Hakim-Hakim 6:3 - Eipomek

³ Midian nang arye, Israel ninye taleamik talak noutamak nirya, Israel nang sik dina koulamik ning wa dam akunum koubuka, aik yan talak ara, sik Midian nang ap, Amalek nang ap, tonda keting yangan tam yuk yala nang nirya ap, Israel ninye sik wa wibuka koulamik ning ubula dona ati, sik mutuku-mutuku nirya bululyanuka, adiparyuk sik wa wilina nirya, ubula dalubuka dololamik.

Hakim-Hakim 6:3 Referans Kwoze

Hakim-Hakim 7:12

Ura, sik Midian yala nang ap, Amalek yala nang ap, tonda yuk yala nang, keting panalyangalamle tam ulamik nang ap, mekinak, weik lyu noutamak akunum aik dobuka ulamik. Sik ninye ara, sul kwising pia weika arye amulamak tonun, nukmanto kum pia weik ulamik. Tonda sik unta basam ara, mek wininga yamulamla atonun, pia weik ubika ati, kum nukmanto kibuk. Ati sik ninye ap, unta basam ap ara, kum nukmanto ubuk.

Hakim-Hakim 6:33

Atalak ara, sik Midian tam ap, Amalek mutuku nang ap, tonda yuk-yuk mutuku nang, keting yangan tam ulamik nang ap bulubuka, tonok sukumuk wekikce, Yordan mek koubuka otam mutuku si Yisreel mekin binuka, sik tenda cang kain aik amutuku binuka dobik.

Hakim-Hakim 3:13

Ninye deiyoknye Eglon bira, Kanaan mutuku ulamik nang kan-kan arye, Amon yala nang ap, Amalek yala nang ap, ‘Neika mal olalbinamapʼ tenen, neika ansinibuka yayikce, Israel yala nang yanuka obuka sirya dakik. Winibikce, Yeriko mutuku kurma yo duk weik ulamuk mutuku nirya ara, sik anang arye yanuka alubuka doprobik.

Ayub 1:3

Tonda, el pil don nang babye pia weik ulamik. Ulamikce, domba basam yupa tujuh ribu (7.000) ap, unta basam yupa tiga ribu (3.000) ap, tonda keledai basam yupa ara, pamubarye ratus (500) ap, sapi basam yupa ara seribu (1.000) ap, aning nirya talibuka weilamik. Winilamikbuk, sik keting yangan tam ulamik ninye noutamak bona weik nang ton aulamik bukni, el Ayub bira pia weik sisinanye ap, pia telebnye bira, el tonok ulamuk. El atonunye ton kum ulamuk.

1 Raja-Raja 4:30

Salomo bira, keting panalyangan tam ulamik nang ap, Mesir mutuku ulamik nang ap, sik bikamik touk kume. Elda pia weik kel arye bikne ning bikamukce, ulamuk.

Hakim-Hakim 8:10

Minop talak ara, sik keting yangan tam ulamik nang, sik yin nang ara, yupa pia weik seratus tiga puluh lima ribu nang (135.000) ulamik bukni, Gideon ap, el mapu arye, yupa weike dua puluh ribu nang (20.000) oplobikba, mitik tonunuk lima belas ribu nang (15.000) tuba kam ulamik. Ati, atalak ara Sebah ap, Salmuna ap, tonda sik mapu yin nang ara, lima belas ribu nanguk, mutuku si Karkor mutuku unmek.

Kejadian 29:1

Yakub bira, el lengdar mapmok ning nirya, akunum eibukce, bisik banmoka ani, keting yangan tam bukni, mutuku si Padan-Aram mutuku biyuk.

Mika 6:15

Tonda, anggunce gandum duk ap, yuk yala ning nirya ap, dobuka dokamlum bukni, duk teleb ning ton moupliba, pia kum dakanamlume. Anggun kounamlum ning yala nirya ara, teleb ubuka nong upliba, kum linamlume. Urtalya ati, kounamlume. Tonda, anggun Zaitun yo duk dakuka, anggun nong likna ati, mek purupmunce, minyak mek dobuka, dokola delinamlum bukni, anggunce aminyak mek dobuka, anggun nong deice, kum likinamlume. Yuk nang arye, aminyak mek ara, alapdopnamsiyake. Aning atonun, anggur tapu duk dakukapmunce, mek purunamlum bukni, anggur mek kintinibuka deipnamlum ning ara, anggun ton dobuka, kum dinamlume. Yuk nang arye, anggur mek babye, ubula alapdopnamsiyake.

Ayub 31:8

Malye ulamtinyopura, yuk nang arye, na yala dokamtinye ning ara, duk dakuka diptinge. Tonda, malye ulamtinyopura, na kouamtinye ning nirya ara, talye kwinibuka bataktinge.

Ulangan 28:51

Tonda, ayu nang arye, mal olyanamsiyak talak ara, anggun domba basam do, sapi do, maka do, anggun weilulum ning yala-yala nirya ap, tonda anggun koululum ning nirya ap ara, kum kipdeipnamsiake. Winibikirye, daupnin balamica ani, anggun din ning yala-yala nirya kum kipdeipsicopura, anggun babye ton, obuka kum daneipnamsiake. Ara, anggun gandum duk nirya ap, tonda anggur duk ap, anggur mek ap, minyak zaitun mek ap, tonda anggun weilulum sapi basam ap, kambing basam ap, domba basam ap, aning nirya kum kipdeipsikiba, aning nirya ara, kum dalirye, anggun nirya babye dipnalume.

Imamat 26:16

Narye anggunti, “Wenenamsine,” nyapmasina ara, talye ati kum nyapmane. Ara, narye anggun wenena ati, anggun dam ara, kanye imun weik ning arepsinyopura, ilil pia weik unamsile. Ara, anggun nong nirya, buppu kibuka talin nakina uk, el si malaria ap, tonda ilong talibuka ngosokne talin ning ap, arepnamsine. Arepsinyopura, auk dilamsiliba, pia min kum lopnamsile. Winibuka disilyeura, anggun asing kuna deiyok uk ton dilamlya ani, asing malye kupnamsile. Tonda, bol malye bopmunye, uk dilamsilya ani, anggun nong nirya mitang upsilyopura, dibinauk unamlume. Tonda, anggun wenena ati, ikin ning ton, anggun dam deipnyopura, anggun wa wiplumce, ‘Din ning kouplum ning nirya ara, nong uplyeba, din dipnamapʼ tenen, wa wipmunce, kounamlum bukni, ‘Din ning yuk-yuk ning nirya ara, nong upliba dinamapʼ tenen, wa wipmunce kounamlum bukni, din ning nong ara dipkoprob libuka kum dinamlume. Deiyok ara, yuk mutuku yu nang, anggun mal olan nang yakirye, anggunti yanuka, obuka sirya daksikirye, anggun wa wibuka yala kouamunye ning nirya ara, libuka sirya dakdopnamsiake. Anggun mal olan nang aryuk, aning nirya libuka dinamake.

Hakim-Hakim 6:2

Midian nang arye Israel ninye taleamik talak ara, yu weik arye ikin ning weik, sik nong deice delilamik ati, Israel nang arye Midian mutuku nang ati ilil weik ulamuk. Ati, buru tam sakukabikce, tia talak una ati, keil deiya pum bisik ap, mutuku tam keil uamukak ap, bai tam talye ninye binmanto kum mutuku ak, binuka ulamik.

Hakim-Hakim 6:4

Wekuka sik Midian nang arye, Israel ninye sik un dam yanuka, tia karin una ati, doltakna cang kain aik dobukabikce, Israel ninye sik wa wibuka koulamik ning nirya ubula dona ap, weltakana ap, winilamik. Winibuka balamikce, Gasa mutuku biyik. Sik wekuka balamik mutuku nirya ara, Israel ninye domba basam ap, sapi basam ap, tonda keledai basam ap nirya, bobuka biyik. Ton ning ara oplobik. Tonok babye ton pia kum batakik, Israel nang sik koulamik ning ap, weilamik ning ap, kum dayukba, dina ap kwaning ap, patalamuk.

1 Raja-Raja 20:27

Winibik talak ara, Israel tam ulamik ninye, sik yin talen nang babye, ‘Opdanuyabʼ tenen, bulubukabikce, kintinibik. Tonda, sik oldan talak patapnamuk ning ap, aning dobuka, boyanganamik nang ap, sik dinamik ning nirya ap ara, kintinip deibik. Akunum kintinip deibikopura, Israel tam ninye, sik yin talen nang nirya ara, ‘Raja Benhadad ap, el tam nang ap ara, olbinamapʼ tenen bisik banmek. Atalak aryuk, sik Siria mutuku yin talen nang yanganmekce, ‘Asukumuk opdanuyabe,’ tenebik lyu mutuku biyikce, sik domik tenda aik binuka dobik. Tonda, sik Israel tam nang ara, bisik banmeka ani, Siria tam nang bulubuka, wekmeka dam yayikopura, dipdeyik. Atalak ara, utenebik, ‘Se, sik Siria mutuku ninye, sik yin talen nang ara, kum nukmanto, pia weik bulupmeka anya arye, sikcuk amutuku lyu nirya ara, langdipmake. Bukni, nun Israel ninye ara, nun ding ara, mitik tonunuk, bulubuka yanganmaba anya arye, nunda kambing basam yupa bitinyeuk yangalamle atonun, ubuka kintinip deipmabe. Ati ‘Se, nunda yate wiriptibye do?’ tenebikce, ilil kanye bobuka, ilil weik unmok.

Yesaya 62:8

Dipkoprob, na Allah arye, na mikip sirik tam taruk eibikirye, anggunti nyalin yupu deice arye, akunum nyapdeipsise. Ara, na taruk mikip weik erebuka, ilil nyalin yupu nyapsinirye, dipkoprob aning winipnamne. Ayupu ara, ani. “Narye lo kum arepnyopura, sik pera mutuku unyak yu nang arye yanuka, anggun Israel nang arye, akunum koululum gandum ara, ubula dobuka, kum dipnamake. Tonda, lo arepniba, anggun ikin kanye bobuka, pil dolamluma ani, nong kiplum anggur duk dobuka, anggur din mek kintinibuka, ‘Naʼ tenen deiamlum mek ara, yuk pera mutuku yin talen nang arye yanuka, aning dobuka dibikirye, sirya kum dakanamake. Aning ara, kum winipnamsiyake, nyapsine.

Yehezkiel 25:4

Winyamluma ara, na Allah arye, sik Amon tam nang ati biknyeura, keting yangan tam pata mutuku noutam unyak nang ati, lo arepnyeura, sikda keting yangan tam arye yakirye, anggun Amon tam nang ati, malye kibuka opnamsiyake. Sik ayanganyak nang arye, anggun Amon mutuku nang ululum mutuku noutam, tia dolina tenda aik dobuka, asukumuk unamake. Winibikirye, sik Amon mutuku nang arye, anggun kouamlum yo duk ap, anggunce weilamlum ning, sapi basam do, kambing basam do, moum yung wamlye ning ara, ubula dobuka dipnamake.

Keluaran 17:8

Israel ninye, Rafidim mutuku noutamak tuba unmek talak ara, Amalek yala nang arye, ‘Israel ninye opnamap’ tenen, amutuku yanuka warikmekce, Israel nang ati, mal dolyayik.

1 Raja-Raja 5:10

Ura, Hiram apil dolamuka deice arye, Salomo patalamuk touk, weik cang kat yo, aras yo ap, sanobar yo ap, weik arye toubuka arelamuk.

Yesaya 11:14

Winibikceura, sik abitinye yala nang neika kipdobikirye, sik Pilistin nang olbana ati, keting kumulban tam neika mal pibinamake. Tonda, sik bitinye yala nang arye, otam keting panalyangan tam unyak nang ara, sik talilamikce bona nirya ara, binuka alubuka dopropnamake. Israel yala nang ap, Yehuda yala nang ap, sikce Edom mutuku unyak nang ap, Moab mutuku unyak nang ap, binuka opnamake. Winibikceba, Amon yala nang nirya ara, sik abitinye yala nang, sik amu tamuk unamake.

Yeremia 49:28

Ura, na Allah Yahweh arye, Kedar yala nang ap, Hasor mutuku noutam unyak nang ati, ayupu ton nyapsine. Ara, ninye deiyok kibuka, Hasor mutuku ulamik nang ap, sik mutuku ap, Raja birye taleamuka ati, ayupu nyapdeipsine. Hasor mutuku nirya ara, Babel mutuku talibuka ulamuk ninye deiyoknye, Raja Nebukadnesar birye olamukce, alubuka dololamuk. Hasor mutuku ati ara, narye winipnamne. Yuk mutuku yu yin talin nang ati, “Anggun minop tikmunyak arye, omutuku, Kedar yala nang unyak mutuku olbinamlume. Ara, keting panalyangan tam mutuku noutam unyak nang nirya ati, olbimunce, anang nirya adiparyuk opmunce, kum daneipnamlume!

Yehezkiel 25:3

Amon mutuku nang ati, nyapnulyame. Na Allah Yahweh, aning-aning deice tam erebuka, Pia Mikip Weik Deiyoknye ununye birye, nyapdeipsise yupu ara, moubuka kekepnuninyake. Ayupu nyapsine. Anggunce na si eren aik pum tam, Pia Teleb Lek Aik ati, yu nang arye, Yerusalem mutuku, na aik malye kipdeipnik talak ara, anggunce, ‘E, aning ara, eiplume! Nun kanye deipnamabe. Moubuka unyake,’ nyabuka kanye deiamlume. Tonda, aning atonun, yu nang arye, Israel nang ulamik mutuku noutam nirya, malye-malye kipdeibikba, amutuku ninye tunim abikce, ninye una kumce, maning pabuk talak ara, anggunce aning eibuka, kanye deiamlume. Atonun ton, Yehuda yala nang malye kibikce, tapu koubuka, sik mutuku tamubuka, wenena aik dongolbiyik talak ara, anggunce aning eibuka, kanye deiamlume.