“Ayupu nyapdeipkin ning ara, Yeremia ance Yerusalem mutuku unyak ninye, sik kekena ak binuka nyapnulyame. Ara, nyapnulyame. Se, sik Israel ninye ati, Allah Yahweh arye nyapsile. Anggunda minop talak kam ulalum talak ara, ‘Nun ni Allah, elda mambul weik anya arye, el amu tamuk unamabe’ tenen, moubuka tenelamnulumce, pia weik kanye deibuka, na si ati erelamnulum ning ara, tuba tenesunune. Tonda, kam nang kil dopnuce talak taruk murubikiba kanye delilamak touk, anggunce nati atonun tenelamnulume. Tonda, Mesir mutuku batakuka, anggun mek ap, mok ap kum ati, ninye kum ulamik mutuku noutam balalum talak ara, na balamse bisikuk, anggun babye nati melibuka dobolbalamnulume. Amutuku ara ninye arye wa wibuka yala ning kum koupmanto mutuku anya arye, narye meliamsisiba, anggun nirya na menekuka balamse bisikuk, melibuka dobolbalamnulume. ‘Minop talak winibuka anggunce nati melilamnulum ning ara, pia tuba tenesunune,’ Allah arye nyapmasile,” nyapnulyame. Allah arye na Yeremia biti nyapnuke.
Hosea 2:7 - Eipomek7 Winipnyopura, el tenelamlye nang ati, ‘Epdatibye’ tenen, dobolbinamle bukni, pia kum epdanamake. Tonda akil arye, pia pi dobuka enamle bukni, el tenelamlye nang ati, pia kum eipnamle. Winiplye talak ara, ‘Na min arye domnuknye, el damuk tamubuka binune. Minop talak ara, na akanye ap, neika telebuk ulamnume bukni, wini talak ara, ikinuk ununa anya arye, namince domnuknye dam, tamubuka binamne,’ tenenamle. Gade chapit la |
Hosea 2:7
41 Referans Kwoze
Winipmanto ara, uk dilamle ninye ap, suse dilamle ninye ap, sik nong bol malye upliba, ‘Yata kwetenanye birye, melipsutu do?’ tenen, el balamaka atonun, sik Efraim tam ninye ap, Yehuda tam ninye arye, sik malye wininyak ning moubuka tenebikirye, ‘Se, nun malye winina ati, Allah arye wenen ning arepnusil’ tenen, kel bikikirye, adiparyuk Asyur mutuku morolbinamake. Bikirye, Asyur mutuku ninye deiyoknye biti, ‘Se na nio, yuk pera mutuku nang arye olyanamsiyaka anya arye, ance an mutuku yin talin nang wibuka deiptumba, lyepnamsiyake,’ nyabuka moropnamake.” “Nyabuka moronamak bukni, na Allah arye dipkoprob nyapsine. Asyur mutuku yin talin nang ap, sik ninye deiyoknye ap, moroptum babye, anang arye kum melibuka lyepdsitinge. Tonda uk ap, suse ap dilamlye ninye ati, kwetena walwal nang arye, moubuka kum kwetepmanto ulamak touk, Asyur mutuku ninye arye anggunti, pia teleb ubuka kum melipsitinge.
Pia malye mutuku noutam ulamlumce, ikin weik ulamlum bukni, naryuk anggun patalamsuk touk, anggun din ning dobuka arelamsise. Arelamsiseba, aning dobuka, weik arye dilamlumba, boulamsuke. Din ning dipna arye boupsinopura, atalak arye tuba tamubuka tonap, anggun bidamnye ati, kanye deipdana arye, dipdanuka kwalipdana arye ulamlume. Kwalipna arye ulamlum talak ara, na si yaniptapnin arye, nati luba kilamnulume.
Akilapu bitinye bukni, du kil el si ara, Ohola. El dukul ulamuk atonun ning ara, Samaria mutuku noutam ulamik nang atonun ulamuk. El weit kil si ara, Oholiba ulamuk. Tonda, el weit kil, malye pia weik winilamuk. Aning atonun ning ara, Yerusalem mutuku noutam ulamik nang atia. Winipmanto ara, sal arye, kilapu dolamak touk, na Allah arye amutuku bitinye noutam ulamik nang ati, ‘Naʼ tenen, ning tenen, domsebuk, sikce mapu weika arye delilamdik. Akil el si Ohola, bira domona ati nyapman bukni, el nong ara, Samaria tam ulamik nang ati nyapne. Tonda, Oholiba kil si nyapmana ara, el nong ara, Yerusalem mutuku noutam ulamik nang ati, nyapsine.
Nun ni Allah, nun kele. Mutuku-mutuku nirya arye, kwemdina ning Isa Mutuku Dongonye si erenyak ning ati, ‘Mok arepsilyame,’ nyabuka moroptibye babye, mok kintinibuka kum arepsutue. Tonda, im noutamak ulul ning aryuk, mok tukwak mutuku kum dopkweteptue. Aning nirya kum bukni, Allah ancuk, nun patapsilye ning nirya arisilyame. Ati ara, nunce an deiceuk, nun kanye delinyabe. An dem aryuk, aning-aning nirya arisilyame.” Israel ninye arye, Allah ati ayupu nyabik.
“Aninye nirya bataknirye, na ununak uk, tamubuka binamne. Sik batakuka na ununak dauname talak noutamak ara, sik Israel ninye ap, Yehuda tam unyak ninye arye, keting tamun yupa pia, weik ulamikirye, imun kanye bobuka unamake. Mambul kanye bobuka daulamica ani, tuba tonap moubuka tenipdekirye, ‘Se, dipkoprop, nunda pia malye weik ulamupe. Malye ulamupa ati, Allah arye weik arye wenepsuka ara, merekuka wenepsuke,’ tenebikirye, kel kipnamake. Kel kibicopura, sik nirya arye, ‘Se, nun ni Allah, dan tam ulul do? Allah arye eipsuturye, melibuka lyepsutue’ tenen, pia pi dobuka enamniake. Weik arye imun kanye bobuka unamak talak noutam arye, ‘Se, nun ni Allah, ancuk melipsutume. Tonda, nun ni koproba ance, bico tenepsimince, nun malye wininyap ning ara, mangkau kibuka lyepsutume,’ nyabuka engena deice arye moronamniyake. Malye kanye bobuka engena deice arye, engenamaka babye, na ton pia kum eipnamniyake. Sik malye winilamik ning moubuka teneipdekirye, ‘Dipkoprob nunda malye winilamupu’ tenen, bikdakirye na dam yanuka, laka kibuka yana nyapnutumopura, kekebuka melipsitinye. Kumopura, kume.” Allah arye nyabuk.
El anye bira, ninye tenelamak kanye atonun kum ubukba, ninye nirya arye elti, yakikba, bura tam biyuk. Ninye arye tenelamak kanye atonun kum bukni, talye bai kam ulamle ning, sapi basam do, keledai basam do, atonun kanye bobukce, talye palamle ning dilbalamuk. Winilamuka ani, pata mutuku mapmanba, el nong nirya, mok purwu palilamla touk, ulamukba ninye arye elilamik. Winilamuka ani, sirya talak ara, elce tamubuka tenebuk. Ara, Allah elce aning-aning nirya talibuka, deice tam Pia Mikip Weik Deiyoknye ulinye birye, el teneplirye, ‘Yatanye do, anye bira, ninye deiyoknye unamle,’ tenelye touk erelilule. Tonda Allah ara, tukwak mutuku ninye deiyok nang nirya, talibuka unyak nang nirya, sik deice tam ululnye bira, ‘Allah el uka’ tenen, moubuka kel kibuk. Bikamukba, Allah arye, ila tuba tamubuka, tonap an ni koproba teleb kipdeibuk.
“Anda ninye unyakak arye yakuka, bai tam donokikiba unamlame. Winipkicopura, talye kam ulamle ning ap, anggun neika kam unamlume. Atalak ara, sapi basam maning kwapu dilamak touk, an babye aninguk dinamlyame. Winibuka unamlam talak nirya ara, keting tamun tekbarye (7) mapnalame. Mapnalama deice arye, dipkoprob Allah aning-aning deice tam, Weik Erena Deiyok ululnye, elcuk ninye nirya talipnamsile. Tonda, Allah elce tenelye touk, tukwak mutuku ninye deiyok nang kina ati, ‘Anye birye talipnamle’ tenen, wipdeipliba talinyake. Allah arye ikin ning deipnamkila deiyok ara, arup nyapmakin ning, ‘Kel biknamle’ tenen, winipnamakile,” nyabuk.
Allah arye nyapliba winipnamkile. Ara, Na nio, anda ninye unyakak arye yakuka. bai tam donokikiba, unamlame. Winipkikiba, talye kam ulamle ning ap, sik ap, neika kam unamlume. Atalak ara, sapi basam maning dilamak touk, an babye, aninguk maning dinamlyame. Winibuka unamlam talak nirya ara, keting tamun tekbarye (7) mapnalame. Winipnamlama deice arye, ‘Dipkoprop Allah aning-aning deice tam, Weik Erena Deiyoknye ululnye, aniryuk ninye nirya talipnamsile. Tonda, Allah elce tenelye touk, tukwak mutuku ninye deiyok nang kina ati, anye birye talipnamle’ tenen, wibuka deipliba talinyake. Allah arye, ikin ning deipnakila deiyok ara, arup nyapmakin ning, ‘Kel kipnamle’ tenen, winipnamakile.
Anyapmap ning ara, Allah el pil don nang malaikat, nun diksukumuk unyap nang nirya, bulubuka, yupu talebuburye, nyabupu ning nyababe. Ati ara, ninye kam unamak nang, mutuku nirya arye, ‘Dipkoprop Allah aning-aning deice tam, Weik Erena Deiyoknye ululnye birye, nun nirya talipnamsile’ tenen, kel biknamake. Tonda, Allah elce tenelye touk, tukwak mutuku ninye deiyok nang kina ati, ‘Anye birye talipnamle’ tenen, wipdeipliba talinyake. Tonda, Allah arye, ‘Anye bira, talye bona utotoa talina kumnye ulul bukni, ereipnun,’ teneplirye, erelilule.” Nebukadnesar birye, nyabuk.
Ati ara, na Allah Yahweh, aning-aning nirya deice tam erebuka, Pia Mikip Weik Deiyoknye ununye birye nyapkine. “Se, an Oholiba bira, minop talak ance, ‘Se anang ara, pia patanulule,’ tenelalum nang bukni, aminyan talak ance, ‘Kume anang ara, na likeʼ tenen, lik upkukba, bataklum nang ara, narye sik anang ati, ‘Winiplulume,’ nyapyeura, sikce anti, dana-dana tam nirya arye, an dam yanuka warekiceura, akil opnamabe,’ nyapnamake.
Anggun kanye talima pum tam arye, ‘Se, nun dana-dana tam unyak nang nirya, sik yuk-yuk yala nang ap, yuk pera mutuku nang ap nirya arye, talye ning yo ap, keil ap, isa ap atibuk, si erelamik touk, nun babye winiptibyeʼ tenen, patapsilyeba, nyanululum ning ara, dipkoprob kum upnamle, nyapsine. Kume, anggun atenepmalumce, wininmalum ning nirya ara, aminyan talak, dipkoprob nong pia kum upnamle. Allah arye nyabuk.
Aning kum bukni, sikce anang urasin atonun patung-patung ati, sik deice ongon baju, dengna weik baju, narye anggunti, areamsise ninguk, kwiriploplumce, abaju dobuka, anggunce memeplum isa si eren ning, el si patung delilamlum ning, ‘Malye kiplyak’ tenen, singipdongoplume. Aning nirya winipmunyeura, aminyan talak, ‘Talya ning isa si erepnamap’ tenen, aning dobuka, tukwak deipmunce, sik minyak zaitun mek ap, nintong teleb nyan ati, el si dupa ap, dobuka aning dam delilulume. Aning nirya ara, dipkoprob na si erena ati, arepnamnutum bukni, anggunce, talye isa si erena ati, amambul ning boyanuka arepmunce, isa siuk erelulume.
Bukni, narye minop talak, sik deiyok nang, Mesir mutuku ulamikba, melibuka boyangalamse talak ara, nyalina yupu nyapdeiamse atonun yupu, aminyan talak kum nyapnamsine. Nyalina yupu winiryuk ning, anggun dam nyapnamsin ning ara, el nong yuk upnamle. Minop talak ara, anggun deiyok nang ati, nara anggun akanye atonun ulamsirye, ‘Wininamlume, aning ara kum wininamlume,’ nyabuka, nyalin yupu nyalyangalamse. Bukni, atalak ulamik ninye arye, na nyalilamse yupu ara, kum kekelamnik. Sikce nati, batakamnik. Winipmanto ara, kilapu sik akanye yapu ati, deiyok kum upmalye babye, batakanyak touk, Israel ninye arye, sik akanye atonunye, na unun bukni, sikce nati bataknike.
Nyabukce, ayupu ton dukdongobuka nyabuk. Na mapu Israel ninye, sik kanye imun upliba, moronyak ning ara kekenune. Ara, nyanyake. “Se, nun ni Allah, nun malye ulamupuba, ance nun wenena ati, ikin ning weik arelamsulumba, awenen ning nirya dololamupu. Winipmanto ara, nunda ninye arye delina kum ning, bai tam talye kam ulamak ning atonun ulamupu. Bukni, winira ance, ‘Diksukum winin ninguk winilamting’ tenen, peteresilyame. Adeice, ‘Nun malye wininyap ning batakuka, an damuk tamubuka yanamap’ tenen, kintininyabe. Ati ara, nun ni koproba Allah, anda Yahweh, ancuk nun dobuka, an dam boyasilyame,” nyabuka morobik.
Malye uk ulalum bukni, anggun adiparyuk, ‘Kume, nun malye ulamupu ning nirya ara, dipkoprob bataknamabe,’ nyalulum bukni, talye si bam bol deice aryuk ayupu nyaltakalulume. Kanam aryuk tilila yupu nyaltakalulume. Ati ara, anggun minop talak Asyur mutuku nang arye, anggun Israel yala ninye olamsik touk, aminyan talak ara, sik Mesir mutuku unyak ninye arye, anggun wenena ati, malye kibuka opsikirye, opnamsiyake.
Anggunce memebuka deipmunce, si erelulum isa mer ara, dan tam unyak do? Ikin ning anggun dam yalyopura, imun kanye bolulum talak ara, anggunce puturubuka deiamlum ninguk, sikti, ‘Se yanuka lyepsilyame,’ nyabuka moropnamlume. Atalye ning arye, anggunti dipkoprob lyepsiting toura, sik Isa Mutuku Dongonye si erelulum ning aniryuk, anggun ikin ning upsilye talak ara, aning arye lyepnamsitinge. Narye kume. Aning ara, urdem ati kum nyapsine. Se anggun Israel yala ninyeo, anggun asik dolulum mutuku, weik arye dolulum touk, anggunce talye Isa Mutuku Dongonye siuk weik arye erelulum ning ara, kum nukmanto. Ati, sik Yehuda yala ninye unyak mutuku noutamak ululum ninye nirya ara, Isa Mutuku Dongonye si weik arye ereluluma ati, wenepnamsine.
Anggunce nyalulume. ‘Nunda kuda basam balye deice welebuka bukibirye, minopce bikbik abuka binamabe,’ nyapmaluma ati, dipkoprob olyanamsiyak talak ara, adiparyuk bikbik abuka bindopnamlulume. Tonda, anggunce, ‘Kuda basam bikbik abuka balamle ning deice bukibirye, bikbik abuka binamabe,’ nyapluma ati, dipkoprob anggunti olyanamsiyak nang ara, anggun balye tam arye, bikbik abuka dobolyanamsiake. Ati, anggunce tenepmamunye touk winipnamlulume. ‘Minopce binuyap’ tenen, banmamun bukni, anggun mal olan nang aminyan dobolyasikirye, opnamsiake.
Allah Yahweh arye Nyabuk. “Winipmanto, sal tonok ton, kil akunum domlye bukni, ‘Akil bataknun,’ teneplirye akunum batakalule. Winibuka bataklyopura, akil yuk nang doprobikceura, min domlinye birye, tamubuka kum doproptue. Aning winina ara, amutuku nirya malye uptue. Israel nang, yuk kilapu ati weik tonun moun dilalumce, ubula yolalamlum ati ara, wini talak na Allah dam tamubuka yatum do? Aning ara kum winiptume.” Allah arye nyabuk.
Elce malye weik winilamuk ning ara, ani. Ahas el tenebuka ara, ‘Siria mutuku noutam bukni, pia mambul weik asik, el si ara, Damsyik, amutuku unyak nang arye, sik si erenyak isa mikip deice arye, malye kipnika ati, narye aisa ati, domba basam ato ning obuka arepnirye, el si erepnya deice arye, sik anang meliplyeba, mal olan ning atouk, na babye aning winipnyeba, melipnamnile,’ tenebuk. Utenebuk bukni, dipkoprob ning ara, Siria mutuku nang, sik si erelamik ninguk, Ahas birye, si erebuka deice arye, el ap, Yehuda mutuku noutam ulamik ninye nirya ap, tonda Israel tam ulamik ninye nirya ap, Allah arye kanye imun weik ning arelamukba, doprobikce, ikin asa ulamik.
Nunce, ‘Wininamabe,’ nyabuka, nyalin yupu deice nyapdeiamupu yupu deice arye, akunum nyapdeibupu ning nirya ara, kum bataknamabe. Nunce aning nirya, adiparyuk winipnamapca! Ara, nunce Allah si erena ati kum bukni, yuk-yuk ning ati, im deice ulul ninye deiyok kil, el si erena ati, teleb aren ning bobinuka arelbanamabe. Tonda, ‘Aren ning pia teleb upnamleʼ tenen, aning deice ara, anggur mek ton dikilongonamake. Aning nirya ara, nun isa kil, el si erena ati, arelbanauk wininamabe. Aning wininamaba ara, nun wini talak unyap nang ap, Yehuda yala nang, nun apu yapu ap, ninye deiyok kibuka, nun mutuku taleamsik nang, nun Raja-Raja nang ap, sik amu tam pil dona deiyok kiamik nang ap, aning atonun ulamik. Tonda, Yerusalem mutuku noutam bisikak balamik nang ap, tonda Yehuda mutuku noutam asik domikce daulamik nang ap, nun nirya arye, min talak isa kil si erelamupu touk, wini talak babye, el si tuba erenamabe. Winibipya babye, nun deice ikin ning kum yanamsile. Atonun, minop talak, isa si erelamupu talak ara, nun pil dolamupu ning nirya ara, telebuk uamuk. Tonda, nun din ning yala-yala weik awamukba, weik tonun dipnarye, telebuk ulamupu. Ati ara, nun nirya arye, aninguk talibuka wininamabe.
Oholiba birye, Asyur nang ati, pia tuba tenelamukce, patalamuk ning ara, sik Asyur mutuku yin talin nang ap, yin talin nang, sik deice tam deiyok-deiyok nang ap, Bupati-bupati nang ap, Gubenur nang ap, ninye olbana ati, yin talin nang ap, ninye olan talak sik nong deice kat ning ongolamik nang ap, yuk yin nang bukni, kuda basam balye deice arye, bukuka balamik nang ap nirya arye, akil ap neika malamik. Tonda awinilamik nang nirya ara, wel pia urasin teleb nang ulamik.
Allah Yahweh arye, minopce deiyok koubuka, ‘Israel yala ninye kekenamak’ tenen, nabi Hosea biti, ayupu nyabuk. “Hosea anda Israel ninye noutamak bimince, amutuku talye-talye yoltanyak kil, binuka dopnulyame. Akil binuka dopmince, akil arye deipnamle mapu nirya ara, an mapu kopropba kum unamake. Yuk nang arye, an dopnalam kil ap neika ukirye, talye yoldakiba, akil arye, sik yuk nang mapu ton deipnamle. Amapu ara, talye yoltanyak kilapu arye delinyak ninye, sik yala ton unamake. Wininamluma deiyok ara, ani. Ara, winipmantonye wininamlama atia. Deiyok ara, malye kilapu arye, sik minop dolamik nang batakuka, yuk talye daunyak nang ap, talye-talye yoldalamak touk, na mapu koprop, Israel ninye arye, nati batakaninyake. Batakaninyakce, yuk talye ning ati, ‘Nun ni koprop ani,’ nyabuka, Isa Mutuku Dongonye, si erenyake. Wininyaka deice arye, na Allah ati batakaninyake. Tonda, aisa si erenyaka deice arye, sal ap, kilapu ap, talye yoldalamak touk wininyake. Israel nang babye, atonun wininyake. Sikda diksukum teleb kibuka una kumce, malye-malyeuk wininyakce, nara sik ni koprop Allah Yahweh ati, batakuka bindopnike.” Allah arye, Hosea biti nyabuk.