Amutuku noutamak nirya, keta on ning weika arye onamle. Winiplyopura, amutuku unamak ninye ara, kanye deibuka mot senamake. Amutuku nirya ara, Allah arye tuba tamubuka teleb kipdeipliba, Libanon mutuku pia teleb ulamuk touk, urasin pia teleb mutuku upnamle. Amutuku pia teleb upliba, Karmel mutuku ap, Saron mutuku ap, pia teleb ulamle touk unamle. Winiplyopura, ninye nirya arye Allah el dirina eibikirye, el mikip weik ulul ning eibuka kel biknamake. ‘Nun ni Allah ara, Dirina Deiyoknye, si Weik Erenanye ulule,’ nyanamake.
Hosea 14:5 - Eipomek5 Ati ara, aminyan talak ara, narye anggun Israel yala ninye ati, tuba tamubuka teleb kipdeipnamsine. Winipmanto ara, kel-kel alamlye tuku dauamliba, mok cepliba, mok purye sakuka poupliba, tuba ton teleb ulamle touk, narye sikti, teleb kipdeipniba, telebuk unamake. Winipnyopura, pia telebuk unamake. Winipmanto ara, mok weik cepliba, bunga keta oplibuk, teleb ulamle touk unamake. Tonda Libanon mutuku noutam kepyal yo tiklirye, yating tuku pum tam bilirye, mikip arye tiklamle atonun unamake. Gade chapit la |
Hosea 14:5
32 Referans Kwoze
Doyanamle talak noutam nirya ara, sik Israel Anang arye, winipmanto, yo yating tukwak bilirye, ayo weik tonun neplirye, atukwak mutuku noutam nirya ara, duk pia weik tonun moulamlirye, tukwak mutuku, im sirya, mutuku sirya nirya, unyak nang arye dolonamake. Ara, Allah arye Israel nang ati, teleb kipdeipnamla deice arye, ninye tukwak nang, mutuku sirya, im sirya nirya ton, teleb kipdeipnamle.
Winipsilyopura, anggun dib tenelulum deice arye, Kristus anggun kanye talima noutamak usiliba, el ap, kanye dukdongobuka unamlume. Tonda, weik yo yating tuku pum bisik bilirye, weik neplyopura, ayo lulukna kumce pia teleb tiklamle touk, Allah bico tenepsilirye, melisilye ning noutam ululuma deice arye, ‘Sik yuk nang nirya ati, bico tenebuka melilamunce, pia teleb unamlum’ tenen, Allah morosunune.
Tonda, aninye deiyoknye birye, amutuku talinamle talak noutamak ara, Allah arye melilamliba, amutuku noutamak nirya ara, gandum wa pia weik panamle. Tonda, amutuku kon deice, wa wibuka koulamak gandum nirya ara, nong pia weik akunum uplyopura, kumanya yalirye pupliba, gandum bok nirya kamupliba dakalsakanamle. Tonda, sik amutuku noutamak nirya ara, sukun tuku uk unamle. Ara, Libanon mutuku, teleb sukun tuku ulamlaba, duk moulamle yo, ayala-ayala nirya, duk weik moulamle touk, nun mutuku babye atonun unamle. Amutuku noutamak unamak ninye nirya babye, yupa pia weika arye deibuka, tabakdabakibuk, aninye yupa ara, talye bai mutuku palamle mutmuta atonun, kibuka unamake. Winibuka unamak talak, sikce wa wibuka kounamak ning nirya ara, teleb kibuka papliba, libuka dinamake. Aning nirya, ‘Winibuka unamle’ tenen, Allah ati moronamabe.
Na peterepnusin yupu ara, weik melinamsila anya arye, mok purwu saklamla atonun upnamsile. Tonda, kurye dei saklirye, maning deice palilamla atonun upnamsile. Tonda, winiryuk koupmakce maning tuku deice, mok purwu saklamla atonun upnamsile. Tonda, na peterepnusin yupu ara, winipnamsile. Winipmanto ara, din yala kouamikiba, mok weika arye cepliba, aning bongoplirye, pabuka duk teleb moulamle touk, na peterepnusin yupu ara, melinamsile.
Tonda aminyan talak, Israel yala ninye mitik tonun dem, sirya tuba unmace ninye ara, yuk mutuku ninye kan-kan dabinuka unamak bukni, pia mikip weik ninye unamake. Winipmanto ara, weik yu kuse el si singa kus ara, mikip pia weik ulule. Bai tam noutamak ara, yuk kam ning ton, yala weik aulul bukni, sik mikip ara mitik uka. Singa kuse ara, el mikip pia weik. Singa kuse yu weik ning arye, domba basam weklamaka kan-kan binuka weklirye, talye lukparabuka domba basam obuka diplirye, el si arye, kalibuka bataklamle touk, sik Israel ninye arye, yuk mutuku ninye kan-kan bikirye onamake. Ninye arye, yu weik singa kuse ati, yupu kum seklamak touk, yuk mutuku ninye arye, Israel ninye ati, yupu sekmanto kum unamake. Singa kus arye domba basam olamle talak, domba basam arye lyepdanmanto kum ulamak touk, atalak ara Israel ninye arye olbinamak ninye, sik bidamang ati, kum lyepdanamake.
Ati, an unamlam mutuku selal selamle tukwak nirya ara, narye mek dikeipkiniba, mek balamlirye telebuk unamle. Tonda, selal selamle tukwak mek arepneba banamle. Na Dib Kanye ara an deice deipkiniba, ance deipminba dadeipdanin banamak ninye sik deice deipnamne. Na mikip sik deice deipniba, teleb kipdeipnamsine. Winipnya deice arye, sik un ning nirya telebuk upliba, sik aninye ara yupa pia weik upra banamake.
Nun ni Allah, an mapu koprop bukni, akunum min arye diamik nang ara, aminyan ance kam bukeipminba, kam unamake. Sik deiamik nang ara, akunum tuku palibuka wiamik bukni, sik nong ara, tamubuka kam buknamake! Tamubuka kam bukmunyopura, weik tonun kanye deipmunce, weik yupu weik tonun mot nyapnamlume! Winipmanto ara, mok purye tuku deice saklirye, dua pito weleplirye, dirina arye teleb ulilamle touk upnamle. Aning deiyok ara, Allah ance an mapu akunum diamik ara, tuba tamubuka, kam bukeipnalame.
Allah Yahweh arye na Yesaya dam yanuka nyapdeipnuke. “Na unak im deice arye, narye aning nirya biknamne. Winipmanto ara, pia weik keting tin unmalya ani, kumanya ton minop balamle touk winipnamne. Nara Allah Yahweh tunim abuka unamne. Winipmanto ara, wa wibuka kouamikca ani, lin talak li kiplyeba, mok purye tuku deice saklyeba, keting tin arye dua tunim abuka welelamle touk winipnamne. Ara, amutuku nang winipnamak ning eipnye babye, narye tamubuka aning-aning ton kum winipnamne. Diplopnamne.
Elcuk aninye talinamle talak ara, winipmanto, wa wibuka kouamicak, mok ceplirye, adeice sakliba, koun ning teleb kibuka palamle ning atonun, Allah ance elti, melipminya deice arye, elce talinamle ninye nirya ara, telebuk unamake. Tonda, mok weika arye ceplirye, koun ning bok deice saklibuk, koun ning paplirye, urasin teleb kilamle touk, ance melipminya deice arye, ‘Nun Raja arye, talinamne ninye nirya ara, telebuk unamak’ tenen, moropkine.
“Tonda domon yupu ton nyapnukine. Ara, ninye arye, koulamak ning, koubikiba, aning el yating tuku pum tam weklirye, nong telebuk nebuka weleplirye, aminyan talak duk teleb ubuka moulamle atonun, Yehuda yala nang babye, weik opnamak bukni, mitik anun uk tuba kam ulamiki bukni, aminyan talak tuba tonap, weik upnin banamake.
Aning atonun ululnye bira, dua kum sum, keting panalyalirye, deiplye talak ara, dirina teleb ulamle atonun ulule. Tonda, anye bira mok cepliba, dola falamlebuk, aminyan keting ula donokliba, urasin teleb ulamle touk ulule. Raja birye, Allah ati ilil upliba, ninye taliplyopura, aninye ara, kanye delinyake. Ara, keting panalyalirye, keting ula deiplyopura, ninye arye kanye delinyaka atonun ulule.” Allah arye, na Daud biti nyapnuke, nyabuk. Nyabukopura, Daud birye, ayupu ton nyabuk.
Anggunda, moubuka teniplulume. Mutmuta kan-kan arye ulamle kurun ning ara, tenenamlulume. Akurun ning urasin ara, pia teleb ululbuk, aning ara, pil dona ap, baju ongona ap, kum ulule. Apil kum dolulbuk, weik ninye deiyoknye, Raja Salomo ongolamuk cang baju, el si juba ara, urasin mitik teleb bukni, akurun ning urasin ara, pia weik telebe.
Tonda, an taram ara, urasin teleb ukulule. Winipmanto ara, an taram bitinye ara, rusa basam bitinye do, kijang basam bitinye do, sik urasin ara, pia teleb ururaka atonun, an taram bitinye babye, atonun urasin telebuk ukulule. Tonda, rusa basam mi bitinye ara, urasin teleb kita, el si ara, bunga bakung noutam barikirye, sik din dinmarikce talak ara, urasin pia teleb ulye touk, an taram bitinye babye, urasin pia telebuk ukulule.
Narye na dopnamnilanye biti, weik tonun bico tenenirye, elti, na kanye delinune. El tonok ara, na ning ulule. Yuk nang ton pia kum patanulule. Aning atonun, na kanye delinunye birye, nati, weik tonun bico tenenilirye, nati kanye delilule. Ati, nara, el kil unune. Yuk kilapu nirya ara, pia kum patalule. Nun bitinye arye, pia bico tenelanauk unimirye, kanye delilanauk unyame. Winipmanto ara, domba basam weina deiyoknye birye, el domba basam bobalirye, urasin teleb kita, el si ara bunga bakung noutam deipliba, dinmakiba, eiplirye kanye delilamle touk, narye moun dinun nye birye, na si bam bol deice mutupnilye talak ara, pia kanye deibuka ulule.
Tonda, ninye deiyoknye Raja, weik arye yu upliba wana ati, weik arye nyalul yupu ara, weik yu kus, el si ara singa arye, weik yupu nyapliba, ninye nirya ilil weik ulamle touk, ulule. Raja arye yu upliba, ninye talye lukparabuka olula ati nyapne. Bukni, ninye deiyoknye Raja arye, yuk nang ati kanye deiplyopura, winipmanto, mutmuta deice, mok dumduma sakmalirye, palipmaliba, teleb ulamle touk, winilule. Raja arye, el kanye delilul ninye ati, teleb kibuka melilula ati nyapne.
An ‘Naʼ tenen, ninye, nun Israel yala ninye ara, Mesir mutuku ulamupuba, ance anggur tapu yala dobuka, yukak koulamak touk, an mapu dobuka, yuk mutuku ninye ulamik mutuku noutamak koupnamsilame. Yuk mutuku ninye aning-aning nirya, amutuku ulamik bukni, Allah ance dobuka donoklumce, nunda amutuku noutamak punubuka deipsulume.
Tonda, nati, ‘Nun lik’ teneninyak nang ara, ance sikti, obuka amu tam akunum deiplum nang ara, na asing arye akunum eibuka bikamse. Tonda, yuk nang arye, na dam yanuka nyapnike. ‘An opnamap tenelamkik ati, Allah arye akunum wenebuka obukba, pia engebuka ngalukunyake,’ nyabuka, laka nyapnikba, akunum kekepse.
Tonda, aning atonun, ninye ara neika ukirye, kanye deipdatingce, teleb kibuka neika ulamting toura, pia telebe. Winipmanto ara, cang weik mutuku, el si ara, Hermon mutuku kon bukuk tam ara, beren tam talak, mok purye weik saklyopura, amutuku unyak nang eibikirye, kanye delinyake. Atonun, tukwak nang arye, neika uptingce, kanye deipdatingce, ulamting toura, pia telebe. Sion mutuku deice, beren tam talak, mok purye saklyopura, amutuku unyak nang eibikirye, kanye delinyake. Ara, talye ati kume. Deiyok ara, ani. Minop talak ara, Allah Yahweh arye, “Sion mutuku noutam unamak nang ara, pia teleb kilinamsine,” nyabuka, nyalin yupu deice arye, nyapdeiamuk. Ara, “Israel yala nang ara, aminyan doyanamle talak nirya ara, kam pia una deiyok ning arenamsine. Sikda, min kume, kum danamake,” nyabuk.
Na Allah arye, teleb winina ati deiyok ning nirya ara, im deice arye dopkwetepniba, tukwak mutuku noutam mok celamle atonun uplirye, diksukum una deiyok ning tukwak mutuku saklirye, ninye nirya sik talima wekliba, diksukumuk unamake. Aning ati, na Allah arye, akunum kintineipse. Tukwak mutuku, mutuku-mutuku nirya ninye lyen ning arepneba dopdobikirye, diksukum un ninguk weik upra banamle. Na Allah Yahweh arye, akunum keteneipsa ati wininamle.
Diba, sik malye tuba wininyak nang ara, kum danamak bukni, ance nunti, “Aning ara, wininamlume. Aning ara, pia kum wininamlume,” nyapdeiamsulum yupu uk talikirye, diksukum telebuk wininyak nang nirya ara, pia telebuk wininamake. Sikce unamak ning nirya ara, telebuk unamle! Ara, pia teleb cang yo, el si ara kurma yo palamle touk, unamake. Ara, winipmanto, Libanon mutuku noutam ara, weik yo, el si aras yo mikip arye tiklirye, cang ap, urasin teleb ap, ulamle touk, ance sik diksukum wininyak nang ati, telebuk winiliminyeba, pia telebuk unamake!
Allah arye, aning nirya akunum winiplyopura, anggun Israel nang arye, mot nyapnamlulume. Anggunce nyanamlum ning ara, ani. “Se, nun ni Allah Yahweh, nunce antibuk, teleb nyapkiyabe. Ara, ikin kanye bobuka ulamupu bukni, ance nun kanye kwa dipsulumce, mikip kipdeipsulume. Minop talak ara, ance nun malye ulampu ning ati, yu upkukba, weik arye wenyamsulume. Bukni atalak ara, ance nunti, yu tenyamsulum ning ara, akunum kum kipmakila ati, kanye deipsilame.
Narye sik malye ulamik ning nirya ara, akunum eipsirye, tuba bikinune. Bukni, narye, sik amalye ning talibuka, unyak nang tuba tamubuka teleb kipdeipnamne. Tonda, narye sikti, melipnirye, diksukum bisikuk bobinamne. Tonda, sikce, ‘Se, yata wiriptibye do?’ tenen, imun kanye bobuka, unyak nang ara, narye sik talima kwa dipnirye, anggun kanye talima tamubuka teleb kipdeipnamne. Winipnyopura, yata nang do nirya, sikce ikin kanye bobuka engenyak nang ara, teleb kipdeipnyopura, sikce kanye deibuka nati, ‘Se, Allah ara, pia teleb ulule,’ nyabuka, nati si erenamniake.
Narye Israel nang nirya, asukum unyak nang babye, pia otam mutuku noutam unyak nang babye nirya ara, narye tuba tonap teleb kipdeipyeba, tenina kum aryuk, talye tunim abuka, pia teleb unamake. Nara, Allah Yahweh arye ayupu nyapmasina ati, aning nirya ara dipkoprob nong upnamle,’ nyapsine. Na mapu koprop nirya ara, narye kwetepnirye, pia teleb kipdeipnamsine.
Se, anggun nirya, Allah dam akunum bataklum nang ara, tuba tamubuka, el damuk yanamlume. Elce anggun teleb kipdeipsilirye, malye ning nirya ara, lyepdosilirye, kum kipdeipsilyeba, el yupu moubuka talipmunce unamlume. Winipmunyopura, anggunce nyanamlume. “Diba, winida nun akunum tamubuka, Allah Yahweh, el dam yayabe. Ati, dipkoprob elda nun ni koproba Allah,” nyanamlume.
Aminyan talak nirya ara, narye sikti, kanye deipnirye, teleb kipdeipnamne. Tonda, narye sikti, batakna pia kumce, ‘Amutuku noutamuk, pia teleb unamakʼ tenen, kintinip deipyeba, telebuk wininamake. Aning akunum nyapdeipsina ati, aning ara, pia kum bataknamne. Na nyasinye touk, dipkoprob pia wininamsinarya! Na kanye tenen ning ap, na talima ap deice arye, nyalin yupu arye nyapsine. Aning nirya ara, dipkoprob winipnamsine!
Aning winipmasila ati ara, nun nirya arye piribibirye, Allah Yahweh ati, dib tenebuka dobolbanamabe. Ara, nun ni koprop Allah ati, ‘Se, dipkoprob anda pia mambul weiknye ulyame,’ nyabuka, el tibuk, si erenamabe. Batakna kumce, Allah ati dib tenebuka dobolbalamipya ani, dipkoprob Allah arye, nun melina ati, asum-asum nirya beren tam talak keting panalyangalamle atonun, Allah arye nunti, yanuka melinamsile. Aning atonun winipmanto ara, weik dou malamlya ani, sirya talak ara, mok weik arye cepliba, tukwak mutuku nirya, teleb ulamle touk ulirye, nunti melipsilirye, teleb ulinamsile. Nabi Hosea birye nyabuk.
Nabi Mika birye, Allah ati nyabuk. Se, na ni Allah. An uminye Allah atonun, ton pia kum ulule. An tonok ulyame. Ati, Allah Yahweh ance wipdeiamsulum ninye, mitik anun sirya tuba aunmab ninye ara, nun malye wininyap ning nirya, namin kipsimince, lyepsilyame. Anda ninye tukwak nang ati, pia ton kum deresilyame. Nun malye wininyap ning dekna ati, adiparyuk wenebuka opsutum bukni, aning kum winimince, nunti tamubuka bico tenesimince, melibuka lyesilyame. Ance ninye ati, weik arye bico tenesilyame. Ance nun tukwak ninye ati, kanye delisilyame. Winibuka ulyamnye ati, moropkine.
Piblisite