Ibrani 13:17 - Eipomek

¹⁷ Ura, Allah diba tenena ati, ninye deiyok nang atonun usinyak ninye arye, nyasinyak yupu moubuka kekepmunce, sik amu tam bukuka, dakeiyam asa arye unamlulume. Sikce, ‘Nun amu tam unyak ninye ara, diba tenebuka teleb unyak do, kum do?’ tenen, kalikuka disinyaka ara, urdem ati kum unyake. Aminyan talak Allah arye adeiyok nang ati, asipdeliba, sik pil nirya ati, “Winilamubu, winilamubu,” nyabuka laka nyabikiba, Allah arye anang ati, yupu lipsisikuka bokeipnamle. Kekena kumce mandipna dopmunyopura, anggun deiyok nang ikin kanye bobicopura, anggun babye anggun bidamang ati, malye winililanamlume. Ati, anggun deiyok nang arye melibuka dosinyak pil noutamak nirya ara, ‘Telebuk unyabe, nun deiyok nang arye, kanye deibuka unamak’ tenen, anggun deiyok nang arye nyasinyak touk, kekebuka dobolbanamlume. Sik yupu yanina meme.

Ibrani 13:17 Referans Kwoze

1 Timotius 5:17

Winira, yuk yupu ton nyapnukine. Allah yupu peteren nang, sik deiyok nang nirye arye, anang ati kibuka si erenamake. Allah yupu aik deiyok nang nirya ati, si erenamak bukni, weik mambul ning ara, Allah yupu pia bita lilibuka peterena ap, ‘Yuk ninye dib tenepnamak’ tenen, tilila nyana ap wininyakce, pil donyak nang ati ara, weik arye si erenamlulume nyapkine.

Ibrani 13:7

Ura, sik ninye deiyok nang atonun ubuka, Allah el yupu peterelamsik nang ara, sik winilamik ning luba kina kume. Anang arye winilamik ning ara, tuba tenenauk unamlulume. Sikce diksukum ulamikce, teleb pil dolamika deice arye, nong kilamuk ning nirya ara, aning tuba tenenauk unamlulume. Anggun deiyok nang arye diba tenelamik touk, anggun babye atonun, diba tenebuka telebuk wininamlulume.

1 Peterus 5:5

Asurat deice arye, “Yuk nang ati, nimalye arye sik amutamak unamlulume,” nyapmasin touk, anggun wisi danana kum arye, kam nang atonun nang ati, ayupu nyapsine. Ara, sik wisi nang amutamak umunce, sik yupu kekebuka nimalye arye unamlulume. Buku Amsal yupu noutamak sekeipsik yupu aupmala ati nyapsine. Ayupu ara ani. ‘Sik kanye erebuka, dildanyak ninye ara, Allah arye aninye ati bataklirye, sik yupu sekelule. Bukni, sik kanye darabuka, talima nimalye arye amutamak unyak ninye ati ara, bico tenepsilirye, talye luba kibuka melisulule.’ (Amsal 3:34) Ayupu tuba awamsuka ati, anggunce yuk ninye nirya ati, anggun bidamnye kanye darabuka, talima nimalye arye teleb ubuka unamlulume.

Rasul 20:28

‘Malye winipnyap’ tenen, anggun kanye talima moubuka umunyak arye melibuka dildanamlulume. Tonda, Allah El Dib Kanye arye, ‘Sik talima melipdakirye dinamak’ tenen, melin nang atonun kipsuk akarye, wibuka deipsuk nang ara, anggunce sikti, sik talima moubuka kalekuka dinamlulume. Allah el mi koprop dibukura, el ining banmok deice arye, Allah dekuka deibuk ninye ara, domba weilamak nang arye sik domba weilamak touk, Allah el diba tenebuka talinyak nang ati, melibuka weinamlulume. Anang ati moubuka dimunce, melinamlulume.

Yeremia 13:17

Anggunce na Yeremia nyapdeipsin yupu, kum kekepnumunyopura, na adiparyuk, ninye babye kum banyakak dabinirye engenamne. Ara, sik kanye talima erena deice arye, maknya kilanyaka ati, nyapne. Na asing maka langdipnilirye, saknamnile. Ara, winipmanto ara, anggunda, Allah el weilul domba atonun ululum bukni, yu nang arye anggunti opsikirye, tomobuka sik mutuku tamubuka bobicak arye, wenen aik dongopnamsiaka ati, aning eipnirye engenamne, nyapsine. Nabi Yeremia birye, nyabuk.

1 Korintus 16:16

Wininyaka anya arye, na kayapo anggun Korintus ninyeo, mikip arye, ayupu ton nyapsine. Stefanus ap, el aik unyak nang ap, sik diksukum ulamak atonun unyak ninye arye, ‘Yesus ati diba tenebik ninye melinamap’ tenen, pil donyak ninye nirya ara, sik amu tam bukuka, sik nyanyak yupu nimalye arye, kekebuka unamlume. Sik anang arye, ‘Allah el piluk donamape’ tenen, tabakikirye, nun ap pil mikip arye, donyapa ati, ayupu nyapmasine.

Pilipi 2:12

Aning ati ara, na kayapu, minop talak dipdongobuka, anoutam talak nirya, na yupu kekebuka, teleb kibuka winimunya atonun, pia wininamlume. Tonda na ap, neika ulamubu talak babye, wini talak nun yuk-yuk unyap talak babye, Allah el yupu uk kekebuka, el yupu uk talibuka dobolbalulum touk, apia wininamlulume. Allah arye, ‘Apil winibuka donamak’ tenen, teleb kibuka tenyamsuk touk, ‘Aninguk pataplya ati, apiluk tenebuka donamak’ tenen, anggun kanye talima noutamak melibuka pil dosulule. Winibuka anggun talima noutamak pil dosulul anya arye, anggunce atouk, yuk-yuk tenepmunce, ‘Allah arye lyepnamnil ara, weik mambule,’ tenenamlume. Tonda, ‘Na mikip kumnye birye malye winipnun’ tenen, kanye pia moupnamlulume, na Paulus arye, nyapsine.

Keluaran 32:31

Nyabuk touk, Musa birye Allah Yahweh el dam ila tuba welebiyukce nyabuk. “Se anang ara, pia weik malye winipmak ning ara, laka nyapnukine. Sikce sik bidamang ati, sapi basam urasin atonun ning, emas dobuka memepmekce, aning ati, ‘Nun ni Allah atia’ tenen, aning si erenmek.

Pilipi 2:29

Epafroditus yalyopura, anggun Yesus ap, dukdongobuka umunye ninye arye, anggun weik kanye deibuka, taruk aribuka, telebe nyabuka ansininamlume. Tonda atalak-atalak nirya ara, Epafroditus ap, el atouk nang ap, ati, si erenamlume. Ara, urdem ati kume.

Roma 14:12

Anyabuk yupu ara, aupsuka anya arye, ayupu deice arye kel kinyabe. Nun tukwak ninye nirya arye winilamubu ning nirya ati, laka nyabibyeba, Allah arye, “Aning telebe, aning ara malye,” nyabuka yupu lipsisikuka bokeipnamsile.

2 Tesalonika 3:14

Yatanye birye do, nunce asurat noutamak sekeipmap yupu kum kekeplirye, batakuka yaniplyopura, anye biti moubuka tenenamlulume. El ap, neika una kume. Leipropnamlulume. Ura, winipmunyopura, elce, ‘Se, na malye wininmanabuk, wininmaniake’ tenen, ‘Alye upnamle’ tenen, nyapmasiabe.

Ibrani 13:24

Sik Allah yupu peterena deiyok nang ap, Allah ati diba tenyamikba, Allah arye, ‘Na ninye unamak’ tenen, dololamuk ninye nirya ap ati, “Telebe,” nyanamlulume. Sik Italia mutuku diba tenenyak ninye arye, anggun nirya ati, “Telebe,” nyapsiyake.

Yesaya 62:6

Na Allah arye, Yerusalem mutuku weik asik warikdongobuka cang keil poka dobik deice, ‘Nun mal olan nang arye, yanuka opsicakʼ tenen ati, kalikna deiyok nang ton wipdeipniba, anggun amutuku noutam ululum ninye ati, kalikinamsiake. Sik anang ara, keting noutam babye, lukunyan babye, talye mangkau asa kibuka, tunim abuka kum unamake. Bukni, pia tuba-tuba, na Allah Yahweh atibuk tenebikirye, “Nun ni Allaho, ance nunti, nyalin yupu deice arye, ‘Winibuka teleb kipdeipnamsine,’ nyamsulum ning ara, tuba teninauk unamlulume,” nyabuka, unamake.

Pilipi 4:1

Na kayapu. Na weit yapu atonun ninyeo, pia bico tenesunune. ‘Se, kanye eibratibye’ tenen, pia tenesunune. Anggun nirya ati, na kanye pia weik deipsine. Yesus arye dekna ning arepnamnil ning deiyok ara, anggun tia. Ara, Yesus el laka teleb yupu peterelamsisibuk, anggunda diba tenelamluma ati, dekna ning arenamnile. Yesus el weik mikip deice arye, nun nong talye nong dobuka, el nong pia teleb ulye touk, nun nong im deice ninguk kwepdeipnamsile. Aning ati ara, na arup nyapmasin touk, nun Deiyoknye Yesus talima dukdongobuka umunce, diksukumuk ubuka, kanye lamapdongobukauk unamlulume.

Pilipi 3:18

“Nun peterebupu ninguk talibuka, wininamlulume,” nyapsine yupu ara, urtalya ati kum nyapsine. Deiyok ara, ani. Minop nyalamsise touk, ila tamubuka tonap, engebukapnirye, ayupu deiyok ara, anye nyapsine. Ara, yuk nang weik, sik malye-malye winilamaka deice arye, ‘Kristus wanwanun yo deice obik ara, talye ning uk,’ tenebuka yaniltana nang atonun wininyake.

Yakobus 4:7

Aning ati ara, anggun kanye talima nimalye arye ubuka, Allah el amuak umunce, el yupu uk kekenamlulume. Isa Mutuku Dongonye ati ara, el yupu kekebuka dobolbana kum arye, manya deibuka tunimapmunyopura, Isa Mutuku Dongonye anggun dam arye, sakdakuka yukak binamle.

Pilipi 1:4

Narye anggun nirya ati, Allah morosunun talak nirya ara, weik kanye deibuka, anggunti Allah morosunune.

Lukas 16:2

Nyabikopura, bona weik talinanye birye, el yo bok delina deiyoknye yukubuk ati, yayukopura, ayupu nyabuk. “Yuk nang arye, ‘El pil malye ubuka dolya deice arye, an yo bok kum ulule,’ nyakinyak ara, yata wiriplum deice arye na yo bok kum danalul do? Anda na yo bok moubuka delina deiyoknye tuba kum unamlama ati, na yo bok deice pil dolamlum ning nirya ara, ‘Winibuka, winibuka pil dolamse,’ nyabuka, laka nyapnunilyame,” nyabuk.

Amsal 5:13

Tonda, ‘Nara yata ati na peteren nang arye nyapman yupu ara pia kum kekelamse do? Tonda, na peteren nang arye, nyapman yupu ara, amul deice arye pia moubuka kum kekelamse do?’ tenelamunce, engenamlume.

1 Samuel 8:19

Samuel birye, aning nirya laka nyabukba, sik Israel ninye arye, Samuel nyanmok ning ara, kum kekebikce, “Talye nyanmasila ati, awaplye babye, teleb uka. Nun patapsil ning ara, ninye deiyoknye Raja arepsutumba, elcuk talipnamsile,” nyabik.

Kejadian 16:9

Hagar birye nyabukba, Allah el si Yahweh arye dopdeipmok Malaikat arye, tamubuka nyabuk. “Kume, an deiyok kil dam tamubuka bimince, el amu tam bukuka, el yupu kekebuka unamlyame.

Pilipi 2:16

Ayupu nirya nyapmasin touk, Allah el kam una deiyok yupu talibuka, dipkoprop moubuka kekemunce, telebuk utumopura, ‘Na talyeuk pil kum dolamse, nong lakak upnamle’ tenen, aminyan ara, na weik kanye deipnamsine. Ara, Kristus arye, ninye mutuku-mutuku nirya ati, yupu bokeiplirye, wenebuka opnamle talak ara, na weik kanye deipnamsine ati, nyapsine.

Efesus 5:21

Tonda, anggunce Kristus ati, ‘Elda mambule, nun Deiyoknye usulule’ tenen, winimunya deice arye, anggun ap, neika umunye ninye ati ara, sik amu tam bukuka nimalye arye, unamlume. Kanye talima kum ereldanamlulume.

Yehezkiel 33:2

“Se, anda ninye sirika arye, deipkiknye ulyama ati, an mutuku nang ati, nyapnulyame. Yata mutuku do nirya, tonok mutuku noutam ara, na Allah arye, ton mal olana yu nang dopdeipniba, olyanganamak talak ara, amutuku nang ara, winipnamake. Amutuku ninye arye, ‘Nun mutuku mal olan nang, olyanamsiyakʼ tenen, sik kan-kan arye, kalikna deiyoknye ton wipdeibikiba, akalikinanye birye, pia moubuka dinauk unamle.