Yerusalem mutuku tamubuka biyukopura, Yosia birye sik amutuku ulamik ninye nirya ati nyabuk. “Anggun bulupmunce, nun ni koprop Allah, el si Yahweh, el si erena ati, Kaplina Kwalina el si Paskah kwalipnalume. Ara, nun apu yape, Mesir mutuku noutam arye, banuyik talak, Allah arye, sik winiryuk mapu kum obukce, sik aik kaplibuka bindomuka ati, Kaplina Kwalina nyalamap kwalina kwalipnamalume. Ara, tilila ati kume, Allah arye nunti, ‘Aning wininamlume, aning winipmunyopura, dipkoprob narye, kalikuka melinamsine,’ nyapdeipsukba, buku noutam sekeiamsikba, tuba nyasilye touk winipnalume,” Raja Yosia birye, aninye ati nyabuk.
Keluaran 12:14 - Eipomek14 Arup winipmanye ning ati, anggunce asum-asum pia teninamlume. Anggunce, ‘Asum ara, Allah el weik sum ulule’, tenebuka, oketeng tamun, oketeng tamun nirya, kwalina pia kwalinamlume. Ara na si Yahweh, na si erena ati, akwalina pia kum bataknamlume. Keting tamun nirya, kaplina kwalya ara, pia batakalongona kume, apia kwalipmunce, na si erepnin banamnulume. Allah el si Yahweh arye nyabuk. Gade chapit la |
Keluaran 12:14
29 Referans Kwoze
Ati anggunce, ‘Asum ara, mambul weik mambul sumʼ tenen, pia talipmunce, kintinilinamlume. Anggun ap, anggun mapu nirya ap, anggunce deipmunyeba, dadeipdanin bakirye unamak ninye babye, ‘Allah arye nyapdeipsuk ning ara, dipkoprob winipnamabe. Ara, ‘pia weik sumʼ tenen, anyapmasin atonun pia wininamlume.
Awala, asum babye, narye anggun Israel ninye aning-aning nirya lyepnirye, Mesir mutuku noutam arye dobuka, bobinamasina ati, oketeng tamun, oketeng tamun nirya ara, aning pia teninamlume. Omapnin banamlum talak nirya ara, Nena Kum Roti Kwalina ara, pia kum bataknamlume. Tenibuka kwalinauk, pia yunamlume. Anggun wininamlum ning ara, atam arye, dipdongobuka keting tamun, keting tamun nirya, kwalipnin banamluma atia.
Allah Yahweh arye, Musa ap, Harun ap ati nyabuk. “Kaplin Kwalina (Paskah) noutam wininamlum ning ara ani. “Domba basam obuka, Allah si erena ati, boyanmakirye, Kaplin Kwalina dam yanuka kwalipmunce, Allah ati arenamlum domba basam tup ara, yuk mutuku arye yanamak ninye asik nang ap nirya ara, abasam tup pia kum dinamake.
Se, nun ni koproba Yahweh, an mambul teleb si ara, pia ati aunamle. An si ara ninye arye tuba teninauk unamake. Diba, tukwak mutuku, im sirya, mutuku sirya nirya, noutam unyak nang arye anti, “Se, Allah Yahweh ara, pia mikip weik ulirye, mambul weik ninye arye, dopman kum pil dolulnye winilule,” nyabuka, yuk nang kekenak ati, laka nyanauk wininamake. Atalak arye dipdongobuka, dounamle talak nirya ara, pia nyanauk wininamake. Tukwak nang nirya arye, an si luba kum kinamkiake.
Allah Yahweh arye, ninye kanye talima noutam pil dolyeura, ninye nirya arye, elce kum ninye kum winipmanto pil dosinyaka nirya ara, tuba tenenauk unyake. Aning nirya ara, pia kum luba kinyake. Aning nirya ara, pia ati, aupnamle. Nun ni koproba Allah ara, aning-aning nirya talilulnye ati, el kanye aryuk, nun talye kankan nang nirya ati, weik arye bico tenesilirye, nun patasulul ning nirya tenesilirye, melisulule.
Ati, anggun ni koproba Allah Yahweh arye, elce kintinip deiamlyakuk, pia teleb kanye deibuka umunce, aning dinamlume. Ara, anggun ap, anggun mapu ap, anggun kilmapu ap, anggun pil don nang ap, kilapu ap, tonda anggun asik noutam unamak Lewi yala nang ap, yuk mutuku arye tikilyangan ninye asik nang ap, tonda yuwak kilapu ap, sik nin ap, sik ni ap akunum dibikba, batakik mapu ap, kwangnamne nang ap, anggun nirya ara, teleb kanye uk bobuka ulamunce, kil-kil asa arye neika unamlume.
Musa birye Israel nang ati, nyabuk. Abib wala dam akunum uplyopura, awala noutam arye, anggun ni koproba Allah Yahweh, el si erebuka kina ati, weik kaplina yuna kwalinamlume. Aning wininamluma deiyok ara, ani. Ara, minop talak awala deice ara, lukunyan kibuk talak noutam ara, Allah elce anggun Israel nang ti, Mesir mutuku ulamlumba, anggun min yuma mapu kum obuk bukni, Mesir mutuku noutam arye lyebukabsukce, anggun Kanaan mutuku yangana ati boyanamsuke. Ati ara, awala noutam ara, weik kaplina kwalinamlume.
Aminyan talak ara, Musa ap, Harun ap, Mesir mutuku deiyoknye, Firaun dam birikce nyaprik. “Nun Israel ninye, nun ni koproba Allah, el si Yahweh arye nyapmakil yupu nyapnuname. Ara, ‘Ance Israel nang ati, “Telebe,” nyapminba, ninye kum unyakak pata mutuku bikirye, na si erena ati, kwalina kwalibikirye, na si erenamniyake.’ Allah arye nyapdeibuke,” nyaprik.
Nena Kum Roti dipnuyik talak ara, Yesus arye aroti dobuka Allah ati, “Telebe,” nyabukopura aroti tobuka, el mapu ati bokuka arinmokce ayupu nyanmok. “Anggun lyena ati na nong arepnamne touk, aroti ara, na nong atonun ati arepsine. Dobuka diplulume. Anyaripmasin roti ara, ‘Na nong tenebuka dinamlum’ tenen, arepmasina ati, dobuka diplulume,” nyabuk.
Aninye deiyoknye, el kisok deice kaluna ati, kalupdeipnamlum ning, el si mahkotaʼ ara, na Allah, si eren aik pum tamuk, pia ati deipnamake. Aning anyaik pum tam deiamikiba, ninye nirya eibicopura, adiparyuk, sik Heldai ap, Tobia ap, Yedaya ap, adekna weik ning areamik nang ati, tuba teninauk unamake. Aning atouk, ninye deiyoknye Yosia birye, talima namin una deice arye, teleb unamle ning ati, tuba bikinamake.
Aninguk kum bukni, yuk ning ara, asum-asum nirya beren tam talak ara, gandum dua kilogram boyanuka arelyanganamnulule. Tonda minyak zaitun mek tonok liter ara, arup talak kintinibuka, gandum teikice ning ‘Mitik tonun moul ap uptueʼ tenen, agandum ap, minyak ap, arenamnulume. Aning ara, asum-asum nirya, beren tam talak ara, pia na Allah Yahweh ati, winibuka arenamninyake. Awinipnamak ning ara, pia awinipnin balamikca ani, pia wininamaka ati nyapsine.
Daud birye, anyabuk deice, “Dipkoprop diksukum ning ara, aninguk wininamabe,” nyabuka, laka nyabuk. Nyabukba, sik Israel ninye ara, aninguk winipra yangalamik ani, wini talak babye, tuba wininyake. Ara, ‘Sik mal olan nang, olbana nang babye, sik aik ap, sik bon-bona ap, mining dam anyuk kalikna nang babye, sik dekna ning atonun, dolona telebe,’ tenebik. Deiyok ara, Daud birye, ‘Aning ara, pia wininamabe,’ nyapdeibuka anya arye, sik Israel nang arye, atalak arye dipdongobuka, wini talak babye, aninguk wininyake. Yuk nang obisibikirye, bon-bona doprobikirye, aning nirya bokuka, neikto touk dolonyake.
‘Allah el si Yahweh arye, nyamuk yupu libupu marikna, Peti Perjanjian boyangalamik nang arye, Yordan mek duk-duk noutamak yanuka tikikba, Yordan mek nirya sekukabukce, mikdobukba, eitam kin, outam kin kibukba, anoutam arye dopromubu keil ara, atia,’ nyabuka, laka nyanamlulume. Akeil ara, asukumuk pia aupnamle. Doyanamle talak noutam nirya ara, Israel ninye, akeil eibikirye, atalak narye melipsiba, winibuk ning ati, tuba tenenamake,” Allah arye nyabuk.
Allah Yahweh arye Harun biti, “Aning ara, batakna kume. Pia tenenamlyame,” nyapdeibuk. Anyapdeibuk ning ara, ani. “Na Allah, na si erena ati, arena pia teleb ning kintinibuka, arelyanganamniyak ning nirya ara, an Harun ap, an mapu ap arye, dobuka, uku dongopnamlum ning nirya ara, narye an ap, an mapu ap ati, akunum kintinip deipsise. Ati ara, atalak arye dipdongobuka, doyanamle talak nirya babye, aninguk dolonamlume. Ara, an ap, ance deipminba, dadeipdanin banamlum nang nirya ap ara, atouk wininamlulume. Narye akunum arepsina anya arye, aning ara, pia anggun tenen ninguk unamle.
Amoupdeibik ning ara, Israel ninye eibikirye, asum Allah arye, Korah yala nang ati wenebukce, tuku likdobukba, tuku pum bisik biyikce, diplamik nang unyakak sukum biyik ning ap, Allah arye uku dopkwetebukba, Korah tam nang nirya dibuk ning ap, tuba tamubuka tenebikce, bikik. ‘Ara, emas teikuka, mitik pala kibukba, amesba deice deibik ning eibikce, bikinamakʼ tenen, bikilina ati, aning kintinipdeibik. Tonda, Harun tam nanguk, Allah dam yakirye, siltong teleb nyan ning ati, arepnamting bukni, Harun yala kum nang arye, yuk ninye yala-yala nirya ara, apil pia kum dopnamtinge. ‘Aning babye biknamakʼ tenen, aning kintinip deibik. Ura, yuk yala ninye nirya ara, ‘Allah el si erena ati, uku ap, siltong teleb nyan ning ap, el dam yanuka areptibye,ʼ tenebikce nang ara, asum winibuk ning tuba tamubuka tenibikcopura, ‘Ilil weik upnamleʼ tenen, bikilin ning deibik. Yuk yala ninye arye, malye kibikirye arebikcopura, Korah ap, el melin nang ap, obuka kum daneibuk touk, unamake. Ayupu nirya ara, Allah Yahweh arye, Musa el kekenak nyapdeibukba, elce Eleasar biti, binuka ayupu nyabukba, kekebukce, anyapdeipmok touk, ubuka pil dobuk.
Pong-pong ana el si terompet, atalak nirya nyanamak nang ara, talye nang arye kum nyanamak bukni, Harun el mapu dem aryuk, pong-pong anamake. Ara anang ara, Allah aik pum tam pil dona deiyok nang unyaka anya arye, sikcuk nyanamake. Aning nyapmasina ara, wini talak arye, dipdongobuka doryanamle talak noutamak nirya, anggun ap, anggunce deipmunba, dadeipdanin banamak ninye babye, atonun wininamake. Pia kum bataknamake.
Ayupu ton nyabuk. Anggunce tanggal sepuluh kiplye sum arye, domba do, kambing do, nong pia teleb ning tonok wibuka, kintinibuka weilamunya ani, awala noutam tanggal empat belas (14) akunum uplyopura, opnamlulume. Ara, asum ipnulya ati, keting okumul binulye talak akunum uplyopura, ara jam pamubarye atonun, Israel ninye nirya, sik aik yuk-yuk aulamak touk, adiparyuk domba do, kambing do, yim ning tonok opnamlulume.
Wala tonoknye, el si ara Abib ati, “Wala si Abib noutam arye asum, atanggal deice arye, weik sum kipnamnulume,” nyapdeiamse touk, uplyopura, anggunce, ‘E Nena Kum Roti Kwaning, dina sum ara kunum aupmale,’ tenepmumce, na si erenamnulume. Atalak ara, narye anggun ati nyapdeipsisi touk, Abib wala noutam like tekbarye sum ara, anggunce nena deiyok ning, el si ragi, tabakuka dapmace roti kum dinamlume. Anggunce dinamlum ning ara, nena kum roti dapmunce, tekbarye sum arye, anena kum roti kwaninguk dinamlume. Deiyok ara, Abib wala noutam aryuk, anggun Mesir mutuku ulamluma batakuka, yanamluma ati, aning ara tuba tenipmunce, wininamlume. Tonda, asum atanggal deice arye, yanabuka na si erenamnulum talak ara, asum-asum nirya, na telebe nyana ati, na aik yanganamlum talak ara, taruk banang yangana kume. Anggun wa wibuka koumunce, limunye ning noutam ara, teleb arin ning bobuka, na si erena ati, na aik yanuka arelyanganamnulume.
Na Allah ap, ninye ap, neika una ati, kintinipnamlum aik noutam bukni, narye Musa biti, “Aning ara, wininamlulume, aning ara, pia kum wininamlulume,” nyapsiba, Musa birye, kil bitinye deice seksiba, ayupu libuka boyanamuk marikna, el si Peti Perjanjian pum tam deipnamle aik, Pia Teleb Lek Aik nyanyap ati ara, anyaik wilina ati, lapkwetepnamlam cang kain, gorden bai tam atonun upnamle ara, lampu weisa delinamlulume. Alampu upna kalikin nang ara, Harun ap, el mapu ap, sikcuk, ‘Aupna tangaplyakʼ tenen, sikcuk sintam arye dipdongobuka kalikuka, pil donmakcebuk, beren tam kinamle. Atalak noutam nirya ara, anyaik deipnamle upna, pia lana uk unamlulume. Aupna pia lapliba, na Allah Yahweh arye, aupna lapliba, pia dinamne. Narye aupna ati, lak nyapnamkin yupu ara, pia kum bataknamlyame. Ati, atalak arye dukdongobuka, dounalam keting tamun noutam nirya ara, Israel ninye arye, apil pia donamake. Ara, Harun birye deipliba, deipdanin banamak ninye nirya babye, nyapse touk pia ati wininamnyake. Allah arye Musa biti laknyabuk.
Na Allah arye, “Aning wininamlume. Aning ara, pia kum wininamlume,” nyabuka, nyapdeipsin yupu nirya ara, anggun Israel ninye koproba babye, yuk mutuku arye yanuka, anggun ap neika ululum ninye asik nang babye, anggun nirya anyapdeipmasin yupu uk, talibuka unamlume. ‘Nun yuk, sik ninye asik nang yuk unamak,’ tenena meme. Ara, na Allah arye, anggun nirya ati, ‘Na mapu unamake,’ tenesunune. Ati, na si erena ati arenamnulum ning ara, anggun nirya ara, narye nyapdeipsise yupu atonunuk, talibuka pia ati unamlume.
Piblisite