Keluaran 13:22 - Eipomek

²² Sik balamik talak nirya ara, batakna kumce, keting noutam, sik balamik bisik, Allah arye weik dua areamukba, sik balamik bisikuk balamuk. Atonun, lukunyan nirya ara, weik uku buk arepnaba, sik ap balamik. Keting noutam babye, lukunyan babye, pia kum batakamuk.

Keluaran 13:22 Referans Kwoze

Wahyu 10:1

Aning nirya eipsopura, adiparyuk mikip weik ubuk malaikat, im deice tam arye koluka yanganmokak, eipse. El nong dana-dana nirya ara, dua kiprobukba, el kisok deice ara manu senamnya deibukba, eipse. Amalaikat el urasin ara, keting dirin weik ulul touk, dirin weik ubukba eipse. El yan ara, weik aik ayukumna iklamak atonun ubuk bukni, ining bi ubukba, eipse.

Keluaran 14:1

Israel ninye bisik biyik talak ara, Allah el si Yahweh arye Musa biti nyabuk.

Keluaran 14:19

Aning akunum nyabukopura, Israel ninye ban bisik menekuka balamuk malaikat, Allah arye dopreiamuk malaikat ara, memeprobuk. Allah el malaikat memeprobukce, Israel ninye banmeka aminyan tam kipromokba, sik menekuka banmek. Aning atonun, weik dua sik urasin tam menekuka balamuk ning ara, kisikdobukce sik aminyan tam kibuka banmok. Ati, Allah el malaikat ap, weik dua ap ara, Israel ninye sik aminyan tam yan talbalibuka tikrikce, banmeke. Winibukba, Israel ninye menekuka banmeke.

Bilangan 9:15

Ura, Allah el si eren aik, baju bol aik, akunum dobik sum arye dipdongobuka, dotalak nirya ara, weik dua yayukce, anyaik ikdeiamik deice tam nirya, yanuka singnilongolamuk. Allah nyalin yupu ara, anyaik noutamak deiamike. Atalak arye, dipdongobuka dotalak nirya ara, keting wekelbalamle talak arye dipdongobuka, beren tam talak nirya ara, pia ati anyaik deice ara, adua dem bukni, el urasin ara, weik uku dilamle touk, tikna arye, anyaik deice dilamuk.

Nehemia 9:12

Tonda, nun apu yapu arye, ‘Dan bisik binuyab do?’ tenen, ‘Sik kanye walwal uplyak’ tenen, sik melina ati, ance keting noutam talak ara, weik dua dopdeiamlumba, ayukumna yo atonun tikamukce, menekuka balamukba, sik aminyan tam balamik. Lukunyan talak ara, weik uku buk areamlumba, dirina weik akman bisikuk, nun apu yapu eibuka balamik.

Nehemia 9:19

Nun ni Allah, ance weik bico tenelamsulumce, winipsulum ati, nun apu yapu, mek kum ati, ninye kum ulamikak mutuku noutamak yangalamik talak ara, kum bataklamlume. Sik ti bico tenebuka tuba melilalume. Winilamluma ara, keting noutam balamik talak ara, weik dua ayukumna yo atonun ubuka, tikna arye, menekuka banmanabuk, aminyan dobolbalamik. Aning atonun, lukunyan talak ara, weik uku buk dirina uamukce, ayukumna yo atonun tikamuk. Adirina deice arye, sik binaman bisik eipna arye balamik. Malye ulamika babye, adua ap, auku buk ap, tuba tamubuka kum dopromlume.

Yesaya 4:5

Allah kanye arye ton ap, Yerusalem mutuku asik bukni, amutuku kon deice, Sion mutuku kon eitam, im noutam arye, mambul ning bitinye deipnamle. Ara, Sion mutuku dup yanuka bulubuka weknamak nang nirya, sik alip ara, Allah arye keting noutam talak, weik dua atonun kipdeipnamle. Lukunyan talak ara, uku sekiceba, tulum weleplirye, uku dilamalyak dirina ulamle touk, kibukaplirye, tulum ap, uku buk dirina ap, amutuku deice uplyeura, yanuka melinamle. El Allah mikip ap, teleb kina ap arye, weik dirina atonun uplyeba, amutuku deice arye erebuka ulirye, amutuku nang meliplyeba, sikda el amu tamuk unamake.

Keluaran 40:38

Ati ara, atalak Israel ninye balsusulamik talak nirya ara, keting noutam talak ara, Allah arye weik dua arebukba, anyaik deice tam tikamuk. Tonda, lukunyan noutamak ara, adua noutamak arye, weik uku buk dilamukce, dirina weik ulamuk. Aning nirya tuba ulamukba, Israel ninye nirya arye elilamik.