Ibrani 12:9 - Eipomek

⁹ Aninguk kum bukni, nun nirya ara, nun ni yapu arye wenebuka peterelamsikba, kekelamubu. Winibuka winilamsik ning ati, nun ni yapu ati, si erebuka kanye delilamubu. Nun tam ninye ati, mitik anun arye si erelamubu bukni, nun Ni Kopropa Allah arye, nun kanye talima ap, dib kanye ap, kam ulisululnye ati ara, adiparyuk weika arye si erebuka, el amu tam bukeipyopura, kam pia unamabe.

Ibrani 12:9 Referans Kwoze

Bilangan 16:22

Nyabukba, kekebikopura, sik atikmek ninye nirya ap, Harun ap, Korah ap, nirya ara, sik adiparyuk tuku deice kanipdongobuka bukikce, Allah ati nyabuka morobik. “Se, nun ni koproba Allah, nun tuku ninye ap, talye daulye kam un ning, yala-yala nirya ap ati, kam una deiyok ning, nun kanya ara, an diamuk aresilyame. Ninye tonoknye birye, ton, malye upmok ning ati, Allah ance an mapu, nun Israel yala ninye nirya ati, yu kanye bopmalamce, adiparyuk opnamasilam do? ‘Naio, ati nunda kum opnusilamʼ tenen, moropmakiyabe,” nyabik.

Bilangan 27:16

Morobukce ayupu nyabuk. “Na ni Allah, anda Yahweh unmalame. Ancuk, ‘Ninye kam unamak’ tenen, kam una deiyok ning dobuka, ninye dib kanye kam un ning arepsulumba, adeice ninye im sirya, mutuku sirya nirya kam unyake. Anda kam una deiyok ning dobuka ninye nirya arelyamnye, ninye talima noutamak babye, elilyamnye birye, ‘Israel ninye talibuka, sik ninye deiyoknye kiplirye banamlanye wibuka deipnalam’ tenen, moropkine na nio.

Yesaya 42:5

Nara Allah na si Yahweh unune. Narye nyapkine. Im ap, im noutamak ulul ning ap, im deice ap nirya ara, naryuk kwepdeipse. Tonda, naryuk, tukwak im sirya, mutuku sirya nirya ap, tukwak mutuku ulul ning ap, tuku deice arye butukuka palamle ning aning-aning nirya ara, narye kwepdeipse. Na aryuk tukwak ninye ara, anggun isin aresunune. Areneba kam unyake. Tonda, anggun dib kanye babye, naryuk anggun talima noutam dongosunune.

Yohanes 3:6

Ninye arye delinyak ning ara, talye ninye nonguk delinyak bukni, Allah El Dib Kanye el mikip deice arye, ninye dib kanye ati, kam una deiyok ning arisilirye, winiryuk ninye atonun kilisulule.

Ayub 12:10

Kam unyak ning yala-yala nirya ara, Allah el mikip deice pil doplirye, melipliba, kam unyake. Tonda, Allah el mikip weik deice aryuk, kam un ning aresilyeba, nun tukwak mutuku noutam unyap nang nirya babye, kam unyabe. Aning nirya ara, Allah aryuka!

Zakaria 12:1

Sik Israel nang ati, Allah Yahweh arye “Winipnamsine,” nyapdeibuk yupu ara ani. Allah Yahweh elcuk im ap, tuku ap kwepdeibuknye biryuk, aning-aning nirya taleamukce, ninye ap kwepdeibuka ati, sik talima pum tam ulamle kanye ton dongopdeibuk. Allah arye nyabuk yupu ara, ani.

Keluaran 20:12

“Anggun ni yapu ap, anggun nin yapu ap, ‘Sikda mambule’ tenen, sik yupu moubuka kekemunya deice arye, teleb winipmunyopura, keting tamun weika arye tonap arepnamsine. Pia teleb mutuku arepsinyopura, kam tuba unamlume,” Allah el si Yahweh arye nyabuk.

Yesaya 38:16

Na ni Allah, anda mikip weik deice arye aning-aning nirya talilyame. An nyasiminye yupu nyan deice ap, an mikip arye winiminye ning deice ap arye, nun ninye nirya unyabe. Aning atonun na babye, na kam una lo ton ap tabakuka arepnilyame. Ati ara, ance melibuka kwetepnutumce, kam una lo ton arepnutum toura, na tuba kam unamne. Ati, anti diba tenepkinirye unamne.

1 Peterus 5:6

Aning ati ara, Allah el mikip pia weik ululnye, el amu tam bukuka, anggun kanye darabuka, talima nimalye aryuk unamlulume. Winibuka umunyopura, Allah arye tenepsuk talak akunum uplyopura, anggun dobuka ereipnamsile.

Yakobus 4:7

Aning ati ara, anggun kanye talima nimalye arye ubuka, Allah el amuak umunce, el yupu uk kekenamlulume. Isa Mutuku Dongonye ati ara, el yupu kekebuka dobolbana kum arye, manya deibuka tunimapmunyopura, Isa Mutuku Dongonye anggun dam arye, sakdakuka yukak binamle.

Yesaya 57:16

Ayupu nyapmasina ara, talye ati kume. Deiyok ara ani. Ara, narye na mapu, anggun dam ati, “Anggunda pia malye ululum nang,” nyabuka, pia ati kum wenepnamsine. Tonda, narye sik malye unyak ning ati, tuba-tuba yu upnilyeba, anggunti kum wanamsine. Deiyok ara, ‘Na yu tuba upnilyeura, anggunti pia wenepsinirye, ikin ning anggun deice pia deipsinyopura, na mapu anggun imun kanye bobuka, talima daksaknul’ tenen, tuba tonap kum wanamsine. Narye anggun nirya ara, memepdeiamsak umunya ati, aminyan talak naryuk, anggunti, kanye tonap teleb kipdeipnamsine.

Imamat 19:3

Tonda, ninye nirya adiparyuk, anggun nin yapu ap, anggun ni yapu ap ati, ‘Sikda mambule’ tenen, kinamlulume. Winipmunyopura, tekbarye sum nirya ara, pil dona kumce, asum deice na Allah arye nyapdeamsi touk, na siuk erebuka, si erenamnululume. Nara, anggun ni Allah Yahweh unune. Anggun ni Allah, na tonok unune.

Roma 9:5

Tonda, nun apu yapu ara, Israel yala ninye arye delilamikba dadeipdanin, yangalamik nang ara, weik mambul nang ulamik. Tonda, ninye lyena ati, Allah arye wibuka dopkwetepsuknye, Kristus el deiamrik nang bitinye babye, sik apu yapu ara, Israel yala ninyeuk ulamik. Anirya ati ara, sik Israel ninye ara, talye ninye kum unyake, nyapmasine. Aning atonun Kristus babye, talinye kum ulule. Elda, aning-aning nirya talibuka deice tam Weik Deiyoknye kibuka ulule. Elda, dipkoprop Allah ulule. ‘El si ara, pia erenauk unamap’ tenen, Amin nyapsine.

Amsal 30:17

Ninye ton el li koproba ap, el lin ap, sik akunum wisi dadikirye, aik bukdikce talak ara, sik bitinye ati, akutubuka malye yupu nyalulnye bira, aminyan talak Allah arye, anye bira wenebuka oploplirye, bai tam donokliba, Gagak maka ap, Rajawali maka ap arye, anye bira el asing ara, lukuka dipnamdake.

Ulangan 27:16

Tonda, “Yata nang do nirya, sik wisi nang ati, bico kum tenebikirye, anang ati, si erebuka kina kumce, batakikiba, talye kankan uk ulamikcopura, epdakca menenga ara, Allah arye arepliba, anang sik mapu dam, ikin ning yalyeba, dolonamake. Adeice arye dipnamake,” nyabuka, yupu deice arye, sun yupu nyanamake. Ayupu ara, anggun Israel nang nirya kekepmunyopura, anggunce tamubuka nyanamlum yupu ara, ani. “Yo, dipkoprob nyapmasuluma ati, nunce, “Aninguk winipnamleʼ tenen, ‘Akunuma,’ nyababe,” nyapnamlume.

Penghotbah 12:7

Aning atonun, nun ninye nong ara, tamubuka tukwak min kum danmapye talak ap, nun kanya tamubuka el arepsuknye Allah dam min kum binmapye talak ara, nunce Allah atibuk tenenamabe. Ayupu nirya nyapmakina ara, talye ati kume. Ara, ‘Na wisi daniryuka’ tenena meme, kam tuba unmaminye talak aniryuk, Allah diba tenebuka el si erepmince, ‘Allah atibuk tenebuka kentinilinamlyame’ tenen, nyapkine.

Yakobus 4:10

Anggun kanye talima nimalye arye ubuka, Allah el amuak kipdopmunyopura, Allah arye anggunti erepdeipnamsile.

Maleaki 1:6

Na Allah Yahweh, aning-aning nirya talibuka, im deice yin talin malaikat sik weik deiyoknye unune. Narye, na si eren aik pum tam, pil dona deiyok nang, anggun imam-imam nang ati nyapsine. Anggun teneipdelulume. Anggun kele, yata ninye do, sik mapu arye, sik ni yapu ati kanye delinyake. Atonun, weik nang amu tam unyakce, aik pum tam talye pil donyak ninye ara, sik deiyok nang ati kanye delinyake. Nara, anggun ni koproba Allah Yahweh unune. Tonda anggun weik deiyoknye unune. Ati ara, yata ning ati, anggunce nati, si kum erenululum do? Nara, weik mambulnye unun bukni, anggunce nati, ilil kum usulul do? Dipkoprop anggunce na ap, na si ap ati, malye nyanululume. Bukni, aning nyapsiniba, angguncuk tamubuka nyalulume, “Nunda yata ning wininyaba deice arye, an si ati malye nyanyap do?” nyabuka asipdenulume.

Yehezkiel 22:7

Tonda, anggun Yerusalem mutuku ululum nang ara, anggun ni yapu ap, anggun nin yapu ap ati, ‘Telebe,’ nyabuka, sik yupu kum kekemunce, sikti kum kanye delilulume. Tonda, ninye asik nang, yuk karin mutuku arye yanuka, anggun mutuku noutam, sik ap neika ululum nang ati, ikin ning weik, sik nong deice delilulumba, ‘Seʼ tenen, imun kanye bobuka unyake. Tonda youwak kilapu ap, sik ni yapu dibikba kwaknamne mapu yanuka unyak mapu ap ara, anggun dam unyak buk, talye yupu nyaplopmunce, kum melilulume. Batakalulume.

Roma 9:3

Na yala nang kopropa, nun Israel yala ninye ati, imun kanye bonune. Imun kanye bonuna deiyok ara, nyapnusine. Ara, na yala ninye sik Israel ninye nirya ati, ‘Nun ni Allah arye lyeptue’ tenen, pia se tenenune. Israel yala ninye nirya lyena ati ara, ‘Allah arye na Paulus ati, bataknuturye, Kristus ap, na ap wilibuka yuk-yuk deipnutuba, adeice arye Israel ninye nirya lyeptue’ tenenune. Ara, ‘Se, na yala nang kopropa, Israel ninye nirya lyeptue’ tenen, pataniliba, nyapsine.

Roma 1:3

Sik seklamik yupu noutamak ara, Allah el Mi Koprop ati laka nyalamik. Allah el Mi Kopropa Yesus ara, minop talak ulamuknye Daud birye deibukba, dadeipdanin yangalamika ani, Daud el yala nang arye Yesus yanuka deibik.

Rasul 2:30

Bukni, Daud ara, aminyan ak, winipnamuk ning ati, laka nyalamuknye nabi ulamuk. Tonda, Allah arye Daud biti, ‘Dipkoprop winipnamne,’ nyapdeibuk yupu deice arye ayupu nyabuk. ‘Daud elce deiplibuk, dadeipdanin balamica ani, sirya tam deipnamak mi ara, Daud el ulye touk, ami babye, erebuka weik ninye deiyoknye kipdeipnamne,’ Allah arye nyabuk. Allah arye nyapdeibukura, Daud kekebukce akunum kel kiyamuk.

Lukas 18:2

Tonok asik dolamik noutam ninye yupu bokolina deiyoknye ulamuk. Anye bira, Allah dib kum tenyamuka anya arye, Allah el si kum erelamuk. Tonda yuk nang ati, bico pia kum tenelamuk.

Lukas 18:4

Asum-asum nirya ayupu uk nyabuka morolyangalamukura, ayupu bokolinanye birye, “An yupu kum bokeipnukine,” nyabuka batakalongolamuk. Winilamukura, sirya ara, anye birye nyabuk. “Allah diba kum tenenirye, yuk nang ati bico kum tenenun bukni, ayouwak kil batakna kum arye, pia tuba-tuba morolyanganauk unilya ati, elti, yupu lipsisikuka bokeipnamne. Elda pia morolyanganauk unilyebuk, lik unilya ati, winira el yupu bokeipnamne,” nyabuk.

Wahyu 22:6

Malaikat arye ayupu ton nyapnuke. “An kekepmamu yupu nirya ara, pia dib yupu uk ulula ati, ninye nirya arye ayupu diba tenepnamake. Nun Weik Deiyoknye Allah, el yupu laka nyalamik ninye, sik nabi-nabi nang sik kanye talima talyamukba, sikce el yupu laka nyabuka seklamik. Anye elcuk, ‘Na mapu nirya arye aminyan winipnamle ning kel kipnamak’ tenen, el malaikat dopkwetebukba, an Yohanes ati laka nyapmakile,” amalaikat arye nyabukba, kekepse.

Yesaya 45:10

Yatanye do nirya, el li koproba ati, “Naio anda yata ning ati, nara winibuka deipnulum do?” nyabuka asilelulnye bira, Allah arye wenebuka opnamle. Aning atonun yatanye birye, el lin biti, “Nongo, anda yata ning ati, nara winibuka deipnulum do?” nyabuka asilelulnye bira, Allah arye wenebuka opnamle.