Hakim-Hakim 4:13 - Eipomek

¹³ Kekebukce, adiparyuk el yin talin nang nirya yukubukba, yayikopura, sik kuda basam tuku deice lipdakuka balamik ning, besi ning arye, domik kereta ton, yupa weik sembilan ratus (900) wibuka deibukba boyayik. Sisera el mapu ap, kuda basam tuku deice lipdakuka balamik kereta bukuka, Haroset-Hagoyim mutuku arye olana ati Kison mekin biyik.

Hakim-Hakim 4:13 Referans Kwoze

Hakim-Hakim 4:7

Yuk talak ara, na Allah arye, Yabin el yin talin nang sik deiyoknye Sisera biti, yupu tenepce arye nyapniba, el mapu ap, ninye olbana ati, kuda basam tuku deice lipdakuka balamle kereta ap, mek si Kison mekin yanamake. Ara, ‘An Barak birye Yabin biti opnalam,’ tenen atia. Anang nirya ara, bobuka an taruk deice deipniba, opnamale.’ Allah arye nyapdeipmakilba, narye nyapkine,” Debora birye nyapdeibuk.

Yosua 17:16

Yusuf birye deibukba, deipdanin balamik nang arye, tamubuka Yosua biti nyabik. “Kume, nunda ninye yupa pia weik unyaba ati, asukum ara, weik mutuku bukuk noutam ara, nun una ati, lo ton weik kum ubuk. Tonda, Kanaan tam unyak nang, sik weik mutuku dabu tam, teleb mutuku luak unyak nang ara, sikce ninye olban talak ara, kuda basam, kirikuka tuku deice balamak ning, kereta perang deice tikikirye, tuku deice bobuka banyake. Aning kereta perang talibuka, wininyaka ara, besi arye donyaka ati, mikip weik ulule. Ara, sik Bet-Sean mutuku, mitik asik dobuka unyak nang ap, tonda Yisreel mutuku lu unyak nang nirya ara, Kereta perang besi talibuka unyake. Ati nunda, ‘Se, yata wiriptibya deice arye, sik mutuku doproptibye do?’ tenen, tuba tenenyabe,” nyabik.

Hakim-Hakim 1:19

Atalak nirya ara, Allah Yahweh arye, Yehuda yala nang ati melibukba, iknapye mutuku tam nang nirya ara, obuka sirya dakikce, amutuku alubuka doprobik. Bukni, anyapce ubuka, outam mutuku lu tam ulamik nang ara, obuka sirya kum dakik. Sik mutuku alubuka kum doprobik. Tonda, aKanaan tam nang ara, amutuku noutam arye, kum yakdonokik. Deiyok ara, sik lu tam ulamik ninye, Kanaan nang arye, ninye olbana ati, kereta perang, kat ning si besi arye moupdeiamik ning ton taleamika ati, amutuku ulamik nang ara, Israel yala nang, sik Yehuda tam nang arye obuka, sirya dakik bukni, kum yakdonokik.

Hakim-Hakim 4:12

Yuk nang arye Sisera biti, “Kume, Abinoam el mi Barak ap, tonda el yin nang ap, Tabor mutuku akunum welebuka binmake,” nyapdeibikba, Sisera kekebuk.

Hakim-Hakim 5:19

Atalak ara, Kanaan mutuku weik deiyok nang yayikce opmandasike. Sik Kanaan mutuku weik deiyok nang ara, Taanak mutuku yanuka opmandasike. Ara, Megido mek puak anyuk mal olalamik bukni, ‘Kat ning perak ap, anang talinyak ning, dekna weik ning dalubuka dopropnamap’ tenen, yangalamikce opmandasike bukni, obuka sirya kum daksikce, tonok ning babye ton kum dalubuka dololamik.

1 Raja-Raja 18:40

Aning winibukba eibika ati ara, Elia birye sik awekmek ninye nirya ati nyabuk. “Bahal isa si erenyak nang, el yupu lak nyana deiyok nang, sik nabi-nabi nang nirya ara, tomoplulume. Anang nirya tomoplulume, tonoknye babye batakmunba bana kume,” nyabukura, adiparyuk anang nirya tomobik. Winibuka Elia damuk boyayikba, sik anang bobuka, sik nirya arye Kison mekin biyikura, Elia birye nyapdeibukba, anang arye, sik malye nabi nang nirya obuka sirya dakik.