Habakuk 1:13 - Eipomek

¹³ Wininalam bukni, na nio, anda malye winin ning ayala-yala nirya ap, malye unyak nang ap ara, kanye deibuka kum elilyame. Anda, pia Teleb koprop, uk ubuka, pung ulyamnye binya arye, an pia teleb asing arye, malye ning ati, kanye deibuka kum elilyame. Aning atonun, malye wininyak nang ara, ance aninye eibuka, ‘Dauplye’ tenen, kum batakalongolyame. Na nio, anyapman touk ulyamnye bukni, yata deiyok ati, wini talak ara, anda malye wininyak nang, sik Kasdim nang ati, kum wenepmalam do? Tuba dinmasemince, bico tenesilyam bukni, yata deiyok ati, sik malye wininyak nang, Kasdim yala nang arye, nun Israel ninye teleb ubuka unyap nang ati, olyanganamsiak do? Habakuk birye Allah ati, malye nyabuka morobuk.

Habakuk 1:13 Referans Kwoze

Mazmur 50:3

Nun ni Allah ara, talye tunim abuka, kum ulirye, talye panabuka yangalule. Elce yalye talak nirya ara, weik uku buk dilule. Tonda, el yalye talak ara, weik mikip kum ap, mok cena ap, weik dua ap, yalyebuk, elda aminyan tam yangalule.

Mazmur 10:15

Na nio, anti moropkiabe. ‘Sik mikip dobuka, pia yu weik unyak nang ati, sik mikip unyaka ara, ance kum kipdeipnamlame!’ tenen, moropkiabe. Tonda, ance sikti, ‘Sik pia malye wininyak ning ara, yata wirinmak do?’ tenen, moubuka dipdemince, aning nirya eipmince, wenepnalam’ tenen, moropkiabe na nio.

2 Samuel 4:11

Ati ara, ninye malye winibikceura, sik wenena ati, yuk nang arye, kwang dakalana ati obicopura, ara mitik mambul. Bukni, deiyok kum upmalyebuk, sikda yu upsukura, teleb ulamoknye ati, opmaruma ara, weik mambul, pia malye upmarume. Anggunto nang ati ara, weik kanye imun ikin ning, anggun ninye malye winipmarum nang deice deipnune. Ara, Abnar bira, el malye una babye, kume. Elda telebnye bukni, mangkau arye, el aik pum tam tuba mapmokba, anggun yu upsukba, anggunce el aik wekuka, opduma ati nyapsine. Aning ati ara, wini talak awinipmarum ning ati, narye ikin ning delina ara, anggun deiceuk deipnusine. Abnar opmarumba, el ining sakuka dekna ati ara, anggun dekena ning arena ati, narye nyapdeipnyeura, na tam nang arye, anggun bitinye ati, nong opsikirye, amutuku noutam arye kum kibuka, deipnamasiyake.” Raja Daud birye, sik Rekhab ap, Baana ap ati, nyabuk.

Rasul 2:23

Ura, minop talak Allah arye, ‘Sikce Yesus ati winipnamake,’ akunum tenyamuk ati, min kum winipmok talak ara, el akunum tenyamukce, kel bikamuka anya arye, ‘Yuk nang arye, Yesus dobuka, sikce opnamak’ tenen, malye nang arye, Yesus dobuka anggunti arepsike. Aripsikura, sik yuk pia malye ulamik nang meilyamika arye, Yesus dobuka, wanwanun yo deice deibikce, paku dakuka, Yesus obikura, dibuke.

Yesaya 64:12

Nun malye winilamupu ning wenena ati, ance nyapdeiamlumba, yuk nang arye, aning-aning nirya akunum malye winililamsik bukni, nun ni Allah Yahweh, ance aning nirya elisiyam bukni, talye batakalongosilyam do? Talye mangkau asa umince, wenen ikin ninguk nun deice deipsiminba, tuba imun kanye uk bobuka unamap do? Nabi Yesaya birye Allah ati nyabuk.

Yesaya 33:1

Allah arye nyapdeibukba, nabi Yesaya birye sekeibuk. Se, nun mal olan nang, sik Asyur mutuku ninye arye, sik yuk mutuku unyak ninye ati, sik mutuku dakuka uku sice kiploplum bukni, yuk mutuku ninye arye, anggun talilulum ning nirya babye, dakuka kum uku sice kiplopsulume. Anggunce, yuk mutuku ninye sik nong deice, pirilen ning delilulum bukni, yuk mutuku ninye arye sik Asyur mutuku ninye nong deice pirilen ning kum delinyake. Ati ara, wini talak anggunce ‘Naʼ tenen, ninye ati, sik mutuku ulubuka uku sice kiploplum bukni, aning winibuka akunum sirya dakmunyopura, aminyan talak, yuk mutuku ninye arye, anggun talilulum ning nirya babye atonun, ulubuka uku sice kiplopnamsiake. Tonda, anggunce, yuk mutuku ninye, sik nong deice, pirilen ning delilulum bukni, aning winibuka akunum sirya dakmunyopura, aminyan talak yuk mutuku ninye arye, anggun Asyur mutuku ninye ati, anggun nong deice pirilen ning delinamsiake.

Yesaya 21:2

Na Yesaya lengdar mana deice arye eipse ning ara, na ilil upnuke. Alengdar mapsa deice eipse ning ara, yuk mutuku yu nang arye, Babel mutuku nang ara dobuka, sik mal olan nang deice deipnamaka ati eipse. Ton nang arye, yuk nang ati, tenebuka arye tilila yupu nyalamik touk, atalak ara, tuba tenen arye tilila yupu nyanamake. Alengdar mapsa ning ara, ton tam nang arye, yuk mutuku nang ati, sik bona nirya ara, ubula dolamik touk, atalak babye yakirye, ton mutuku nang talinyak bona nirya alubuka dopropnamake. Aning nirya ara, wininmokak eipse. Tonda, Elam amutuku ara yin nang yakirye, Babel mutuku nang olyanamake. Tonda Madai amutuku yin nang yakirye, Babel mutuku nang yanuka, warikuka opnamake. Ara, Babel mutuku nang arye, yuk mutuku nang nirya, ikin ning sik nong deice delilyeba, kanye ikin ulamuka ati, Allah arye Babel nang ati, sik mitang kipdeipnamle.

Mazmur 83:1

Asap birye, aMazmur mot yupu sekuk. Asap birye nyabuk yupu ara, ani.

Mazmur 73:3

Winilamsa deiyok ara, ani. Narye, sik kanye talima erebuka, kwalinauk unyak ninye, pil dobuka, dolon ning weika dolokirye, kanye deibuka telebuk unyakba, elinunce, ‘Se, sik anang ara, kanam asa uk unyak bukni, nara yata deiyok ati, ikin asa uk unun do?’ tenelamsa deice arye, yu upnukce, na dib tenepse ning, walwalapmanto upnuke.

Mazmur 50:21

Anggunce amalye-malye winin ning ara, talye lubakibuka winilulum talak ara, narye sikti, wenen yupu tonap tabakuka kum nyapsise. Anggunce nati utenenululume. ‘Kume, Allah ara, nun winilamap atonun ning ap, nun tenenyap atonun ning tenelulnye ulula ati, kum wenepnamsile,’ tenenululume. Winibuka tenenululum bukni, wini talak ara, narye weik wenepnamsine. Tonda, anggunce malye weik winilulum ning ati, akunum lakak aryuk, laka nyapmasine.

Mazmur 35:22

Ati ara, aning-aning nirya ara, Allah Yahweh ance akunum eililyama ati, yupu nyana kumce, talye tunim abuka, kum wininamlyame na nio. Nara pia ikin weik unulula ara, an akunum bikilyama ati, ‘Anda pera sukum kum unalyame, bukni, na dam yamince, melibuka lyepnamnilam’ tenen, moropkine na nio.

Ayub 15:15

Na kanye ara ani. Ara, Allah arye amu tam bukni, im deice el pil don nang, sik malaikat ati, ‘Sik nirya ara, pia dipkoprob, teleb piluk donyaka,’ diba kum tenelule. Tonda, im deice ulye ning nirya ati ara, Allah arye, ‘Aning nirya ara, malye winina pia kumce, dipkoprob pia telebuk ulula ati, na dam yangana telebe,’ kum tenesilul.

Ester 4:14

Nyabukce, ayupu tonap dukdongobuka nyabuk. “Ance yupu nyana kum, talye dingbu abuka uminyopura, nun ni Allah arye, Yahudi yala ninye lyena ati, yuk nang deice arye lyena ning arepnamsile. Bukni, Persia mutuku ninye arye an ap, an ni koproba ap, el mapsilip nirya ap ara, oplobikirye, sirya daknamake. Bukni, moubuka teneipdelyame. Nun walwal bukni, anda ninye deiyoknye, el Ratu kil akunum ulyame. Aunmalama deiyok ara, Yahudi yala ninye ikin bobuka weika arye unmak talak, sik lyena ati aunmalam do, kum do? Ati, ‘Ance yata wiribuka uptuma deice arye, Yahudi yala ninye nirya lyeptum do?’ tenen, nyapkine. Bukni, na nyapmakin touk kum umince, batakminyopura, an ap, nun Yahudi yala ninye nirya ap, oplopnamsiake.” Mordekai birye Ester biti nyabuk.

1 Raja-Raja 2:32

Nyabukce, ayupu ton dukdongobuka nyabuk. “Anda Yoab opminya deice arye, Allah Yahweh arye, Yoab malye ubuk ning ara, kwang dakna ati, aning dobuka, Yoab el nong deiceuk tamubuka deipnamle. Allah Yahweh arye, Yoab el yuk wenepnamle ara, na ni koproba Daud, el min kel bikmokbuk, ninye bitinye nang, malye kum upmarikbuk, Yoab birye anang bitinye omuka atia. Ara, Abnar Israel mutuku yin talen nang, sik yupa ulamika deiyok kiamuknye ap, tonda Yehuda mutuku ulamik yin talen nang, sik yupa nirya ati, deiyok kiamuknye Amza ap, Yoab birye omuka atia. Sik abitinye nang ara, malye una kum buk omuk. Bukni, Yoab el tonok ara, malye weik ulamukbuk, sik malye kum wamdirikce, telebuk ulamdik nang omuke.

Ayub 21:7

Tonda, aning tenenune. ‘Se, Allah arye yata deiyok ati, sik pia malye-malyeuk unyak nang ara, kam una ati lo tonap tabakuka tuba arelulba, wisi delinyak do? Tonda yata deiyok ati, sik malye un nang, mikip weik nang kipnin bakirye, sik bona ara weik arelulba, bona weik talin nang unyak do?

Mazmur 18:26

Sik yuk nang nirya, sikce anda Allah ati, batakna kumce, pia tuba diba tenebuka dobolbakinyak nang ati, ance tamubuka sikti, pia kum batakalyame. Tonda, malye winin ning tonok babye kum ukirye, diksukumuk wininyak nang ara, Allah ance tamubuka diksukum kililyame.

Mazmur 25:3

Bukni, na kele, yatanye birye do nirya, ninye arye anti, diba tenepkikirye, ‘Allah elcuk melibuka lyepnamnil’ tenen, an si deice moropkikcopura, an adiparyuk dipkoprob melibuka lyelonamsilyame. Bukni, yata nang do nirya, deiyok kum upmalibuk, tilila yupu deice arye, talye-talye nyapkikce nang ara, ance anang wenepminba, sik anang nirya ara, alye dakanamake.

Mazmur 35:17

Se na ni Allah, anda aning-aning nirya talimince, mikip weik deiyoknye ulyama ati, yata talak arye, anang wininyak ning ati, talye ton diltaknauk unamlam do? Ati na nio, ayu nang arye, ikin weik ning, na nong deice deipnikirye, malye weik winilininyaka ati, ‘An Allah arye, na dam tamubuka yamince, lyepnamnilam’ tenen, moropkine. Winipmanto ara, bai tam ulamle yu weik pus, el si ara singa, ayu kus arye, na obuka dipnutu atonun, sik yu nang arye atonun, winininyaka ati, ancuk, na dam yanuka, lyepdopnilyame na nio!

Mazmur 35:25

Ayu nang arye, “E, akunuma, ‘Anye optibye,’ tenen, patapsuk touk, wini talak akunum winipmaba ara atia,” ‘Nyapdacak’ tenen, na ni Allah ance, sik yupu sekenalame. Winipminyopura, ayupu pia kum nyapdatinge. Atonun ton, ‘Sik yu nang arye, malye yupu nyapsicak’ tenen, Allah ance yupu sekmince, anang ati opnalame. Sikce nyasinyak yupu ara, ani. “E, anye akunum obuburye, sice buklobupe. Winipmanto ara, ninye arye din ning dobuka dibikiba, adin ning kum danalamle touk, nunce anye akunum kum kipdeibupe,” nyabuka, ‘Kanye deibuka nyapsicak’ tenen ati, na ni ancuk anang nirya obuka, sirya daknalame.

Yesaya 24:16

Mutuku sirya, im sirya tam arye, Allah el pia teleb ulul ning ap, mikip pil dolul ning ap ati, yuk-yuk mutuku nang arye, el si sibuka erebikceura, nun Yudea mutuku noutam unyabuk, Allah elce talibuka usulul Israel nang arye kekenamabe. Allah ara, malye un ning tonok ning babye kum ulirye, pia Teleb Diksukum Ulinye ulula ati, dopera mutuku nang arye, el si erenamake. Winipnamak bukni, na Yesaya bira, weik ikin kanye bopnirye, ngalukuka tuba engenamne. Malye kanye bobuka engenamabe, bol malye bopnamnarya! Ara talye ati kume. Deiyok ara, anggun tenena arye tilila yupu nyakirye, yuk nang ati malye weik nyabuka uanyake. Dipkoprob, sik malye unyak nang arye, tuba-tuba tilila yupu nyabica deice arye, yukupdobikcak arye, yuk nang ati malyeuk kilinyake.

Ratapan 3:36

Tonda, nunce malye kum winipmabye bukni, yuk nang arye, tilila yupu nyabikca deice arye, sik yupu lipsisikuka nyanyak deiyok nang kekebikirye, deiyok kum upmalibuk, nunti wenen ning ara, deipsikceura, nun ni Allah Yahweh arye, aning eibuka akunum bikisulule.

Habakuk 1:14

Nyabukce, ayupu ton dukdongobuka nyabuk. “Na ni Allah, na kanye aryuk tenepmana ara, nyapnune. Ara, ance ninye ati ara, mek pum tam ulul ning, mekwen pum ikan atonun ulisilyame. Nun kele, laut mekwen pum bisik kam ulul ning, ayala-yala nirya ara, sik ninye deiyoknye atonun ning kum ulule. Sik talye balsusunauk unyake.

Zakaria 8:17

Tonda, anggun ap, anggun kayapu koproba ap ati, yu kanye bobuka, anggun kanye talima pum tam ara, ‘Anang ati, malye winipnamabe, anang opnamabe,’ pia kum tenenamlume. Aning atouk, anggun kwitcapu ati, talye yupu deice, ‘Dipkoprob wininamne,’ nyabuka, na tenebuka tilila yupu kum nyalinamlume. Anyapmasin ning ara, talye ati kum nyapmasine. Deiyok ara, ani. Na Allah Yahweh arye, anggunce malye tenelana ap, malye ulana ap, anggunce anggun kwitcapu ati, mikip arye nyalalulum ning ap, ura diksukum kum ulamlum ning ap nirya ara, narye pia lik tenenune. Amalye winin ning nirya ara, na lik ati, aning nirya bataknamlume. Allah arye nyabuk.

Ulangan 23:15

Ninye tonoknye ton, el aik melibuka, pil dona ati uang arye, yuknye dekukaplirye, yanuka deiamliba, el aik pil dolamlya ani, lik upliba, ‘Na likʼ tenen, batakuka bilyopura, anye birye, sik yuk nang dam yaliba, sikce, “Na melipnutum do?” nyaplirye, yanuka moropsilyopura, anggunce anye biti, ‘Na dam yangana kume. An deiyoknye damuk, tamubuka binamlyame,’ kum nyapnamlume. Anggun adiparyuk, anye biti melinamlume.

Ayub 24:23

Anang sikce, ‘Nun tuba teleb kibuka unamapʼ tenena deiyok ning ara, Allah arye tia ati arelul bukni, elce, ‘Amalye wininyak nang ara, yata wininamak do? Teleb ninguk wininamak do, malye ninguk wininamak do?’ tenen, anang nirya ati, tuba-tuba kalikuka dinauk ulule.