Ibrani 2:16 - Eipomek

¹⁶ Ayupu ara talye kum nyapsine. Yesus arye melilul ninye ara, Allah el im deice pil don nang malaikat ati, kum melilule. Aning ara kume. Aning kum bukni, nun apu kopropa Abraham arye deibukba, dadeipdanin yangalamika ani, dadelisinyak ninye, nun tukwak ninye ati, melibuka lyesulule.

Ibrani 2:16 Referans Kwoze

Galatia 3:29

Kristus ati diba teneplum ati, ‘Na dokola ninye’ tenen, akunum dopsuk ninye nirya ara, Allah arye nunti winibuka tenesulule. El kanye ara, ‘Abraham birye deibukba, dadeipdanin yangalamik mapu atonun ninye unyaka anya arye, aninye babye, narye Abraham biti nyalilamse ning dopropnamake,’ tenesulule. Tonda, “Abraham birye deipliba dadeipdanin banamak ninye ati, teleb ulinamne. El deipkirikdanin banamak mapu ati, teleb ning arenamne,” nyabuka nyalin yupu deice arye nyamuka ara, ‘Wini talak diba tenenyak ninye ara, sik babye atonun arenamne,’ Allah arye tenesulule. Na Paulus arye laka nyapsine.

Galatia 3:16

Allah arye Abraham biti, “Wininamkine,” nyabuka nyalin yupu nyalamuk ning ara, Abraham ap, elce deibukba, dadeipdanin balamika ani, deipnamik mi, Yesus ati, nyalamuk. Allah yupu noutamak sekamik ning ara, Allah arye Abraham biti, “Ance deipminba, dordeipdanin banamak mapu arye, dadeipdanamak mapu arye tukwak mutuku ninye im sirya, mutuku sirya nirya noutamak arye, ninye weika arye teleb ulinamak,” kum nyalule. Kume, Allah arye nyalamuk yupu ara, “Ance deipminba, dordeipdanin banamak nang arye, deipnamak mi ara, el deice arye tukwak mutuku ninye teleb ulinamne,” nyalule. Ati, anyalilamuk yupu noutamak ara, “Mapu,” nyamtu toura, ara ‘Ninye weik ati nyapsuke,’ teneptibye bukni, ayupu deice ara, “Mi tonok,” nyabuka anya arye, adeice ara, ‘Ara tonok mi ati nyapdeipsuke. Tonoknye birye teleb winilinamsile’ tenen, kel kinyabe. Allah arye Abraham biti, “Ance deipminba, dordeipdanin banamak mi,” nyalilamuk mi ara, yuknye biti kum nyalilamuk. Kume, ara doyanamuk keting tamun noutamak arye, Yesus Kristus deipnamuk ning ati ayupu nyapsuke.

Kejadian 22:18

Tonda, ance deiplum mi arye deipliba, dadeipdanin balamica ani, pia dodeipdanin binamak nang ati, narye teleb kipdeipnamne. Teleb kipdeipnyopura, anang arye dodeipdanin balamica ani, aminyan deipnamak nang deice arye, mutuku sirya, im sirya nirya, unamak ninye ati, teleb kipdeipnamne. Deiyok ara, narye nyapmakunuba ance, na yupu kekemomce, aninguk winipmalam ati, ayupu nyapkine,” Allah arye, Abraham biti nyabuk.

Ibrani 12:10

Nun ni yapu kopropa arye, ‘Aning teleb,’ tenyamsik touk, wenebuka peterelamsik bukni, nun Ni Kopropa Allah arye, ‘Na mapu pia teleb kilinamne’ tenen, asilesilirye, wenebuka peteresulule. Winisilya ara, talye ati kume. Ara, ‘Na malye ning tonok babye kum upniliba, pia diksukumuk unye touk, na mapu babye atonun neika unamak’ tenen, wenebuka peteresulule.

Ibrani 6:16

Ura, Allah arye el si ap, tabakuka nyabuk ning ara, deiyok ani. Ara, anggun kele. Ninye arye, “Wininamabe,” nyabikce talak ara, yuk nang kekebikirye, ‘Dip do, tilila do?’ tenebikirye, ‘Yupu deice wapdacak’ tenen, yupu sekelongona ati, weik si ap tabakuka nyanyake. ‘Amambul si deice arye nyapsine,’ nyanyake. Weik si ap deice arye nyabikcopura, sik kekece ninye yupu walana kum diparyuk, weik si ap kekekca deice ara, ‘E, aning ara, pia dib nyapmasiyake,’ tenebikirye, diba tenenyake.

Roma 2:25

Ura, Musa sekamuk mem yupu talibuka, dipkoprop dobolbalamtumtoura, Allah el mapu una ati, laka kilin ning, den bam bol deice ning sekelulum ara, mitik teleb upsutu bukni, Allah el mem yupu yaniltanauk winipmunyopura, anggun den bam bol mouse ning sektinga babye, ‘Deiyok pia kum upsuka atia,’ tenebuka anggunda talye nang atonun kibuka ululume.

1 Peterus 1:20

Allah arye, aning-aning nirya min kum kwepdeiamuk talak ara, ‘Yesus arye ninye lyepnamle’ tenen, akunum wibuka deibuk bukni, winira sirya talak ara, anggun lyena ati akunum lakak arepsukbuk, kel kibape.

Ibrani 2:15

Tonda, yata tukwak ninye nirya do nirya, ‘Aminyan talak, nun dibibyak’ tenen, ilil asa unyak ninye ara, Isa Mutuku Dongonye arye, aninye nirya tapu koubuka talyamukba, el amu tam ulamik. El amu tam ulamik ninye nirya ara, Yesus arye, ‘Aninye loplopnirye lyepnamne’ tenen, ninye atonun dayukce lyepsuke.

Ibrani 2:17

Arup nyapmasin yupu nirya aning ati ara, Allah arye Yesus ati, ninye atonun ubuka deibukba, Yesus ara el weit yapu atonun ninye, tukwak ninye atonun dayuk. Ninye atonun dayuk ning deiyok ton ani. Ara, ninye malye un nang ati, bico tenyamsukce, Allah ap, ninye ap, ansinilina pil dona deiyoknye upsuke. Nun malye winin ning ati, talye luparabuka oplopsutu bukni, bico tenyamsukce, ‘Batakna kum arye, teleb ubuka lyena pil donamsin’ tenen, ninye nong atonun dayuk. Ton deiyok ara ani. Ara, Allah arye Yesus ati, ‘Ninye atonun uplirye, tukwak ninye sik malye winin ning kum kipdeiplirye, sik pununa ati, dipnamle,’ tenyamuka ati, Yesus ara, ninye nong atonun dayuk.