Hakim-Hakim 3:3 - Eipomek

³ Tamubuka, amutuku tuba ulamik nang, yala pamubarye ninye deiyok nang, sik si ara ani. Pilistin nang mutuku noutam aulamik. Ara, Kanaan mutuku nang ap, Sidon mutuku nang ap, tonda Hewi mutuku nang ara, Libanon mutuku tam ulamik nang ara, sikda Bahal-Hermon tam arye, dipdongobuka binamuka ani, Hamat mutuku bisik bana ati, lu tam ulamik.

Hakim-Hakim 3:3 Referans Kwoze

Yosua 13:3

Ura, Mesir mutuku nang unyakak arye, diprongobuka, otam arye ubuka, keting panalyangan tam balamle mek, el si Sikor mek, atam arye diprongobuka, deice tam (ara utam) balamuka ani, atam bokolalulak ara, Ekron mutuku eitam ulule. Atam noutam nirya ara, Kanaan yala ninye arye, taleamikce ulamik. Amutuku noutam ulamik ninye deiyok nang nirya, sik Pilistin deiyok nang ara, pamubarye nang ulamik. Ara, Gasa mutuku talilamuknye ap, Asdod mutuku talilamuknye ap, Askelon mutuku talilamuknye ap, Kat mutuku talilamuknye ap, Ekron mutuku talilamuknye ap, sik winibuka nang, amutuku talibuka ulamik.

Yosua 13:5

Anyapce dipdongobuka, Gebal yala ninye arye, talibuka ulamik mutuku ton aulule. Amutuku arye dipdongobuka, eitam mutuku noutam bukni, keting panalyangan tam mutuku aulule. Ara, Libanon mutuku bukni, weik mutuku bukamukak, Hermon mutuku dam buk, utam mutuku ara, Bahal-Gad mutuku arye dipdongobuka binamuka ani, otam Hamat mutuku wekel bana ati, amutuku bisik balamikak uk aulule. Amutuku nirya babye, dopropnamake.

1 Samuel 29:2

Atalak ara, sik Pilistin mutuku, ninye deiyok talibuka ulamik nang ara, pamubarye Raja nang nirya arye, yuk-yuk deiyok kibikba, sik yin talen nang ap, yupa yuk-yuk lelebukabikce, bisik banmek. Ara, ton yupa ara, pia weik seribu (1.000) nang banmek. Ton yupa ara, pia weik, seratus (100) nang banmek. Sik winibuka banmekopura, Daud ap, el melibuka balamik yin talen nang ara, sik nirya, Raja Akhis ap, el yin talen nang ap, sik aminyan tam banmek.

1 Samuel 13:5

Atalak ara, Pilistin ninye arye, Israel ninye olbana ati, ninye weika arye bulubik. Sik yin talin nang ara, laut mekwen kup-kup keil wenenga, pasir atonun ubika arye, nukmanto kum ubik. Tonda, sik kuda basam arye libuka, kereta bukuka, tuku deice ban ning ara, yupa weik, tiga ribu (3.000) kereta kintinibik. Aning atonun, akereta talin nang, yin talina deiyok nang ara, enam ribu (6.000) nang wipdeibik. Israel ninye olbana ati, Mikmas mutuku binuka kintinibik. Mikmas mutuku ara, atam keting yangan tam ara, Bet-Awen mutuku binuka kintinibik.

1 Samuel 6:18

Aning atonun, sik Pilistin ninye deiyok nang, pamubarye ulamik touk, emas arye puturubuka, deibik kupmana urasin atonun, puturubuka deibik ning ara, amutuku nirya ulamik touk, kub urasin ato ning babye, pamubarye arebik. Amutuku noutam bukni, sik pamubarye ninye deiyok nang arye, weik asik domik ning taleamik touk, aning babye pamubarye arebik. Ara, kat keil tembok arye antanap dongobuka, poka domik mutuku ap, tonda mitik-mitik mutuku ara, keil poka tembok deibuka, min domik ning ap, amutuku nirya ara, weik suse urasin ato ning ap, kupmana urasin ato ning ap, kat ning emas deice puturubuka deiamik ning arebik. Ura, apil domik ning ati, ‘Tuba aning tenipnamapʼ tenen, lak bikilina ati aning ara, Yosua el wa windam nirya, weik mutuku yangamuk keil tuba aulule. Akeil dam ara, sik Lewi yala nang, Allah Yahweh arye, “Aning ara, wininamlume, aning ara, winina pia meme,” nyapdeiamukce, sekuka areamukba, sik Israel nang arye, Nyalin Yupu Marikna (Peti Perjanjian) yo peti pum deiamik ning, asukumuk binuka deibik. Apil dobik ning lak bikina ati, atalak noutam arye, dipdongobuka, wini talak babye, akeil ara, tuba Bet-Semes mutukunye, Yosua birye wa windam aubuk touk, tuba aulule.

Hakim-Hakim 18:7

Ati ara, apamubarye nang banmeka ani, Lais mutuku biyik. Biyikopura, amutuku noutam ulamik nang ati, moubuka dinmekce teninmek. Ara, ‘Se, sik Lais mutuku noutam unyak nang, sik nong ara, dipkoprob Sidon mutuku nang ulamik touk unyakba eipmabe,’ tenebik. Sikda, ilil kanye bona kumce, ‘Yuk mutuku nang mal olyanamsiyak do, yuk ikin ning nun deice upnamsil do?’ tenena pia kumce, talye mangkau kanye bobuka unyake. Tonda, ‘Sidon mutuku unyak nang dam, kum unyak bukni, sikce talyak bona ap, yuk teleb ning ap ara, aning yala-yala nirya weika arye, talibuka unyak anya arye, tonoknye babye, pia kum patalule. Tukwak mutuku noutam aubuk ning nirya ara, weika arye talinyake. Sikda ikin pia kum unyake. Sik unyak mutuku ara, Sidon mutuku atouk unyake. Mutuku sirika unyak bukni, aning-aning nirya sukulongona kumce, teleb aryuk unyake,’ tenebikce bikdeibik.

Hakim-Hakim 14:4

Atalak noutam nirya, Israel ninye ara, Pilistin yala nang arye taleamikba, sik amu tam ulamika ati, Allah arye, ‘Yata wiriptinye deice arye, lo arepnutuba, Pilistin ninye wenebuka opnamne do? Tonda, dan talak arye, Pilistin ninye malye kipnamne do,’ tenelamuk. Allah arye winibuka tenelamuk bukni, Simson el li ap, el lin ap arye, aning nirya kum tenyamdikce, kel kum bikamdik. Ara, Allah arye, ‘Simson bira akil doptue deice arye, Pilistin ninye opnamne,’ tenyamuka ara, kum bikamdik.

Hakim-Hakim 10:7

Winilamika ati, Allah Yahweh arye Israel nang ati, yu ubukba, ‘Israel nang ara, sik wenena ati, yuk mutuku yu nang arye, ikin ning sik nong deice deipnamake,’ tenebukak arye, Allah arye Israel nang dobuka, sik Pilistin mutuku nang ap, Amon mutuku nang ap, sik taruk deice deibuk. Winibukba, sik amutuku-amutuku nang arye, Israel nang ulamik mutuku nirya yanuka, obuka sirya dakikce, ikin ning weik, sik nong deice delilamik.

Hakim-Hakim 4:2

Winilamika ati ara, Allah arye aninye bobuka, Kanaan mutuku talibuka, ninye deiyok ulamuknye, el si Yabin biti arebukba, Yabin birye Israel ninye malye kibukabukce aninye talilamuk. Raja Yabin el asik ara, Hasor mutuku ulamuk. Yabin el yin talin nang, sik deiyoknye el si ara, Sisera ulamuk. El asik ara mutuku si Haroset-Hagoyim mutuku dobuka ulamuk.

Yosua 19:28

Adinibuka, otam ton Ebron mutuku ap, Rehob mutuku ap, Hamon mutuku ap, tonda Kana mutuku ap, dipdongobuka binamuka ani, weik mutuku Sidon mutuku binuka deibuk.

Yosua 11:3

Atonun, el ninye deiyoknye, Yabin birye, Kanaan mutuku otam, keting kumulban tam ulamik nang ap, Yordan mek otam, keting panalyangan tam ulamik nang ap, sik kekena ati, ninye ton wipdeibukce, nyabuk. “Anggun nirya yamunyeura, melipsumunyeba, nun nirya arye, Israel nang olbinamabe,” nyabuka morolbiyik. Ara, sik Amori yala nang ap, Het yala nang ap, Feris yala nang ap, Yebus yala nang iknapye tam ulamik nang ap ati nyabuk. Tonda, sik Hewi yala nang bukni, Hermon mutuku arye, outam ulamik nang, ara Mizpa mutuku noutam ulamik nang nirya, sik kekena ati, ninye ton wipdeibukba, laka nyabik.

Ulangan 3:9

(Weik mutuku dup Hermon mutuku atibuk, sik Sidon mutuku noutam ulamik nang ara, ‘Siryon mutuku,’ nyalamik. Tonda, sik Amori mutuku noutam ulamik nang ara, ‘Senir mutuku,’ nyalamik bukni, amutuku ara, tonok mutuku atibuk, si bitinye nyalamik.)

Ulangan 1:7

Winira amutuku batakuka, yuk mutuku si, Amori mutuku binamlume. Ati, anggun cang kain tenda aik dakmunce, bobuka bimunce, Amori yala nang talilamik mutuku tam noutamak nirya ap, sik talilamik tam dam mutuku nirya ap, angguncuk talilbinamlume. Amutuku nirya arepsinyeura, anggun mutuku koproba uk kipnamsile. Aning ara, mek kum mutuku ap, weik mutuku uamuk tam nirya ap, Yordan mek duman bukuk mutuku taram ap, anyapce otam lyu mutuku tam ap, outam mek kum mutuku, Negeb mutuku ap, dabu tam weik laut mekwen kup-kup tam ap, Kanaan yala nang tam ap, itam mutuku si, Libanon mutuku ap, Efrat mutuku ap anyapce, otam weik arye balamle mek si ara, Efrat mek duman ap, amutuku otam, atam noutam ulul mutuku nirya, bimunce, amutuku nirya talibuka unamlulume. Narye amutuku akunum arepsina atia.”

Bilangan 34:8

Tonda, Hor mutuku tam arye, dipdongobuka keting panalyangan tam mutuku si Hamat mutuku bisik ban tam, anyapce Zedad tam ap, dipdongobuka wililonak deipnamlulume.

Bilangan 13:29

“Tonda, Amalek yala ninye ara, Negeb tam unyake. Het yala ninye ap, Yebus yala ninye ap, Amori yala ninye ap, mutuku kon deice unyake. Tonda, Kanaan yala nang ara, weik laut mekwen dam arye dipdongobuka, ‘Yordan mek kup-kup unyake,’ nyabuka, yan laka nyabik.

Kejadian 49:13

Zebulon, an yala ninye ara, weik laut mekwen kup-kup binuka unamake. Weik mok piripna doplye talak ara, laut mekwen deice balamle mek lia yo ara, ‘Piripna arye opsilyak’ tenen, sik unamak mutuku wekelbikirye, tia ati yanuka unamake. Sik unamak mutuku sirya ara, Sidon mutuku dam anyapce sekropnamle.

Yosua 9:7

Nyabuka morobik bukni, sik Israel deiyok nang ap, Israel nang nirya arye, tamubuka nyabik, “Anggunda, mining dam nun unyap mutuku noutam, anyuk ululum nanguk yanamlum do? Ati, nunda yata deiyok ati, nyalin yupu nyapdanuyap do? Tonda, nun aunamap mutuku dam, yanuka umumyopura, yata deiyok ati, ‘Olana kum aryuk, teleb kibuka neika unamabeʼ tenen, nunce nyalin yupu nyapdeipdanamap do?” nyabuka, sik Hewi nang ati nyabik.

Yosua 11:19

Amutuku-amutuku nirya ulamikce, talilamik pala mutuku noutam nirya ara, tonok tam nang babye, Israel nang ati, ‘Aning ara, nun kayapu nang koprobaʼ tenen, “Teleb kibuka neika unamabe. Walana babye, pia kum unamabe,” nyabuka, nyalin yupu deice arye, kum nyalalamik bukni, Gibeon mutuku noutam ulamik nang, ara Hewi yala nang ulamik nang ara, sikda, ‘E, nun kayapu nang koproba,’ tenelamik. Bukni, yuk-yuk mutuku nirya ara, Israel ninye arye, amutuku nang olalamik talak arye, amutuku ulamik nang nirya ara, obuka sirya dakikce, sik mutuku tuku nirya dorobikce, talibuka ulamik.

Hakim-Hakim 3:2

Tuba abatakuka deiyok ara, Israel nang arye deipdanin banamak nang nirya ara, “Kanaan mutuku nang arye ninye olalbana ati wininamlume,” nyabuka, ‘Wenenamakʼ tenen, batakamuk. Ara, ‘Ninye olalbana ati, wininyake, tenena kum bikamik nang ati, wenebikiba, biknamakʼ tenen, batakamuk.

1 Samuel 6:4

Nyabikba, sik Pilistin deiyok nang arye, tuba tamubuka, “Nun malye unyap ning, kum daneibuka teleb kilina ati, nunce Allah elti, yata deken ning areptibye do” nyabuka, sik Pilistin deiyok nang arye asipdeiyik. Nyabikba, sik imam-imam nang arye, tamubuka nyabik, “Nun ap, nun pamubarye ninye deiyok nang ap, kanye imun weik suse dilamsuk touk, aning urasin atonun ubuka, dekena weik ning, emas arye puturubuka deipnamlume. Winipmunce, pamubarye weik torok atonun suse, weik tonun nelamle ning ap, tonda kub mana urasin atonun ubuka, pamubarye ap, kat ning emas arye puturubuka deipnamlume. Deiyok ara, anggun ninye deiyok kibuka, ululum nang nirya ap, anggun talye Pilistin mutuku noutam daumunye ninye ap, anggun deice, aning weik awamuka anya arye, aning urasin atonun puturubuka bobinamlume. Allah arye ikin ning, sik nong deice deibuk ning ara, suse weik tonun nelamukce, bukuka dilamuk ning ap, kub mana weik ton ap areamuk. Ati, kat ning emas arye, aning urasin atonun ubuka puturupdeimunce, Allah yukuna ati, bobinuka arepnamlume,” nyabik.

1 Samuel 6:16

Atalak ara, sik Pilistin mutuku arye yanganmek nang, sik pamubarye ninye deiyok nang arye, aning nirya akunum eibikopura, Bet-Semes mutuku batakuka, sik asum aryuk sik mutuku, Ekron mutuku uk, tamubuka biyik.

2 Samuel 24:7

Amutuku biyikopura, Yoab ap, yin talin nang, sik deiyok-deiyok nang nirya ap ara, eitam mutuku arye, dipdongobuka outam ton nukulbinmeka ani, utam Tirus mutuku noutam ton nukul biyik. Tirus weik asik dana-dana tam nirya ara, pala weik keil dobuka, taplakuka domik weik cang keil poka ton, deibuka dolamik mutuku uamuk. Amutuku arye dipdongobuka, nukda banmeka ani, sik Hewi yala nang ap, sik kanaan yala nang ap, ulamik mutuku binuka wekikce nukik. Tonda, amutuku arye dipdongobuka, outam ton nukul biyik. Ara, pia outam nukulbinmeka ani, mitik tonun arye, keting yangan tam arye domik weik asik, Bersyeba mutuku ton nukul biyik. Ara, pia utam nukulbinmeka ani, mutuku si Yehuda mutuku tamuk nukul biyik.

1 Raja-Raja 8:65

Ati ara, Raja Salomo ap, sik Israel ninye nirya ap, ninye kum nukmanto, pia weik arye bulubukabikce, weik kwalina yubuka Allah ati si erenmekce, Allah el si eren aik bisik bublan kukik. ‘Wininamap’ tenen, yanmek nang ara pia weik. Ara, Hamat mutuku bana ati deiyok koubuka balamikak arye, anerye dukdongobuka otam nirya, Mesir mutuku weik mek balamukak arye bulubuka yanmek. Amutuku-amutuku nang nirya arye, like empat belas (14) sum deice arye, kwalina kwalinmekce, Allah el si Yahweh ati si erenmek.

Yehezkiel 47:20

Anyapce, keting komulban tam wililonak ara, Laut Tengah mekwen deiamukak aryuk kintinipmunce, anyapce dabu tam (arah utara) dipdongobuka binamunya ani, arah utara tonok mutuku tam ara, Hamat mutuku bisik wekelbalamak tam bukni, keting komulban tam teleb tam binuka deipnamlume. Asukumuk aupnamle.

1 Raja-Raja 9:20

Anoutam talak ara, Salomo el pil dona ati, ikin weik pil dilamukba, anyasik-anyasik pil dolamik talak ara, weik asik ulamik ninye, Israel yala kum ninye ara, sik si ara ani. Ara, Amori yala ninye ap, Het yala ninye ap, Feris yala ninye ap, Hewi yala ninye ap, Yebus yala ninye ap, amutuku noutam tuba talye daulamik.