Keluaran 23:26 - Eipomek

²⁶ Na siuk erenulumopura, narye anggunti melipsiniba, amutuku noutam unamak Israel kilapu nirya ara, mi mun pum opyukliba, talye ton kum deliltakanamake. Tonda, amutuku noutam ara, youkwak kilapu ton kum unamake. Mapu teleb weik ubuka delinamake. Winibuka melipsinyopura, anggun kam un talak ati ara, keting tamun tonap, lo weik tonun arye arepsinyopura, keting tamun kam weik unamlume.

Keluaran 23:26 Referans Kwoze

Ulangan 7:14

“Aning ara, yuk mutuku im sirya, mutuku sirya nirya unyak ninye ara, mitik tonun aupmal bukni, anggun Israel ninye ara, weika arye arenamsile. Yuk mutuku nang aulye ning atonun kume. Sikda mitik tonun bukni, anggun Israel ninye ara, pia weike. Aning atonun, anggun kilapu nirya arye, mapu weik delinamake. You kilapu kum unamake. Sik ninye arya, mapu weik delinamake. Anggun weilulum kam ning ara, domba basam do, sapi basam do, kambing do, aning nirya, mi weika arye delinamake.”

Ayub 5:26

Allah arye milikilya deice arye, an babye ulaminya ani, pia wisi deipmince, nong mikip tuba unamlam karin aryuk, dipnamlame. Allah arye bico tenesilye ninye nirya babye, atonun unamabe. Winipmanto ara, wa wiamice bukni, pia wisiplyeura, lilamak tonun upnamabe. Elifas birye Ayub biti, ayupu nirya nyabuk.

Ulangan 28:4

Tonda, Allah arye teleb kipdeipsilyeura, anggun nong babye, teleb kipdeipsiliba, anggunce deipmunyeba, deipdanin banamak nang nirya ara, weik unamake. Tonda, tuku deice arye wibuka, koun ning yala-yala nirya ara, nonguk unamsile. Aning atouk, anggun kambing basam ap, domba basam ap, sapi basam ap, ura anggun weilulum ayam maka ap, yuk yala weilulum maka ap nirya babye, yamubuka arepsilyeura, weik unamsile.

Ayub 21:10

Tonda, sikce talibuka weinyak kam ning nirya ara, winipmanto sik yim sapi basam arye teleb aryuk mi deipdanin bakirye, mapu weik kipnin balule. Tonda, sik weinyak kil sapi basam arye, sik mi delin talak babye, ikin kum ulule. Sikce weinyak kil sapi basam nirya arye, teleb kibuka mapu weik delinyake. Dibin sapi basam mi delina pia kume.

Yesaya 65:20

Sik amutuku ukirye delinamak mapu nirya ara, mitik talak arye, like bitinye do, winilyeto kam unmaca ani, adiparyuk kum dibinamake. Pia kam unamake. Aning atonun, anggun wisi ninye ara, daulamunya ani, wisi deipmunce, minopce dipna kumce, pia daulamunya ani, wisi deipmunba, kul potong uk upnamsile. Wel tuba umunye talak ara, kum dibinamlume. Anyapmasina ara, urdem ati kum nyapsine. Amutuku noutam ara, keting tamun yupa weik, 100 tahun deice arye wisi akunum deiamikce nang ati, yuk nang arye, ‘Anang ara kam nanguk unyake,’ tenenamake. Ati, keting tamun yupa weik 100 tahun kum kipmalibuk, dipmantonye ton awamtu toura, yuk nang arye, ‘E, elda malye ulamlya dengna ati, Allah arye wenen ning el deice deipmala arye dipmale,’ tenenamake. Ara, Yerusalem winiryuk mutuku unamak ninye ara, keting tamun yupa pia weik kam uk unamaka ati nyapne.”

Mazmur 144:13

Tonda, an Allah arye melipsiminyeba, nun Israel yala nang nirya arye, wa wibibirye, kounyap ning, yuk-yuk ning nirya, kounamak ning nirya ara, pia nong weik tonun unamle’ tenen, morokinyabe. ‘Winipsiminyopura, nun lin ning pia weik tonun libibirye, aning yuk-yuk ning nirya bobuka, dokola deilina ati, weik aik pum noutamuk dongobibiba, anyaik nirya langdipnamle’ tenen, moropkiabe. Atonun, ‘Nunce weinyap ning, el si ara domba kil basam nirya arye, mapu yupa pia weik, beribu-ribu, mapu nukman kumto delinamak’ tenen, morokiabe.

Mazmur 107:38

Allah Yahweh arye, sik aninye ati melilamliba, sik mapu delina ati ara, weik tabakuka arepnin baliba, delinamake. Winipnin banamaka deice arye, sik mapu nirya, pia weik deipnin banamake. Tonda, sikce talibuka weinamak kam ning ayala-yala nirya babye, pia weik upnin banamle.

Kejadian 35:29

Daulamuka ani, sirya talak ara, dibukce, isin dakrobukba, el mapu Esau ap, Yakub ap arye, tuku lukuka, sik ni el nong weiprik. Isak dibuk talak ara, akunum pia wisi dayukce dibuk.

1 Tawarikh 23:1

Raja Daud akunum wisi dayuk talak ara, elce deiamuknye Salomo boyanuka, ‘Sik Israel yala ninye deiyoknye una ati punupnirye, Raja unamleʼ tenen, erepdeibuk.

Kejadian 25:8

Winibuka ulamuk bukni, pia wisi dayukura, dibuk. El dibuk talak ara, pia wisi akunum dayukce dibuk. Dibukopura, Allah arye Abraham el kanye dobuka, el apu yapu dam bobinuka deibuk.

Ayub 42:17

Ayub akunum wisi dayukce, mikip kum ubukopura, dibuk.

Mazmur 55:23

Na kayapu nang, anggun nirya ara, kekepnululume! Anggun ikin usulul ning nirya dobuka, nun ni Allah Yahweh, el deice deipnamlume! Winipmunyeura, bico tenepsilirye, el mikip deice arye, melibuka lyelonamsile. Pia dipkoprob nyapsine. Allah arye, ‘Aning ara, wininamlume, aning ara, pia kum wininamlume,’ nyabuka, yupu talibikirye, pia diksukum kibuka wininyak nang ara, pia kum bataknamsile. Elce melisilya deice arye, nunce elti, ‘Diba,’ tenenyap ning ara, min kum upsutue. Tuba diba tenenauk unamabe.

Mazmur 90:10

Nun kam una ati, keting tamun lo arepsulum ning ara, tujuhpuluh tahunuk (70) kipdeipsulume. Mikip arye unyap nang ara, keting tamun delapan puluh tahun (80) unyabe. Bukni, aunyab talak nirya ara, teleb ton kum unyabe. Kanye imun ning ap, uk din dina deiceuk, upnin balamipya ani, sirya talak ara, ance isin arepsulum ning ara, tamubuka dopropsiminyeura, dibinauk unyabe. Nunce tenenyaba ara, ‘Pia kamuk unamaba,’ tenenyap bukni, minopce dibinyabe.

Ulangan 4:40

Tonda namin asa arye umunce, Allah arye, ‘Aning ara, wininamlulume. Tonda aning ara, kum wininamlulume,’ nyabuka, el yupu nyapdeibukba, asum arye narye anggunti, peteresinye ning nirya ara, kekenamlulume. Ara, arup arye dipdongobuka, dorunamle talak nirya ara, Allah arye nyalul yupu, pia moubuka talibuka wininamlume. Aninguk winipmunyopura, aminyan talak nirya, anggun ap, anggunce deipmunyeba, deipdanin banalum ninye nirya babye, telebuk wininamlume. Tonda, winipmunyopura, Allah arye wini talak arepnamsil mutuku, binuka unamlum talak ara, keting tamun pia weik talibuka unamlume. Allah arye, ‘Aninye ara, amutuku pia talibuka unamak’ tenen, arepnamsile.” Musa birye, Israel ninye ati nyabuk.

Hosea 9:14

Nyabukopura, nabi Hosea birye, tamubuka nyabuk. “Se, na ni Allaho. Ati ara, sik Efraim yala nang nirya ati, ikin yata ning arenamlam do? Na Hosea birye, yata ning moroptiniba, ance aninguk areptum do? Winipmanto ara, sik wenena ati, sik kilapu nirya ati, akilapu ara, mi bona kumce, you un ninguk kipdeiptum do? Tonda, mapu deiptinga babye, sik nin yapu arye winiryuk mapu ati, moum yung cen ning areptum do? Ato ninguk areptumce weneptum do, kum do?’ tenen, nyabuka moropkine na nie,” nyabuka, nabi Hosea birye nyabuk.