Anggun bidamnye arye, anggun bidamang ati nyalalulume. “Kume, nunda aning-aning ayala-ayala nirya weika arye bulubuka akunum deiamuba ati, nunda bona uto-uto talin ninye akunum unyabe. Yata ning do nirya kum patasulule,” nyabuka kwalilulume. Utenebukce nyalalulum bukni, dipkoprop winimunye ning ara, moubuka kum tenelulume. Allah arye anggunti el kanye ara, ‘Kume, aninye ara, pia malye-malyeuk wininyaka anya arye, yuk nang nirya arye anggunti, se sikda bicoe,’ tenenamake. Sikda talye bona utotoa kum ninye ap, asing kun ninye ap, talye nong demuk banang banyak ninye ap atonun unyake. Allah arye anggun ati, ‘Sik Laodikia ninye ara, na like,’ utenesulule.
Hosea 12:8 - Eipomek8 Allah Yahweh arye, sik Yakub yala nang ati, nyabuk. “Sik Kanaan mutuku nang arye, talye dungnubuka, bona diripnarye, ubula dololamik touk, anggun babye winilulume. Ara, ‘Abona ara, yata barye kilo ulul do?’ tenen, anggun ikin kiklilen ning, el si timbangan talibuka dipdemunce, tilila yupu uk nyalulume. Ara, ninye arye, ‘Nun bona deknamapʼ tenen, anggun dam yakcopura, anggunce sik bona deiamikirye, yanuka dekelulnye birye, talye yupu deice arye, ‘El ikin ara, ani. Ati, yo bok ara, winibuka arepnamnulume,’ nyabuka, tilila yupu uk nyaplobuka, dipkoprob yupu, el dam kum nyalulume. Winimunya deice arye, yuk nang ati, ikin ning sik nong deice delilulume. Gade chapit la |
Hosea 12:8
29 Referans Kwoze
Mikip kum nang nirya ara, tonok isin atonun unyaka ati, sikce pia kum lyepsitinge. Atonun, sik pia mambul weik nang babye, sikce kum lyepsitinga ati, sik bidamang lengdar deice arye, elilamak ning atonun unyake. Talye bona utotoa talina kum nang babye, weik nang babye, sik nirya ara, mambul nang kume. Winipmanto ara, bona dobuka, ‘El ikin ara yata barye kilo do?’ tenen, timbangan deice deibikcopura, sik ikin ara, pia mitik diamuk ulule. Sik tukwak nang ara, weik mambul nang kume. Diba, talye bona utotoa kum nang babye, weik bona talin nang babye, sik nirya ara, mambul kum ati, winipmanto ara, ‘Ikin ulul do?’ tenen, timbangan deice deiptibya babye, sik ikin ara, pia kume. Sik nirya ara, tonok isin atonun unyaka ati, sikce kum melibuka lyepsitinge.
Wininyak deice arye, kanye deibuka teleb ubuka neiktoto una pia kum arye, malye teneldana ap, waldana ap, oldana ap, wininyake. Awininyak ninye ara, sik kanye talima pia malye ubuka anya arye, dipkoprop moubuka kum teneptinge. Allah el dipkoprop yupu batakuka yaninyaka ati ara, wini talak ara, teleb ning kum teneptinge. Deiyok ara, sikce. Tonda, anang sik malye tenenyaka ara, ‘Allah yupu dobuka yuk nang ati peterebibyopura, aminyan ara, yuk nang arye yo bok arepsikce deice arye bona weik talin nang mapu unamabe,’ tenenyake.
Tonda nyabuk. Aning deiyok ara ani. Sik adomba basam nirya akunum dekikirye, dopropnamaka ning ara, adomba basam nirya opnamak bukni, sik anang arye, ‘Se, adomba basam opnamaba ara, bicoe,’ pia kum tenenyake. Sik adomba basam el kalipdeibuka dekenyak nang arye nyanyake, “Se, Allah Yahweh anda pia telebe. Adomba basam dekmapya deice arye, nunda, pia weik tonun tabakuka bona weik talin nang unamabe,” nyanyake. Tonda, adomba basam dekenyak nang ap, sik domba weina ati deiyok nang ap, sik nirya arye sik weinyak domba basam ati, ‘Se nun domba basam obikirye, dipnamak,’ tenen, pia bico kum tenenyake.
Tonok ning ton, narye moubuka kum tenipnamtinye ning ulule. Ara, kil tonok el akanye akunum dobuk kil bukni, el akanye ap neika teleb ubuka una kumce, talye ulamlirye, yuk nang ap talye yoprakirye, malye ulamlya ani, adiparyuk akil arye nyalule. “Kume, na yata malye unya ati wenepmanilam do?” nyalule. Winibuka nyalul bukni, dipkoprob pia malye ulula anya arye, ayupu nyalul ning ara, ‘Yata wiribuka ayupu talye nyaptu do?’ tenen, moubuka kum teninune.
Atonun, sikce deipdanin yangalamikce, sikce sik bidamang ati, ‘Nunda pia teleb nanguk unyabe,’ tenelamik bukni, dipkoprob sik aninye nirya ara, pia tuba malyeuk ulamik. Awinibuka unyaka atonun unyak ninye nirya ara, winipmanto ara, nininga pia weik ulul bukni, mek pia kum kekenyak ninye ulamak touk unyake.
Bukni, nun ni Allah arye, anti, malye kipdeipkilirye, wenebuka opkilyeura, tamubuka kam bukmince, teleb kum unamlame. Tonda, yuk nang arye anti, ‘Elda telebnye ulamuk,’ kum nyanamkiake. Allah arye anti, mikip arye talipkilirye, an unamlamak arye bobinuka, bai tam deiplopnamkile! Diba, tukwak mutuku noutam bukni, kam tuba unyak nang kan-kan arye, tomobuka bobikilirye, deiplopnamkile. Ara Allah arye, an akunum opkilyeura, sik akunum diamik nang unyak sukumuk, an babye bobinuka, deiplopnamkile.
Wini talak tukwak mutuku unyakce, aning-aning nirya, weik talikirye, bona weik talin nang atonun unyak ninye ati, nyanamlyame. “Anggunda maknya kanyeuk, kintinina ap, dina ap, meme. Bona ap, yo bok ap, tukwak bona weik nang nirya ap ara, anang deice anggun kanye delina kume. Aning arye kum lyepsutue. Aning nirya ara, pia unamle ning kume. Yata wiribuka talakuk aupmalya ani, aminyan talak tukwak ning nirya kum danamle. Tukwak ning ara, ‘Yata talak kum danamsil do?’ Nun walwal anya arye, aning ati kanye delina meme. Aning kum bukni, ‘Allah elcuk melipsilirye, lyepnamsil’ tenen, el deiceuk anggun kanye delinamlulume. Nun kanye deibuka, teleb una ati, arisilya deiyoknye bira, Allah elcuk aning-aning nirya weik arye arisulule.” Ayupu nyapnamlyame.
Wininmekura, Yesus arye aFarisi nang ati ayupu nyabuk. “Anggun Farisi nang ara, ‘Yuk nang arye malye nang tenepsicak’ tenen, anggun malye winimunye ning duknumunce, nong bol deiceuk teleb pil dolulum bukni, anggun kanye talima noutamak tenebuka duknulum ning ara, malye ning weik tuba aupmalye ning ara, Allah arye kel biksulule. Tuku ak ninye arye, ‘Aning ara mambul’ tenen, pataplibuk kanye delinyak ning ara, Allah aning ati, el kanye ara, ‘Aning ara pia malye, tenebuka like,’ tenelule.
Nyabukce ayupu ton nyabuk. “Tonok pil donanye birye, el deiyok nang bitinye nang utiringopura, tonoknye birye abitinye nang pil kum doptue. El deiyok nang bitinye nang ati, kanye deibuka, tonye pil dobuka, tonye pil dobuka, kum winiptue. Ato pil don nang ara, ton deiyoknye biti, kanye deibuka, ton deiyoknye biti, lik tenebuka unamake. Tonda, sik deiyok nang bitinye kibikce, ton deiyoknye biti, pia talibuka unamake. Ton deiyoknye biti, lik uplibuk, bataknamake. El pil deiyok nang bitinye nang utiringopura, tonye biti lik tenebuka bataklirye, tonye biti kanye deiplirye, meliplyopura pil donamle. Tonye bira, bataknamle, tonye bira, pia talinamle. Ayupu nyapmasin touk, Allah ap, yo bok do, talye tukwak ning nirya ap ati, neika talibuka kum pil doptume. Tonok ning ara wibuka talinamlulume,” Yesus arye nyabuk.
Yesus arye nyabuk bukni, anye bira, ‘Yesus arye nati, el malye ulule,’ tenepmanila ati, ‘Na malye wininye ning kum biknilirye, telebnye uk, tenepnunile’ tenen, ayupu tamubuka nyabuk. “Yo, deiyok ara, Allah yupu deice arye, ‘Anggun bidamang unyak nang,’ nyalulul ara, dipkoprop ara yatato nang ati nyalul do? Yata nang ati bico tenebuka kanye deipnamne do? Yata nang ati, melinamne do?” nyabuka asipdeyuk.
Sik laut mekwen pum tam ulul ning, ikan olamak nang ara, Allah ati pia kum tenenyaka anya arye, el mekwen pum ikan tomon ning, el si jala ati, ‘E aning ara, weik mambule’ tenen, aning ati, si erenyake. Aning atouk, sik mekwen pum ikan on ning si ara, ‘Se, aning ara, mambul ning anya arye, nun dina ati, mekwen pum ikan weik talepmalebuk, dobuka weik dinyabe. Kum dinyap ning ara, weik tuba aulula anya arye, aning dekibirye, yo bok weik dolonyabe. Wininyaba deice arye, aning-aning weik aupmasile. Tonda, ayo bok deice arye, yuk yala din ning nirya, pia teleb ning dekuka dinyabe. Ati, nunda kil-kil kanye bobuka, pia telebuk unyabe,’ tenenyake. An Allah ati, pia kum tenikinyake.” Habakuk birye, Allah ati nyabuk.
Anggun malye un ning weik aupmasili buk, anggun mandipna kanye arye, ‘Kume, nunda malye ton kum winilamupu,’ nyabuka talyeuk nyalulume. Tonda, ‘Tuba malye kum unyabe. Teleb uk unyabe,’ nyalulume. Tonda anggunce, ‘Kume, Isa Mutuku Dongonye si Bahal kum erelamap touk, tuba kum erenyabe,’ nyanululume. Nyanululum bukni, anggun tamubuka weik lyu mutuku noutamak pil dolamlum ning ara, tuba tonap tenepnululume. Anggun malye weik ulamlum ning ara, moubuka tenepnamlulume. Utenepdamunce, anggun bidamnye kel biknamlume. Anggunda winipmanto, unta basam kil arye, ‘Yim unta basam ulamlyak ati, dan do?’ tenen, burum kwakmalirye, otam binmana, atam yanmana ulirye, talye lukparabuka balsusulamle touk umunce, anggun babye kanye bona kumce, malyeuk ululume. Anggunda moubuka kum tenelulume.
Malye ululum ning, kum nukmanto usilibuk, anggunce nyanululume. ‘Kume, nunda malye kum wininyap nang unyabe. Nunda telebuk unyabe. Ati, Allah arye kum wenebuka opnamsil,’ nyaldalulume. Bukni, na Allah arye dipkoprob nyapsine. Narye anggun malye weik ululuma ati ara, wenebuka opnamsine. Ara, anggun malye ululum diparyuk, ‘Kume, nunda malye kum wininyap nang, telebuk unyabe,’ nyaluluma deice arye, yupu bokipsinirye, wenebuka opnamsine. Na Allah arye nyapsine.
Tonda, na nabi Maleaki birye ayupu nyapsine. Anggun malye ululum diparyuk, Allah el dam yupu nyalulum ning ara, ‘Na pia like weike,’ tenesulule. Utenesulul bukni, anggun malye umunye diparyuk, Allah Yahweh ati tamubuka asiltolulume. “Nunda yata ning winibibya deice arye, Allah ati lik kilinyap do?” Ati, na Maleaki birye laka nyapnusine. Anggunce, Allah ati lik kililulum ning ara, ani. Ara, anggunce nyalulume. “Malye wininyak ninye nirya ati ara, Allah elce teleb uka tenesulule. Tonda, diksukum telebuk ulul Allah ara, dan sukum ulul do?” nyabuka asiltolulume. Winimunya deice arye Allah ati lik kililulume. Maleaki birye Israel ninye ati nyabuk.
Nyabukce, ayupu ton nyabuk. “Anggun kele. Na mapu koprop Israel ninye arye, malye winibice talak ara, ‘Allah arye nun malye winin ning kum daneipnamsil’ tenen, kam ning boyakiba, anggun imam nang arye aning obuka, na arena ati, uku dalulume. Ati ara, anggun imam-iman nang arye, ‘Kume, Israel nang malye winipmace talak ara, sik malye winin ning dekna ati, teleb kipdeipnamsil’ tenen ning boyakiba, nunce aning nirya bokuka dopropbibirye, aning ara, nun ton dobuka dinamabe. Tonda, aning bokuka doprobibya deice arye, nunda bona weik talin nang unamaba anya arye, sik Israel ninye malye wininyak ning ara dauaplye,’ tenelulume.
Pia malye mutuku noutam ulamlumce, ikin weik ulamlum bukni, naryuk anggun patalamsuk touk, anggun din ning dobuka arelamsise. Arelamsiseba, aning dobuka, weik arye dilamlumba, boulamsuke. Din ning dipna arye boupsinopura, atalak arye tuba tamubuka tonap, anggun bidamnye ati, kanye deipdana arye, dipdanuka kwalipdana arye ulamlume. Kwalipna arye ulamlum talak ara, na si yaniptapnin arye, nati luba kilamnulume.
Ura ninye arye, ‘Dekna ning ati, ikin yata barye do?’ tenen, kiklilen ning, timbangan malye kibuka kiklinyaka ara, Allah arye, ‘Aning ara pia na like,’ tenelule. Bukni, ninye arye, ikin kiklilen ning el si ara timbangan, kiklipdekirye, timbangan dipkoprob ulamle touk nyabikirye, auang yo bok dipkoprob ning arinyak nang ara, ateleb wininyak ninye ati ara, Allah arye el kanye weik delilule.
Winipmanto ton, maka dobona kel nang arye, maka tomobuka, aik domikca noutam, maka pia weik dongolamak touk wininyake. Ara, aning atonun, sik anang arye, minina yupu ap, tilila yupu ap, ninye on yupu ap, nyaplobikirye, ‘Amutuku nang, sik bona nirya ubula dolonamabe,’ tenenauk unyake. Sik aik pum bisikuk, malye winin ning arye, pia weik langdibuke. Amalye ning wininyak deice arye, amutuku nirya, sikce talibuka winikirye, akunum bona talin weik nang unyake.
Tonda, anggun malye ululum ninye arye, anggun bidamang ati nyalalulume. ‘Anango, wala winiryuk tiknamle talak upliba, Allah el si erenyap talak ara, dan sum akunum kum datuba, nunce tonap tuba tamubuka, nun gandum minop dektibye do?’ Tonda, anggun ayupu nyabuka nyalulume. ‘Allah si erena ati, pil dona kum diparyuk, dikdik senyak sum, Sabat sum ara, dan talak sirya daknamle do? Sabat sum akunum sirya daktuba, nunce nun gandum duk dektibirye, deken ning dopropnamabe,’ tenelulume. Tonda, deken ning, ‘Weik doproptibye’ tenen, gandum duk lun ning ara, mitik ning aryuk lululume. Mitika aryuk lululum bukni, ‘Aning dekena ati, yo bok weik tabakuka arepsululume,’ nyabuka morolulume. Tonda, gandum duk sak libikirye, timbangan deice delinyak talak ara, anggun timbangan ara, tilila ninguk kiklilulume. Aning dipkoprob ikin ara, kum nyalulume. Winimunya deice arye, anggun mutuku ninye ati, tilila yupu uk nyalulume. Anggunce, ‘Kume, gandum duk el ikin ara, mitik anun uka,’ nyaplobuka, tilila yupu nyapmunce, sik ning talye ubula dobuka dilulume.
Piblisite