyasilya atonun, diksukumuk pil dolule. Allah arye, “Wininamne,” nyalul yupu nirya ara, aninguk ulule. Anyalul yupu nirya ara, talye yupu kum nyalule. Nun nirya ati, diksukum kibuka talisululce, nyasulule.
Nyabukura, Allah el si Yahweh arye Elia biti tamubuka nyabuk. “An keil deiya aunmalamak arye kisipdaka na yanuka tiknun damak, amutuku dupak ayalyame. Nara Allah, na si Yahweh, narye an dam yanapnya ani, kisibuka binuna atia,” nyabuk. Nyabukura, Allah unmok dam ara, kumanya mikip weik balamleto ubuka biyukba, amutuku-amutuku yo pamuka nirya weik arye lulukdayuk. Tonda, amutuku weik keil nirya ara, teleb bukabukce, aning sakuk bukni, atalak ara Yahweh el nong ton akumanya noutamak kum ubukba, Elia kum eibuk. Weik kumanya dopdandobukopura, weik mutuku lulukna ton dobuk. Winibuk talak babye, Allah el si Yahweh, el nong ton lak kum kipmokba, Elia ton kum eibuk.
Anggun kele, ikin ning weik ulamu bukni, sik batakna kum arye, diba tenelamikce, pia pi dobuka, pil dolamik nang ulamik. Winilamika ati, Allah arye sikti, teleb ubuka kipdeiamukbuk, kanye deibuka ulamik. Tonda, nunce, ‘Anang ara, weik mambule, sik pia telebuk ulamik,’ tenenyabe. Anggunda ayupu akunum kekelamlume. Ayub ara, el nong deice ikin ning pia weik ulamu bukni, teniltona kum arye, pia palibuka tunim abuka ulamuk. Daulamukba, Allah arye ila tamubuka aribuk ning ara, akunum kekelamlumce kel biklume. Nun ni Allah ara, pia bico tenepsilirye, nun malye wininyap ning ati optapsitu bukni, lubakipsilirye, nun patapsilye ning nirya ati, talye arisulule.
“Yata ning do nirya, urasin atonun puturubuka, aning ati kisal dobuka, gutam tuku dipdongobuka si erena meme. Anggun ni Allah ara na Yahweh uka. Ati yuk talye ning si erena meme. Na mapu arye yuk ning nirya ati, ‘Nun ni’ tenen, si erebikcopura, na malye kanye bobuka pia yu unune. Nati, ‘Nun like’ tenen, malye-malye nyaninyak nang ara, sik wenepnirye, sikce deipnamak mapu ap, sik mapu deipnamak mapu ap, amapu babye deipnamak mapu ap ara, sik deipkirikdop nang ninye dika bitinye do, winilye do nirya ara, tuba wenenamne,” Allah arye nyabuk.
Nyabukura, Allah el si Yahweh arye tamubuka nyabuk. “Na mikip ap, pia teleb wininye ning ap, weik mambul ning ap, an dam winipnin banirye, na si koprop Yahweh laka nyapnamakine. Tonda, ‘Naʼ tenen, ning ap, na kanye delin ning ap, bico tenenamne ning ap ara, na wibuka deipnamne ninye ati, aning arepnamne. Aning atonun, sik malye winibiceba, adiparyuk oploptinye bukni, bico tenepnirye, namin kipnamne ninye babye, na dem aryuk wipnamne. Nara Allah ununa ati nyapkine,” Allah arye nyabuk.
Anggun ni koproba Allah, elda ninye ati minopce kum wenepnamsil bukni, bico tenebuka melisululnye ulula ati ara, anggunce el dam tamubuka yamunyopura, eipsilirye melinamsile. Tonda, elce anggun apu yapu ati, ‘Na tenena ninye unamlume,’ nyalilamsuk yupu ara, kum luba kipnamle. Elce anggun apu yapu ati, ‘Winibuka melinamsine,’ nyalilamsuk ning ara, pia tenenauk unamsile. Tonda, anggunti, pia kum bataksilirye, obuka sirya kum daknamsile. Tuba melinamsile. Allah arye wininamsile. Musa birye nyabuk. Ara, Musa birye, “Allah arye nyapdeipnuk yupu ara, bobuka anggun Israel ninye ati akunum laka nyapsine,” nyabuk.
Tonda, na ap, an mapu Israel nang nirya arye, anyaik yanmanto kum ubibye talak babye an si eren aik tuba tenebibirye, anti tenibuka moropkipyopura, ‘Kekenamsilam’ tenen, moropkine. Ara, ‘An unak im deice arye kekepsimince, nun malye wininyap ning ati, namin kipsimince, lyelonamsilam’ tenen, moropkine.”
Aning ton eipsirye kel bikse. Ara yata deiyok ati, tukwak nang nirya arye, sik talima noutam ara, ‘Malye un ning ap, yu arye malye un ning ap ara, talye luparabuka winiptibye,’ tenen, wininyaka deiyok ara ani. Ara, sikce malye weik ubikiba, deiyok nang arye anang tomobuka, ninye yupu lipsisikuka bokolinak ara, minopce kum bobanyake. Tonda, sik malye ulamik ning wenen ning nirya ara, ‘Winipnamsiabe,’ nyabuka, talye nyanyak bukni, dipkoprob ning ara, minopce sik nong deice ikin ning kum delinyake. Ati, sikce talye mangkau arye malye ninguk tuba wininyake.
Aning nirya akunum winipnyopura, amutuku noutam unamak ninye ara, ‘Yatanye birye melipsutuba, nun un ning nirya teleb kipdeipsutu do?’ teninamak talak nirya ara, na Allah pia diksukum yupu nyanunye biti moronamniyake. Narye, ‘Wininamne’ nyanun touk, batakna kumce aninguk wininunye biti moronamniyake. Aning atonun, amutuku unamak ninye arye, yuk nang ati, ‘Wininamsiyabe,’ nyabuka nyalin yupu nyanamak talak nirya ara, na Allah pia diksukum yupu nyanunye, na si deice arye nyalin yupu nyanamake. Wininamaka deiyok ara, minop talak malye ululum ning nirya ara, akunum kum kipdeipsinirye, tuba tonap pia kum teninamne. Aning nirya kum kipreipnirye, bataknamne.” Allah arye Israel ninye ati nyabuk.
Aning kum bukni, yata nang do nirya, sikce ‘E, mambul weik ning ani, mambul weiknye bira ani,’ tenenamak talak ara, sikce anyapnusin ninguk tenenamake. Tonda, tukwak mutuku, talye daulye ning nirya ati, ‘Aning ara, mambule,’ pia kum tenenamlume. Aning nirya kum bukni, anggunce na Allah Yahweh ati, diba tenepnulumce, na ap, na wininye ning ap, moubuka biknamnulum nang ara, angguncuk, ‘E, mambul weik ning ara, Allah Yahweh el uka,’ tenepmunce, aning deice aryuk, kanye pia delinamlume. Ara, anggunce na Allah ati, “E, Allah arye bico tenesilirye, elce, ‘Aning ara wininamlume, winipmunyopura, narye melisinirye, pia teleb kipdeipnamsine,’ nyabuka, nyalin yupu deice arye nyapdeipsuka deice arye, teleb kibuka melisulule. Elce winilye ning nirya ara, diksukum una ap, teleb ning winin deice aryuk, ninye yupu lipsisikuka bokosilirye, tuba-tuba melisulule,” nyaptingce, na si erepnitinge. Nara Allah Yahweh arye, anggunti pia bico tenesinirye, pia kum batakasunune. Narye, anggun tukwak mutuku sirya, im sirya nirya ululum nang ati, melisinye ning nirya ara, bico tenena ap, dip yupu nyana ap, malye winin ning pia kumce, diksukum winin deice arye melisunune. Tonda, na Allah arye, ateleb winin ning nirya ap, ‘Diksukum winin ning nirya ap ara, telebe uka’ tenen, na kanye delinune. Aning ara, na si Allah Yahweh arye ayupu nyapsine, nyabuk.
Na ni Allah, ancuk ninye yupa weik, beribu-ribu nukman kumto unyap nang nirya ati, batakna kumce, pia bico tenesimince, ance, ‘Winibuka teleb kipdeipnamsine,’ nyalin yupu deice nyapdeipsulum touk, tuba pia telebuk kilinamsilame. Bukni, wisi nang arye, malye winilamikca dengna ara, sikce deibikce mapu deice, ance ikin ning dobuka, sik mapu deice deibuka wenamsilame. Anda dipkoprob pia mikip weik ulyamce, aning-aning nirya, deice tam erebuka ulyame. Allah Yahweh, anda im deice yin talin malaikat nirya talilyamce, sik deiyoknye ulyama ati, ance mikip weiknye ulyame.
Dipkoprop Allah Yahweh ara, minopce yu upliba, adiparyuk kum wenesulule. Bico tenepsilirye, namin asa aryuk melisulule. Bukni, el babye, mikip weiknye ulule. Ati ara, yata nang do nirya elti, ‘Nun likʼ tenebikirye, pia malye winibikcopura, sik wenenak arye batakliba, talye kum wininamake. Allah arye, sik malye uning ati, ‘Daupmalyeʼ tenen, talye namin kum kilule. Aning kum bukni, yu weik upliba, mikip arye anang ati wenepnamlarya. Dan mutuku do nirya, Allah Yahweh banamle mutuku noutam, el pil doplyopura, amutuku noutam ara, mikip weik kumanya dolamle. Tonda weik mok ap, kum ap, bebeya laklamle ning ap, ulule. Winipmanto ara, Allah Yahweh, el yan yanibuka, banamla sukum arye, atu sung-sunga ara, dua bum atonun unamle.
Kibukce, ayupu nyabuk. “Na ni Allah, an si Yahweh ati, si erepkine. Anda na deiyoknye Abraham ara, an diamuk taliplumba, an si erekulule. Ance Abraham biti, ‘Winipnamle,’ nyapdeipmamu touk, pia teleb ubuka akunum wininmalame. Tonda, Abraham ati, bico tenepmince, elti, teleb kililyame. Tonda na nio, anda Yahweh arye melipmanilama deice arye, na deiyoknye Abraham, el tam ninye, sik aik akunum yanmane. Aning nirya ara, anca,” nyabuka Allah el si Yahweh ati, el si erebuka kibuk.
Winilula ati ara, Musa ap, na ap nun neika epdanimirye, yupu sisikinyame. El ti ara, narye yupu laka nyalinune. Musa biti, domona yupu ning ton kum nyalinune. Tonda, yuk nang nirya kum bukni, na yupu tanmanye talak ara, Musa el uk ara, na nong urasin kum dilinulul bukni, kanye dem ara, elinulule. Aning nirya ati ara, anggunce Musa elti, malye yupu nyapmarum ning ara, yata ati ilil kum upmasil do? Yata deiyok ati, el deice malye yupu nyarumunya arye yanirurum do? Musa ara, na pil dolulnye ulula atia, nyabuka, Allah el si Yahweh arye, Harun ap, Miryam ap ati wenebuk.
Nyabukura, Raja Daud elce tamubuka nyabuk. “Se! Aning ara, na pia kanye ikin atia! Bukni, na kanye ara, ninye arye, na ikin ning delina ara, na like. Ati, na kanye ara, pia teleb ning ara, Allah Yahweh arye, nun Israel yala nang nirya unyap mutuku ap, na ap, ikin ning deipsutu. Deiyok ara, nun ni koproba Allah Yahweh aryuk, pia weik arye bico tenelamsuke. Bukni, weik kanye ikin ning ara, nun mal olan nang arye, nun Israel nang ati, weik yu arye opsicake. Ninye arye nunti, bico kum tenesinyake.” Daud birye nyabuk.
Anggunda teleb kibuka unamlume. Ara, narye peteryamsise yupu ara, talye ning tenebuka batakna meme. Winipmanto ara, bace duk ngang karaklamak atonun, narye peteryamsise yupu moubuka talipmunce, telebuk unamlume. Tonda, winipmanto ning ton, ninye arye, ‘Ayupu ara mambul weik’ tenen, kat ning deice sekuka deibikirye, dilamak atonun, narye peteryamsise yupu anggun kanye talima pum tam moubuka tenepmunce unamlume.
Piblisite