Allah el mikip deice arye nunti, ‘Malye ning nirya batakuka, diksukum un ninyeuk unamak’ tenen, nyabuka melipsukce, akunum lyepsuke. Winipsuka ara, nun teleb ubuka pil dolamupa deice arye, kum lyepsuk bukni, elce minop talak akunum tenyamsuk touk, elce nunti bico tenepsukce, el kanye aryuk nunti talye melibuka lyepsuke. Allah el kanye aryuk bico tenyamsukce, ‘Yesus Kristus el pil donamla deice arye, aninye melibuka lyepnamne’ tenen, kintiniyamsuk ning ara, Yesus Kristus deice arye kintiniyamsuke. Aning ara, aning-aning min kum kwepdeiamuk talak arye, nun Lyena Deiyoknye Yesus Kristus akunum kintinipdeiamsuke.
Ibrani 3:1 - Eipomek1 Arup nyapmasin yupu nirya aupmala ati, anyapnusin yupu babye kekenulume. Isa Mutuku Dongonye arye, nun tukwak ninye ati, ‘Malye winipting’ tenen, talima lilosululba ikin asa unyap talak ara, ‘Nun du kopropa Yesus arye, melinamsil’ tenen, eltibuk diba tenebuka tenenamlume. Na kayapu, Allah arye wibsukba, elti, diba tenelulum ninye ati nyapsine. Allah arye nyapsukba, ‘Allah el dam im deice binamabe’ tenen, diba tenenyap touk, anggun yuk mutuku ton ululum ninye, aning atonun diba tenelulume. Aning ati ara, anggun kanye tenen ning nirya ara, Yesus deiceuk deipmunce, eltibuk diba tenenamlume. Yesus elti, diba tenebuka eluk talibuka unyabe. Yesus ara, Allah arye tukwak ninye lyena ati, el pia kai teleb yupu laka nyana ati, deiyok kouna deiyoknye ulule. Nun ap, Allah ap, neika una ati, ansinilina deiyoknye Yesus usulule. Yesus ati diba tenebibirye, el yupu laka nyalbanyabe. Gade chapit la |
Ibrani 3:1
63 Referans Kwoze
Sik bik-bik abuka ban nang arye, pitin kilin ak bita dinmakirye, ‘Dekna ning dopropnuyap’ tenen, mikip arye, pia pi deibuka, bik-bik abuka balamak atonun unune. Ara, Allah arye, nati, ‘Im deice yalirye, dekna atonun ning dopropnamle,’ tenepnukce, yukupnuke. Yukupnukce, Yesus Kristus ap, na ap, kanye dukdongopnuka anya arye, el ap, neika unyama ati, anyuk tenebuka, pia pi deibuka, pil donune.
Ura, nun malye winin ninye kum melipdanmanto unyaba ati, nun patasilye touk, anye birye melibuka lyesulule. Allah ap, ninye ap dana-dana ansinilina deiyoknye, nun deiyoknye Yesus ulul ning ara ani. Elda, pia malye una kumnye ulul ati, malye winin ning tonok babye kum winilule. Elda pia malye una kumnye ulya ati, sik malye winin ninye yuk, el pia yuk ulule. Aning-aning nirya outam aubuk bukni, Allah arye Yesus dobuka, im deice tam erebuka deibukba, weik mambulnye ulule.
Ara, na kayapu. Nun Deiyoknye Yesus ati pil dolamsiba, yu nang arye, tomopnikce, tapu koubuka wenena aik dongopnikba, asukumuk unune. Narye anggunti nyapsine. Allah ati dib teneplum arye, akunum lyepsuka ati ara, Allah arye anggunti, ‘Na mapu unamaka ati, winibuka, winibuka diksukumuk wininamake,’ tenyamsuk atonun, adiparyuk aninguk tenebuka unamlulume, nyapsine.
Diba tenena kum nang arye, wininyak bukni, anggunda diba tenelulum ninye ara, Allah arye, ‘Na mapu kibikirye, diksukumuk unamak’ tenen, akunum wibuka deiamsuke. Tonda, ‘Na piluk dokirye, ninye ap, Allah ap, ansinilina deiyok nang unamak’ tenen, wibuka deiamsuke. Anggunda kunuknak noutam atonun, malye ulamluma noutam ulamlumbuk, Allah yukubsukce, dobuka teleb dirinak atonun delilbisuke. Winipsuka deiyok ara, ‘Allah el si erebuka, elti, telebe nyabuka, pia unamak’ tenen, dirinak delilbisuke.
Arup nyapmasin yupu nirya aning ati ara, Allah arye Yesus ati, ninye atonun ubuka deibukba, Yesus ara el weit yapu atonun ninye, tukwak ninye atonun dayuk. Ninye atonun dayuk ning deiyok ton ani. Ara, ninye malye un nang ati, bico tenyamsukce, Allah ap, ninye ap, ansinilina pil dona deiyoknye upsuke. Nun malye winin ning ati, talye luparabuka oplopsutu bukni, bico tenyamsukce, ‘Batakna kum arye, teleb ubuka lyena pil donamsin’ tenen, ninye nong atonun dayuk. Ton deiyok ara ani. Ara, Allah arye Yesus ati, ‘Ninye atonun uplirye, tukwak ninye sik malye winin ning kum kipdeiplirye, sik pununa ati, dipnamle,’ tenyamuka ati, Yesus ara, ninye nong atonun dayuk.
Nun dib tenenyap ninye nirya ara, kanye dukdongobuka nong tonok atonun unyabe. Allah El Dib Kanye arye, tonok nong atonun kilisulule. Aning atonun, Allah arye nunti, ‘Aninye lyepnamne’ tenen, yukupsukba, dib tenebuburye wini talak ara, ‘Elcuk dolyasilyopura, el ap, neika pia unamaba ara, dan talak arye, dolyanamsil do’ tenen, aning atibuk kintinipdeibuka dinauk unyabe.
Ara, Allah arye anggunti, ‘Aninye ara, narye aning-aning ap, tukwak ninye nirya ap, talibuka unye talak, pia teleb weik dirinak unmana ara, sik ap unamabe’ tenen, yukupsuke. Allah arye anggunti, nyapsuk anya arye, ‘Aminyan talak Allah arye anggunti, kanye deipnamsil’ tenen, nunce anggunti, “Wininamlulum, wininamlulum,” nyabuka peterena ap, anggun ikin ulamsuk ning ati, kwa daklamsupu ning ap, anggun kanye imun kanye bona ati, talima mulina ap ulamsubu.
Awinilamse nirya ap, aning tuba wininye ning nirya ap deiyok ara, ‘Ninye im sirya, mutuku sirya, Allah el ninye lyen yupu, el laka teleb yupu kekebikirye, Yesus dib tenepnamak’ tenen, wininune. Tonda, winipnyopura, Allah arye, “Na mapu ati, teleb ning arenamsine,” nyabuka nyapdeiamsuk touk, ‘Na ap, anggun ap, nun nirya arye, neika dopropbibirye, telebuk unamap’ tenen, wininune.
Yin talin nang arye, ‘Yuk mutuku ninye obisipsikcak’ tenen, pia pi dobuka olalamak atonun, Allah dib tenebuka taliplum pil moubuka talina ati, mikip arye pirilenamlyame. Allah ati dib tenelulum ning ara, moubuka talipmince pia bobanamlyame. Aning ara, pia telebe. Minop talak, ninye weik kekenmekba, ance, “Kristus ati, dib tenenune,” nyabuka, teleb yupu nyaplum talak ara, Allah arye, ‘Anye bira, na ap, im deice pia unaname’ tenen, wideipkuke. ‘Bol koplobuka pia kam una ati, kintinipkuk ning dopropnamne’ tenen, pia moubuka teneminyak arye dolonamlyame.
Anyapmasin ning ara, dukdongobuka laka nyapnusine. Ara, Kristus tukwak mutuku yanuka ulamukce, nun Yahudi yala ninye melyamsuka deice arye, lakak kipsuk ning ara nyapnusine. Ara, Allah arye Yahudi yala ninye, sik minop talak ulamik ninye, nun ayupu yapu ati, “Wininamsine,” nyalilamuk yupu nirya akunum winibuk. Winilamuk ning deiyok ara, ani. Allah arye, Yahudi yala ninye ati, “Wininamsine,” nyabuka nyalin yupu nyasilye ning nirya ara, ‘Dipkoprop winilule, tenenamake’ tenen, Yesus Kristus tukwak mutuku yayukce, nun Yahudi yala ninye ati weika arye melyamsuk.
Ninye nirya, sik malye winin ning ati, kum daneiplirye, teleb winilisulula deiyoknye Yesus ap, elce nun malye winin ning kum kipdeipsilirye, teleb kilisulul ninye babye, nun Ni Kopropa Allah, el tonok ulule. Yesus ap, nun ap, nun Ni Kopropa Allah tonok ululba, nun yala tonok unyaba anya arye, Yesus el ap, nun diba tenenyap ninye ap, nun du weit atonun unyabe. Yesus ap, elce lyepsuk ninye nun ap, nun du weit atonun unyaba anya arye, Yesus arye nunti, alye una kum diparyuk, “Anggunda, na weit yapu ululume,” nyasulule.
Yesus arye sikti, tuba tamubuka tonap nyabuk. “Anggun mambul kanye bona kume. Ilil asa una kumce, kanye deibuka telebuk unamlume,” nyabuk. Tonda, “Na Ni Koprop Allah arye, ‘Na yupu dobuka peterelbinamle’ tenen, dopdeipnuk touk, narye anggunti, ‘Na laka teleb yupu ninye lyen yupu dobuka peterelbinamak’ tenen, dopdeipsine,” Yesus arye el wipdeiyamuk mapu ati nyabuk.
Dipkoprop Allah Yahweh arye, na deiyoknye ati nyabuk. Na Allah Yahweh arye, akunum nyapkisa ati, anyapkise ning ara, tonap tenepnirye, yuk ning ton kum punubuka nyapnamne. Ara, na Allah ap, ninye ap, teleb ubuka neika una ati, ansinilina deiyoknye pil talibuka pia donamlyame. Ara, minop talak ulamuknye, el si ara Melkisedek birye, apiluk talibuka dolamuk touk, an babye, apiluk talibuka pia donamlyame.
Na si ara, Yudas arye, Yakobus el weit koprop arye ayupu sekeipsene. Nara, nun deiyoknye Yesus Kristus arye, talipnukura, el piluk donune. Ayupu sekeipsin nang ara, nun ni Allah wipsukce, bico tenesilirye, nun du Yesus Kristus arye, ‘Malye ning arye, malye updeiplyak’ tenen, melibuka kalikisulule. Anggunti ayupu sekeipsene.
Amambul yupu ton nyapnusine. Nunce Allah ati, winiryuk diba tenebupu talak ara, kanye bokoltona kum arye, mikip arye diba tenebupu touk, tuba-tuba diba tenepra balamibya ani, dorsirya talak babye, batakna kum arye, Allah eluk moubuka talibibirye, tuba diba tenenamabe. Winibuka winibibyopura, wini talak babye, aminyan talak babye, Kristus ap, talima dukdongobuka neika unamabe. Bukni, kanye boktopsilyeba, Allah ati batakipyopura, Yesus Kristus ap, neika kum unamabe.
Aning atonun, sik tilila aryuk, talye pil donyak ninye bukni, sik deiyok nang, Allah dib tenebik nang wininyakopura, sik amu tam pil dobuka unyak nang arye, ‘E, nun deiyok nang ara, Allah dib tenen nang anya arye, nun mitik nang atonun unyaba ati, mitik anun arye, si erebuka unamabe,’ tenena kume. Aning ara, pia kum bukni, apil don nang arye, sik deiyok nang dib tenebik nang ati ara, mitik anun arye kume. Pia teleb ubuka, sik pil melibuka donamake. Deiyok ara, sik pil dopbiceura, teleb winibikirye, dopropnamak nang ara, Allah dib tenen nang unyaka ati, weik arye si erebuka unamake. Tonda, amu tam ubuka, pil donyak nang arye, sik deiyok nang ati, sik adiparyuk bico tenenamak ati nyapkine. Ati, asukum deice tam nyapmakin yupu ara, urdem aryuk pil dopra unyak nang ati, mikip arye peterenalyame.
Allah arye sikti, ‘Anang lyepnamne’ tenen, wipdeiamsuka ati, ara nunce anggun Tesalonika mutuku nang ati, Allah el laka teleb yupu, ninye lyena yupu peterelamsupu deice arye, Allah arye anggunti yukupsuke. ‘Wininamak’ tenen, yukupsuka deiyok ara, ani. Ara, nun Deiyoknye Yesus Kristus ap, el yanamle talak upnamle ning ap, urasin pia teleb kibuka yanamle. Atalak ara, ninye nirya arye elti, teleb nyabuka, el si weik arye erepnamak talak ara, ‘Anggun Tesalonika nang babye, neika atonun wininamak’ tenen, yukupsuke.
Anirya ara, tuba tenebirye, anggunti Allah morosenyabe. Allah morosinyaba ara, ani. Ara, Allah arye anggunti, ‘Wininamake, wininamake,’ tenyamsuk touk, pia diksukumuk winibicopura, Allah arye anggunti, nyapnamle. Ara, “Anang ati ara, na kanye deipsine. Yukuamse talak arye, ‘Wininamake,’ tenyamse touk, akunum wininyake,” nyabuka, ‘Teleb ulinamsil’ tenen, nunce anggunti, Allah morosenyabe. Tonda, Allah arye anggunti, melipsilyopura, anggunce, ‘Teleb pil donamap’ tenen, tenelulum ning ap, dib tenemunye deice arye, winilamlum ning ap, anirya ara, ‘Allah el mikip deice arye, anggun winin ning nirya nong updeipnamsil’ tenen, Allah anggunti morosenyabe. Na Paulus arye nyapsine.
Aning ati ara, Allah arye anggun nirya ati, bico tenenyamsukce, ‘Aninye ara, na tenen, ninye na mapu unamak’ tenen, wibuka deiamsuka anya arye, malye una pia kum aryuk, anggun teleb-teleb ubuka wininamlum ning ara, nyapnusine. Ara, winiryuk baju ongolamaka atonun, bico tenebuka melilana ap, yuk nang ati namin kibuka melina ap, yuk nang ati kanye talima lamabuka amu tam una ap, ting-tingana kumce, namin asa arye unamlulume.
Winibuka pia yuk ulalum bukni, wini talak ara, nun ni Allah arye, anggun malye ulalum ning kilibuka lyepdeipsukce, el ap, neika una ati, kanye dukdongopsuke. Teleb kipdeipsukce, el ap, dukdongobuka ansinibdeipsuk ara, el Mi Koprop Kristus ara, ninye nong dayukce, tukwak mutuku yanuka daulamuka ani, nunti dibuk deice arye teleb kipdeipsuke. Winipsuka ara, talye ati kume. Deiyok ara, ‘Na Allah arye sik dobuka, na dam deipnamsin talak ara, sik malye wini ning tonok babye, kum uptu ura, pia diksukumuk unamak’ tenen, teleb kipsukce, el ap, kanye dukdongopsuke. Akunum teleb kipdeipsuk ning ati ara, yata nang arye do nirya, ‘Aning ara, malye ning,’ nyabuka malye yupu kum nyapsitinge.
Tonda, weik arye kanye pia deibuka, pin-pin asa arye, nun ni Allah ati, ‘Teleb, nyanamak’ tenen, Allah morosinyame. Nun ni Allah ati, tuba-tuba, ‘Telebe,’ nyanamlulume. Nyanamluma deiyok ara, ani. Ara, Allah arye, ‘Na mapu nirya akunum teleb kipdeipnirye, im deice dekna weik ning arenamne’ tenen, kintiniamsuk ning ara, ‘Sik Kolose ninye im deice ukirye, sik babye teleb ning dopropnamak’ tenen, akunum teleb kipdeipsuke. ‘Im deice dekna ning dopropnamak’ tenen, teleb keipdeipsuka ati, nun ni Allah ati, ‘Telebe’ nyabuka, weik arye kanye delinamlulume. Nun ni Allah arye, aning-aning nirya talilirye, im deice weik dirina noutamak pia unamlak ara, nun ap, anggun ap, dib tenen ninye nirya ap, neika unamabe. Anggun Kolose ninye ap, ‘Im deice unamlum’ tenen, Allah arye akunum teleb kipdeipsuke.
Nun kele, nun ikin usilye ning, sik Akaya tam ninye babye atonun ikin unyaka anya arye, Allah arye nun talima kwa dibuka melisilye touk, Allah arye anggun babye talima kwa dibuka melinamsile. Aning ati ara, nun kanye teniltona kumce, anggun Akaya tam ululum ninye ap, Korintus mutuku ninye ap ati, ‘Anang ara, telebuk unamake’ tenen, kanye deibuka tenesinyabe.
Sik nirya arye kanye deibuka yo bok bulubuka delilamik bukni, na kanye ara, ‘bita moubuka delilamik ara, pia telebe,’ tenepse. Ara sik Yahudi yala ninye, sik diba tenelamik ninye arye, Allah yupu dobuka, sik Yahudi yala kum ninye unyak mutuku binuka peterelamik. Makedonia mutuku ninye ap, Akaya mutuku ninye ap, sik nirya ara, Yahudi yala kum ninye bukni, peterelamik yupu kekelamikce, diba tenelamik. Ati, sik Yahudi yala kum ninye arye, Yahudi yala diba tenelamik ninye kan-kan bukni, Yerusalem mutuku unyak bona utotoa kum ninye melina ati, yo bok bulubuka delilamik. Abulubuka delilamik ning ara, bita moubuka delilamik. Wini talak ayo bok arepnamak ning ara, telebe nyapne. Winibuka wininamake ati, na kanye deipne.
Ura, na kayapo, winipmanto yupu tonap nyapnusine. Duk teleb moulamle yo, el si ara, Ara yo, ninye arye ayo kouamikibuk, teleb ubuka kwapu bongona kum arye, duk mouna kum diparyuk, kolupyopura, akolupmalye yo taruk ara, deiltakanyake. Ayo taruk seklobikirye, yuk talye buru mutuku palamle yo taruk dobuka, ‘Yo duk teleb ubuka moupnamle’ tenen, ayo taruk seklopmaca deice yanuka dukulongonyake. Winibikiba adukdongopmace yo, el yating ara, kum ulamle yating ap, nong ap, taruk ap arye, teleb ning doproplirye, teleb ubuka palule. ‘Min arye teleb kibuka papnamle’ tenen, kouamikiba, palamle ning ap, aminyan dukdongobice ning ap ara, tukwak teleb ubuka bongoplirye, duk moupnamle. Aning atonun, anggun Yahudi yala kum ninye ara, aminyan talak dukulongolamak yo taruk atonun ululume.
Nabi Hagai birye, sik imam nang ati, nyabuk. Allah Yahweh arye nunti nyapdeipsuk yupu ara, ani. Anggunda, ‘Allah arye aminyan talak wininamle noutam ara, teleb upnamsil do, malye ulinamsil do?’ tenen, na kiklildena ati, umunce, dinauk unamnulume. Minop talak ara, na Allah Yahweh, na si eren aik, ‘Dopnuyap’ tenen, tonok keil babye bobuka, anyaik min kum domik talak, ikin wamsuk ning ati, tuba tamubuka tonap tenipdenamlulume.
Winipnamna deiyok ara, urdem ati kume. Winipnyopura, ninye nirya eibikirye kel biknamake. Ara, ‘Allah el si Yahweh, el taruk mikip deice arye winibuke’ tenen, moubuka teneipnamake. Ninye nirya eibikirye moubuka tenenamake. Ara, Allah Yahweh, Pia Telebnye ulirye, Israel ninye ati kalikuka melilule. Sik nirya arye, ‘Allah elcuk aning nirya kwepdeibukba aulule’ tenen, moubuka kel biknamake.
Sik anang arye, weik kwalya kwalibuka dinmace talak ara, mot sena ati, lelim len ning, el si kecapi ap, gambus ap, tonda rebana ap, suling ap onmakirye, kanye wangalamak mek, anggur mekuk dinyake. Wininyak deice sikce, ‘Se, nun ni Allah Yahweh, elce amambul pil donamleʼ tenen, sikce elti, moubuka bita tenebikirye, el taruk arye mambul pil dolamuk ning ati, si kum erenyake.
Ati ara, amalaikat arye ayupu ton nyabuk. “Allah arye, Babel mutuku ulamik ninye sik wenena ati, akunum oplopmala ati ara, anggun im deice tam ululum ninye nirya arye, kanye deibuka pin-pin asa arye unamlume. Tonda, Allah arye wiamsukba, elti, diba tenebuka ululum nang ap, el yupu dobuka peterelbana ati, deiyok kouna nang, dopkwetepsuk Rasul nang ap, el yupu laka nyalamlum nabi-nabi nang ap, anggun nirya babye kanye deibuka pin-pin asa arye unamlume. Deiyok ara, sik Babel mutuku ulamik ninye arye, anggun nong deice ikin ning weika arye delilamsika ati ara, Allah arye sik Babel mutuku unyak ninye ati, akunum wenebuka oplopmala atia. Ati anggun nirya arye kanye deibuka unamlulume.”
“Arebikirye, amalye deiyoknye ap tabakicopura, Domba Mi Atonye biti, opnamake. ‘Domba Mi Atonye opnamap’ tenen, piripdenamak bukni, Domba Mi Atonye birye, sik nirya ati malye kibuka oplopnamle. Winipnamla ara, talye ati kume. Ara, yuk ninye deiyok nang weik aunyak bukni, sik deice tam Weik Ninye Deiyoknye bira, eluk ulule. Tonda, yuk Raja nang weik aunyak bukni, sik deice tam weik erena Raja Deiyoknye bira, Domba Mi Atonye bira, eluk ulule. Ati ara, Domba Mi Atonye birye, sik malye un ninye deiyok nang nirya ati obuka sirya daknamle. Atalak ara, Domba Mi Atonye elce, ‘Aninye na mapu unamak’ tenen, wiamukce, yukamukba, elti, diba tenelamikce, batakna pia kumce, el yupu talibuka dobolyanganyak ninye ap, el ap neika unamake.” Amalaikat arye na Yohanes ati aning nirya laka nyapnuke.
Nun ap, anggun asurat eiplum nang ap, ‘Nun nirya arye kanye tonok tenebuka, ansinibuka unamap’ tenen, nun elilamubu ning ap, yupu kekelamubu ning ap ara, anggunti laka nyabuka peteresinyabe. Ura nun kanye tonok tenebuka, ansinibuka unyap nang ara, nun ni Allah ap, el Mi Yesus Kristus ap, dukdongobuka neika unyabe. Nun ap, nun ni Allah ap, el Mi Yesus ap, kanye tonok tenebuka, kanye talima dukdongobuka unyabe.
Winibuka umunye talak noutamak arye, ikin ning ton upsilyopura, Allah elce anggunti, teleb kipdeipsilirye, ‘Darapdongobuka unamak’ tenen, mikip arepsilyopura, pil pia palibuka dona ati deiyok ning arenamsile. Allah arye, ‘Sik ap, Yesus Kristus ap, kanye dukdongobuka unyaka deice arye, pia kam unamake. Teleb arye dirina kan-kan ak, na ap dukdongobuka neika unamap’ tenen, yukupsuke.
Anggun kan-kan unyak ati, Allah yupu aik talina deiyok nang ati, ayupu ton nyapnusine. Ara, na babye Allah yupu aik talina deiyoknye birye, na nyapnusin yupu kekebuka, ‘Wininamlulum’ tenen, moropsine. Tonda, Kristus nong deice ikin ning deibikbuk donmoka ani, obikbuk dibuka ara, na asing arye akunum eipse. Tonda, Yesus tamubuka yanamle talak, Allah arye weik teleb ubuka mambul ning ap, dirina weik ap, upnamsil talak ara, na ap unamabe. Aning nirya wininye deice arye, na Peterus arye moropsine.
Aning ara, talya ati kum nyapsine. Deiyok ara, minop talak diksukumuk ulamik kilapu arye, Allah deice kanye deibuka ulamikce, sik talima noutam teleb ulamika deice aryuk, urasin teleb kilapu ubuka delilalamika ati, sik ulamik touk, anggun wini talak ululum kilapu babye, atouk unamlulume. Sik minop talak diksukum ulamik kilapu ara, sik nin yapu amutamak pia nimalye arye ulamik.
Minop talak ara, sikce tia talak ati domik aik, mitik teleb aik uamuk bukni, Kristus arye, Allah ap, ninye ap dana-dana ansinilina weik deiyoknye una ati, yayuk talak ara, talye tukwak ninye arye, domik aik noutamak kum wekelbiyuk. Kume, elce wekelbiyuk aik ara, atukwak mutuku noutamak kum ulule. El wekelbiyuk aik ara, malye ning tonok babye kum ulamuk aik, mambul weik aik wekuk. Yesus arye wekuk aik ara, tukwak mutuku noutamak kum ulule. Anyaik ara, im deice ulul aik atia.
Yesus ara, Pia Teleb Aik menekuka biyuk ning ara, nun lyena ati wekuk. Ura, Yesus ara, Allah dantam, ninye dantam, ansinilina weik deiyoknye akunum upsuke. Ara, Melkisedek arye apil dolamuk touk, Yesus ara, Melkisedek el yala atonunye ubukce, Allah ap, nun ap, teleb kibuka neika una ati, ansinilina deiyoknye pia unamsile.
Allah arye, duknyamuk bukni, el Dib Kanye arye, laka nyasulul yupu ara, ani. Ara, Allah el laka teleb yupu, ninye lyen yupu kekebuka dib tenebikca deice arye, sik Yahudi yala kum ninye babye, Allah doproplirye, melibuka talinamle. Sik babye, el mapu unamake. Allah arye, Yahudi yala ninye, Israel ninye ati, “Wininamsine,” nyalilamuk ning nirya ara, anggun Yahudi yala kum ninye babye, dolonamlume. Anggun ap, Israel ninye ap, kanye talima dukdongobuka, nong tonok atonun akunum teleb kipdeipsuke. Tonda, Allah arye, “Kristus deice arye, winibuka wininamsine,” nyabuka nyalisilye ning nirya ara, anggun ap, nun ap, neiktotouk dolonamabe. Aning nirya dolonamaba deiyok ara, el laka teleb yupu, ninye lyen yupu dib tenenyap deice arye, arisiliba dolonyabe.
Ura, bol koplobuka pia kam una ara, talye winina kum bukni, ara na areamnulum ninye ap, an ap, ance dopdeipnulumnye Yesus Kristus ap, nun nirya talima dukdongobuka neika una ati nyapne. Aninye nirya arye, nunti diba tenepsikirye, nun bitinye ap, aninye ap, talima dukdongobuka neika ubibya deice arye, pia kam unamake.
Ninye melina ati apil dopluma deice ara, yuk nang arye anggun Korintus nang ati, ‘Kume, anang ara, telebuk wininyak’ tenen, laka biknamake. Apil dolulum talak ara, ninye weik arye nyanamake. “Anggun Korintus ninye ara, ‘Kristus el laka teleb yupu dib tenenyape,’ nyalamak touk dipkoprop ayupu uk talibuka dobolbanyake. Tonda, sikce nun ap, yuk mutuku ninye ap ati, sik ning weik arye bokuka aresinyake,” nyanamake. Aning ati ara, ninye weik arye, nun Ni Koprop Allah ati, “Telebe,” nyanamake.
Anyapmasin yupu aubuka anya arye, na weitcapu atonun ninyeo, anggun babye, anggun bidamang ati, pia moubuka kalekelanamlulume. Ara, ‘Nun kan-kan tonoknye do, tonok kil do, sik kanye talima noutamak ara, malye winin ning weik upliba, diba kum tenekirye, Pia Kam Una Deiyoknye Allah ati, urasin tamubuka yukak bicak’ tenen, moubuka kalekelanamlulume.
“Nun malye unyaba, patasilye touk melibuka lyesulule,” nyapmanu ara, deiyok ton ani. Ara, Musa sekamuk yupu deice arye nyalul touk, ‘Allah ap, ninye ap ansinilina deiyok nang kibuka apil donamak’ tenen, wibuka delinyake. Bukni, anang ara, sik babye tukwak nang anya arye, malye winipmanto nang ton unyake. Bukni, Musa sekamuk yupu, mem yupu akunum aribukba, daulamuka ani, keting tamun yupa weik akunum ubukba, aminyan ara, Allah arye, el winiryuk nyalilamsuk yupu deice arye, el Mi Kopropa wibuka deibukba, nun ap, Allah ap, ansinilina weik deiyoknye usulule. Yesus ara, malye winin ning kum winipmantonye ulule. Allah arye elti, pia teleb updeibukba, malye winin ning tonok babye kum winilule ati, pia telebnye ulule.
Aning ati ara, Allah arye nunti, “Wininamsin,” nyabuka nyalilamsil yupu, winiryuk yupu ara, akunum kintinipsukopura, Kristus arye, Allah ap, ninye ap dana-dana Ansinilina Deiyoknye usulule. Apil dobuka usilya deiyok ara, ani. Ara, Allah arye yukusilye ninye nirya ara, Allah arye, “Winibuka arenamsine,” nyabuka nyalilamsuk ning, ‘Dipkoprop doprobikirye, aning talibuka pia teleb unamak’ tenen, Kristus arye nun Ansinilina Deiyoknye usulule. Ura, Allah arye, ninye teleb ulina ati, yupu nyalilamukba, minop talak ayupu winilamika noutamak ara, Allah arye yukulamuk ninye, sik malye winilamik ning ap, nun malye wininyap ning ap, kum danalina ati, Kristus dibuk deice arye deksuke. Kristus arye nun lyena ati, punupdeipsuka deice arye, nun malye winilamubu ning noutamak lopdeipsukce, lyebuka deksuke. Nun punupsuka anya arye, Kristus ara nun ap, Allah ap, Ansinilina Deiyoknye usulule.
Elce, “Wininamsine,” nyabuka nyalilamsuknye, Allah ara, tilila kum nyalule. Elce nyasilye touk dipkoprop ulula ati, nunce, ‘Allah ara, dipkoprop lyenamsil’ tenen, diba tenebuka dinauk unamabe. Winibuka winibirye, laka arye nyanyap yupu ara, yuk bisik kirikuka bana kum, el yupu uk talibuka pia batakna kumce, pia talibuka unamabe.
Piblisite