Aning ati ara, na kayapo, Kristus kel kina ati, Allah yupu noutamak bukni, deiyok yupu deiyok kounamaba ara, akunum kel bikibirye, ‘Nun kanye talima wisipnamsil’ tenen, minopce kel bikuka bikatabibirye, yuk ning ton, weik mambul yupu ton kel kipnin banamabe. Ura, aik dopnuce talak ara, minyuma ayukumna yo akunum ikikirye, ila tuba tonap kum iklamak touk, Allah yupu deiyok ning bukni, deiyok kounamaba ara, ila tuba tonap tamubuka kum kel kipnin banamabe. Ayupu deiyok kouna ati nyapmasina ara, nukuka nyapnusine. Ara, ‘Malye tuba-tuba winilamibiba, Allah arye wenebuka opsilyak’ tenen, malye winin ning batakna yupu ap; Allah ati, diba tenena yupu ap;
Ibrani 5:12 - Eipomek12 Ura, aning ara talye kume. Minop arye diba tenelamluma anya arye, wini talak teleb ning ara, anggunda peterena deiyok nang akunum winipmatum bukni, anggunda kabula. Tuba patasilye ning ara, yuk kel nang arye, Allah yupu noutamak ulye deiyok yupu, deiyok kinyak ning uk, kanam asa aryuk kekepmanto ning ara, ila tuba tonap peterepsitingiba, kel kiptume. Moum dinmapu arye, tup ning kum dilamak talak, moum yung tuba patalyeba, dilamak touk, anggunda, Allah yupu weik mambul nong noutamak ning ara, min kum kekebuka doproptume. Anggunda, nong bol deiceuk tuba patasulule. Gade chapit la |
Ibrani 5:12
23 Referans Kwoze
Winiryuk deibice mapu, sik nin yapu moum ati pia patalamle touk, Allah el pia teleb yupu, talima ak wisibuka teleb ulisulul yupu ati, pia patanamsile. Winibuka patapsilyeura, kekebuka dolonauk upmunyopura, Allah arye lyepsuk ak, el ap talima dukdongobuka umunya ara, pia wisipnin balamlya ani, telebuk unamsile.
Yata ninye do nirya, sik moum dinmapu atonun tuba unyak ninye ara, moum yung atonun yupu, bol deiceuk dolonyak nang ara, malye winin ning kum diparyuk, pia diksukum winin ning ara, min kum kel bikinyake. Ara, Allah yupu nong noutamak yupu atia. Anggunda moum dinmapu atonun tuba umunya anya arye, aikin yupu ara, ‘Deiyok ani’ tenen, moubuka kum kel kiptume. Kabula.
Tonda, Allah el laka teleb yupu, Kristus yupu ati, ‘Dipkoprop moubuka kel kinamabe’ tenen, pia piribuka kel kipra banamlulume. ‘Kristus el yupu pia teleb,’ tenenauk umunye talak nirya ara, weik kele arye peterelana ap, ‘Mankau arye malye winibibyak’ tenen, “Kanye mouplulume,” nyabuka wenelana ap, pia melipdanuka unamlulume. Tonda, winibuka wininamlum talak noutamak nirya ara, minop seklamik yupu, buku Mazmur Allah yupu mot ap, anggunce sekuka nyalulum Allah yupu mot ap, Allah el si erena ati, arisilye mot nirya ap, nyanamlulume. Amot-amot nyanamlum talak ara, anggun kanye talima noutamak arye Allah ati, “Telebe,” nyabuka tenenamlulume.
Aning atonun, bai tam ulamle weik kuse atonun ning, weik yu ning, el si ara, singa kuse, el din ning ton kum uplirye, din kum diplyopura, mikip kum ulule. Bukni, nun ni koproba Allah Yahweh ati, si erebuka ukirye, ‘El dem aniryuk lyenamsil’ tenen, el amu tamuk unyak ninye nirya ara, teleb ning ati, kum patalule. Sik kam una ati, teleb ning nirya arepliba, kanye imun ton kum ulule. Aning nirya ara, sik dam pia aunamle.
Nyabukura, Yesus ayupu kekebukce, atikmek nang nirya ati lik ubukba, ayupu nyabuk. “Anggun atalak umunye ninye ara, dib kum tenelulum ninye anya arye, pia malye winilulume. Na lik ati, ‘Yata barye talak arye anggun dam tuba unamne do?’ Tonda, ‘Teleb unamak do?’ tenen, batakna kumce, yata barye talak arye pia dinamsin do? Ati, isa talyamuk mi ara, dobuka na dam boyalulume,” Yesus arye nyabuk.
Allah el si Yahweh arye, ‘Israel ninye na dam yangakiba, narye teleb kibuka melinamne’ tenen, adomon yupu nyabuk. Anggun mek patasulu ninye nirya ara, narye kintineipse mek dekna kum, ur talye yanduka dobuka dina ati yalume. Anggun yo bok kum ninye ara, na dam yamunce, yo bok kum upmalibuk, anggun din ning ara, dekna kumce, urdem arye dopropmunce, dinamlume. Winipmanto ning ara, anggur tapu duk mek ap, sapi basam moum yung ap, akunum kintinipsise ning ara, dekna kum urdem arye yamunce dobuka dinamlume. Ati, na dam yanulume.
Allah arye Esra meliamuka deiyok ara, Esra ara, ‘Allah arye wininamlulume,’ nyapdeiamsuk yupu nirya, ‘Pia moubuka kel biknamne’ tenen, yuk ning tenena kumce, ayupu uk moubuka kel kibukce, pia moubuka taleamukce, dobolbalamuk. Aning akunum winibukopura, Allah arye nyapdeiamuk yupu dobuka, Israel ninye ati, “Dipkoprop wininamlume,” nyabukabukce, peterelamuk. Winibuka ulamuka ati, Allah arye Esra biti, weik arye melilamuk.
Ara, atalak-atalak noutam nirya ara, yupu arena ati deiyoknye, Ahitofel birye yupu nyalamukba, Daud babye, Absalom babye, kekelamdikce, ‘El nyalye yupu ara, pia dipkoprob mambul ulula ati, el nyalye yupu kekena uk unamabe,’ tenelamdik. Ara, ‘Ahitofel bira, Allah arye nyalilamle yupu atonun yupu nyalule,’ tenelamdik.
Winipmanto ning ara, yatanye do, Allah yupu nyalulnye bira, Allah el dam yaturye, nyaptubuk elce ila tamubuka nyapsutu touk, pia mikip deice arye peternamsile. Aning atonun, yuk ninye ati, melibuka pil dolulnye bira, Allah arye el mikip arisilya deice arye, yuk ninye ati melibuka pil donamle. Allah arye, ‘Na pil donamak’ tenen, talye arisilye pil dona deiyok ning deice arye, Yesus Kristus ap, kanye dukdongobuka umunce, anggun wininamlulum ning nirya ara, teleb ubuka unamlulume. Winibuka umunyopura, yuk nang eipsikirye, Allah el si weik arye erebikirye, elti, “Telebe,” nyanamake. Ninye mutuku-mutuku nirya arye, Allah el si erebikirye, ‘Weik mikip ululnye bira, Allah eluk,’ tenebuka, ‘Pia unamak’ tenen, Allah moronune. Akunuma.
Aning arenilya anya arye, Allah ati, “Telebe,” nyanun bukni, na kanye ara, Allah dib tenenyak ninye arye, ‘Allah si erepnuyap’ tenen, bulubikce talak ara, ‘Ninye nirya moubuka kekeptingce, kel bikting’ tenen, sik kekepmanto yupu pamubaryeuk nyapteneba kekeptingopura, ‘Aning ara, pia telebe,’ tenenune. Bukni, sik kum kekeptingce, moubuka kum kel bikting yupu, Allah Kanye arye, arepnilibuk, yuk mutuku yupu deice arye, 10 ribu yupu nyaptinya babye, ‘Aning ara, mambul kume, daupmalye,’ tenenune. Deiyok ara, sik yuk ninye kum kekepting yupu deice arye, nyapnyopura, sik kanye talima kwa baribuka mikip kum kipdeiptinya ati nyapmasine.
Ura, nun apu yapu ap, ton yuk Israel ninye nirya ap, mek kum ati ninye kum ulamikak balamik talak ara, Musauk el ap, sik neika ulamik. Tonda, Allah el im deice melinanye malaikat, Sinai mutuku deice yupu nyabukura, kekebukce, nun apu yapu ati sik yupu wililamuknye bira, Musa el uka. Tonda, Allah arye, ‘Aning kam una deiyok ning arepnamne’ tenen, el kam yupu, pia unamle yupu ara, Musa arye nun arepnamsuka ati, Allah arye nyapdeibukura, el im deice pil donanye birye, Musa aribukura, doprobuk.
Nyabukura, Yesus ayupu kekebukce, atikmek nang nirya ati lik ubukura, ayupu nyabuk. “Atalak umunye nang ara, diba kum tenen, ululum nang ati, yata wiribuka talak arye apia unamne do? Tonda, ‘Teleb unamak do?’ tenen, batakna kumce yata wiribuka talak arye pia dinauk wininamsin do? Ati, ami, na dam boyalulume,” nyabuk.
Ura, na weit yapu atouk ninyeo, Yesus ap, dukdongobuka umunce, weik kanye deibuka unamlulume. Minop talak ara, anyapnusin yupu akunum nyamsise bukni, ila tonap, nyapnusin ara, na ikin una kume. Tonda, ‘Mankau arye malye ning tenepmunyak’ tenen, yupu seknusine. Tonap ayupu uk kekepmunyopura, ayupu moubuka melinamsile. Anya arye, anggun melina ati ayupu nyapnusine.
Ati, na Allah Yahweh arye anggunti nyanamsin ning ara ani. ‘Aning ara, wininamlulume. Aning ara, kum wininamlulume,’ nyan yupu ara, tonap weik tonun tabakuka arenamsine. Ton talak ara, mitik anun arye nyanamsine. Ton talak ara, weik tonun arye nyanamsine. Nyapsinyopura, pia kanye walwal unamsile. Winipmanto ara, bisik walwal nang arye, kirikikirye, yuk bisik balamak touk wininamlume. Winimunyopura, ton nang ara opnamsiake, ton nang ara, tapu koubuka sik mutuku bobinamsiake, ton nang ara ikin ning anggun nong deice deipsikiba, imun kanye weik bonamlume.
Ura, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Mitik mapu tenelamak touk tenemunya ara, bataklulume. Ura, malye ning pataplyeba, malye winina ati ara, pia mitik aling pum lin mapu arye, aning-aning kum tenebikirye, malye kum winilamak touk, anggun adiparyuk telebuk unamlulume. Bukni, anggun kanye tenen ning noutamak nirya ara, teleb nang, wisi akunum deibik ninye arye, kanye bobuka diksukum ninguk tenyak touk, anggun Korintus mutuku ululum ninye babye adiparyuk tenenamlulume. Malye winina ati ara, mitik mapu atonun unamlume. Teleb winina ati ara, wisi ninye atonun tenepmunce, telebuk wininamlume.
Ayupu winipmanto ning nyapmasin touk, nun tukwak mutuku unyap ninye nirya ara, mitik mapu atonun ulamubu talak ara, tukwak mutuku mem ning deiyok ninguk talibuka, aning amu tam ulamubu. Tonda, Isa Mutuku Dongonye sik amutamuk ulamubu. Allah arye, “Na ti diba tenepnamak ninye ara, aning arenamne,” nyapdeiyamuk ning ara, min kum doprobupe.
Bukni, na kayapo, sikce peterepsikba, Allah el yupu kekeplumce, Allah el dirina arepsukba, doproplum talak ara, ila tuba tonap tenenamlume. Malye nang arye, ikin ning weik anggun nong deice delilamsika deice arye, pia winilelamsik bukni, ikin ulamsuka babye, pia batakna kumce talibuka diba tenenauk unamlulume.
Piblisite