Hakim-Hakim 2:2 - Eipomek

² “Aning atonun, anggunce na yupu batakmunce, Kanaan mutuku talibuka unyak ninye ati, ‘Nun ap, sik ap olana kum diparyuk, teleb kanye bobuka neika unamabe,’ nyabuka, nyalin yupu kum nyapnamlulume. Anggun Israel nang ap, amalye nang ap, neika kum unamlulume. Sik amutuku talibikce, si erenyak isa ati, keil pala yangabuka delilamak ap, sik isa aik ap nirya ara, anggunce uluplopnamlulume. ‘Aning nirya ara, nunce neika wininmabe,’ nyabuka nyapdanamupu bukni, na yupu moubuka kekebuka kum dobolbalulume. Aning yaniptaplumce amutuku ninye malye wininyak ning ara tuba aupmale. Yata deiyok ati, na yupu kum kekebuka dobolbalulum do?”

Hakim-Hakim 2:2 Referans Kwoze

Yeremia 2:36

Malye uk ulalum bukni, anggun adiparyuk, ‘Kume, nun malye ulamupu ning nirya ara, dipkoprob bataknamabe,’ nyalulum bukni, talye si bam bol deice aryuk ayupu nyaltakalulume. Kanam aryuk tilila yupu nyaltakalulume. Ati ara, anggun minop talak Asyur mutuku nang arye, anggun Israel yala ninye olamsik touk, aminyan talak ara, sik Mesir mutuku unyak ninye arye, anggun wenena ati, malye kibuka opsikirye, opnamsiyake.

Yeremia 2:5

Allah el si Yahweh arye anyapdeipmasile. Sik apu yapu arye na Allah dam malye ulamik ning ara, yata deiyok ati do? Tonda, narye yata ning malye winipseba, sik apu yapu arye na bataknik do? Na bataknikce, sik malye ulamik ning ara ani. Sikce, ‘Nun ni koprop unamsil’ tenen, ulamik ning ara, nong una kum ning atibuk talye, ‘Nun ni koprop unamsil’ tenen, ‘Nun deiyok isa ara anye,’ nyabuka, el aisa si erelamik. Winilamika deice arye, sik bidamnye nong uk malye ulilamik.

Yeremia 2:18

‘Mesir mutuku nang arye melibuka lyepsiting’ tenen, ‘Mesir mutuku binamabe,’ tenepluma ara, nong teleb ning ton dopropnamluma ati binamlum do? Tonda, ‘Nil mek kwebuka dinamap’ tenen, binamlum do? Tonda aning atonun, ‘Asyur mutuku ninye sik dam bitibirye, moroptibyeba, telebe tenepsitingopura, sik Asyur mutuku nang arye melibuka lyepsiting’ tenen, anggun amutuku binamlum do? Asyur mutuku noutamak balamle mek, ‘Efrat mek kwebuka diptibye’ tenen, sik mutuku binamlum do? Mesir mutuku ap, Asyur mutuku ap, binuka moroptuma babye, ara nong teleb ning ton kum dopropnamluma ati nyapsine. Amutuku ninye arye, kum melipsitinge.

Hakim-Hakim 2:20

Winilamika ati, Allah el yu weik ubukba, sik Israel ninye ati nyabuk. “Anggun malye winimunya ati wenepnamsine. Ara, minop talak narye, anggun apu yapu ati, ‘Na ap neika teleb dem unamap’ tenen, ‘Winipnamlulume, aning ara kum winipnamlulume,’ nyapdeiamse yupu, kekebuka kum dobolbalulume. Tonda, anggun akunum bataknulumce, na yupu ton kum kekepnuluma ati, wenepnamsine.

Ulangan 7:16

Musa birye, Israel ninye ati ayupu ton nyabuk. Ura, Allah arye anggunti, el mikip anggun deice deipsiliba, anggun binuka unamlum mutuku, yuk mutuku nang olbinumunyopura, aninye nirya obukapmunce, sirya daknamlulume. Amutuku ninye ati, bico tenebuka, batakna kume. Tonda, sik Isa Mutuku Dongonye si erenyak ning nirya ara, ilil tenena meme. Aning si kum erenamlulume. Winipmunyopura, wena tapu youlamle touk youpnamsila atia.

Keluaran 32:21

Atalak ara, Musa birye Harun biti nyabuk. “Aning ara, sikce yata ning ton wiripmakiyak ati do? Yata wiripmakiyaka deice ati, ance sikti, malye kilinmalam do? Ance anang bobuka yanamlum diparyuk, pia malye wininmalam ning ara, weik mambule. Aning ara, pia ikin weik, malye ulin ning sik nong deice deipmalam ara, yata deiyok ati winipmalam do?” Musa birye Harun biti nyabuk.

Kejadian 4:10

Nyabuka pilibukba, Allah el si Yahweh arye, nyabuk. “Se, anda yata winipmamu do? Kekelyame! An weit koproba, el ining tuku deice sakmoa arye, ngalukunmalba kekepne.

1 Peterus 4:17

Allah arye ninye mutuku sirya im sirya nirya ati, yupu yuk-yuk bokeiplirye, wenepnamla ara, el mapu kan-kan arye deiyok koupnamla anya arye, ikin ning anggun nong deice deipsikce talak ara, kanye deibuka, Allah el siuk erenamlulume. Tonda, el mapu kan-kan arye deiyok koupsilyeura, mitik ikin usilye bukni, aminyan daknamle talak ara, diba tenena kum arye, Allah el laka teleb yupu ati, yaniltanyak ninye ati ara, yupu bokeiplirye, wenepnamle ning ara, weik mambule. Sik pia ikin weik unamake.

2 Tesalonika 1:8

Tonda, ayanamle talak ara, yata ninye do nirya, ‘Allah ara nun like’ tenen, dib tenena kum arye, Allah el ap, nun Deiyoknye Yesus ati, el laka teleb yupu, ninye lyena yupu ap ati, batakuka yaninyak ninye nirya ara, weik arye wenebuka, sik nong deice weik ikin ning deipnamle.

Hakim-Hakim 6:8

Morolamikba, Allah el si Yahweh arye Israel nang sik noutamak arye, ‘Na yupu laka nyananye unamle’ tenen, wipdeiamukce dopkdeibukba, Israel ninye sik dam biyukce, ayupu nyabuk. Anggun Israel nang ati kalikuka melisulul Allah, el si ara Yahweh, elce anggunti nyapsile. “Anggunda Mesir mutuku nang arye anggunti, arena kum diparyuk, tapu koubuka pil dilamsik bukni, ikin kanye weik bobuka ulalum talak noutamak arye lyepromsise.

Kejadian 12:18

Uk dinmokba, Firaun birye, Abram yukubukba, yayuk. Yayukura, Firaun birye, nyabuk. “Anda yata ikin ning na nong deice deipmanilan do? Yata deiyok ati, kunusa dopmanumurye, ‘Akil ara, na dopse kil,’ nyabuka lak kum nyapnulum do?

Yosua 9:7

Nyabuka morobik bukni, sik Israel deiyok nang ap, Israel nang nirya arye, tamubuka nyabik, “Anggunda, mining dam nun unyap mutuku noutam, anyuk ululum nanguk yanamlum do? Ati, nunda yata deiyok ati, nyalin yupu nyapdanuyap do? Tonda, nun aunamap mutuku dam, yanuka umumyopura, yata deiyok ati, ‘Olana kum aryuk, teleb kibuka neika unamabeʼ tenen, nunce nyalin yupu nyapdeipdanamap do?” nyabuka, sik Hewi nang ati nyabik.

Hakim-Hakim 6:10

“Atalak ara, narye anggunti nyalilamsise. ‘Nara Yahweh, anggun ni koproba Allah unune. Ati, anggun unamlum mutuku, Amori ninye talibuka unyak mutuku noutamak unamlum bukni, isa si erenyak ning ara, anggun babye aisa si kum erenamlulume,’ nyabuka nyalamsise. Winibuka nyalamsise bukni, anggunda na yupu kum kekelamnulume. Ati, narye arepsiba, sik Midian tam ninye arye, anggun Israel nang ati, tuba tamubuka tonap malya kipsikirye, talinamsiyake,” Allah arye nyabuk. Allah arye el nabinye biti laka nyabukba, anabinye arye, Israel ninye ati nyabuk.

Hakim-Hakim 8:27

Gideon birye nyapdeibukba, adoprobuk dekna weik ning emas arye, urasin pia teleb baju ton wibuka kintinip deibikba doprobuk. Ara, Allah ap, ninye ap ansinilina deiyok nang, sik weik deiyoknye, el taram deice ongalamuk baju urasin atonun ning, emas dobukabukce kintinibuka memebik. Aongon aling si ara, efod nyalamik. Gideon bira, el mutuku koproba Ofra mutuku dam aning efod deiamuk ani, aminyan talak, sik Israel nang nirya arye aning dam bena arye, si erelamik. Winilamik ning ara, pia malye-malye weik winilamik. Ara, Allah ati dib kum tenelamikce, Gideon birye emas arye kintinibuka memamuk ning ati, aninye nirya ara, si erelamik. Tonda, aning talibuka kaliklamik nang ati, ‘Nun yata winipnamap do?’ tenen, asilyangalamikba, anang arye aning efod dipdena arye, adeice arye lak len yupu arelamik. Winilamik ning nirya ara pia malye. Winilamika deice arye, Gideon ap, el kilapu ap, el mapu nirya ap ara, wena youlamle atonun winibuk. Aning ara, pia malye weik ulamik.