Beren tam talak nirya ara, imam adiparyuk kam ning oyakceba, uku dongona ati, keil taplakikirye, yangabuka memepdeibikak, mesba deice uku sekmaliba, dinmalye ning ara, moubuka kalikmalirye, dinmalibuk, uku dinamle. Moubuka kalikna kumce, batakmaliba, auku ara, kum tangapnamle. Beren tam talak nirya, uku dan yo boyanuka, amesba deice deiplirye, uku seklyopura, auku tuba dinauk unamle. Ati, anyaik pil donanye, imamnye, el weik deiyoknye bira, tuba-tuba beren tam talak nirya ara, ‘Allah ap, ninye ap, teleb kibuka neika unamapʼ tenen, uku dongona ati, kam ning oplirye, anoutam arye meta ap, kop ap, uku dan yo ap bobinuka, amesba deiceuk memebuka delinamlule. Winipmalya arye, ‘Israel nang, sik malye upmace nang ati, Allah namin kiplirye, teleb kipdeipnamsilʼ tenen, boyanmakce ining ning obuka, meta dobukaplirye, uku dongonamle.
Imamat 3:5 - Eipomek5 Adopropnamle ning nirya ap, tonda, ‘Allah ati, arepnamapʼ tenen, yuk tup ning ap, kintinibuka deipmakce ning nirya ap, tabakuka uku dongona ati, amesba memebuka deibika arye, Harun el mapu arye, aning nirya bobuka, amesba deice uku dinmalye noutam, uku dongonamake. Ara, ‘Allah Yahweh ati arepnuyapʼ tenen, uku dongobikiba, atup ning nirya uku diplirye, siltong teleb ning weleplya ati, Allah kekeplirye, kanye teleb unamle. Gade chapit la |
Imamat 3:5
24 Referans Kwoze
Anggun babye, kam keil atonun ululuma anya arye, Yesus ap kanye dukdongobuka ululum talak nirya ara, el dopropsilirye, aik atonun dobuka teleb updeipnamsile. Tonda, ‘Allah ap, malye winin ninye ap, ansinibuka neika utibye’ tenen, ansinilina deiyok nang ati, Allah arena deiyok nang atonun kilisulule. Winisilyopura, Yesus Kristus ap, talima dukdongobuka diksukum umunye deice arye, Allah ati teleb ning arenamlume. Ara asing elinyap ning kum bukni, tonda nong kipman talye ning ati arenamlulum bukni, Allah arye, ‘Aning teleb,’ tenelye ning uk, anggun kanye talima noutam arye arilulum ning, elti, arenamlume. Winipmunyopura, kanye delinamsile.
Aning nirya, akunum winipminyeura, asapi basam kob ap, basam dei irin ning ap, tonda keil duk bitinye ap, talima irilamle ning ap, pia teleb ninguk, ance wibuka dopropmince, na Allah arena ati, kam ning obuka, keil pala deice uku dongona ati, kintiniplum ning, el si ara mesba, aning damak bobiminyeura, aning nirya binuka, uku dongopnulyame. Winipminyeura, uku arye, aning nirya dipnamle.
Nara, Allah Yahweh, aning-aning nirya talibuka, deice tam erebuka, mikip weik deiyoknye birye, ayupu nyapkine. Israel yala nang, talye daulamik nang weik tam ara, minop talak bataklamnikce, malye weik ulamik bukni, Lewi yala nang kan-kan, ton tam nang ara, kum bataklamnikce, na si eren aik pum tam, pil tuba melilamik. Ara, ninye el si Sadok, elce deiamukba, dadeipdanin yangalamika ani, deibikba unyak nang ara, na si erena ati, Israel nang arye arebikceba, kam ning dobuka obikirye, Israel nang, sik malye winin ning kum danalina ati, mesba deice uku dongonamake. Ara Lewi yala nang bukni, sik tuba teleb unyak imam nang ati nyapne. Minop talak, sik Sadok tam nang ara, Israel yala nang nirya arye, nati batakamnikce, malye weik ulamik talak ara, anang arye tuba teleb ulamikce, na si eren aik pum tam uamuk ning nirya kaliklamik. Ati ara, wini talak ara, sik Sadok tam imam nang arye, na dam yanuka, na si eren aik noutam pil donamake. Ara, Israel yala nang, ‘Nun malye unyap ning, Allah arye namin kibuka kilipsutueʼ tenen, kam ning arebikceba, Sadok yala imam nang arye, opnopura, sikcuk mesba deice uku dongonamak pil talibuka donamake. Israel nang arye, akam ning arebikceba, Sadok yala imam nang arye, aning kalebuka, meta ap, ining ap, doprobikirye, na Allah ati, arenamninyake.
Sik anang ara, malye winin ning, pia weik wininyaka deice arye, na si eren aik pia malye weik kililanyake. Na si erena ap, na si erebuka kina ap ati, sikce domba basam opnarye, abasam el meta ap, ining ap tuba arepnulum bukni, anggunce apia malye-malye weik ululuma deice arye, aning nirya, pia malye kililulume. Tonda, sik Israel yala nang arye, yuk yala nang, talye-talye daunyak nang ara, sik den bama mouse kum sekenyak bukni, sikce, ‘Kume, Allah el si eren aik dam talye mangkau asa wektume,’ nyaluluma deice arye, pia malye ululume. Aning atouk, anang ara, yuk mutuku ninye asik nang unyakce, narye, ‘Aning ara, wininamlume, aning ara, pia kum wininamlume,’ nyapdeiamsise yupu ati, diba kum tenebikirye, yanininyake. Tonda, na siuk kum ereninyaka ati, na dam pia kum yanmanto nang unyake. Sikda, den bama mouse kum sekikirye, sik kanye talima ap, sik nong nirya ara, malye tuba unyaka ati, na dam kum yatinge. Ati, sik Israel nang arye, na si erena ati, kam ning nirya obuka, ining ap, meta ap dobuka, nati arelyanganinyak talak ara, sik aninye asik nang ap ansinipmunce, na si eren aik dam kum yatume. Amalye ning weik winimunya deice arye, na si eren aik, pia malye kipdeipnuluma deice arye, na pia like unulule. Narye sik Israel nang ati, ‘Aninguk wininamlume, aning ara, pia kum wininamlume. Winipmunyopura, naryuk, winibuka kaliksinirye, pia melinamsine,’ nyabuka, nyalin yupu deice arye nyapdeiamsise ning nirya ara, anggunce akunum yaniltanauk ululume.
Winibuka atup ning akunum bokuka deipnopura, sik Lewi yala nang arye, sik ap, tonda sik imam-imam nang ap ati, Kaplina Kwalina dinamik ning, yuk ning ton kintinililamik. Deiyok ara, minop talak ulamuknye, imam Harun birye deiamuk nang ara, sik atalak pil donman imam-imam nang, Israel nang nirya arye, Kaplina Kwalina sum aren ning, basam tup ap, meta ap, kintinibuka delinmance, pil donmana ani lukunyan kilamuk. Aning ara, ‘Allah arye kanye deipnamsilʼ tenen, arelamik ning, uku dongolamikce, pil weik dolamik ati, sik bidamang, sik dipnaman ning ati, kintinipmanto kum ulamik.
Tonda asum aryuk, Allah el si Yahweh, el si eren aik urasin dam ara, weik lo ton aupmok ning ara, Salomo birye bublan kuka, teleb kipdeibuk. Winina ati ara, alo noutam Salomo birye aning-aning weik arye Allah ati arebuk. Elce arebuk ning ara, ‘Allah si erepnuyap’ tenen, kam ning obukabukce, uku dongobuk. Tonda, ninye koulamak ning gandum ap, aning atonun bukni, yuk ning ap arebuk. Tonda, ‘Allah ap, ninye ap, teleb ubuka neika unamap’ tenen, kam ning arepmek ning arye, meta ap, tuba aupmok ning ara, weik arye ton arebukce uku dongobuk. Ura, Salomo birye, aning-aning nirya, Allah el si eren aik buru tam weik lo noutam arye arebuka deiyok ara, ani. Ara, Allah arena ati weik pala keil dobuka, pala keil yangapdeiamik ning ara, mitik ati ara, asum arye aning-aning nirya arebik ning ara, pia weik ati, akeil pala kintinip deiamik adeice arye, aning nirya deipmanto kum ubuk. Akeil deice ara mitik lo ubuka ati ara, talye arye yuk sukumuk arebuk.
Aboyaliba, opnamle kil domba basam el meta nirya ara, adiparyuk dobukaplirye, mince winilamlye touk, malye winipmalinye birye, ‘E, na malye winipman ning ara, ining ning dobuka, Allah dam binuka arepniba, Allah arye lyepnilirye, teleb kipdeipniliba, Allah ap, na ap, tuba tonap teleb kibuka, neika ansinibuka neika unanamʼ tenen, boyaliba, obuka, uku dongolamla atonun kibuka, pil doplirye, uku dongonamlule. Anye birye, aopmalye kil domba, meta nirya bobinuka, imam nang, sik weik deiyoknye biti arepliba, imam adiparyuk, ameta nirya mesba memepdeibika deice binuka, uku dongonamlule. Ara, amalye winipmalinye, el pununa ap, dekna ap ati, arepnamlule. Ameta dobuka uku dongopliba, uku diplirye, siltong teleb ning welepliba, Allah Yahweh kekeplirye, el kanye teleb unamle. Tonda aning atonun, aimamnye birye, apil winibuka dolamlye touk, ubuka doplyopura, adeice arye, atonoknye el mangkau arye malye winipmalye ning ara, Allah Yahweh arye kilipnamle. Amalye winipmok ning ati, kum wenebuka opnamle.
Aboyaliba, opnamle kil kambing basam el meta ap, kop ap nirya ara, adiparyuk dobukaplirye, mince winilamlye touk, malye winipmalinye birye, ‘E, na malye winipmana ati, ining ning dobuka, Allah dam biniba lyepnilyopura, el ap, na ap, tuba tonap teleb kibuka, neika unanamʼ tenen, meta nirya boyaliba, mesba deice uku dongolamle touk ubuka, pil doplirye, uku dongonamlule. Aning atonun, anye birye, akambing meta nirya boyanuka, imam nang, sik weik deiyoknye biti arepliba, imam adiparyuk ameta nirya, mesba deice deiplyeba, uku diplirye, siltong teleb ning welepliba, Allah Yahweh kekeplirye, el kanye teleb unamle. Aning ara, amankau arye malye ulul ning ara, pununa ap, dekna ap ati, apil donamlule. Tonda aning atonun, aimamnye birye, apil winibuka dolamlye touk ubuka doplyopura, adeice arye, amalye ning mangkau arye winiplinye, el malye winyamlye ning ara, Allah Yahweh arye kilipnamle. Amalye winyamlye ning ati, wenebuka kum opnamle.
Wininamnimak bukni, aopmalye basam el yan tup ap, deisuruk deice palilamle meta ap ara, el anye biryuk, dobukaplirye, mek likukaplirye, teleb kibuka kintinilinamlule. Apil dobuka kintiniplyopura, Allah ap, ninye ap, ansililina ati, sapi bol arye domik doltakne tenda aik noutam pil donyak nang, sik imam nang aryuk, akintinip deipmalye ning dobuka, keil pala taplakuka yangabuka kintinip deibik sukumuk binuka, uku dongopliba, aning nirya uku diplirye, siltong teleb ning ara, Allah Yahweh dam welepliba, kekeplirye, el kanye teleb unamle. Aning ara, Israel nang arye, ‘Nun malye wininyap ning nirya, Allah arye namin kipnamsil’ tenen, kam ning obuka, nong nirya boyanuka, uku dongonamak ning ara, Allah elti, aning arebikiba, elcuk kanye delinamle.
Allah ap, ninye ap, ansinilina ati, sapi basam bol arye domik doltakne tenda aik pum tam, pil dona deiyoknye, imam atalak pil donmalinye, elce adomba basam mi obuka deipmunce, bokuka yuk kintinip deipmunye ning nirya ara, el anyaik pil donmalye imamnye birye, aning nirya bobilirye, binuka uku dongopliba, uku arye dipnamle. Adin ning binuka uku dongonamle ning ara, Allah Yahweh, el si erena ati, binuka arenamlule.
Tonda atalakuk, roti kwaning din ning deiyok ning, terigu do, tepung do, yakong do, Allah el arena ati, kintinibuka delilamik ning ara, Israel nang arye, boyanmek ning ara, Harun el taruk tonok arye, mitik tonun ton dobuka boyayukce, uku dongona ati, mesba kintinibuka deiamikak yayukce, uku dongobuk. Asukumuk bukni, beren tam talak kam ning obukabukce, uku dongopmok ning, akunum uku dongopmok bukni, atalak ara tabakna ati ara, aroti kwaning dina deiyok ning ton arebukce, Allah el arena ati, uku dongobuk.
Winipmanto ara, sapi basam dobuka obikiba, imam nang arye, uku dongopnamak talak ara, roti kwaning dana deiyok ning tepung ton, tabakuka arenamnyake. Ara yate deiyok ning do nirya, sik malye unyak ning kilina ati do, na Allah arye, ‘Na si erena ati arepnamnulume,’ nyapdeiamsise ati do, na Allah ap, anggun ninye ap, neika telebuk una ati, arelyangan ning do, aning-aning arelyanamnulum talak nirya ara, wininamlume.
Tonda, an Musa birye, sik Israel nang ati, nyapnamlyame. ‘Tonok sum, Allah el si erena ap, elti, arena ap ati, boyanuka arelyanganamlum ning ara, ani. Ara, keting tamun tonok kipmalye yim domba basam bukni, bol pia teleb ninguk, bitinye boyanuka arelyanganamlume. Aning atouk, asum-asum nirya pia arenamlulume.
Bukni, akam ning opmalinye biryuk, abasam el yan tup nirya ap, el deisuruk nirya ap ara, el anye biryuk, aning nirya dobukaplirye, mek likukaplirye, teleb kibuka kintinilinamlule. Winibuka aning nirya akunum pil dobuka, kintinip deiplyopura, Allah Yahweh ap, ninye ap ansilina ati, cang sapi bol arye domik doltakne tenda aik noutam pil don nang, imam-imam nang, sik deiyoknye biryuk, akintinip deipmalye ning dobuka, uku dongopliba, aning nirya, uku diplirye, siltong teleb ning ara, Allah Yahweh el dam welepliba, kekeplirye, Allah el kanye teleb unamle.
Tonda, imamnye birye, maka talibuka, el pol potong sirik ning dana-dana tam taliplirye, delonamlule. Bukni, el potong den talak ara, mitang asa arye, moubuka denamlule. Mikip arye dinmalirye, ‘Potong tuba batakna ap, dila una ap uplyak,’ tenena ati, wininamlule. Imamnye winiplyopura, maka el nong ara, adiparyuk ining ning dana ati, keil pala yangabuka kintinip deiamlumakuk, mesba deiceuk danamlule. Winipliba, el nintong teleb ning ara, Yahweh kekeplirye, kanye teleb unamle. Aning pil donamaka nirya ara, ‘Allah arye, nun malye winin ning kilipnamsilʼ tenen, uku dongobikiba, aning nirya uku diplirye, siltong teleb ning ara, Allah Yahweh el dam welepliba, kekeplirye, el kanye pia telebuk unamle.
Bukni, min yuma deipnamak yim sapi ap, yim domba ap, yim kambing basam ap, nirya ara, mi min yuma deiplye ning ara, Israel nang arye, ‘Nun ningʼ tenen, tuba tamubuka, kum dopropnamake. Ati, ‘Tuba tamubuka dopropnamapʼ tenen, aning pununa ati, dekna ning ton, kum arelyanganamake. Deiyok ara, aning ara, mapu min yuma deibikce ning ara, na Allah ninguk unamle. Narye, ‘Aning ara, pia teleb lek ning, na ninguk ulule,’ tenenuna anya arye, aning min yuma ning ati, tamubuka kum dopropnamake. Ati, aning pununa ati, keil uang perak dobuka, kum arenamniake. Ara, aning ara, pia lek din ning anya arye, anggun imam nang arye, adiparyuk opmunba, banamle ining ara dobuka, mesba deice binuka, purupmunyeba, mesba deice dupnamle. Tonda, aning kwalipmunce, anggun meta nirya ara, dobuka na si erebuka kina ati, uku dongopnamlume. Winipmunyopura, uku arye, ameta diplyopura, adeice arye, siltong teleb ning welepliba, na Yahweh arye kekepnirye, na kanye deipnamne.