Ura, Allah arye el yupu uk nyabukce, adiparyuk aning-aning yala-yala nirya kwepdeibuk. Ara, nun asing arye elinyap ning nirya memebuka delina ning ati ara, asing eipmanto ning dobuka, aning deice arye kum kwepdeibuk. Aning kum bukni, el yupu nyabuka mikip diparyuk, aning-aning nirya kwepdeibukba, anyapmok touk kikliman kibuk. Aning nirya ara, diba tenenyaba deice arye, kekebuka kel kinyabe.
Kejadian 1:1 - Eipomek1 Aning-aning nirya kum uamuk talak ara, Allah arye im ap, tuku ap kwepdeibuk. Gade chapit la |
Kejadian 1:1
67 Referans Kwoze
Na Allah Yahweh arye nyapsine. “Allah naryuk im babye, im deice ulul ning babye kwepdeipse. Nara Allah tonok unune. Winipsirye, tukwak kwepdeipsiba pia darabuka abukuk. Atukwak mutuku, mutuku-mutuku nirya kwepdeipsa ara, ‘Talya urdemuk aunamle’ tenen, kum kwepdeipse. Aning kum bukni, ‘Aning-aning ayala-yala nirya unamle’ tenen, kwepdeipse. Winipsinye bira, Allah na tonok unune. Yuknye ton kum ulule nyapne.
“Se, nun ni Allah, anda nun Weik Deiyoknye usilyame. Aning-aning nirya ara, ance, ‘Winibuka, winibuka kwepdeibuka deipnamne,’ tenyamlum touk, adiparyuk kwepdeiamlumba, aning nirya ulule. Aning ati ara, an tonok ara pia telebuk ulyame. Telebe nyana yupu ap, si erena yupu ap, si kina ning ap, mikip kilina yupu ap, anirya ara, an deiceuk delinyabe. Ancuk aning nirya talibuka pia unamlame.” Sik 24 wisi deiyok nang arye Allah ati nyanyake. Na Yohanes arye nyapsine.
Nara Allah na si Yahweh unune. Narye nyapkine. Im ap, im noutamak ulul ning ap, im deice ap nirya ara, naryuk kwepdeipse. Tonda, naryuk, tukwak im sirya, mutuku sirya nirya ap, tukwak mutuku ulul ning ap, tuku deice arye butukuka palamle ning aning-aning nirya ara, narye kwepdeipse. Na aryuk tukwak ninye ara, anggun isin aresunune. Areneba kam unyake. Tonda, anggun dib kanye babye, naryuk anggun talima noutam dongosunune.
“Na Allah arye nyapne. Na sum deice pil kum donamluma deiyok ara ani. Ara, like nakub barye sum deice arye, narye im ap, tuku ap, laut mekwen ap, aning noutamak ulamle ning ayala-yala nirya ap kwepdeipse. Winipsa ati, like tekbarye sum ara, na dikdik semse. Winipsa ati ara, Na Yahweh arye asum ati, teleb kipdeipsirye, ‘Asum ara ‘Naʼ tenen, weik mambul sum,’ nyabuka asum wibuka yuk deipse,” Allah el si Yahweh arye nyabuk.
Ayub anda, tukwak mutuku, im sirya, mutuku sirya ap, tuku amu tam yangan keil ap nirya, kwelinmase talak ara, an asing koproba arye dinmalum do? Atalak ara, an dan mutuku ulamlum do? Ara, mutuku kwepdeipnuse ati, mutuku yangan keil deiyok koubuka deipsak ara, akunum kel bikaminyopura, laka nyapnamanilyame.
Aning-aning nirya kweipdeibuk talak arye dipdongobuka, wini talak babye, aning nirya atouk ulule.” Ayupu nyabuka nalibuka nyamsiake. ‘Ayupu ara, tilila yupu’ tenen, akunum kel kinyak bukni, sikce, ‘Aning kum tenepnuyap’ tenen, talye lubakinyake. Sikce, ‘Ayupu ara kum tenepnuyap’ tenen, lubakinyak ning ara nyapnusine. Ara, Allah arye, “Winipnamle,” nyabuka, el yupu nyabuk deice arye, im ap, im noutam ulul ning nirya ap kwepdeibuk. Tonda, tukwak mutuku ap, tukwak ulul ning nirya ap ara, mek dobuka dobukce, mekwen noutamak danerye, “Aning-aning nirya dalyame,” nyabukura, atouk kwepdeibuk.
Tonda, sik Israel ninye arye, nyabik. Yahweh an tonok ara, dipkoprob Allah ulyame. Yuk ton kum ulule. Ancuk im deice kwepdeiplume. Ancuk im deice ulul ning kurya ap, wala ap, keting ap, aning-aning nirya kwepdeiplume. Tonda, laut mekwen ap, laut mekwen noutamak ulul ning ap, tukwak mutuku ap, tukwak mutuku noutamak ulul ning ap, nirya ara, ancuk kwepdeiplume. Winiplumce, aning-aning nirya kam una ati, isin areplumce, meliminba, tuba kam unyake. Ati ara, im deice yin talibuka unyak malaikat nirya arye, an si erena ati, kisok kanupdongobuka si erekinyake.
Ura, na Allah Yahweh arye, anggun nin yapu min kum deiamsik talak arye, mun pum tam tuba ulamlum talak, kintinip deibuka wiamsise. Winyamsisa ati, tuba melisunune. Nara, anggun Lyena Deiyoknye usunune. Na Allah Yahweh arye aning-aning nirya kwepdeiamse. Winilamsirye, naryuk im deice ulul ning nirya kwepdeibuka lilipdeiamse. Aning atonun, naryuk tukwak mutuku noutam ulul ning nirya babye, kwepdeibuka lilipdeiamse. Yuk nang arye ton kum meliamnike. Na aryuk apil dolamse.
Na nio, anda Allah Yahweh, aning-aning nirya talibuka, deice tam erebuka, pia mikip weik ulyama ati, an tenelalam touk, adiparyuk winilyame. Ati, Allah an mikip weik taruk deice arye, im noutam ap, mutuku sirya, im sirya nirya ap, kwepdeiplume. Yata ning nirya do, tonok ning babye, an ikin upkiliba, kum winipmanto ning ton, pia kum ukulule. Anda, pia mikip weik ulyamnye biti, aning-aning nirya ara, kanam aryuk pil dopra ulyame.
Allah Yahweh, el mikip weik deice arye, atukwak mutuku nirya kwepdeibuk. Allah el kel weik deice arye, atukwak mutuku ara, urasin teleb kibuka kwepdeibukba, asukumuk aulule. Tonda, el kel weik ap, aning-aning nirya nong noutam kel bikilula deice aryuk, im tam ton kwepdebukce, amsuna kitcamikca yokuka tokolilamak touk, pala kipdeibuk.
Ara, talye ati kume. Deiyok ara, Allah elce, “Aning-aning nirya, wini talak winipnule,” nyabukba, adiparyuk, aning-aning nirya anyapmok touk, kikliman kibuk. Aning atonun, elce ayupu nyabuk talak aryuk, aning-aning nirya, lakak kibukce, pia darabuka winilule. El yupu nyabuka, deice aniryuk, aning ayala-ayala nirya, kwepdeibukba, lakak kibuk.
Amalaikat weik yupu deice arye ayupu nyanmokba kekepse. “Allah arye ninye mutuku-mutuku nirya ati, yupu lipsisikuka bokeipsilirye, wenepnamsil talak ara, akunum dam upmasila ati, anggun nirya arye Allah ati ilil asa unamlulume. Ilil upsiliba, Allah ati, ‘Se, anda pia teleb ulyame,’ nyabuka, elti, si erenamlulume. Yata ning do nirya, im noutamak ap, tukwak mutuku ap, laut mekwen ap, balamle mek nirya ap, aning-aning nirya kwepdeibuknye, Allah ati, anggun nirya arye el siuk erepnamlulume,” nyapra banmokce, amalaikat lakuka banmokba, na Yohanes arye eipse.
“Anggun awininmalum ara, yata ati do? Nunda talye ulamak ninye atonun unyame. Nun talye tukwak nanguk unyame. Nunce anggunti, ‘Yesus arye ninye lyesulule,’ nyabuka, Yesus el laka teleb yupu boyanmasiname. Anggun amutuku ninye, talye ning si eremunya ara, batakmunce, donga ibuka, ‘Allah dipkoprop ululnye si erenamluma’ tenen, nyapsiname. Allah dipkoprop, elce im tam ap, tuku tam ap, laut mekwen ap, aulye ning noutamak ulul ning nirya ap, kwepdeibuknye bira, el uka. Ati, el siuk erenamlulume.”
Atonun, elce aning-aning nirya kel weik bikilula deice arye, im ap, im tam ulul ning yuk-yuk ning nirya babye, elcuk kwepdeibuke. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk si erebuka kina ati, ‘Naio nunce anti pia telebe,’ nyabuka nyanamabe.
Allah el mikip weik deice arye, tukwak mutuku nirya kwepdeibuk. Allah el weik kel deice arye, tukwak mutuku ara, urasin teleb kipdeibuk. Tonda, el weik kel deice arye, tukwak mutuku nirya, teleb kipdeibukce, asukum kat kipdeibukba, asukumuk unamle. Kum long-long apnamle. Tonda, Allah arye, weik deiyok ning noutam nirya, weik kel bikamuknye birye, im alip tam ap, im noutam ulye ning nirya ap, kintinibuka, teleb kipdeibuk.
Sik dib tenena kum ninye ara, wininyak bukni, nun dib tenenyap nang ara, nun kele. Nun Ni Koprop Allah, el tonok ulule. Yuk ton pia kume. Elda Kam Una Deiyoknye ulula anya arye, el deice aryuk aning-aning nirya kintinipdeiamsuke. Winipsuka ati ara nunce, ‘Nun kam unyaba ara, Allah el si erena ap, el piluk dona ap ati, wininamabe’ tenen, unyabe. Aning atonun, nun Weik Ninye Deiyoknye tonokuk ulule. Elda, Yesus Kristus ulule. Allah arye nyabukba, Yesus pil dobuka deice arye, aning-aning nirya kintinibuka deiamsuke. Tonda, Yesus el pil dopsuka deice aniryuk, lyepdeipsuka ati, el mikip deice aryuk kam unyabe.
Ance, ‘Wininamake,’ tenelamlum touk, milo mapu babye, mitik ton akunum nepnin banyak mapu babye, anti, “Se, nun ni Allah elda pia telebuk ulule,” nyabuka, an si erekinyake. An siuk erekinyaka ara, talye ati kume. Ara, malye weik unyak ninye nirya, amitik mapu arye an si erekinyakba, kibicopura, yupu kum nyapmanto unyake. Ara, malye wininyak ninye arye, ‘Allah nun like’ tenen, yanikinyak ninye ap, an olana atonun unyak ninye ap, tonda, ‘Allah arye wenesulula ati ara, nunce kwang dakna ati, el ulul ning ara, malye kilinamabe’ tenen, unyak ninye ap nirya ara, yupu nyapmanto kum unamake.
Ati ara, na ni Allah, narye anti, nyabuka moropkine. Na kam tuba unamanye talak aryuk, ‘Kam una deiyok ning min kum dopropneminyeura, adiparyuk kum dipnamne’ tenen, moropkine na nio. ‘Tuba kam uptinye’ tenen, moropkine. Na ni Allah, anda pia kum dipnalame. Tuba-tuba dounamle talak nirya ara, kamuk unalame. Pia kum dipnalama atia.
Winilamuk bukni, wini talak ara nun sirya talak unyaba noutamak ara, Allah arye nunti, el Mi Kopropa deice arye, nyasulule. Allah arye el Mi Kopropa ati, ‘Aning-aning nirya dobuka arepniba, weik ninye deiyoknye ulirye, aning nirya pia talinamle’ tenen, wibuka deibuk. Tonda, Allah arye im ap, tukwak mutuku ap, aning-aning nirya ap, elce nyapdeibukba, el Mi Kopropa pil dobuka deice arye kintinipdeiyamuk.
Ayupu ara talye ati kum nyapsine. Allah Yahweh arye, ‘Wininamne, wininamne,’ tenebuka, winilul ning nirya ara, minop talak arye, ‘Aning ara winipnamne,’ tenyamuk touk, aning-aning nirya kwepdeibuk ati, aning nirya telebuk ulule. Ara, malye ubuka unyak nang arye wininamak ning babye, Allah arye, ‘Winibuka malye upnin banamake’ tenen, akunum kintinibuka tenelamuk bukni, aminyan sirya talak ara, Allah arye amalye unyak ninye ati, wenebuka oplirye, uku dilye mutuku dopkwetepnamle.
Anggunda yata ati bita kel kum kilulum do? Anggunda yata ati kum kekeplum do? Anggunda yata ati walwal asa ululum do? Nara Allah, na si Yahweh unune. Nara Kam Pia unune. Minop talak arye dipdongobuka, doryanamle talak ara, pia aunamne. Mutuku sirya ap, im sirya ap, anoutamak mutuku nirya kwepdeipsa deiyoknye bira, na uka. Nara Allah ara mikip kum upniliba dikdik sena ton kumnye unune. Weik mambul pil donun bukni, ikin kum upnutuba, dikdik kum senune. Tonda, narye weik mambul ning nong noutam ning nirya akunum kel kiamse ning nirya ara, talye tukwak ninye nirya arye, pia dipkoprob kum teneptinge. Tonda na kel kipse ning sik ton bita kel kum biktinge.
Se, nun ni Allah Yahweh, ance pil dolyam ning aning-aning nirya ara, pia weik awinilyam ning ara, ninye arye kum nuktibye. Anda dipkoprob weik kel bikna deice arye, aning-aning nirya kwepdeiamsulume. Winibuka winipsulumba, tukwak mutuku noutamak nirya, ance kwepdeiamsulum ning, ayala-yala nirya weik aulule.
Ninye mutuku-mutuku nirya arye, sik bidamang taruk arye, puturubuka delilamak ning memepdeibikirye, ‘Nun ni ani,’ tenen, aning talibuka, elti, si erenyake. Tukwak mutuku talibuka, si erenyak isa mer nirya ara, talye aulul ning, urasin atonun, ubuka deibikirye, si erenyake. Bukni, nun ni koprop Allah Yahweh arye, im deice ulul ning nirya kwepdeiamuke.
El taruk erebukce, ayupu mikip arye nyabuk. “Wini talak arye dipdongobuka, aminyan doryanamle talak noutamak, pia kamuk unamlanye bira, im deice tam ap, im noutamak ap, tukwak mutuku ap, laut mekwen nirya ap, ura, aning-aning nirya noutamak ulul ning, aning-aning nirya ap, kwepdeiamuka deiyoknye, el si deice arye ayupu nyapsine. ‘Lo pia awamsilya ani, aminyan talakuk sirya daknamsila’ tenena pia meme.
Aning ara talye kum nyapne. Deiyok ara ani. Allah arye aning-aning nirya kwepdeiamukba, ulul ning nirya ara, Allah el mikip deice aniryuk tuba teleb ulule. Tonda, sirya talak ara, elcuk aning-aning nirya deice tam erebuka ulirye, aning nirya talinamle. Aning nirya ara, el ninguk unamle. Aning ati ara, ‘Ninye im sirya, mutuku sirya nirya arye el siuk erebikirye, Allah ati, “Elda pia telebuk ulule,” nyabuka nyanamak’ tenen, Allah moronune. ‘Dipkoprop anyapman touk pia aunamle’ tenen, Amin nyapne.
Na Allah arye, ‘Na yupu arepniba kekeplirye, lak nyalbinamleʼ tenen, an Yesaya biti, na yupu dobuka an si pum akunum dongopkise. Tonda, narye anti, tuba kalikinauk ukunune. Winipmanto ara, na taruk pum tam ulyama anya arye, yata ning do nirya anti kum yanuka opkutue. Na Allah ara, im deice tam uamlye ning nirya babye, akunum bibikuka deiamse. Aning atonun, naryuk tukwak mutuku amu tam barina ati, teleb kipdeipsiba, tuba aupnamle. Wininuna ati ara, narye Sion mutuku unyak nang ati, nyapsine. “Anggunda, na mapu koprop, ‘Naʼ tenen, nang ululume,” nyapsine.
“Se, Nun ni Allah Yahweh, anda aning-aning nirya deice tam erebuka umince, pia mikip weiknye uminye birye, im deice yin talin malaikat nirya ara, sik deiyoknye ulyame. Nun Israel nang nirya ara, Allah an mapu ubirye, an siuk erekinyabe. Tonda, na nie, anda Peti Perjanjian bublan deice malaikat urasin atonun ning, el si Kerub, bitinye puturubuka deibubak, deice tam ara, bukmince tuba asukumuk ulyame. Nun ni Allah, an tonok aryuk erebuka uminyeba, atukwak mutuku ninye deiyok kibuka talinyak nang nirya ara, an amu tamuk unyake. Allah ance im ap, tukwak ap wepdeiplumce talilyame. Mutuku sirya im sirya nirya talinyaka deiyok nang ara, an amu tamuk unyake. An tonok ulyame.
Nun ni Allah, el si Yahweh arye, yata ning do nirya, im deice ulye ning nirya ap, tukak mutuku ulye ning nirya ara, elcuk kwepdeiamuk deiyoknye ulule. Allah Yahweh arye, el si erenyak ninye nirya ati, ‘Teleb kipdeipsilirye, pia telebuk wininamlum’ tenen, Allah moronamabe. Ara, el si deiamuk mutuku, weik mambul mutuku si, Sion mutuku noutamak arye, ‘Pia teleb kipdeipnamsil’ tenen, Allah moronyabe.
Na Yohanes arye ayupu seksene. Ara aning-aning nirya kum uamuk talak, Allah el Kam una Yupu dobuka yanamuknye, Yesus ulamuk. Im deice ei ulamuka ani, tukwak mutuku yayuk talak ara, aulamukce, yupu nyalamukbuk, kekelamubu ning ap, nun asing arye elilamubu ning ap eibuka, nun taruk arye talilamubu ning ap ara, aning-aning nirya ara, anggunti laka nyabuka peterenyabe. Apeterenyaba ara, Kam Una Deiyoknye, Yesus, elti, nyasinyabe.
Wini talak ara, anggunce im deice erebuka dipdemunce, moubuka tenepnululume. Moubuka tenepmunce kel biknamlulume! Yatanye birye keting ap, wala ap, kurya nirya ap kwepdeibukba, im deice ulul do? Im deice ulul ning nirya kwepdeibuknye, elcuk kurya ap, keting ap, wala ap, im deice ulul ning nirya ap ara, kwepdeibukce, sik tonok-tonok, si yuk-yuk arebukce, sik si yuk-yuk sisibuka yukulule. Kurya im deice ulul ning yupa nirya ara, kum nukmanto ulule. Bukni, Allah na si Yahweh ara, na mikip weik deice arye aning nirya talibuka ununa anya arye, tonok ning babye kume, kum datue. Aning nirya tuba awamlye touk, pia unamle.
Bukni ance nun ap, yuk talye kam ulul ning ayala-yala nirya ap ati, ‘Mapu deibikiba, kam unamaka,’ tenepsimince, isin tuba arepsiminye talak ara, mapu ton deibibyeba, kam unamake. Ance kam una deiyok ning arepsiminye deice arye, talye kam ulul ning do, ninye do, mapu deibibyeba, dadeipdanin, banamak mapu ap, kam ulul ning deipdanin banamak mapu ap arye, tukwak mutuku-mutuku nirya binuka unamake. ‘Winibuka-winibuka,’ tenesiminya deice arye, tukwak mutuku nirya teleb ulisilyame.
Ninye mutuku sirya im sirya nirya arye, sik taruk deice arye puturubuka deibikirye, ‘Nun ni koprop ara aniʼ tenen, aninguk talibuka, elti, si erenyake. El si erenyak ning ara, tukwak mutuku noutam talibuka ukirye, isa si erenyak ning nirya ara, talye ninguk ulula ati ara, apil tonok babye pia kum doptinge. Bukni, nun ni koproba Allah Yahweh ara, mikip weik ululnye, elcuk im tam ulul ning nirya kwepdeiamuk.
Allah arye nyapnuke yupu ara, ani. “Winira na tenyamse pil nirya ara, akunum sirya dakne. Aning-aning nirya min kum uamuk talak, na akunum ulamse ati, nara deiyok kouna deiyoknye ununa ati, na si ton Alpa nyaninyake. Tonda, aning-aning nirya kum danamle talak babye, nauk ara, pia kam unamna ati, na si ton Omega nyaninyake. Na si ton, Deiyok Kouna Deiyoknye ap, tonda, Sirya Dakna Deiyoknye ap nyaninyake. Yata ninye do nirya, mek pataplyopura, narye sikti, Pia Kam Una Mek kwebuka urdem arenamsine. Ara pia kam una deiyok mek pu arye, kam una mek kwebuka urdem arenamsine. Amek ara kum dekenamake.”
Tonda, Allah arye, tenepnuke. ‘Paulus bira, na yupu laka nyabuka peterenamle,’ tenepnuke. Aning ara, ani. ‘Ninye nirya moubuka kekenamak’ tenen, Allah arye, ninye lyena ati, bico tenepsilirye, el kanye aryuk pil donamsil ning ara, ‘Paulus bira, “Allah arye, winibuka, winibuka wininamsile,” nyabuka, peterenamle’ tenen, wipdeipnuke. Allah arye, aning-aning nirya kwepdeiyamuk deiyoknye birye, ninye lyena ati tenyamsuk ning ara, dungnyamukce el demuk kel bikamuk. Aning nirya duknyamuk bukni, Allah arye nati, ‘Aning laka nyapnyopura, Paulus kekeplirye, aninye nirya ati laka nyabuka peterelbinamle’ tenen, wipdeipnuke. Na Paulus arye, nyapsine.
Sik talye tukwak nang ati, ilil kibuka ululum nang ara, nara, Allah Yahweh arye, anggun nirya kwepdeipsisopura, akunum lubakipnulume. Tonda, naryuk im deice tam wamlye ning nirya babye, bibikuka deipsirye memepdeipse. Tonda, tukwak mutuku amu tam deiyok ning babye, naryuk kwepdeipsirye tikipsinye, Allah ati akunum lubakipnulume. Lubakipnuluma deice arye, anggunda yata ning deiyok ati, asum-asum nirya ara, ‘Anggun opnuyapʼ tenen, kintinibuka deibikirye, yu weik arye olyanganamsiyak nang ati, ilil usulul do? Bukni, moubuka tenipdelulume! Dipkoprop, sik yu weik unyak nang arye, anggunti akunum olyanamsiyak do? Anang ara, dan sukum unyak do? Kume, anang arye, wini talak kum olyasitingce, min kum, kum kipdeipnamsiyake.
Ninye Mi Koprop Atonunye birye nyapnuke. “Yohanes, ance Laodikia mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara, ani.” Ayupu nyapsinye bira, na tenene ning nirya nong akunum upnamla ati, ‘Amin,’ nyananye unune. Nara, batakna pia kum diparyuk, Allah el yupu tuba dipkoprop nyanune. Allah arye kwepdeibuk ning nirya ara, na talinirye, weik deiyoknye unune.
Atonun, im noutam uamuk dua nirya ara, im noutam uamuk ning nirya leleipdongamuk bukni, Allah el isin arye pubuka deice arye, adua nirya kipdobukce, im yoka diamuk ulule. Tonda, Allah el mikip weik taruk arye, weik laut mekwen pum tam ulamuk yu kwatima, el si ara Naga babye, talibuka obukce, kum kipdeibuk.
Yesus arye, ayupu nirya nyabukopura, el li Allah ati moronmaka deice arye ayupu nyabuk. “Naie, anda im deice ap, tukwak mutuku nirya ap, talyamlumce, aning nirya deice tam weik deiyoknye ulyama ati, narye anti, ‘Telebe,’ nyabuka an si erepkine. Tonda, an nyasiminye yupu noutamak ning ara, kel bikna kanam nang ap, weik kel nang ap ati, deiyok dunulul bukni, mitik mapu atonun unyakce, talima mitang arye unyak nang ati, deiyok noutamak ning ara laka kibuka laka nyasilyame.
Tonda, im tam ap, im noutam ulul ning babye, yatanye birye, el mikip weik taruk deice arye kwepdeibukba, aning nirya aubuk do? Tonda, yata tonye, elcuk tukwak noutam bukni, weik laut mekwen kwepdeibukba, mek kait ara, welebina, koulukuka binapna kiptuba, anye birye, aning nirya yaniptuba, kum uptu do? Aning nirya ara Allah elcuka!
Anggunda yata ati bita kel kum kilulum do? Anggunda yata ati kum kekeplum do? Aning-aning nirya deiyok kouna talak arye, yuk nang arye kum laka nyapmasikba, pia kum kekeplum do? Allah arye, tukwak mutuku ap, tukwak mutuku ulul ning ap, deiyok koubuka kintinip deiamuk talak arye, aning moubuka bita kel kum kiamlum do?
Asurat tukwak binuka deibukce, Hizkia birye Allah el si Yahweh ati morobukce nyabuk. Na ni Allah an si Yahweh, anda Israel nang pia melibuka kalikisilyame. An dirina ara, an si eren aik pum tam ulule. Minop arye, memepdeibik ning, malaikat urasin atonun deibik ning dana-dana tam tikrikce, sik pol anoutam ara, an aulyame. Anda aning-aning deice tam umince aning nirya talilyame. Ninye tukwak nang arye, amutuku-amutuku weik talinyakce, weik deiyok unyak bukni, dipkoprob ara, ancuk amutuku nirya ap, adeiyok nang nirya ap, deice tam umince talilyame. Weik mikip weiknye bira an tonoka. Na ni Allah ancuk im ap, im deice ap, tukwak ap, kwepdeiplumce, weik deiyoknye ulyame.
Nyabukopura, Huram birye ninye deiyoknye Raja Salomo biti surat seken ning sekuka kintinibukce, Salomo dam tamubuka deibuk. Huram birye tamubuka sekeibuk surat noutam arye, ayupu nyabuk. “Allah Yahweh ara, elce el ‘Naʼ tenen nang, sik Israel nang ati, weik tonun bico tenelule. Winilya ati, elce an Salomo biti erepdeiamkukba, ance aninye talebuka sik ninye deiyoknye Raja ulyame.
Allah ance im kwepdeiplumce, wala ap, kurya ap nirya, kwepdeiplum ning nirya ara, na asing arye elinunce, ‘Se, aning ara pia telebe’ tenen, mambul kanye bonune. An mining taruk arye, im noutamak ulul ning nirya kwepdeiplumce, ‘Asukumuk unamle,’ tenelamlum touk, deiplumba, tuba aulul touk, na asing arye dinye talak ara, narye ‘Se, aning ara pia telebe’ tenen, mambul kanye bonune.
Piblisite