Hosea 13:1 - Eipomek

¹ Minop talak, sik Efraim yala ninye, teleb ubuka ulamikce, mikip weik ninye ulamika ati, yupu nyalamikba, sik yuk mutuku ninye arye, ilil ulamuk. Bukni, sik Efraim yala ninye nirya ara, isa si Bahal si erelamika deice arye, malye weik winilamik. Ati, wini talak ara, akunum diplamak ninye atonun unyake.

Hosea 13:1 Referans Kwoze

Hosea 11:2

‘Yukupniba, na dam yanamake,’ tenyamse bukni, tuba tamubuka tonap, ‘Na dam tamubuka yalulume,’ nyamsiba, sik amul deiceuk kekelamik bukni, nati batakalamnikce, mitik yukakuk binuka ulamik. Na dam tamubuka kum yangalamik. Na mapu koprop Israel ninye ara, ‘Isa Mutuku Dongonye si erenamap’ tenen, isa si ara Bahal dobuka, Bahal isa el si eren aik pum tam, el urasin atonun ning puturubuka memelamikce, Bahal el si ati erelamik. Winilamikce, isa el si Bahal ap, yuk-yuk talye ning ati, ‘Nun ni koproba ani,’ nyabuka, patung atonun kintinibuka delilamikce, aning si erena ati, siltong teleb ning uku dongobuka, aisa si erelamik.

Lukas 14:11

Ara talye ati kum nyapsine. Yata ninye do nirya, sikce sik bidamnye ati erelilalamak nang ara, aminyan talak Allah arye anang dobuka amu kipdeipnamle. Bukni sik talima darapdongobuka amu tam ulamice nang ara, aminyan talak Allah arye anang erebuka teleb ak deipnamle.” Yesus arye nyabuk. Nyabukopura, Yesus arye el bukmok aik deiyoknye biti nyabuk.

Amsal 18:12

Ninye ton sik kanye talima erebikirye, kwalibuka ukirye sikce tenebuka, ‘Se, nunda weik teleb nang unyabe,’ tenebuka unyaka deice arye, dipkoprob aminyan talak ara, saknamake. Yuk ninye amu tamuk unamake. Bukni, ninye ton mitang asa arye, kanye talima dakdongobuka ululnye bira, telebuk upnin baliba, yuk ninye nirya eibikirye, elti, kanye delinamake.

1 Raja-Raja 12:25

Aning nirya akunum winibukopura, Yerobeam elda ninye deiyoknye akunum kibuk talak ara, adiparyuk Efraim yala nang talibuka ulamik tam, Sikem mutuku binuka ulamuk. Ara, ‘Ninye arye olyanamnyaka’ tenen, aning-aning nirya memebuka deibukba, mikip weik kibuk. Winibukce, tia talak ati amutuku ulamuka ani, anerye yuk mutuku ton el si ara Peniel mutuku biyukce, amutuku ton mikip kina ati kintinibuk.

1 Samuel 15:17

Anyabuk touk, Samuel birye, Saul biti nyabuk. “Ura, minop talak ara, ance an bidamang ati, ‘Se, nara talye urdemnye,’ tenelalalum bukni, Allah arye, erebuka tikeipkukba, Israel ninye ayala-ayala nirya, sik ninye deiyoknye, Raja min wipdeipkuk do, kum do? Allah arye, ninye deiyoknye tikeipkukba umince, Israel ninye unyak mutuku nirya, talibuka ulyame.

Hakim-Hakim 12:1

Atalak aryuk, Efraim yala nang nirya arye, ‘Mal olalbinamapʼ tenen, kintinibik. Winibikopura, adiparyuk kintinibuka, Yordan mek koubuka, keting panalyangan tam, Zafon mutuku biyik. Biyikopura, sik anang arye, Yefta biti nyabik. “Yata deiyok ati, anda nun ton kum laka nyapmasilamce, Amon yala nang ati olbinmamu do? Nun ak laka nyapmasutumba, nun neika an ap, ansinibuka binmatibye. Ati wini talak ara, nunce an asik uku dongopnukiyabe. Uku arye an asik dipnamle talak babye, an nong ap, an ap, neika ansinibuka ululum nang ap, anggun nirya ara, uku arye dipnamsile,” nyabik.

Hakim-Hakim 8:1

Efraim mutuku nang arye Gideon biti nyabik. “Oketeng tamun noutamak, anda Midian tam nang olbinamalum talak ara, yata ati nun ton kum nyapmasulum do? Winyamsuluma ara, yata deiyok ati, malye winipsulum do? Nunce anti malye kanye bopmabe,” nyabuka, Gideon dam nyalbiyikce, elti, malye-malye yupu weik nyanmik.

Yosua 3:7

Asum ara, Allah el si Yahweh arye, Yosua biti nyabuk. “Minop talak, narye Musa meilyamsiba, pil mikip arye dolamuk touk, an babye, narye melipnamkine. Aning ara, ‘Israel ninye nirya, kel biknamak’ tenen, arup arye deiyok koubuka, narye an weiknye kipdeipnamkine. Winipkiniba, Israel nang nirya arye anti, ‘Se, Yosua bira mambule, Yahweh arye melilule,’ tenebikirye, an yupu kekenamkiyake,” Allah arye, Yosua biti nyabuk.

Bilangan 13:16

Musa birye wipdeibukba, sikce Kanaan mutuku dilbiyik nang ara atia. Winibuk talak ara, Nun el mi Hosea biti, Musa birye winiryuk si, ‘Yosua,’ nyabuka si arebukba, anye asi dobuk.

Bilangan 13:8

Efraim yala nang kan-kan ara, Nun el mi Hosea wipdeibuk.

Bilangan 10:22

Winibikopura, Amihud el mi Elisama birye, Efraim yala nang ati, sik deiyoknye kibukce, menekuka bayukba, Efraim yala nang, sik yala si bendera deice sekuka talibikce, melibuka biyik.

Kejadian 2:17

Bukni, tonok yo ara, ayo duk dakuka kum dinalyame. Ayo duk dina ara, meme. Ara, Malye Winina ap, Teleb Winina ap, Kel Bikna Deiyok Yo duk dakuka dipminyopura, dipkoprob dipnamlame. Ayo duk tonok ara meme, pia kum dinalyame, nyapkine.” Allah arye, nyabuk.

2 Korintus 5:14

Aning-aning winibya nirya ara, deiyok tonokuk ulule. Ara, Kristus elce nun nirya ati, bico tenepsilirye, melisilya deice arye, el mikip arisilibuk adeice arye el pil donyabe. Aning babye, talye ati kume. Kanye teniltona kum usilyeba, pia dipkoprop tenenyabe. Nun kele. Yesus arye, ‘Ninye mutuku-mutuku nirya dipnamak’ tenen, tukwak mutuku ninye nirya sik lyena ati, elda tonoknye birye, nun malye ning nirya pununa ati dipsuke. Aning ati, nun kele. Kristus dipsuka deice arye, nun malye ning nirya punupsuka ati, Kristus dipsuka deice arye, nun nirya akunum dibupe.

Roma 5:12

Ura, yuk yupu ton dukdongobuka nyapnusine. Malye una ati deiyok ning ara, tonoknye birye deiyok kibukce, ninye tukwak ninye nirya benepdeibukba, dakdongopsuke. Dakdongopsukce, wini talak ninye im sirya, mutuku sirya nirya ara, talima malye usulula ati ara, malyeuk wininyabe. Tonda, anye malye uamuka deice arye, ninye dipna deiyok ning ton yayuke. Ninye im sirya, mutuku sirya nirya malyeuk unyaba anya arye, ninye nirya dipnauk unyabe.

Yesaya 66:2

Na Allah Yahweh arye nyapsine. “Tukwak mutuku noutam ulul ning nirya ap, im noutam ulul ning nirya ap ara, na taruk koproba arye, kwepdeipsiba ulule. Kanye talima erena kum, ‘Se nun malye unyabe’ tenen, ilil upliba, nimalyap asa unyak ninye ati, na kanye delinune. Tonda, sik malye unyak ning batakikirye, narye, ‘Aning ara wininamlulume, aning ara, kum wininamlulume,’ nyalisinye yupu nirya ara, moubuka kekebikirye, talibuka unyak ninye ati, na kanye delinune.” Allah arye, Israel ninye ati nyabuk.

Ayub 29:21

Tonda, mambul yupu nyan talak ara, na tenepse ning, akunum nyapnyopura, atalak ara, sik amot nirya ara, moubuka kekelamikce, yupu nyana kum, talye tunim abuka ulamik. Ara, ‘Anye yata mambul yupu ton dukdongobuka nyapnamsil do?’ tenen, sikda yupu ton nyana kum bukni, na nyalamse yupu nirya ara, sikce moubuka kekelamik.

Ayub 29:22

Na yupu akunum nyapne talak ara, sik yuk nang arye ton, yupu tabakuka kum nyalamik. Na nyalamse yupu ara, sik deice ara, mok purye saklamle atonye ulamse. Sikda teleb kanye bobuka kekenauk ulamik.

Hosea 2:8

Israel ninye ara, talye-talye yolamak kilapu atonun unyake. Ara, sik ‘Din ning, el si ara gandum ap, anggur mek ap, zaitun yo duk mek ap, tonda dekna pia weik ning emas ap, perak ap, pia weik arye aresululnye bira, Allah biryuk aresulule,’ pia kum teninyake. Aning moubuka kum tenenyaka deice arye, ateleb ning nirya dobuka, talye Isa Mutuku Dongonye, el si Bahal, el si erebuka kina ati, arelamik. Aisa ara, kam una kum ning bukni, ninye taruk deice arye puturubuka memepdeibikirye, talye ning Bahal ati, ‘Nun ni koproba,’ nyabuka, el siuk erebikirye, na Allah ati bataknikirye, na si pia ton kum ereninyake.

Hosea 8:4

Tonda, yuk malye ning winilamik ning ara ani. Ara, na mapu, sik Israel nang ara, na sik deiyoknye unun bukni, sikce, ‘Allah arye yatanye erepdeipsilyeba, Raja kiplirye, nun talibuka unamsil do?’ tenen, nati kum asipnik bukni, aning kumce, sik ninye deiyoknye, Raja-Raja tikna ati, sik kanye aryuk, ninye wipdeiamikba, Raja-Raja kilamik. Atonun ubuka, sik amu tam, yuk ninye deiyok nang nirya tikna babye, na kel bikina kumce, sikce, ‘Nun bidamnye aryuk, wipdeipnuyabe,’ tenelamikce, adeiyok nang ton wililamik. Tonda, sik dengna weik ning, el si emas ap, perak ap dolamikce, ‘Talye isa si erenamapʼ tenen, patung berhalah memepdeiamikce, isa siuk erelamik. Wininyaka deice arye, dibinyaka ati, winipmanto ara, sik mining nang aryuk, sice buklopnarye malye kibuka, olana atonun unyake.

Yesaya 7:8

“Ayupu ara, talye ati kum nyapkine. Deiyok ara ani. Aram mutuku ninye deiyok nang unyak sukum ara, Damsyik mutuku unyake. Ati Aram mutuku deiyok ara, Damsyik mutuku mikip mitik tonun ulul touk, sik Aram mutuku ninye nirya babye, mikip mitik tonun unyake. Tonda, Damsyik mutuku babye atonun, mikip weik kum ulule. Amutuku talibuka, ninye deiyoknye Resin bira, el mikip mitik tonun ulul touk, el ulul mutuku Damsyik mutuku deiyokak babye, mikip mitik tonun ulule. Aminyan talak, keting tamun enam puluh lima (65) tahun ton, akunum kiplyopura, narye nyapniba, yuk nang arye, Efraim yala ninye nirya obikirye, sirya dakmanto upnamake.

Hosea 2:10

Winipmanto ara, atalye yolamak kil, el tenelamlye nang wekmakca dam arye, el ongonlamle baju kwiriplobikiba, el nong bananguk uplirye, alye weik daklamle touk, narye Israel ninye, sik teleb ning nirya kum kipdeipnamne. Winipnamne talak ara, tonoknye babye ton, malye tenebuka na dam yalirye, yanuka kum dopropnamle. Israel ninye ati, kum lyeptinye.