Hizkia bira teleb winilamuk ning ara ani. Yehuda mutuku tam ulamik nang arye, Allah el si erena ati, mutuku kon deice domik aik balamikce kam ning obuka Allah ati arelamik bukni, anyaik ara Allah arye, ‘Aning ara, kum wininamlume, aning ara winina meme,’ akunum nyapdeiamuk. Ati, anyaik-anyaik nirya ara, Hizkia birye ulubuka dakuke. Tonda, aninye arye, ‘Isa Mutuku Dongonye si erenamap’ tenen, weik keil dobuka, dokola delilamik ning nirya ara, Hizkia birye teikukura, kum daneibuk. Tonda, ‘Isa Mutuku Dongonye kil el si Asyera erenamap’ tenen, cang yo ikukabice, isa si erelamikak ara, acang yo nirya Hizkia birye, ayo weblobuk. Ton ning ara, minop talak Israel ninye mek ap, ninye ap, kum ulamik mutuku, talye balamik talak ara, yu kwatima arye, si tobukba, ninye weik diamik bukni, Allah arye, nyapdeibukba, Musa birye kat ning, el si tembaga dobukabukce, kwatima urasin atonun ning memepdeibukce, cang yo deice deibuk. ‘Aning ara, weik mambule,’ tenelamika ati, kat ning dopropnak arye, kwatima urasin atonun memepdeipna arye si erelamikce aning dem morolamika ati ara, malye ning pia weik winilamik. Ati, sik Yehuda tam nang arye, kat ning dobuka abal urasin atonun ning ton memepdeipna arye, aning si ara, Nehustan nyabuka si silamikce, ‘Nun moronyap ning kekepsilirye, melinamsil’ tenen, tong teleb ning uku dongolamikce, aning si erelamikce morolamik. Winilamika deice arye, pia malye winilamika ati, Raja Hizkia birye abal urasin atonun memeldeililamik ning ara, dobuka pouklobukce, kum kipdeibuk. Ara, ‘Yehuda nang arye, tuba aning si erebikcak’ tenen, winibuk.
Keluaran 34:13 - Eipomek13 “Anya arye aning ara, winina kum bukni, anggunce amutuku bimunce sik Isa Mutuku Dongonye, el si Asyera, el si erena ati dobik aik ap, yo deiyok iklamak ning ap, kam ning obuka, Isa Mutuku Dongonye arena ati, keil pala dobuka, pala keil bulubuka yakdeibik ning ap, tonda, sik isa si erena ati, puturubuka delilamik ning nirya ap, weplopnalulume,” Allah arye nyabuk. Gade chapit la |
Keluaran 34:13
25 Referans Kwoze
Amutuku binamunyopura, amutuku unyak ninye, sikce si erenyak ning ara, anggun Israel ninye arye, aning si erena ati, aning dam kutam tuku deice deibuka, si kum erenamlulume. Tonda aning si pia kum sinamlume. Tonda, sik amutuku ninye arye winilamice ning ton, ‘Nun babye winipdenuyabeʼ tenen, pia kum wininamlume. Bukni, amutuku nang arye, puturubuka ninye urasin atonun winyamikirye, si erelamice ning nirya ara, dakuka kum daneinamlulume. Atonun, sikce aning si erena ati, weik cang yo ikilin kil ara, anggun adiparyuk daklopmunce, kum kipdeipnamlume.
“Ati ara, anggun amutuku binuka wekmunye talak ara, anggun mapu ap, kilmapu ap ara, aninye ap dolana meme. Aning kum bukni, amutuku ninye arye, sik talye Isa Mutuku Dongonye si erenyakce, domice aik nirya ap, Isa Mutuku Dongonye si erena ati, kam ning obuka, pala keil lelebuka yangapdeibikak nirya, el si mesba ara, dakuka uluplopnamlulume. Tonda, ‘Isa asukum ulule’ tenen, cang keil tikdeibik ning nirya ap, sik Isa Mutuku Dongonye si, ‘Asyera asukum tikilyayuke’ tenen, tikuka iklamik cang yo ara, sekuka uku dongopnamlulume. Tonda, keil arye, sik Isa Mutuku Dongonye tenen ning, ninye urasin atonun memebuka deiyok delilamak ning nirya ap, dakuka uluplopnamlulume. Yo arye puturubuka deiamica ara, uku dongopnamlulume. Aning-aning nirya, ‘Nun ni aniʼ tenen, si erenyak ning nirya ara, daklopnamlulume. Aning atonun, talye ning si erenyak ning nirya ara, adiparyuk ulubukapmunce, uku dapnamlulume.”
Kaplin Kwalina pil akunum winibikce, adin ning akunum kwalibuka dibik talak ara, anang nirya ara, Yehuda tam mutuku, sik yuk-yuk ulamik touk tamubuka biyik. Winibikopura, ninye urasin atonun ubuka memepdeiamikce, “Nun ni koproba melipsilyame,” nyabuka, talye ning bukni, isa si erelamik ning nirya ara, ulubuka batakik. Tonda Asyera isa kil, el urasin atonun ubuka, memepdeiamikce, si erelamik ning nirya ara, dalubuka batakik. Winibikopura, isa si erena ati mesba-mesba memebuka, kintinip deiamikak nirya ara, uluplobikce, sice kibuka batakik. Ara, Yehuda tam mutuku noutam nirya bukni, tonda yuk asik ap, tonda Benyamin yala nang ulamik mutuku ap, Efraim yala nang ulamik mutuku ap, Manasye yala nang ulamik mutuku ap ara, sik anang nirya, sik tam mutuku babye, anirya atonun winibik. Winibikce, tamubuka anang nirya ara, sik ulamik mutuku uk, yuk-yuk tamubuka biyik.
Tonda Raja Yosia birye winilamuk. Amutuku nirya isa si erelamik ning uluplobukce, isa si Asyera si erena ati, ikamik cang yo nirya weblobuk. Tonda, sik isa si erelamik nang arye, talilamik keil, akeil talibuka sik isa sisibuka si erelamika nirya Yosia birye, dobuka teikuka batakuk. Winibukce, atue kiplobuk. Aning-aning si erelamika nirya ara, ninye yok uk yamubukabukce weik ubuka langdibuk. Winyamukce ninye yok uk erelamuk. Deiyok ara, ‘Amutuku-amutuku nirya ara, tuba tonap, ninye yanuka isa si kum erenamak’ tenen, winibuk.
Asum lukunyan aryuk, Allah el si Yahweh arye Gideon biti nyabuk. “An ni koproba el sapi basam yim ning bitinye ning ara, keting tamun tekbarye kiyamlye ning dobuka kintinpnamlyame. Winipminyopura, an ni koproba arye, ‘Isa el si Bahal, si erena ati, kam ning obuka arenamne’ tenen, keil duk bulubuka yangapdeibuka ap, isa si eren aik ap, tonda anyaik dam isa kil si, Asera teneiprebuka, aisa kil el si erena ati, ikamuk ayukumna yo ara, kwenibukapmince, anyaik ap, ayo ap nirya ulubloplyame,” nyabuk.
“Aning atonun, anggunce na yupu batakmunce, Kanaan mutuku talibuka unyak ninye ati, ‘Nun ap, sik ap olana kum diparyuk, teleb kanye bobuka neika unamabe,’ nyabuka, nyalin yupu kum nyapnamlulume. Anggun Israel nang ap, amalye nang ap, neika kum unamlulume. Sik amutuku talibikce, si erenyak isa ati, keil pala yangabuka delilamak ap, sik isa aik ap nirya ara, anggunce uluplopnamlulume. ‘Aning nirya ara, nunce neika wininmabe,’ nyabuka nyapdanamupu bukni, na yupu moubuka kekebuka kum dobolbalulume. Aning yaniptaplumce amutuku ninye malye wininyak ning ara tuba aupmale. Yata deiyok ati, na yupu kum kekebuka dobolbalulum do?”
“Uluplopminyopura, anyaik domik sukumuk, amutuku yim deice, Allah el si Yahweh, si erena ati kam ning obuka arena ak, keil duk bulubuka yangapdeipmince, moubuka memepdeipnalyame. Winipminyopura, ance an ni koproba sapi basam bitinye ning ton, Allah ati obuka arepnulyame. Lak bikna ati nirya nyapnukine. Winipnulama ati, isa kil si tenebuka ikamik cang yo ara, ance kwinibuka bataknamlam ning ara, dobuka keil pala deice uku sekukapmince, asukumuk sapi tup dobuka dapminyeba, uku dipnamale. Ara, Allah el si erena ati, awinipnulyame,” Allah el si Yahweh arye Gideon biti nyabuk.
Nyabukce, ayupu ton nyabuk. “Allah el si Yahweh arye, Israel ninye ati wenen ning sik deice deiplyopura, mekwen amu tam ulul ning nirya ara, lu tamulamla atonun, Israel ninye babye wininamake. Tonda Allah arye, Israel ninye sik apu yapu punun nang ati, ‘Teleb mutuku talinamake’ tenen, areamuk mutuku ara, tamubuka dopropnamle. Akunum tamubuka doproplyopura, ninye arye talye palamle ning kwinibuka donoklamak touk, Israel ninye nirya dobuka Efrat mek koubuka otam donoknamle. Yuk mutuku yu nang arye sirya obuka dakikirye, bobuka yuk mutuku bobinamake. Winipnamla deiyok ara, ani. Israel ninye arye, Isa Mutuku Dongonye si Asyera si erena ati, cang yo ikukabice, aning si erelamik. Asyera Isa Mutuku Dongonye sisibuka, si erelamika ati, Allah el si Yahweh arye, yu ning sik deice deipnamle.
Tonda, ton nang arye, Allah diba tenena kum arye, ‘Yuk talye ning atibuk, nun ni koproba aniʼ tenen, Asa birye taleamuk mutuku noutam, ninye arye aning si erena ati olamikce deiamik ning ap, si eren aik ap nirya ara, daklobuk. Tonda, yuk talye ning si dona ap, si erena ap ati, dolamik ning, el si mesba nirya ap, mutuku kon deice isa si erena ati dolamik aik ap, dakuka sice buklobuk. Tonda, isa si erena ati, mem keil deiamik dobuka teikuka kum kipdeibuk. Tonda isa si Asyerah, el si erena ati, cang weik yo iklamik ning ara, aning nirya kwinibuka, batakuk. Ton ning ara, koubuka yuk karen ak deibuk. Ara, ninye arye, Isa si erelamikak nirya babye, loplobuka yukak deibukce, ton ning ara, dakuka, sice buklobukce kum kipdeibuk.
Aning-aning nirya akunum winibikura, anyapce dikdongobuka, ninye deiyoknye Raja Asa birye, el lu kil Maakha biti, “Weik deiyok kil, Raja kil tuba kum unamlyame,” nyabuka, dobukce el amu tam deibuk. Ati, akil el pil dona kum kipdeibuk. Adeiyok kil Maakha, amu tam deibuk deiyok ara, ani. Ara minop talak akil Maaka birye, isa si Asyera, si erena ati cang weik yo tikdeiamuka deice arye, pia malye weik ulamuk. Winyamuk ati, el wenena ati ara, Asa birye akil bobuka, amu tam kepdeibuk. Winibukopura, aisa si erena ati cang yo iklamuk ning ara, kwinibukce, loklobuka bataklobukce, mutuku si Kidron mek duman bukni, Kidron Banak bobinuka, uku dabukba, uku arye dibuk.
Mikip deice arye el kanye tenen ning ap, el talima pum ap, Allah Yahweh deice deiamukce, Allah arye, “Aning ara wininamlume, aning ara pia kum wininamlume,” nyapdeiamuk ning ati, moubuka kekebukce, talebuka ulamuk. Tonda, Yehuda mutuku noutam isa-isa si erena ati, mutuku kon deice kintinibuka deiamikak nirya ulubuka bataklobukce, Asyerah si erena ati, cang weik yo arye ikdeiamik ning babye, kwinibuka bataklobukce, aning nirya kum kipdeibuk.
Ara, Yehuda mutuku ulamik nang nirya ara, sik deipkirikdop nang arye si erelamiknye, Allah Yahweh si eren aik wekuka, si kum erelamikce, bataklamik. Winilamikce, sikda talye isa siuk erelamikce, Asyera, el urasin ato ning kibuka puturyamikce, el si erelamik. Tonda, aisa si kina ap, si eren ap ati, cang weik yo ton ikdeiamikce, asukum aryuk, Asyerah si erelamik. Adeice arye sikda malye weik ulamik ati, Yehuda yala nang ap, Yerusalem mutuku weik asik noutam ulamik nang ap, sikti, Allah arye, ‘Aning ara, na like,’ tenebukce, yu weik ubuk.
Aning atonun, kanye imun weik uk dilamuk talak, ‘Allah arye melibuka kwetepnamnilʼ tenen, morobuk ning ap, tonda Allah kekebukce, bico tenebuka, dipkoprob el nong kwetebuk ning ap, abuku sejarah noutam akunum sekuka deiamik. Aninguk kum bukni, tonda Raja Manasye birye, Allah si yanilamukce, malye weik winilamuk ning ap, tonda Allah ati, diba tenena kumce, el yupu moubuka kum taleamukce, malye winilamuk ning ap, tonda isa si erena ati, yuk mesba kintinip deiamuk ning ap, isa ati, kam ning obuka, arelamuk ning ap, isa si Asyer si erena ati, weik cang yo ikuka, asukum arye morolamuk ning ap, talye ning bukni, ‘Nun ni ara, aniʼ tenen, ninye urasin atonun kibuka memebuka, patung-patung deiamukce, talye ning bukni si erelamuk ning ap, aning nirya malye ning yala-yala nirya kintinilamuk ning nirya ara, minop talak winilamuk ning sekna buku, el si ‘Buku Sejarah Aminyan Talak Upnamle Ning ati Dina Nangʼ noutam sekuka deiamik. Amalye ning nirya ara, el malye winilamuk talak noutam, el kanye amu tam kum ulamukce, ila tamubuka teleb kibuka, diksukumuk kum ulamuk talak, malye winilamuk ning ati nyababe. Aning nirya babye, Allah arye nyapneura, el yupu laka nyan nang, sik nabi-nabi nang arye nyalamik ning, ‘Minop talak winilamik nang arye, winilamik ning aniʼ tenen, sejarah buku noutam arye sekuka deiamik.
Atalak ara, sik ninye nirya ara, sik taruk deice arye, memebuka delinyak ning, isa si eren ning ati, ‘Nun ni koproba melipnamsilarya,’ kum tenenamake. Tonda, atalye ning si erena ati, mesba-mesba moubuka deibikirye, kam ning obuka, uku dongolamicak, ton kum tenenamake. Sik taruk arye memebuka deiamica nirya ap, siltong teleb ning, isa ati uku dongonyakak ap, tonda isa si Asyera, aisa kil el urasin atonun memebuka deibikirye, si erenyak ning babye, tuba diba tenebuka kum unamake.
Winibuka weik tonun, Israel nang arye malye weik winilamik ning ara, namin kibukce, kum kipdeibuk. Yakub el yala nang malye weik ulamik ning nirya ara, Allah arye pera mutuku inibuka donokuka deice arye, sik malye-malye weik winilamik ning nirya ara, akunum kum kipdeibuk. Tonda, Allah arye sik minop talak isa mer si erena ati, keil pala taplakuka deiamikce, mesba moubuka kintinip deibikce, isa si erelamik ning ara, sikce buklopbukba, talye tuku deice butbuta atonun kipdeibuk. Tonda, sikce isa kil el Si Dewi Asyera, el urasin atonun puturubuka memepdeiamik ning ap, tonda ‘Isa arye nun moronyap ning moubuka kekepnamsiyakʼ tenen, isa si erenak bukni, siltong teleb ning uku dongonyakak, el si mesba dup ap, aning nirya dakuka bataklyopura, aning nirya kum kipdeipnamle.
Sik Yehuda tam nang nirya arye, isa kil, el si Asyera, aisa si erena ati, mutuku dup arye, isa si eren aik domik ning ap, weik yo tikamukce, bok weik ulamle amu tam ara, aisa si eren aik ap, isa arena ati, mesba-mesba domik ning ap, Asyera isa si erena ati, cang ayukumna yo, ikuka deiamik ning ap ara, anggunce isa si erena ati, tuba-tuba arelbalamlume.
Atalak ara, yata mutuku ninye do nirya, sikce winibuka malye unyakce, na yupu ati, ‘Nun like’ tenen, yaniltaninyak ninye mutuku-mutuku nirya ara, nati yu unyinyak ninye nirya ara, opnirye kum kipdeipnamne deice arye, na yu unilye ning ara, adiparyuk yu aknapnamnile. Ara, tukwak mutuku noutam unyak ninye nirya, sikce malye wininyaka deice arye, wenebuka oplopnamne. Allah arye Israel ninye ati, nyapdeibukba, nabi Mika birye kekebukce sekiamuk.
Anggun Kanaan mutuku bimunyopura, sik amutuku talibuka unyak nang nirya ara, adiparyuk yakdonoknamlulume. Tonda, amutuku ukirye, isa si erenyak nang nirya ara, obuka kum kipdeipnamlume. Sikce si erenyak ning ara, keil ap, kat ning nirya ap deice, ninye arye memebuka deibikirye, ‘Nun ni koproba anye tenen, si erenyak ning ap, tonda mutuku kon deice aik dobuka, isa si erena ati, kam ning obikirye, memebuka uku dongolbanyakak ap, adiparyuk dakuka uluplopmunce, aning nirya ara, winibuka sirya danamlulume.
Tonda, talye yuk-yuk ning do, yuk mutuku nang arye, ‘Aning ara, nun ni koproba allah,’ tenelamak ning ara, aning si erena ati, ayukumna yo ton kum ikinamlume. Deiyok ara, anggun ni koproba Allah Yahweh, elda atonun ning si erena ati ara, ‘Na like. Aning ara, na pia like,’ tenelule. Musa birye, sik Israel nang ati, nyabuk.
Bahal si erelamik ning, el si patung ap, Bahal si erena ati domik aik ap nirya ara, Yehu el yin talin nang ap, el melibuka kalekin nang ap arye, ulubuka daklobikce, kum daneibik. Winibikopura, Bahal isa si erelamik sukum ara, deibar dam kiplobik. Awinibik karin dipdongobuka, wini talak babye, anyaik uamukak ara, ninye arye deibar morobikce banyake. Awinibik deice arye, asukum ara, pia malye mutuku kibuk.