Hosea 8:10 - Eipomek

¹⁰ Sikda, yuk pera mutuku nang ati, ‘Melipnamsiakʼ tenen, dengna ap, teleb ning ara, weik tonun binuka arenyak bukni, wini talak ara, narye anang nirya bulukapnirye, tonokak deipnirye, sik anang ati wenepnamne. Wenepnamne talak ara, pia una kum bukni, adiparyuk sik yuk-yuk mutuku ninye deiyok Raja nang ap, sik amu tam deiyok-deiyok nang ap arye, ‘Nunti dengna weik tonun arelyanganamsulume,’ nyabuka, ikin ning, sik Israel nang deice deibikcopura, sikda, ‘Se, yata wiriptibye do?’ tenen, kanye imun weik bobikirye unamake. Deiyok ara, aminyan talak, Asyur mutuku ninye deiyoknye Raja arye, sikti, ‘Dengna weik arelyanganamlume,’ nyaplirye, sikti, ikin weik deipnamla atia.

Hosea 8:10 Referans Kwoze

Yehezkiel 16:37

Ati ara, anggun bico tenelamlumba, malye-malye una ati, neika malamlum nang nirya ara, bulupdeipnamne. Winipnamne ning ara, anggunce imun tenelamlum nang ap, tonda anggunce, ‘Nun lik,’ tenelamlumba, anggun olana ati, yanganmek nang nirya ara, tuba tonap bulubuka, anggun dam deipnamne. Atalak ara, anggun damuk tikikirye, antanap dongopnamsiake. Winipsikceba, narye anggun baju nirya, kwiripnamsine. Winipsinyeba, sik anang nirya arye, anggun nong banang umunyak eipnamsiake.

Hosea 10:10

Ati ara, na Allah arye lo arepniba, yu nang arye, sik malye-malye wininyak nang nirya ati, olyanganamake. Winipnirye ikin ara, sik anang deiceuk deipnamne. Tonok mutuku nang kum bukni, mutuku-mutuku weik, yuk-yuk bukni, sik nirya arye ansinibuka, sik Israel nang ati olbinamake. Tonda, sikti, wenepnamne deiyok ara, sikce malye winin ning weik wininyaka ati, pia weik tonun wenebuka opnamne.

Yehezkiel 26:7

Anyapmasin yupu nirya ara, talye ati kum nyapsine. Deiyok ara, ani. Na Allah Yahweh, aning-aning nirya deice tam erebuka, Pia Mikip Weik Deiyoknye birye nyapsine. Narye, Babel mutuku nirya talibuka, ninye deiyoknye, Raja Nebukadnesar, Babel mutuku arye boyanyeba, anggun Tirus mutuku ululum nang ati, yanuka wareknamsiake. Ara, Raja mikip weiknye birye, el yin talin nang ap, tonda Kuda basam balye deice bukuka, ninye olbalammik yin talin nang ap, kereta perang deice bukuka, olban nang ap bobuka, sik Tirus mutuku nang ati, olyanganamsile. Elce yin talin nang, pia weik bobuka olyanamle.

Yesaya 10:8

Aning ara, talye ati kume. Deiyok ara, Raja Asyur el kanye erena deice arye nyalule. “Kume, narye talinun ning ara, na amu tam unyak yin talin nang, sik eitam deiyok nang nirya ara, weik eren nang, Raja nang atonun unyake.

Hagai 2:6

Nyabukopura, ayupu tonap dukdongobuka nyabuk. “Nara Yahweh, aning-aning nirya deice tam talibuka, im deice yin talin malaikat sik weik deiyoknye birye nyapsine. Na Allah arye tenepse sum akunum dam kina ati, lo mitik anunuk upliba, atalak kiplye talak ara, narye im noutamak ulul ning ap, tukwak mutuku noutamak ulul ning nirya ap, tonda mutuku-mutuku nirya ap, weik laut mekwen deibuk mutuku nirya ara, weik tonun luluknamle. Ara, narye, ‘Wini talak luluktue,’ tenepniba, adiparyuk luluknamle.

Daniel 2:37

Na ni koproba Raja ninye deiyoknye, anda pia telebnye. Yuk ninye deiyok nang atonun kume. Yuk ninye deiyok nang daunyak bukni, anda sik nirya talibuka deice tam ulyame. Allah im deice kwepdeibukce, eitam ululnye birye, na ni anti, ‘Amutuku nirya taliplirye, mikip weik ap, weik mambul una ap, urasin pia teleb una ap unamle’ tenen, wipdeibkukba ulyame.

Yeremia 42:2

“Naio, an asing arye elisilyame! Min talak ara, ninye weik ulamupu bukni, wini talak ara, nun mitik tonun tuba unamabe. Ati, wini talak mitik tonun tuba aunmab nang, nunce anti, moropnukabe. Ati, nunce nyapnukiab yupu ara, nun ni ance kekepsimince, an ni Allah Yahweh, an si erelyamnye biti, tenipsimince, moropsilyame.

Yesaya 36:13

Nyabukce, ayupu ton dukdongobuka, Yudea tam nyalamik Ibrani yupu deice arye, ayupu ton weik yupu deice arye nyabuk. “Raja Asyur birye nyapdeipsuk yupu ara, anggun nirya moubuka kekeplulume!

1 Tawarikh 5:26

Israel yala nang bukni, Kanaan tam isa si erebuka ulamika ati ara, Allah arye, pia karin mutuku, Asyur mutuku taleamuk ninye deiyoknye, el si ara Raja Pul, tonda el si Tilgat-Pilneser, el kanye noutam pil dobukba, aninye deiyoknye birye, Yordan mek koubuka, amek duman keting yangan tam ulamik yala nang ara, Ruben yala nang ap, Gad yala nang ap, tonda Manasye yala nang bukni, noutam arye bokdeibik nang ap, sik nirya ara bobuka, Asyur tam noutam, wenen asik deililbiyik. Ara, Raja Pul birye, sik ayala nang ati, bobuka deibiyuk mutuku si ara, ani. Hala mutuku ap, Habor mutuku ap, Hara mutuku ap, tonda Gason mek dam mutuku ap, dobuka delilbiyuk. Binuka deiamuk ani, atalak arye dipdongobuka, daulamika ani, abuku sekekuka deibupu talak babye, sikda amutuku tuba daunyake.

2 Raja-Raja 17:3

Ura, Raja Hosea bira, Israel tam taleamuk talak arye, Asyur mutuku ninye deiyok kibuka taleamuknye, el si Salmaneser, elce Israel tam yanuka obukabukce, Hosea taleamuk mutuku ara, Salmaneser birye, ‘Amutuku alubuka dopropnamne,’ tenebuk. Utenebuka ati, aketing tamun, aketing tamun nirya ara, Raja Hosea birye, el talilamuk bona kan-kan arye, dekna teleb ning, weik tonun dobuka, Asyur mutuku deiyoknye bitibuk arelamuk.

2 Raja-Raja 14:26

Allah Yahweh arye, sik Israel ninye nirya, sik kanye imun weik deiceuk ulamik ning ati dilamukce, sikti, bico tenebuk. Tonda, Israel tam ulamik ninye kan-kan noutam ara, sik melibuka lyepmanto nang ara, pia kum ulamik. Ara, sik kanye aryuk pil dolamikce, ulamik nang babye, yuk nang arye, yo bok deice arye dekuka, ikin pil dilamikba, talye piluk dolamik nang babye, tonok babye, Israel tam ulamik ninye ati, ton pia kum melipmanto ulamik.

Yehezkiel 16:33

Talya yolan kilapu arye morobikiba, ninye arye, atalye-talye yolamikce kilapu ati ara, yo bok dekenyake. Bukni, anggun Israel nang ara, aning atonun kume. Anggunce, tamubukapmunce, anggunce pia, ‘Anang ara, na talima pia patapnile’ tenen, pia tuba-tuba anang atibuk dekna ara, arelulume. Tonda, sik yuk-yuk mutuku nang yukuna nang ara, angguncuk, yo bok deice arye, libuka yukupmunyeba, dana-dana pera mutuku unyak nang nirya yayikba, anggun ap, neika malulume.

Yehezkiel 23:5

Ura, Ohola akunum domsebuk, elda talye-talye yolamik kil ulamuk. Akil ara, Asyur mutuku ulamik nang ati, pia patalamukba, ‘Seʼ tenelamuk ati, sik ap neika malamikce, yolalamik.

2 Raja-Raja 17:4

Bukni, aminyan talak ton, Hosea birye, Raja Mesir, el si ara So biti, “Ance na melipnutumba, Asyur mutuku ninye deiyoknye, el amu tam unmana ara, bataktinirye, elti, malye kiptinimnye,” nyabuka morobukce, sekin ning arye, surat sekuka deibukce, el mapu wipdeibukba, bobiyik. Tonda, Raja Asyur, el si Salmaneser biti, dekna weik ning bobinuka, keting tamun yupa pia weik deice, arelamuk ning ara, batakuka tonap kum arebuk. Asurat sekuka deibukba, yuk nang bikikce, Asyur ninye deiyoknye, laka nyabikba bikukopura, el Raja Asyur mutuku Salmaneser birye, Hosea tomobuka, wenen aik noutam binuka dongobuk.

Yesaya 30:2

“Ara, anggunce nati, ‘Mesir mutuku ninye arye melipsiting, tenen, morolbitibye do?’ kum nyamnulum bukni, anggun dem aryuk morolbilume. Tonda, Mesir mutuku ninye deiyoknye Firaun birye, ‘Melibuka kalikinamsil’ tenen, el dam morolbilume. Anggunce, ‘Se, Asyur mutuku ninye arye olyanamsiyaka ati, yata wiriptibye do?’ teneplumce, ‘Mesir mutuku noutam duknulbipyeba, yu nang arye kum eipnamsiyak’ tenen, duknulbilume. Anggunda, ‘Allah arye melibuka lyepnamsil,’ tenepmatum bukni, na batakuka anggunce, Firaun dam nyalbiluma deice arye, anggun malye uplume.

Hosea 12:2

Winipmanto ara, ninye arye, ‘Keting panalyangan tam yangalamle kumanya balamlak ara, nun ton bikibirye, aning tomobuka talipnamabe. ‘Beren tam talak arye, dipdongobuka sintam ara, kumanya talipnamabeʼ tenen, nang atonun unyake. Ara, sik Israel nang arye, ‘Asyur mutuku nang arye, yanuka opsicak ati, yata mutuku nang arye, melibuka lyepsiting do?’ tenen, Mesir mutuku nang morona ati, minyak kwebikirye, dekelbanyake. Tonda, sik Asyur mutuku nang dam bikirye, ‘Se anggun ap, nun ap, mal olana kumce, teleb ubuka neika uptibye do? Nun ap neika, nun kwitcapu, kipdanamabeʼ tenen ati, morolbanyake.